LUKA 22

Njama em'bwagha Jesu

(Mat. 26.1-5; Mk. 14.1-2; Joh. 11.45-53)

1Ngelo ya Ndima ya Mikate Isewadie Chachu, iyo iwangwagha Pasaka, erekoghe kaavui. 2Wakohani wabaa na walimu wa Sharia werekoghe wikilola chia em'bwagha Jesu, angu werewiobueghe wandu.

Juda kurumiria kumfunya Jesu

(Mat. 26.14-16; Mk. 14.10-11)

3Niko Shetani ukamngia Juda uwangwagha Iskarioti, nao ni umu wa waja wanughi ikumi na wawi; 4ukaghenda noko kwa wakohani wabaa na walindiri wa Hekalu wipatane seji uchaadima kumfunya Jesu kwawo. 5Nawo wikaboilwa, wikarumiria kumneka feza. 6Juda ukarumiria, nao ukakaia ukilola ngelo ifwane emfunya kwawo izungu ja wandu jisemanyire.

Maboiso gha Ndima ya Pasaka

(Mat. 26.17-25; Mk. 14.12-21; Joh. 13.21-30)

7Nao iji javika ituku ja Mikate Isewadie Chachu, najo nijo ituku Mwana wa Ng'ondi wa Pasaka ubwaghwagha, 8Jesu ukawiduma Petro na Johane ukighamba, “Ghendenyi mudiboisire Ndima ya Pasaka dipate kuja.” 9Nawo wikamkotia, “Kwakunde diiboisire hao?” 10Nao ukawizera, “Iji mwangia mzinyi, mchakwana na mundu udwae mtungi ghwa machi, mnughenyi hata iyo nyumba uchaangia, 11nenyo mumzere mundu wa nyumba, ‘Mwalimu wakukotia welee, chumba cha waghenyi cheko hao andu nichaaijia Pasaka na wanughi wapo?’ 12Nao uchammbonyera chumba kibaa gorofenyi chipambilo nicha; ahoeni wikenyi nicha.” 13Wikaghenda wikawona wokoni sa iji Jesu orewighorieghe, wikaiboisa Pasaka.

Ndima ya Bwana

(Mat. 26.26-30; Mk. 14.22-26; 1 Wakor. 11.23-25)

14Ngelo yaro iendavika, Jesu ukasea kidombo kuja andwamweri na wadumi wake, 15ukawizera, “Nekoghe na bea mbaa eja Pasaka andwamweri nenyo imbiri ya kutirirwa kwapo. 16Angu namzera, sichaaija sena, hata ituku jija ichaakatishwa kwa Wuzuri ghwa Mlungu.”

17Nao ukachiwada kikombe, hata iji wameria kufunya chawucha ukaghamba, “Koonyi ichi mmbaghiane mmbose, 18nani namzera angu sichaanywa divei sena, hata Wuzuri ghwa Mlungu ghumerie kucha.” 19Ukawada mkate, ukafunya chawucha, ukaghuchikanya ukawineka ukighamba, “Ughu nigho mumbi ghwapo [ghufunywagha kwa wundu ghonyu, bonyenyi huwu kwa kunikumbuka ini.” 20Na wokoni nyuma ya vindo ukawada kikombe ukighamba, “Kikombe ichi ni ilaghano iwishi kwa bagha yapo idikagha kwa wundu ghonyu.] 21Ela zighanenyi uhu unifunyagha dekwanye aeni aha mezenyi. 22Mwana wa Mdamu uaendabwaghwa sa iji koni orepangiloghe, ela ni bugha kwa uo mundu umfunyagha.” 23Nao wikazoya kukotiana weni na weni nani uchaabonya ilagho ijo.

Nganyi aighu ya Wubaa

24Nao ikawuka nganyi aghadi ya wanughi wei nani uririkanywagha kukaia m'baa wawo.#Mat. 18.1; Mk. 9.34; Lk. 9.46 25Jesu ukawizera, “Wazuri wa iro mbari zima wakaia na nguma aighu ya wandu wawo na awo wibonyagha nguma wadawangwa, ‘Wabonyi nicha.’#Mat. 20.25-27; Mk. 10.42-44 26Ela konyu inyo ndemchaakaia huwo anduangi; angu uo uko m'baa konyu, uchakaia sa mtini, na kilongozi uchakaia sa mdumiki.#Mat. 23.11; Mk. 9.35 27Angu aho m'baa ni uao? Ni uja uko kidombo kujenyi angu ni uja wawuyadumika? Si uja uko kidombo vindonyi anguwada? Ela ini neko aghadi konyu sa uja udumikagha.#Joh. 13.12-15

28“Ni inyo mduanye nani ngelo rose ra matimo ghapo; 29na sa iji koni Aba uniwikie wuzuri, na ini wori nammbikia wuzuri, 30mpate kuja na kunywa mezenyi kwapo, kwa wuzuri ghwapo; na kusea kidombo vifumbinyi va nguma, mkiritanya iro mbari ikumi na iwi ra Israeli.”#Mat. 19.28

Jesu kughora kiimbiri angu Petro uchamkana

(Mat. 26.31-35; Mk. 14.27-31; Joh. 13.36-38)

31“Simoni, Simoni! Ola Shetani wawusa rusa emtima inyo, na kumuela-ela sa iji ngano ielwagha. 32Ela nakulombia oho irumirio jako jisakesia, hata iji kwameria kunighalukia kuwimangishe wanyinyu.” 33Petro ukatumbulia, “Bwana, neko tayari kughendanya na oho kifungonyi na hata kifonyi wori.” 34Jesu ukamtumbulia, “Niakughoria loli Petro, idime iji, njogholo ndeichaadeda kusemerie kunikana kadadu kukaia ndekuniichi anduangi.”

Ngelo ya ndengwa

35Nao Jesu ukawizera wanughi wake, “Iji neremdumieghe msedwae kikuchu angu mfuko angu vadu, moresowieghe kindo chingi?” Wikatumbulia, “Hata.”#Mat. 10.9-10; Mk. 6.8-9; Lk. 9.3; 10.4 36Jesu ukawizera, “Ela idana namzera, uo uko na kikuchu angu mfuko udo, na uhu usewadie lufu ndeuze nguwo yake ukughuye lufu. 37Angu namghoria, suti Maandiko agha ghikatie, ‘Oretaliloghe andwamweri na wakosi,’ na kula iandiko jiandikilo kwa wundu ghwapo, suti jikatisho.”#Isa. 53.12 38Wanughi wikaghamba, “Bwana, chufu iwi heri.” Ukatumbulia, “Rakata.”

Jesu kulomba aighu ya Mghondi ghwa Mizeituni

(Mat. 26.36-46; Mk. 14.32-42)

39Nao Jesu ukafuma, na sa iji koni mzango ghwake ghorekoghe, ukaghenda cha Mghondi ghwa Mizeituni, na wanughi wake wikamnugha. 40Hata iji wameria kuvika, Jesu ukawizera wanughi wake, “Lombenyi msechengia matimonyi.” 41Nao ukawisigha ukaghenda sa wukula ghwa kukumba igho, ukadunga ngokoro ukalomba ukighamba, 42“Aba ngera kwakunda, niinjire ichi kikombe, ela isakekaia sa iji nikundagha, ela ikaie sa iji kukundagha oho.” [ 43Nao malaika wa Bwana ukamchea kufuma mlungunyi kumfungisha ndighi. 44Nao moni ukikaia na wasi m'baa, ukalomba kwa kufunga ndighi, hata marughudia ghake ghikakaia ghikitonya andoenyi sa matanda mabaa gha bagha.]

45Nyuma ya kumeria malombi ghake, ukawichea wanughi wake ukawikua walala kwa wasi. 46Nao ukawizera, “Kwaki mlalagha? Wukenyi mlombe msengie matimonyi.”

Kuwadwa kwake Jesu

(Mat. 26.47-56; Mk. 14.43-50; Joh. 18.3-11)

47Nao iji orekoghe ukighora, Juda, nao ni umu wa waja wanughi ikumi na wawi ukabusa, ukijilongoza izungu; nao ukamchea Jesu ukamsusugha. 48Ela Jesu ukamzera, “Wele Juda, kuamfunya Mwana wa Mdamu kwa kumsusugha?” 49Nao iji wanughi wake wawona maza iro wikamkotia, “Bwana, diwideme na chufu?” 50Umu wa wanughi ukamdema mzumba wa Mkohani M'baa, ukamdumbua kudu kwa mkonu ghwa kiwomi. 51Niko aho Jesu ukaghamba, “Basi yakata.” Nao ukamuadada uja mundu, ukam'boisa kudu kwake.

52Niko Jesu ukawizera wakohani wabaa, walindiri wa Hekalu, na waghosi awa werechieghe kummbwada, “Welee, mwaacha kuniwada mdwae chufu na rungu sa iji neeka kiting'a? 53Iji nerekwanyeghe nenyo Hekalunyi kula ituku ndemoreniwadieghe, ela ihi ni ngelo enyu, nayo ni ndighi ra kira.”#Lk. 19.47; 21.37

Petro kumkana Jesu

(Mat. 26.57-58, 69-75; Mk. 14.53-54, 66-72; Joh. 18.12-18, 25-27)

54Nao wikammbwada Jesu, na kumghenja nyumbenyi kwa Mkohani M'baa; Petro ukanugha nyuma kwa kula. 55Aho korekoghe na modo ghwakorwa ghadi na ghadi ya waza, na Petro ukaseanya kidombo chiaimweri na awo werekoghe wikioda modo. 56Mwai umu mdumiki iji wammbona Petro ukioda modo ukamkuya meso ukaghamba, “Uhu mundu nao moni okwanyeghe na Jesu.” 57Ela Petro ukakana ukaghamba, “E muka, simwichi putu mundu uhu.” 58Nyuma kapindi, mundu umu sena ukammbona ukaghamba, “Na oho wori ko umu wawo.” Ela Petro ukatumbulia, “E mundu, si ini ungi!” 59Nao sa nyuma ya saa imweri, mundu umu ukachuria kughora, “Kwa loli mundu uhu okwanyeghe na Jesu, angu uo moni wori ni Mgalilaya!” 60Ela Petro ukakana ukaghamba, “E mundu, simanyagha agho kughighoragha anduangi.” Nao ahoeni ukighora, njogholo ikadeda.

61Bwana ukaghaluka ukazighana Petro, na Petro ukakumbuka seji Bwana oremzerieghe, “Kio ichi cheni, imbiri ya njogholo kudeda, kuchanikana kadadu.” 62Nao ukafuma shighadi ukalila nandighi.

Jesu kusekwa na kukabwa

(Mat. 26.67-68; Mk. 14.65)

63Awo wandu werekoghe wikimlindia Jesu, wikamseka na kumkaba. 64Wikamfunga meso na kitambaa na kumkotia, “Loda! Nani wakukaba?” 65Wikamdukana kwa malagho mengi.

Jesu kuredwa imbiri ya Mwandu

(Mat. 26.59-66; Mk. 14.55-64; Joh. 18.19-24)

66Nao iji ndoe yaela, wabaa, wakohani wabaa, walimu wa Sharia, wikakwanyika chia imweri, wikamreda Jesu Mwandunyi. 67Wikamkotia, “Dighorie ngera oho ko Kristo.” Ela Jesu ukawitumbulia, “Hata ngaduamghoria ndemrumiriagha anduangi, 68na hata ngamkotia ikoto ndemdimagha kujitumbulia anduangi. 69Ela kufuma idana, Mwana wa Mdamu uchasea kidombo chia ya mkonu ghwa kiwomi ghwa Mlungu Uwadie Ndighi Rose.”

70Niko aho wose wikaghamba, “Huwo ni kughamba oho ko Mwana wa Mlungu?” Ukawitumbulia, “Inyo mwaghamba angu ini nuo moni.” 71Nao wikaghamba, “Deko na hajaki ya washahidi wamu wazima? Hoku dasikira diweni ukighora kwa momu ghwake moni.”

Currently Selected:

LUKA 22: TAITA

Highlight

Copy