LUKA 20

Ikoto aighu ya nguma ya Jesu

(Mat. 21.23-27; Mk. 11.27-33)

1Ituku jimu, iji Jesu orekoghe ukifundisha Hekalunyi, na kuchila ijo Ilagho Jiboie, wakohani wabaa, walimu wa Sharia, na waghosi, wikamchea; 2wikamzera, “Dighorie, kwawuyabonya maza iri kwa ngumaki; angu nani orekunekieghe iyo nguma?” 3Jesu ukawitumbulia, “Na ini wori nichamkotia ikoto munighorie, 4welee, nguma ya Johane ebaputiza edefuma kwa Mlungu angu kwa wadamu?” 5Nao wikatumbuliana weni na weni wikighamba, “Dikaghamba, ‘Edefuma kwa Mlungu,’ uchaghora, ‘Kwaki sena mseremrumiriagha?’ 6Sena dikaghamba, ‘Edefuma kwa wadamu,’ wandu wose wichadilasa na magho, angu weremrumirieghe Johane kukaia mlodi.” 7Niko wikatumbulia, “Ndedimanyire andu erefumieghe anduangi.” 8Nao Jesu ukawizera, “Na ini wori simghoriagha ni kwa ngumaki niribonyagha maza iri anduangi.”

Mfwano ghwa mbuwa ya mizabibu na walimi wepangisha

(Mat. 21.33-46; Mk. 12.1-12)

9Niko Jesu ukawighoria wandu mfwano ughu: “Korekoghe na mundu umu orewaeghe mbuwa ya mizabibu, ukaipangisha walimi, ukadamba noko cha isanga ja kula kwa ngelo ndacha.#Isa. 5.1 10Ngelo ekuwida zabibu iendavika, ukamduma mdumiki wake umu uneko matunda ghamu gha mbuwa ya mizabibu. Ela waja walimi wipangie, wikamkaba uja mdumiki na kummbunja usedwae kindo chingi. 11Ukaduma umu sena, nao moni wikamkaba na kum'bonya kiwiwi loli-loli, wikammbunja mikonu miduu. 12Nao ukaduma umu wa kadadu, na awo walimi wikamshoghonua na kumkumba shighadi. 13Niko uja bwana wa mbuwa ya mizabibu ukaghamba, ‘Nibonya wada? Nichamduma mwana wapo mkundwa, kewada uo wichamneka ishima.’ 14Ela iji awo walimi wammbona, wikazerana weni na weni, ‘Uhu nuo mundu wa ifwa; nndokonyi dim'bwaghe ifwa jipate kuwuya jedu.’ 15Niko wikamkumba shighadi ya mbuwa ya mizabibu wikam'bwagha.”

“Idana uja mundu wa mbuwa uchawibonya wada waja walimi? 16Uchacha na kuwitotesha, na mbuwa ya mizabibu uchaipangisha walimi wazima.” Nao iji wasikira agho wikaghamba, “Huwo mbai!” 17Nao Jesu ukawizighana na kughamba, “Da sena agha maandiko kutambua kwaro ni wada?

‘Igho werejileghieghe waaghi,

nijo jeni jawuya ibaa ja mbembenyi.’#Zab. 118.22

18Uo ose ughwagha aighu ya igho ijo, uchachika-chika;

na uhu jichaamghuya, jichamfasha putu.”

Ikoto aighu ya kulipa kodi

(Mat. 22.15-22; Mk. 12.13-17)

19Walimu wa Sharia na wakohani wabaa weremanyireghe angu Jesu oreghorieghe mfwano ugho kwa wundu ghwawo, wikakunda kummbwada ija ngelo cheni, ela werewiobueghe wandu. 20Kwa huwu wikakaia wikilola ngelo ifwane, wikammbikia washeki wemzighanira, wikubonyagha weni kukaia waloli kwa Jesu, wipate ilagho jingi kwake jemshitakia kwa wabaa wa serikali. 21Nao awo washeki wikamzera, “Mwalimu, dakumanya kwadaghora na kufundisha kwa hachi, hata ndekutalagha mndungi, ela kwadafundisha chia ya Mlungu kwa loli. 22Idana dighorie, ni hachi isi dilipe kodi kwa Kaisari anguwada?”

23Jesu ukaghutambua mdegho ghwawo ukawizera, 24“Niwonyerenyi pesa. Welee, maandiko agha na fwana ihi ni vani?” Wikatumbulia, “Ni va Kaisari.” 25Jesu ukawizera, “Kwa huwu mlipenyi Kaisari vilambo va Kaisari, na Mlungu vilambo va Mlungu.” 26Hata ndeweredimieghe kummbwada kwa malagho ghake imbiri ya wandu anduangi, ela wikanyama kima wikishinikia agho matumbulio ghake.

Ikoto aighu ya kuruka

(Mat. 22.23-33; Mk. 12.18-27)

27Nao Masadukayo wamu, awa wighambagha ndekuko kuruka kungi kwa wafu wikamchea Jesu wikighamba,#Mab. 23.8 28“Mwalimu, Musa orediandikieghe, ‘Mundu ukafuilwa ni mruna, nao wasigha muka usevae nao mwana ungi, suti ummbuse uo muka, umvaie mruna wana.’#Wuk. 25.5 29Nao korekoghe na wandu mfungade, uja wa imbiri ukalowua muka, ukafwa usepatire mwana ungi; 30huwo koni na wa kawi, ukamlowua uja muka; 31hata wa kadadu wori. Na kutua wose mfungade wikafwa wisepatire mwana ungi. 32Konyuma uja muka moni ukafwa. 33Da kurukenyi-lee, uo muka uchakaia wani, na wose mfungade weremlowueghe?”

34Nao Jesu ukawizera, “Wandu wa ngelo iri wadalowua na kulowolwa, 35ela awo witalwagha kukaia wafwana kuruka na kukaia moyo kwa ngelo iro richagha, ndewilowuagha hata ndewilowolwagha, 36angu ndewiwuyaafwa sena anduangi, kwa kukaia wakaia karakara na weke malaika, nawo ni wana wa Mlungu, angu wameria kuruka kufuma kwa wafu. 37Na kwa malagho gha kuruka kwa wafu, hata Musa wawonyere kwa malagho gha chija kisachi chereakagha modo, andu ummbangagha Bwana, kukaia Mlungu wa Abrahamu, Mlungu wa Isaaka, na Mlungu wa Jakobo.#Kuf. 3.6 38Uo ndekaiagha Mlungu wa wafu anduangi, ela wa awo wiko moyo; angu kwake, wandu wose weko moyo.”

39Nao walimu wamu wa Sharia wikaghamba, “Mwalimu, kwatumbulia nicha.” 40Nawo ndeweredimieghe sena kumkotia ilagho jingi anduangi.

Ikoto aighu ya Kristo

(Mat. 22.41-46; Mk. 12.35-37)

41Nao Jesu ukawikotia, “Yakaia wada kughora wei Kristo ni mwana wa Daudi? 42Angu Daudi moni waghora kwa chuo cha Zaburi:

‘Bwana oremzerieghe Bwana wapo,

sea kidombo chia ya mkonu ghwapo ghwa kiwomi;#Zab. 110.1

43hata niwibonye wamaiza wako wikaie kifumbi

chewikiria maghu ghako.’

44Ikakaia Daudi moni wammbanga Bwana, uwuya ukaie wada mwana wake sena?”

Jesu kuonya aighu ya walimu wa Sharia

(Mat. 23.1-36; Mk. 12.38-40)

45Nao iji wandu werekoghe wikimsikiria, Jesu ukawizera wanughi wake, 46“Mkulindie na walimu wa Sharia, awo wikundagha kusela na nguwo ndacha, na kukunda kurogholwa masokonyi, na kukunda vifumbi viboie andenyi ya sunagogi, na andu kwa ishima karamunyi; 47nawo wawija waka wakiwa, na ichia wialomba malombi mengi gha mikalo. Awo wichapata kutanywa kubaa.”

Currently Selected:

LUKA 20: TAITA

Highlight

Copy