Hechos 5

Te' Ananías y te' Safira

1Pero ijtu inʌc tumʌ pʌn ñʌjayajpapʌ Ananías, y ñe' yomo Safiraji'ŋ mya'ʌyaju ñas-juyi. 2Y yajtzʌ'yu wene te' tumin ñe'cʌcotoya, y wenetij minu quiojtu cʌ'we'ista'm ñe'ŋbajcaŋi. Y myuspa inʌc yomo's. 3Pero ñʌjayu Pedro's: Ananías, ¿tiyajca'nde' jyo'ʌyjayu Satanajsis mis ndzocoy wa'mis sutzjayu Espíritu Santo, y wa'mis nyajtzʌ'yu wene te' tumin ma'ʌyuše'ŋgʌsimis te' nas? 4Juca inʌc mis jamya'ʌ, ¿ja'nja mis inʌc nʌtzʌ'i? Y ma'ʌyu'cmis, ¿ja'nja jequete' mij 'yaŋgui'mipʌ ndumingʌsi? ¿Tiyajca' yʌ'šej ŋguipsu ndzoco'yojmo? Ja'ndejcate' pʌn mis nʌ sutzjayu, sino que Dioste'. 5Myatoŋu'ctij yʌ'šejta'mbʌ tzame Ananiajsis, teytyij cunu y ca'u. Y mumu myatoŋyajupʌ's jene na'chaju. 6Y tzu'cumyaju te' socata'm, pyʌquiaju y myoñaju'ca ñʌpujtyaju y maŋu ñipyaju.

7Y cʌtʌjcu'ca tuca'y horaše'ŋoyj mingue'tu te' Ananiajsis yomo. Y ja'n inʌc myusi tiyʌ tujcu. 8Pijche'ca ñʌjayu Pedro's: Tzamja'ʌj, ¿te'še'ŋgʌsijate' nʌše'ŋmis ndzamdamu, ma'ʌytyamu te' nas? Y ñe'cʌ aŋdzoŋu: Jʌ'ʌ, te'še'ŋgʌsite'. 9Y Pedro's ñʌjayu: ¿Tiyajca' ñchamdu'mbajca'tamu wa'mis oc'isjaytyamu te' tʌ Ngomi's 'Yespiritu? Cʌmato'ŋʌ, nʌ 'yaŋjʌyaju wyacasnaca te' tiju ñipjayajupʌ's mis njayaj, y te'šejmij maŋba ñʌmaŋyajque'tu. 10Teytyij cunu Pedro's ñe'ŋbajcaŋi y ca'u. Y tʌjcʌyaju te' socata'm, y ca'uwa'a pya'tyaju. Ñʌpujtyaju y maŋu ñipyaju jyaya's che'ŋna'oyj. 11Y jene na'chaju mumu te' tu'mʌquiuy, y jujche'ŋ myatoŋyajupʌ's yʌ'šejta'mbʌ tiyʌ.

Soneta'mbʌ señal y isaŋwʌ'ajcuy tujcu

12Y chʌjcu Diojsis soneta'mbʌ isaŋwʌ'ajcuy y señal te' cumgu'yojmo te' cʌ'we'ista'm quiʌ'pit. Y mumu inʌc tu'mʌyajpa te' Salomo'ŋis šetzecʌsi tumo'pyʌ quipsoquiuyji'ŋ. 13Y ya'iwʌ te' eyata'mbʌ pʌ'nojmoc ja'ijtya pyaquitzoco'yajcuy wa'y tyumʌtzʌquiaju ñe'cʌji'ŋda'm. Pero jene wyʌcotzamyatʌjpa inʌc te' cumgupyʌ'nis. 14Y wʌwa'yaju más pʌn y yomo nʌ inʌc wyʌ'aŋjamjayajupʌ's tʌ Ngomi. 15Y quiojtyajpa inʌc ca'eta'mbʌ jojtuŋgʌsi ʌŋgu'yojmo y cape-ʌŋgu'yojmo maŋba quiʌtʌjcumʌy Pedro, wa'y ñicʌtʌjcʌyaju yajtya' quiʌmʌ'ŋis. 16Y te'šejtijque' te' aŋdometa'mbʌ cumgu'yojmocta'm miñaju wʌwʌ pʌn Jerusale'ŋojmo, ñʌmiñajupʌ's ca'eta'mbʌ, y te' yacsnutzʌquiajpapʌ yatzipʌ espiritu's, y mumu yʌ'ta'mbʌ tzoquiaju.

Yacsnutzʌquiaju Pedro y Juan

17Pijche'ca te' mʌja'ŋbʌ sacerdote, y mumu saduceo-wʌ'aŋja'moye quio'ŋyajpawʌ's ñe'cʌ jene nʌ inʌc quiʌjoŋyaju. 18Te'cotoya ñuquiatʌju te' cʌ'wejta'm y quiojtyatʌju mumu'iwʌ šomyajpamʌy. 19Pero te' tzu'tij minu šombʌ'yatʌju tʌ Ngomi's 'yangelejsis, y ñʌpujtyaju'ca ñʌjayaju: 20Maŋdamʌ, y tʌjcʌytyamʌ templo'ojmo y nʌtzamya te' pʌnda'm mumu yʌ' yʌ'šejpʌ iscuy-quenguy. 21Y myatoŋyaju'ctij yʌ'šej, maŋyaju templo'ojmo namdzuti y aŋma'yo'quiʌ'yaju.

Te'pa'ŋoyj nu'cu te' mʌja'ŋbʌ sacerdote y ñe'cʌji'ŋ te' quio'ŋyajpapʌ's. Y wyejtu'mʌyaju te' aŋgui'moyeta'm, y mumu te' Israe'lista'm chamupʌndʌcway. Y maŋu yajsombʌ'yatʌju te' cʌ'wejta'm te' preso'moc wa'y ñʌmiñatʌju. 22Pero nu'quiaju'ctij te' soldadota'm te' šomyajumʌy, japya'tyatʌ. Y witu'yaju, y minu chamyaju. 23Y nʌmyaju: Wiyuŋšej aŋgʌyutijtʌs mba'tu te' presu-tʌjcʌquiuy y wi'tutij oye, y teytyij ijtyaju coque'noyajpapʌ puerta'ŋi, pero nya'aŋwaju'ctʌs ya'iwa'ndʌs jambya'tʌ jojmo. 24Y myatoŋyaju yʌ'šej te' mʌja'ŋbʌ sacerdote's y te' templo-coqueñajpawʌ's quiowi'na's, y te' sacerdote-cowi'na'sta'm, y nʌmyaju: ¿Jujche'cayʌ' maŋba quio'yaju yʌ'wʌ? 25Pero tuma'ŋbʌ'nis minu chamjayaju: Te' pʌnda'm, te' somyajupʌmis preso'mo, teymʌ templo'ojmo ijtyaju, nʌ 'yaŋma'yoyaju. 26Pijche'ca maŋu te' coque'noye'sta'm quiowi'na te' soldadoji'ŋda'm, y yo'cayo'ca ñʌmiñatʌju, porque na'chaju uy maŋu tyʌŋga'yatʌju tza'pit cumgupyʌ'nis. 27Y ñʌmiñatʌju'ca, ya'aŋguejyatʌju te' aŋgui'moye'sta'm tyu'mʌquiu'yojmo, y te' mʌja'ŋbʌ sacerdote's quiʌ'aŋwa'quiaju, 28y nʌmu: Aŋgui'mdamwa'ndʌsmij u'yamij 'yaŋma'yoytyamu yʌ' nʌquiʌsi. Pero nyajmustamwa'mis mumu Jerusale'ŋojmota'mbʌ mista'm aŋma'yoquiuy, y sundambamis wa'ytyʌj tʌj ni'aŋba'tyaju yʌ' pʌ'nis ñʌ'pinbit. 29Aŋdzoŋu Pedro y te' eyata'mbʌ cʌ'wej y ñʌjayaju: Pyʌcpa wa'ytyʌs mato'ŋoyjayu winac Dios y ja'n pʌnda'm. 30Tʌs ndata'sta'm Diojsis yajwinsa'u te' Jesús, te' mis njʌ'mga'tamupʌ cuquiʌsi. 31Y yʌ'wʌ yajmʌja'ŋaju Diojsis ñe' chʌ'na'ŋojmo y quiojtu jujcha' Rey y Yajcotzojcopyapʌ wa'y yajquipswitu'u te' Israel-pʌnda'm y wa'y yajcotocoyjayu ñe'cʌ's te' quiowa. 32Y yʌ'šejta'mbʌ tiyʌ tʌste' nʌ ndzamu y te'šejtijque' te' Espíritu Santo's. Y yʌ' Espíritu chi'yaju Diojsis jujche'ŋ myato'ŋoyjapyapʌ's.

33Pero myatoŋyaju'ca ñe'cʌ'sta'm yʌ'šej, jene qui'šca'yaju y sunba inʌc yajca'yatʌju. 34Pijche'c ijtu tey te' aŋgui'moye'sta'm tyu'mʌquiu'yojmo tumʌ fariseo ñʌjayajpapʌ Gamaliel, aŋgui'mguy-'yaŋma'yoye, y myʌja'ŋgʌna'tzʌyajpapʌ inʌc mumu pʌ'nis te' cumgu'yoyj. Tenaqui'mu yʌ'wʌ y quiojtu aŋgui'mguy wa'y ñʌpujtyatʌju te' cʌ'wejta'm chʌlʌ hora'c aŋgo'moc. 35Y pijche'c ñʌjayu te' tyʌwʌta'm: Israel-pʌnda'm, coquendamʌ cuenta tiyʌ mis sunba ndzʌcjaytyamu yʌ' pʌnda'm. 36Porque cʌtʌquiajupʌ tiempo'oyj tzu'cumu Teudas, y nʌmu que mʌja'ŋbʌte', y quio'ŋyaju tumʌ mone pʌnše'ŋo'yis. Pero yajca'yaju yʌ'wʌ, y titpejpʌ'yaju mumu quio'ŋyajupʌ's, y yaju. 37Yʌ'še'a cʌtʌjcu'c, nʌ jyapyʌjcoyajupʌ aŋsʌ'ŋoyj tzu'cumgue'tu Judas, Galilea-pʌn, y quio'ŋyajque'tu ñe'cʌ wʌwʌ pʌ'nis. Y te'šejtij quiʌtʌcjaquie'tu te'wʌ, yajca'yaju, y jujche'ŋ myato'ŋoyjayupʌ's titpejpʌ'yajque'tutij. 38Y yʌti'ʌsmij ndzamjaytyamba: Tzactamʌ, u'ya tzʌcjaytyame cuenta yʌ' pʌnda'm porque juca pʌ'nisyʌ' quipsaŋgospo'ʌyajupʌ tiyʌ o chʌquiajupʌ tiyʌ, maŋba yaju. 39Pero juca Diojsisyʌ' quipsaŋgospo'ʌyupʌ, ja'nmis musi nyajco'tzjaytyamu, uytya'mis Diojsis quipsoquiuy nʌ nʌquipjaytyamu.

40Myato'ŋoyjayaju Gamaliel, y wyejyatʌju te' cʌ'wejta'm. Y ñacstochʌquiatʌju'ca ñʌjayatʌju: U'ya tzamjaytyame ya'iwʌ Jesujsis ñʌy. Y chʌcʌpʌ'yatʌju. 41Y tzu'cumyaju te' aŋgui'moye'sta'm wyi'naŋdʌjqui, y ñʌ'omyaju que Diojsis myayatʌju pyʌcpašej wa'y yacsnutzʌquiatʌju ñe' Ñʌquiotoya. 42Y tumdumʌ jama inʌc aŋma'yoyajpa y tzamgopu'ŋoyajpa templo'ojmo y tʌcnamaye que Jesuste' te' Cristo.

Currently Selected:

Hechos 5: ZCNT

Highlight

Copy