Hechos 6

Tʌjcʌyaju cu'ya'y anciano

1Y te'ta'mbʌ jamo'oyj nʌ inʌc pyucsu'c wʌwʌ te' cʌ'aŋmayeta'm, tuptupnaquiʌ'yaju te' griegota'm contra te' judío, y nʌmyaju que ja'n inʌc chʌcjayatʌy cuenta ñe'ta'm še'aŋ šajyajpa'c cu'tcuy tumdumʌ jama. 2Te'cotoya wyejtu'mʌpyʌ'yatʌju te' macwʌstʌjca'y pʌ'nis mumu jujche'ŋ cʌ'aŋmayeta'm, y nʌmyaju: Ja'n pyʌqui wa'ytyʌs ndzamgopu'ŋaŋjeju yʌ' Diojsis chame ne'cʌtijtʌs wa'y ŋgʌna'tzʌ'oquie'tu mesa'ojmota'm. 3Te'cotoya atzita'm, copiŋdamʌ mi'ojmota'm cu'ya'y pʌn mujsoyajpapʌ y wyʌcotzamyatʌjpawʌ y jo'ʌyajupʌ Espíritu Santopit, te'ta'mbʌ tʌs wa'y ŋgojtyaju yʌ'šejpʌ cʌna'tzʌ'oquiu'yojmo. 4Pero tʌs maŋbatʌs oto'ŋʌyjojcʌtʌjcu Dios, y ndzamgopuŋjojcʌtʌjcu te' tzame. 5Y ñʌ'omyaju mumuta'mbʌ's te'šej. Y quiopiŋyaju Esteban jo'ʌyupʌ wʌ'aŋjamgupyit y Espíritu Santopit, y te' Felipe, y te' Prócoro, y te' Nicanor, y te' Timón, y te' Parmenas, y te' Nicolás te' tumʌtzʌjcupʌ ñe'cʌji'ŋda'm, y minupʌ Antioquia'ojmoc. 6Yʌ'ta'mbʌ yajca'ŋnu'quiatʌju cʌ'we'ista'm wyi'naŋdʌjqui, y 'yoto'ŋʌyaju te' cʌ'we'ista'm Dios y quiojtyaju quiʌ' ñe'cʌcʌsita'm. 7Y nʌ inʌc šʌ'wi'naju tʌ Ngomi's chame. Y nʌ inʌc wyʌwa'yaju wʌ'aŋja'moyajpapʌ te' Jerusale'ŋojmo, y aŋba'te wʌwʌ sacerdote's inʌc nʌ pyʌjcʌchoŋyaju te' wʌ'aŋja'moquiuy.

Ñuquiaju te' Esteban

8Y jyo'ʌyu Diojsis yajya'moquiu'yis y pyʌmi's te' Esteban, te'cotoya chʌcpa inʌc maya'aŋda'mbʌ tiyʌ y isaŋwʌ'ajcuy te' pʌ'nojmota'm. 9Pijche'ca tzu'cumyaju pʌnda'm te' tu'mʌquiu'yojmoc te' ñʌjayajpawʌ Tzʌcʌpʌ'yatʌjupʌ Mozo, y te' Cirene'ojmocta'mbʌ, y te' Alejandria'ojmocta'mbʌ y te' Cilicia y Asia'ojmocpʌ pʌnda'm, y quipotoŋyaju Estebanji'ŋ. 10Pero ja'n inʌc quiʌpa'tjayay te' myujsoquiuy y te' Espíritu otoŋbapʌpit. 11Pijche'ca quioyojyaju pʌnda'm wa'y ñʌmyaju que myatoŋyaju'un nʌ'c inʌc 'yotowewʌ'ajayu te' Moisés y te' Dios. 12Y yajso'nwitu'yaju te' pʌnda'm y te' tzamupʌndʌcway y te' aŋgui'mguy-tyayu, y ñicutzu'ʌyaju y ñuquiaju y ñʌmaŋyaju aŋgui'moye'sta'm tyu'mʌquiu'yojmo. 13Y tey quiojtyaju sujchajpapʌ testigos wa'y ñʌmyaju: Yʌ' pʌ'nis ja'n 'yotowewʌ'aŋjejay yʌ' masanbʌ templo y te' aŋgui'mguy. 14Nʌtʌs inʌc matoŋu nʌ'c ñʌmu que maŋba jyu'mbʌ'u yʌ' templo te' Nazarejtojmopʌ Jesujsis, y que maŋba quiacpʌ'u te' costumbreta'm Moisejsistʌ tzi'yajupʌ. 15Pijche'ca mumu te' tey pocšajupʌ aŋgui'myajpapʌ's ñique'nʌyaju Esteban, y quienjayaju wyinnaca jujcha' angelejsisñe'.

Currently Selected:

Hechos 6: ZCNT

Highlight

Copy