LUKA 19

Jesu na Zakio

1Jesu ukangia Jeriko, nao orekoghe ukiida. 2Aho korekoghe na m'baa umu wa wawadi wushuru uwangwagha Zakio, orekoghe mzuri wa mali. 3Ukalola kummbona Jesu ni mnduki, ela kwa wundu ghwa wungi ghwa wandu, nderedimieghe kummbona anduangi, angu orekoghe mundu mvui. 4Ukakiria na iseghe, ukaghenda na kujoka aighu ya muku upate kummbona angu uchaidiria chia ija. 5Nao iji Jesu wavika andu aja, ukazighana aighu, ukamzera, “Zakio, sea shwa-shwa; angu suti nikaie nyumbenyi kwako idime.” 6Zakio ukasea shwa wori, ukamkaribisha kwa kuboilwa kubaa. 7Wandu wose wiendawona agho wikamzughunukia wikighamba, “Mundu uhu wangia kukaia mghenyi wa mundu uko mkaung'a.” 8Nao Zakio ukawuka kimusi ukamzera Bwana, “Zighana Bwana, nusu ya mali rapo, nichawineka wakiwa, na ngera namkalie mndungi kwa kindo chingi, nichammbunjira mando ana.” 9Jesu ukamzera, “Idime kukia kwaichea nyumba ihi, kwa kukaia mundu uhu wori, ni wa kivalwa cha Abrahamu. 10Angu Mwana wa Mdamu orechieghe kulola na kukira icho cherelagharieghe.”#Mat. 18.11

Mfwano ghwa feza

(Mat. 25.14-30)

11Nao iji wandu werekoghe wikimsikiria, Jesu ukachuria kuwighoria mfwano, angu orekoghe kaavui na Jerusalemu, nawo wereririkanyireghe angu ahoeni Wuzuri ghwa Mlungu ghuchawoneka shwa wori.#Mat. 25.14-30 12Niko ukaghamba, “Mundu umu m'baa wa ishima oredambieghe isanga ja kula ukupatire wuzuri, ima uwuye. 13Ukawiwanga wadumiki wake ikumi na kuwineka kula umu feza yake, ukawizera, ‘Shamenyi naro hata nawuya.’ 14Ela waisanga wake ndeweremkundeghe, nawo wikamdumia wandu wikighamba, ‘Ndedikunde uhu mundu udibonyere nguma.’

15“Nao nyuma ya mundu uo kubonywa mzuri, ukawuya; ukawiwanga waja wadumiki wake orewinekieghe feza wimchee, upate kumanya seji wishamie. 16Ukacha wa imbiri ukaghamba, ‘Bwana, nashamie na feza yako ngapata feza rimu ikumi.’ 17Nao ukamzera, ‘Kwabonyere nicha, mdumiki uboie oho! Kwa kukaia korekoghe mloli kwa rija ndini, kuchabonya nguma aighu ya mizi ikumi!’ 18Ukacha wa kawi ukaghamba, ‘Bwana nashamie na ngapata feza rimu isanu!’ 19Nao ukamzera, ‘Na oho kuchabonya nguma aighu ya mizi misanu.’ 20Ukacha mdumiki mzima ukaghamba, ‘Bwana feza yako hei, nereifungieghe na kitambaa ngaivisa; kwa kukaia 21nerekuobueghe angu kuko mundu ubirie, kwadawusa iro riseko rako, na kukuwida ivo kusereviwaeghe anduangi.’ 22Ukamzera, ‘Mdumiki mmbiwi oho, nichakutanya kwa malagho ghako gheni; korenimanyireghe neko mundu ubirie, niwusagha iro riseko rapo, na kukuwida ivo nisereviwaeghe. 23Kwaki sena kusereiwikagha feza yapo bengi, kumangu huwu nicha naipata chiaimweri na fwaida yaro?’ 24Nao ukawizera awo werekoghe kimusi aho, ‘Msokenyi iyo feza mumneke uo uko na feza ikumi.’ 25Wikamzera, ‘Bwana, e uo uko na feza ikumi-e!’ 26Ukatumbulia, ‘Namghoria, uo ose uko nacho uchanekwa nyingi, ela uo usewadie, uchasokwa hata icho uko nacho.#Mat. 13.12; Mk. 4.25; Lk. 8.18 27Ela awa wamaiza wapo wiserekundieghe niwibonyere nguma, wiredenyi aha muwibwaghe imbiri kwapo.’”

Jesu kungia Jerusalemu ukizumilwa

(Mat. 21.1-11; Mk. 11.1-11; Joh. 12.12-19)

28Nao iji Jesu waghora agho, ukakiria imbiri kwawo kughenda Jerusalemu. 29Hata iji walighisa kuvika Bethfage na Bethania, kaavui na Mghondi ghwa Mizeituni, ukawiduma wanughi wake wawi 30ukawilaghira huwu, “Ghendenyi ghuja muzi ghwa kimonu, mkakangia mummbona mwana wa punda ufungilo, jingi usejokelo ni mndungi. Mfunguonyi mumrede aha. 31Na ngera mndungi wamkotia kwaki mumfunguagha, mzerenyi, Bwana wamkunda.”

32Nao wikaghenda wikawona wokoni sa iji orewizerieghe. 33Hata iji werekoghe wikimfungua mwana wa punda, mundu waro ukawikotia, “Kwaki mumfunguagha?” 34Wikamtumbulia, “Bwana waamkunda.” 35Wikamghenja mwana wa punda kwa Jesu; wikaala nguwo rawo aighu yake, na kumjosa Jesu. 36Nao Jesu ukighenda wajoka aighu ya punda, wandu wikaala nguwo rawo chienyi.

37Hata iji wavika kaavui na Jerusalemu, ija chia eseria Mghondi ghwa Mizeituni, izungu jose ja wanughi wikazoya kuboilwa na kumkasa Mlungu kwa lwaka lubaa kwa wundu ghwa iro maza mbaa wereriwonieghe; 38wikighamba,

“Nderasimilo Mzuri uo uchagha kwa irina ja Bwana,

sere ndeikaie mlungunyi,

na wubaa mlungunyi aighu nandighi.”#Zab. 118.26

39Mafarisayo wamu wiko izungunyi wikamzera Jesu, “Mwalimu, wizere wanughi wako winyame kima.” 40Jesu ukawizera, “Namghoria, wandu awa wikanyama, agha magho ghichakema.”

Jesu kughulilia muzi ghwa Jerusalemu

41Nao iji wavika kaavui na ghuja muzi na kughuwona ukaghulilia, 42ukighamba, “Na wei kodemanya idime iji iro maza riredagha sere! Ela idana rakuvisikia! 43Angu matuku ghichacha, na wamaiza wako wichakurighia, wikumarie na kukutangala chia rako rose. 44Nawo wichakutotesha putu, andwamweri na wana wako wiko andenyi ya wurigha ghwako; ndewichaasighara igho hata jimweri jiseinjiro andu kwaro, kwa kukaia ndekoremanyireghe ngelo Mlungu orechieghe kukukira anduangi.”

Jesu kughenda Hekalunyi

(Mat. 21.12-17; Mk. 11.15-19; Joh. 2.13-22)

45Nao Jesu ukangia Hekalunyi, ukazoya kuwiwinga cha shighadi awo wereuzagha; 46ukawizera, “Yaandikwa, ‘Nyumba yapo ichakaia nyumba elombia.’ Ela inyo mwaibonya ikaie mbanga ya viting'a.”#Isa. 56.7; Jer. 7.11

47Nao kula ituku Jesu ukakaia ukifundisha Hekalunyi. Wakohani wabaa, walimu wa Sharia, na vilongozi va wandu wikakunda kum'bwagha.#Lk. 21.37 48Ela wikasowa chia ingi ebonya, angu wandu wose werekoghe wikimsikiria kwa loli, wisekunde kuidwa ni ilagho jingi.

Currently Selected:

LUKA 19: TAITA

Highlight

Copy