Hechos 3

Tzojcu te' ne'ŋyacšnupʌ pʌn

1Te' Pedro y te' Juan nʌ inʌc tyumʌqui'myaju wa'y myaŋyaju templo'aŋʌ las tresše'ŋoyj, Dios-oto'ŋʌquiuy hora'oyj. 2Ijtu inʌc tumʌ pʌn yacšnupʌ's ñe'ŋbac, te'šejtya'a pʌ'najupʌ. Ñʌmiñajpa inʌc te'wʌ tumdumʌ jama te' templo-tʌjcʌquiu'yoyj, quiotjayajupʌ's ñʌy Hermosa Puerta. Quiojtyajpa inʌc tey wa'y wya'cu tiyʌ'iwʌ tʌjcʌyajpapʌcʌsi te' templo'ojmo. 3Quienu yʌ'wʌ's que maŋba tyʌjcʌyaju te' Pedro y te' Juan te' templo'ojmo. Y wya'cʌ'yu wa'y chi'yaju limosna. 4Pedro's, te' Juaŋji'ŋ ñique'nʌyaju, y ñʌjayu Pedro's: Nique'nʌtʌj. 5Pijche'ca te' ne'ŋyacšnupʌ's quiengʌpʌjcʌ'yaju y nʌ inʌc jyo'cu wa'y chi'yaju tiyʌ'iwʌ. 6Pero te' Pedro nʌmu: Ja'ndiyʌ ʌs mblata ni ʌs oro, pero ndiyʌ ʌs ijtu, te'wʌ'ʌsmij ndzi'pa. Nazarejtojmopʌ Jesucristo's ñʌquiʌsi tzu'cumʌ y ca'ŋʌ. 7Y jyascʌtʌjcʌyu chʌ'naŋbʌ quiʌ'cʌsi y yajtenaqui'mu. Pijche'ctij paquipʌjcu te' ñe'ŋbac y pyoquipac, 8tʌptongui'mu'c tenayu y ca'ŋnitzʌjcu. Y ca'ŋdʌjcʌyu ñe'cʌji'ŋda'm templo'ojmo, y tʌpwijtu'c inʌc wyʌcotzamba Dios. 9Y mumu pʌ'nis quieñaju jutz ca'ŋba y wyʌcotzamba Dios. 10Ispʌquiajpa inʌc que te'wʌte' inʌc pocspa wa'y wya'cu templo's tyʌjcʌquiu'yoyj, quiotjayajupʌ's ñʌy Hermosa Puerta. Jopi'tyaju y maya'yaju yʌ'še'a quiʌtʌcjayu'c te' ne'ŋyacšnupʌ.

Tzamgopu'ŋoyu Pedro Salomo'ŋis šetzecʌsi

11Tey inʌc nuctzo'ŋajpa Pedro y Juaŋgʌsi te' tzojcupʌ, te' yacšnupʌ's inʌc ñe'ŋbac. Pijche'ctij quiʌ'miñaju cumgupyʌ'nis te' ñʌjayajpapʌ Salomo'ŋis šetze'oyj, y jowya'pʌ'yaju. 12Yʌ'še'a quienu'c Pedro's, ñʌjayu te' pʌnda'm: Israel-pʌnda'm, ¿tiyajca' nʌmaya'tamba yʌ'wʌ? ¿Y tiyajca' tʌj ŋguengʌpʌctamba? ¿Ngomʌ'ytyambaja que tʌsyʌ' isaŋwʌ'ajcupyit o tʌs nwʌ'ajcupyit nʌtʌs nyajca'ŋu yʌ'wʌ? 13Te' Abrahán, te' Isaac, y te' Jacob, y te' eyata'mbʌ tʌ nwinata'mbʌ ndata's Diojsis yajqueju que mʌja'ŋbʌte' te' 'Yune Jesús. Y sunu'c chʌcʌpʌ'tʌ'ʌ Pilato's, mis ndzi'oquia'tamu y ñʌmdamumij wyi'naŋdʌjqui que ja'ne. 14Y jašundamʌmis yʌ' Masanbʌ y Justopʌ. Nwa'ctamumis wa'y chʌcʌpʌ'u te' yajca'opyapʌ. 15Nyajca'tamumis te' tzi'papʌ'stʌ iscuy-quenguy. Y te'wʌ yajwinsa'u Diojsis ca'yajupʌ'ojmoc, y te' ŋguenupʌ tiyʌtʌs, te'wʌtʌs ndzamba. 16Y yʌ' Jesujsis ñʌquiʌsipʌ wʌ'aŋjamgupyit yajtzojcu Jesujsis yʌ' pʌn nʌmis ŋguendamupʌ y ispʌctambapʌmis. Te' Jesujsistʌ tzi'tambapʌ wʌ'aŋjamgupyit, ijtu yʌ'wʌ's cota'nupʌ ša'sa'ajcuy mista'm nwi'naŋdʌjqui.

17Tʌwʌta'm, muspa'ʌs que como ja'nmis inʌc nʌctʌ'ytyame, te'cotoya nyajca'tamumis te' Jesús, mista'm y mista'm ŋgowi'na's. 18Pero te'šej chʌcwa'a Diojsis chamušej wina te' cha'maŋwa'oye'sta'm 'yaŋnacapit que maŋba inʌc tyoyapʌjcu te' Cristo. 19Te'cotoya, quipswitu'tamʌ y tzi'tamʌ ndzocoy Dios wa'y quiotocoyu mista'm ŋgowa. Tey jʌ'ʌ, nimeque'ctijmij maŋba ñchi'tamu tʌ Ngomi's te' sʌ'mnayupʌ itcuy, nu'cu'ca aŋsʌŋ. 20Y maŋba quiʌ'weju te' Jesucristo Diojsis, porque quiopiŋu wina te'wʌ mijcotoyata'm. 21Pero wiyuŋšej ijtu pyena wa'y teymʌ ijtu Jesucristo tzajpojmo hasta que nu'cpa te' aŋsʌŋ wa'y jyomecotzʌcpʌ'u mumutiyʌ. Porque te'šejte' chamu Diojsis cʌtʌquiajupʌ aŋsʌ'ŋojmo masanda'mbʌ cha'maŋwa'oye's 'yaŋnacapit. 22Y Moisejsis chamjayaju tʌta'm ndataj: Mista'm Ngomi Diojsis maŋbamij ŋguiʌ'wejaytyamu tza'maŋwa'oye mista'm nʌ'pin-dʌwʌ'ojmocpʌ jujcha' ʌj. Ñe'cʌ cʌmato'ŋʌytyamʌ tiyʌta'm mij ñchamjaytyamba. 23Y maŋba tyocoyoctujcu te' pʌ'nojmota'm jujche'ŋbʌ'nis ja'n quiʌmato'ŋʌyay yʌ' tza'maŋwa'oye. 24Y mumu tza'maŋwa'oye's chamyajupʌ tiyʌ desde te' Samuel y te' jʌsa'cta'mbʌ's, quiotzamyaju yʌ'ta'mbʌ jama. 25Mijta'm, tza'maŋwa'oye's mijyʌ' quiʌwo'mata'm, y nʌ'ittamumis te' Diojsis chamdzi'yajupʌ tiyʌ tʌta'm ndataj. Yʌ'šej chamjayu Diojsis te' Abrahán: Y misne' ŋgʌwo'mapit maŋba'ʌs nicomasa'nʌpyʌ'u mumu najsacopajcʌsipʌ pʌn. 26Mijcotoyata'm yajminu Diojsis te' 'Yune, y quiʌ'weju wina mi'ojmota'm wa'mij ñicomasa'nʌytyamu y wa'mij nyajtzactamu tumduma'ŋbʌn mista'm nyacha'cuy.

Currently Selected:

Hechos 3: ZCNT

Highlight

Copy