San Marcos 1

Tzamgopu'ŋoyu Juan Bautista

(Mt. 3.1-12; Lc. 3.1-9,15-17; Jn. 1.19-28)

1Yʌ'šej tzo'tzu te' evangelio chambapʌ's te' Jesucristo. Ñe'cʌte' te' Diojsis 'Yune. 2Te' tza'maŋwa'opyapʌ Isaiajsis jya'yʌyjayu te' Diojsis chame chamu'c te' 'Yune. Nʌmu yʌ'šej:

Ʌj Dios, yʌ'yʌs ŋgʌ'wejpa Juan ʌsne' ŋgʌ'wej, mis nwi'naŋdʌjqui.

Yʌ'wʌ's maŋba ñimejcʌyjayaju pʌ'nista'm chocoy mijcotoya jujcha' pʌ'nista'm ñimejcʌyajpa tuŋ.

3Yʌ' Juaŋde' chamgue'tpa Totojaye's nʌmbamʌy:

Y wejqui'mu'c nʌmu tumʌ te' pʌn ja'itʌnʌmʌmʌy:

Nimejcʌytyamʌ ndzocoy tʌ Ngomicotoya

Jujcha' pʌ'nista'm ñimejcʌyajpa tuŋ.

Wʌtzʌcjaytyamʌ te' wyiyuŋ-duŋ te' maŋba minumʌy.

4Te' ja'yʌyušej inʌc, minu te' Juan, y nʌ inʌc yajnʌ'yʌ'oyu te' ja'itʌnʌmʌmʌy. Chamgopuŋba inʌc wa'y quipswitu'yaju te' pʌnda'm y wa'y ñʌ'yʌyaju, te'šej wa'y yajcotocoyjayaju Diojsis te' ñe'ta'm quiowa. 5Judea-nas y Jerusaleŋ-gumgu'yojmošej inʌc tzu'cumyajpa pʌnda'm wa'y myaŋyaju ijtumʌy Juan. Y ñe'cʌ's mumu inʌc yajnʌ'yʌyajpa te' Jordaŋ-nʌ'ojmo quiowʌ'aŋjamyaju'cande' quiowa.

6Y yamba inʌc Jua'ŋis te' pyama camello-pʌcpʌ, y nacapʌ checwatcuy. Y te' quiu'tcuy awute' inʌc y yumij tzinuj. 7Y te' chamgopuŋgu'yojmo nʌmba inʌc: Ʌs ucaŋgʌ'mʌc nʌ minu más mʌja'ŋbʌ que ja'n ʌj. Y myasa'najcupyit ja'n pyʌqui ni wa'yʌs ndo'mʌyu ni mbu'pʌ'jayu wyacasnaca tzay. 8Ʌs, wiyuŋšej nyajnʌ'yʌytyamu'ʌsmij nʌ'pit. Pero ñe'cʌ'smij maŋba nyajnʌ'yʌytyamu te' Espíritu Santopit.

Nʌ'yʌyu Jesús

(Mt. 3.13-17; Lc. 3.21-22)

9Te'ta'mbʌ jamo'oyj tzu'cumu Jesús te' Nazaret-cumgu'yojmoc, te' Galilea-najsis quiowindzʌmbapʌ, y nu'cu ijtumʌy Juan. Y tey yajnʌ'yʌyu Jua'ŋis te' Jordaŋ-nʌ'ojmo. 10Nʌ'cmaj qui'mbujtu te' nʌ'ojmo, pijche'ctij quienu Jesujsis nʌ 'yaŋwaju te' tzap. Queju te' Espíritu Santo jujcha' paloma y wanajcu ñe'cʌcʌsi. 11Pijche'ca pujtu tzajpojmocpʌ otowe nʌmupʌ: Mijte' ʌs Une sunbapʌ'ʌs. Mijpi'tʌj tzocopyacpa.

Satanajsis 'yoc'isu Jesús

(Mt. 4.1-11; Lc. 4.1-13)

12Pijche'ca te' Espíritu Santo's chʌcje'csu wa'y myaŋu Jesús ja'itʌnʌmʌmʌy. 13Tey tzʌ'yu wʌstʌjqui's jama ja'itʌnʌmʌmʌy y nʌ inʌc 'yoc'isu Satanajsis. Tey inʌc ijtyajque'tu Jesusji'ŋ cʌ'soyajpapʌ copʌn. Y te' angelejsista'm tey inʌc nʌ quiotzoŋyaju Jesús.

Yoscho'tzu Jesús

(Mt. 4.12-17; Lc. 4.14-15)

14Šomyaju'ca Juan, maŋgue'tutij Jesús te' Galilea-najsojmo. Nʌ inʌc chamgopuŋu te' evangelio chambapʌ's jutz aŋgui'mopya Dios. 15Y nʌmba inʌc: Ta'nwa'nde' te' aŋsʌŋ. Jʌ'nʌ'a maŋba 'yaŋgui'moyu Dios. Quipswitu'tamʌ, wʌ'aŋjamdamʌ te' evangelio.

Jesujsis wyejyaju macšcu'y suyajpapʌ

(Mt. 4.18-22; Lc. 5.1-11)

16Nʌ inʌc quiʌtʌjcu'c Jesús te' Galilea-ma'raŋi, quienu te' Simón y pyotzo Andrés. Yʌ'ta'mbʌ suyajpawʌte' inʌc y nʌ inʌc quiojtyaju te' šuquiuy-ñuti te' ma'rojmo. 17Y ñʌjayaju Jesujsis: Mindamʌ ʌji'ŋ y maŋba'ʌsmij aŋmaytyamu jutzmis wa'y suytyamu pʌn. 18Pijche'ctij chaquiaju te' šuquiuy-ñutita'm y quio'ŋyaju.

19Cʌtʌjcu tey, tu'ŋa'a'ŋʌyu uša'ŋ Jesús, y quiengue'tu Jacobo y pyotzo Juan, te' Zebedeo's 'yuneta'm. Te'ta'mbʌ's barco'ojmo inʌc nʌ 'yoctʌpyaju te' šuquiuy-ñutita'm. 20Pijche'ctij Jesujsis wyejyaju wa'y quio'ŋyaju. Y chaquiaju te' tyata Zebedeo barco'ojmo te' quioyosaji'ŋda'm, y maŋyaju Jesusji'ŋ.

Te' pʌn ñʌc'ijtʌyupʌ yatzi-espiritu's

(Lc. 4.31-37)

21Pijche'ca nu'quiaju y tʌjcʌyaju te' Capernaum-gumgu'yoyj. Y sabado-jamo'oyjtya'm aŋma'yopya inʌc Jesús te' judio'sta'm wyindʌjcojmo. 22Y te' pʌ'nista'm ñʌmayajayajpa inʌc ñe' 'yaŋma'yoquiuy porque ñe'cʌ's 'yaŋmayajpa wʌpʌ aŋgui'mʌtʌjcupyit y ja'nde' te' aŋgui'mguy-tyayušej. 23Pijche'c nu'cu te' ñe'ta'm wyindʌjcojmo tumʌ te' pʌn ñʌc'ijtʌyupʌ yatzi-espiritu's, y weju'c nʌmu: 24Ej mij, Jesús, Nazaret-pʌn, ¿tiya' sunba tʌji'ŋ? ¿Minujatʌjyʌ' nyajca'u? Ʌs ispʌcpa'ʌsmij. Mijte' te' Masanbʌ Pʌn Diojsisñe'. 25Pero Jesujsis 'yotoŋwindujcu y ñʌjayu: Numumña y putʌ ñe'co'moc. 26Pijche'ca te' yatzipʌ espiritu's yajpitiwijtu te' pʌn. Y maya'aŋ weju'c pujtu ñe'co'moc. 27Y mumu pʌn maya'yaju y naquiʌ'aŋwa'quiatʌju ñe'co'mo: ¿Y tiya'sʌ'ŋyʌ' yʌ'šej? ¿Jomepʌ aŋma'yoquiuysʌ'ŋyʌ' yʌ'wʌ? Porque yʌ' pʌ'nis aŋgui'mbapʌšej 'yaŋgui'mba yatzi-espirituta'm y myato'ŋoyjayajpa. 28Y jʌnʌjtij copuŋu te' ñe' chamʌtʌjcuy te' Galilea-najsis quiowindzʌmbaše'ŋ.

Jesujsis yajtzocjayu Pedro's myo'ot

(Mt. 8.14-15; Lc. 4.38-39)

29Pijche'ctij tzu'cumu Jesús te' judio'sta'm wyindʌjcojmoc y maŋu Jacobo y Juaŋji'ŋ te' Simo'ŋis y Andrejsis tyʌjcaŋʌ. 30Y te' Simo'ŋis myo'ot pijcʌ'ojmo inʌc wi'mñayu ʌŋgu'yojmo. Pijche'ctij chamjayaju Jesús que ca'epʌte'. 31Pijche'ca nu'cu tey Jesús y pyʌjcu quiʌ'cʌsi y yajtzu'cumu. Y jʌnʌjtij chajcu te' pijcʌ's y te' yomo's maŋu chʌjcu cʌna'tzʌ'oquiuy ñe'cʌcotoyata'm.

Jesujsis yajtzojcu sone ca'eta'mbʌ

(Mt. 8.16-17; Lc. 4.40-41)

32Tza'yʌ'ca, tʌ'pu'cande' jama, ñʌminjayaju Jesús mumu jujche'ŋ ca'eta'mbʌ, y te'šejtijque' ñʌc'ijtʌyupʌ yatzipʌ espiritu's. 33Pijche'ca mumu te' cumgupyʌn tu'mʌyaju tey puerta'ŋi. 34Y yajtzojcu Jesujsis wʌwʌ te' ca'eta'mbʌ, wi'ni eya ca'cu'yʌyajupʌ. Y myacpujtu wʌwʌ yatzita'mbʌ espíritu. Jachi'ya lugar te' yatzi-espirituta'm wa'y ñʌmyaju: Ispʌcpatʌsmij.

Tzamgopu'ŋoyu Jesús Galilea-najsojmo

(Lc. 4.42-44)

35Y tzu'sa'u Jesús pichpi'chʌcmaj. Tzu'cumu y maŋu ja'itʌnʌmʌmʌy, y tey 'yoto'ŋʌyu Dios. 36Y maŋu mye'chaju Simo'ŋis y te' ñe'cʌji'ŋ ijtyajupʌ's. 37De que pya'tyaju, ñʌjayaju: Mumu pʌ'nismij nʌ mye'chaju. 38Jesujsis ñʌjayaju: Ma'nta'm aŋdometa'mbʌ cumgu'yoyj wa'yʌj ndzamgopu'ŋoquie'tu tey. Porque te'wʌcotoya'ʌjte' minu. 39Y tzamgopu'ŋopya inʌc Jesús jujche'ŋ ñe'ta'm wyindʌjcojmo ijtupʌ Galilea-najsojmo. Y myacputpa inʌc te' yatzi-espirituta'm.

Jesujsis yajtzojcu yatziputzi'ʌyupʌ

(Mt. 8.1-4; Lc. 5.12-16)

40Pijche'ca quiʌ'minu Jesús tumʌ yatziputzi'ʌyupʌ pʌ'nis. Minu quiujnayu y wya'cjayu y nʌmu: Juca sunbamis, muspamisʌj nyajtzojcu wa'yʌj ŋgowaju. 41Y tyo'ya'ŋʌyu Jesujsis te'wʌ. Yajtʌyʌyu te' quiʌ' y pyi'quisu, y ñʌjayu: Sunba'ʌsmij nyajtzojcu wa'mij ŋguiowaju. 42Y te'šejtij ñʌjayu y jʌnʌjtij tzojcu te' yatziputzi y cowaju te' pʌn. 43Pijche'ctij ñʌjayu Jesujsis: Muspa'mij myaŋu. Y chamna'tzque'tu 44y ñʌjayu: Uy ya'iwʌ tzamjay. Pero mawʌ, ma yajquena nwin te' sacerdote que ñchocwa'mij. Y tzi'ʌ te' sacerdote tiyʌ'iwʌ copʌn Dioscotoya aŋgui'mušej Moisés. Te'šej maŋba myujšaju te' pʌ'nis que ŋguiowajumij. 45Pero tzu'cumu te' pʌn y yʌmʌc teymʌc chamgopuŋu, y yʌ'wʌ te'wʌ inʌc chamjapya jutz tzojcu. Te'wʌcotoyate' Jesús ja'na inʌc musi tyʌjcʌyu quejuqueju'c te' cumgu'yojmo. Itcʌwʌ'nu wyin ja'itʌnʌmʌmʌy. Y teymʌ inʌc maŋba mye'chaju yʌmʌc teymʌcta'mbʌ pʌ'nis.

Currently Selected:

San Marcos 1: ZCNT

Highlight

Copy