LUKA 21

Ifunyo ja muka mkiwa

(Mk. 12.41-44)

1Nao Jesu ukizighana ukawona wandu wiko na mali wikikumba mafunyo ghawo isandukunyi ja mali ra Hekalu; 2ukammbona muka mkiwa ukikumba pesa iwi ra shaba. 3Nao ukaghamba, “Namghoria loli, uhu muka mkiwa wakumba nyingi kuchumba wose; 4angu awo waakumba kufumanya na wungi ghwa mali rawo, ela uo, kwa wukiwa ghwake, wakumba rose uko naro.”

Jesu kughora aighu ya kunoneka kwa Hekalu

(Mat. 24.1-2; Mk. 13.1-2)

5Nao wanughi wamu wikawoka kuja malagho aighu ya Hekalu, seji ipambilo na magho ghiboie, na manosi ghifunyiro kwa Mlungu. Jesu ukaghamba, 6“Agha ghose mughiwonagha, ngelo ichacha msechaawona igho jingi aighu ya mmbao, jisechaaghushwa andoenyi anduangi.”

Wasi na matiriro

(Mat. 24.3-14; Mk. 13.3-13)

7Nao wikamkotia, “Mwalimu, maza iri richakaia lii? Na alama yaro ewonyera maza iro kucha ni iao?” 8Jesu ukawitumbulia, “Mkulindie msechelaghashwa, angu wandu wengi wichacha wikitumia irina japo na kughamba, ‘Ini nuo moni!’ na ‘Ngelo yavika!’ Msakewinugha. 9Msakeobua iji mwasikira malagho gha wuda na nganyi angu maza iro suti rizoe riche, ela kuja kutua ndekulighisire kande anduangi.”

10Nao ukachuria kughora, “Masanga ghichalwa gheni na gheni, na mawuzuri gheni na gheni; 11kuchakaia na misughusiko mibaa ndoenyi, njala na saka rizamie andu kuzima kuzima, kuchakaia na maza mbaa reobosha riwonekagha mawingunyi. 12Ela imbiri ya maza iri rose kuwoneka, wichammbwada inyo na kumtirira, wichamghenja mandunyi ya sunagogi, wipate kumngira kifungonyi, mchaghenjwa imbiri ya wazuri na awo wibonyagha nguma, kwa wundu ghwa irina japo. 13Ihi ichakaia ni ngelo enyu efunya wushuhuda. 14Kaienyi mmange ngolonyi konyu msecheja wasi, wei mchatumbulia wada;#Lk. 12.11-12 15angu ini nichamneka malagho na hikima, hata mndungi usechaadima kumtangala anduangi. 16Mchafunywa hata ni wavi wenyu, wanyinyu, wandu wa kichuku, na waghenyi wenyu, na wamu wenyu mchabwaghwa. 17Wandu wose wichazamilwa ni inyo kwa wundu ghwa irina japo. 18Ela hata iridia jimweri ja chongonyi konyu, ndejichaatota anduangi. 19Kwa kurumaghia konyu, mchakira marangi ghenyu.

Jesu kughora aighu ya kunonwa kwa Jerusalemu

(Mat. 24.15-21; Mk. 13.14-19)

20“Iji mwawona Jerusalemu yamarwa ni majeshi, aho mmanye angu kunoneka kwaro kwalighisa. 21Aho, awo wiko Judea ndewikimbirie mighondinyi, na awo wiko andenyi ya muzi wifume, na awo wiko shighadi ya muzi wisakengia. 22Angu agho ghichakaia ni ‘Matuku Ghekabwa,’ kukatisha agho ghose ghiandikilo.#Hos. 9.7 23Si wasi ugho kwa awo wiko na vifu na awo wiongoshagha matuku agho! Angu kuchakaia na matiriro mabaa isangenyi, na machu gha Mlungu ghichakaia aighu ya wandu awa. 24Wandu wamu wichabwaghwa kwa lufu, na wazima wichadwalwa wunyika kwa masanga ghose; na Jerusalemu ichawadilwa-wadilwa ni wandu wa mbari zima hata ngelo ya wandu wa mbari zima yakatia.

Kucha kwake Mwana wa Mdamu

(Mat. 24.29-31; Mk. 13.24-27)

25“Kuchakaia na alama andenyi ya iruwa, mori na nyerinyeri, na ndoenyi mbari richakaia na wasi na kukambwa ni chongo, kwa wundu ghwa mirurumo ya bahari na mivo-mivo yaro.#Isa. 13.10; Eze. 32.7; Joe. 2.31; Wuf. 6.12-13 26Wandu wichazimia kwa wowa, wikiweseria icho chichaaghupata wurumwengu, kwa kukaia ndighi ra mlungunyi richasukwa-sukwa. 27Niko aho wichaammbona Mwana wa Mdamu ukicha andenyi ya iwingu uko nandighi na wubaa mungi.#Dan. 7.13; Wuf. 1.7 28Maza iri rikazoya kuwoneka, mkaie kimusi na kuwusira vongo venyu noko ighu, angu kukombolwa konyu kwavika kaavui.”

Ifundisho kwa mtini

(Mat. 24.32-35; Mk. 13.28-31)

29Nao ukawighoria mfwano; “Zighanenyi mtini, na midi mizima wori. 30Iji mwawona longe lwaro lukifunya malemba makoo, mwadamanya angu sumesu yalighisa. 31Woruwo koni, iji mwawona maza iri rikikaia, manyenyi angu Wuzuri ghwa Mlungu ghoko kaavui. 32Namghoria loli, kivalwa ichi ndechichaaida anduangi, maza iri rose risebonyekie. 33Mlungunyi na ndoenyi kuchaida, ela madedo ghapo ndeghichaaida anduangi.

Kucheresha

34“Mkulindie, ngolo renyu risechechulwa ni lwafuo, kuwongia, na maza ra irangi iji; Ituku ijo jichemchea ghafla msemanyagha. 35Angu jichawichea wandu wose wiko ndoenyi sa mdegho. 36Ela chereshenyi ngelo rose mkilomba, mpate kukaia nandighi rekia maza iri rose richagha, sena mdime kukaia kimusi imbiri ya Mwana wa Mdamu.”

37Na kula ituku, Jesu orekoghe ukifundisha Hekalunyi, ela nakio orekoghe ukifuma kwendalala aighu ya Mghondi ghwa Mizeituni. 38Nakesho kio wandu wose werekoghe wikicha kumsikiria.

Currently Selected:

LUKA 21: TAITA

Highlight

Copy