Hechos 12

Yajca'yaju te' Jacobo y šomyaju' te' Pedro

1Pijche'cta'm te' rey Herodejsis ñujcu y yacsnutzʌquiaju metza tuca'y te' tu'mʌquiu'yis quiowindzʌmbapʌ. 2Y yajca'u espadapit Jacobo te' Jua'ŋis 'yatzi. 3Y quienu'ca que ñʌ'omyaju judio'sta'm, yajnucʌtʌjque'tu Pedro. Yʌ'šej chʌjcu te' jamo'oyjtya'm wyi'quiajpa'c inʌc levaduratacapʌ pan. 4Y ñujcu'ca te' Pedro, quiojtu preso'mo y chi'oquiu'yaju yʌt-co-tumʌpʌ soldadocʌsi, wa'y quioqueñaju macšcu'y macšcu'ŋbʌn. Y cʌtʌjcu'cande' te' pascua-sʌŋ, sunbate' inʌc ñʌpujtu cumgu'yis wyi'naŋdʌjqui. 5Te'ya quioqueñaju Pedro te' šomyajumʌy. Pero te' tu'mʌquiuy tumʌtzocoy inʌc nʌ wya'coyaju Dioscʌsi ñe'cʌcotoya.

Pedro cotzojcu preso'moc

6Te' pitpʌ tzu'oyj maŋba'cmaj tyaŋbʌ'nʌmu wa'y ñʌpujtu Herodejsis, metzapʌ soldado's quiucmʌ inʌc ʌŋu Pedro. Y metzapʌ cadenapit inʌc si'nu, y te' coque'noyeta'm preso-tʌjcʌcu'yoyj inʌc ijtyaju wa'y quioqueñaju. 7Pijche'ca nu'cu tʌ Ngomi's 'yangeles, y sʌ'ŋjojpajcu te' preso'mo. Y pyi'quisu Pedro che'ŋna'ojmoc wa'y ša'u, y ñʌjayu: Tzu'cumʌ jʌnʌc. Y cuñaju te' cadenata'm ši'ñajupʌpit quiʌ'cʌsi. 8Y ñʌjayu te' angelejsis: Nimejcʌ nwin, y yamʌ nwacasnaca. Y te'šej chʌjcu. Y ñʌjaquie'tu: Mona nwin nu'soquiupyit, y co'ŋa'ʌj. 9Y pujtu'ca, maŋu 'yucaŋgʌ'y. Pero ja'n inʌc myusi juca wiyuŋšejte' te'šej nʌ chʌjcu angelejsis. Quiomʌ'yu juca quenetijte'. 10Quiʌtʌquiaju winapʌ y myetzo'mopʌ coque'noye, y miñaju te' tʌ'ŋgupyʌ puerta'ŋi pujtyajpamʌy wa'y myaŋyaju cumgu'yojmo. Y te' puerta ñe'cʌtij aŋwaju, y pujtyaju, y quia'ŋgucjaquiaju tumʌ jojtuŋ. Y tey chajcu ñe'cʌ te' angelejsis. 11Te'ya minu quipsoquiuy Pedro'sñe', y nʌmu: Wiyuŋšej yʌti'ʌs nʌctʌ'pya que Diojsisyʌ' quiʌ'weju 'yangeles wa'yʌj minu yajcotzojcu Herodejsis quiʌ'ojmoc y u'yʌj yacsnutzʌquiaju jujche'ŋ judio-pʌ'nis. 12Yʌ'še'a ñʌctʌ'yu'c, maŋu Maria's tyʌjcaŋʌ, tu'mʌyajumʌy inʌc wʌwʌ wa'y 'yoto'ŋʌyaju Dios. Yʌ' Maria's ijtu 'yune Juan, a'ŋʌyupʌ's ñʌy Marcos. 13Y quiocsu Pedro's te' portón, y pujtu tumʌ yomo-une ñʌjayajpapʌ inʌc Rode, minu 'yaŋdzoŋu. 14Ñʌctʌ'yjayu Pedro's 'yotowe, pero omapit jaya'aŋwa te' puerta, poytyʌjcʌyu jojmo y maŋu chamu que tey ijtu Pedro puerta'ŋi. 15Y ñe'cʌ'sta'm ñʌjayaju: Nguio'sawapʌmijyʌ'. Pero ñe'cʌ nʌmu: Wiyuŋšej tey ijtu. Pijche'ca nʌmyaju: 'Yangeleste'.

16Pero Pedro's más quiocsu te' portón. Y ya'aŋwajyaju'ca te' puerta quieñaju te' Pedro y jowya'pʌ'yaju. 17Y ñe'cʌ's chʌcjayaju seña quiʌ'pit wa'y ñumumñayaju, y chamgʌ'yu jutz tʌ Ngomi's ñʌpujtu preso'moc. Y nʌmu: Yajmustamʌ yʌ'šej Jacobo y te' atzita'm. Y tzu'cumu y maŋu eyapʌ luga'rojmo.

18Taŋbʌ'nʌmu'ctij, maya'aŋ wocwitu'cʌ'yaju soldadota'm wa'y quiʌ'aŋwa'cme'chaju Pedro. 19Pero mye'tztʌ'u'ca te' Herodejsis y japya'tʌ'ca, quiʌ'aŋwa'quiatʌju te' coque'noye, y quiojtu aŋgui'mguy wa'y yajca'yatʌju. Jʌsa'ca tzu'cumu Judea yʌ' Herodes, y wanajcu Cesarea'ojmo, y tzʌ'yu tey.

Ca'u Herodes

20Y Herodejsis jene nʌ inʌc qui'nisu Tiro y Sidoŋ-gumgu'yojmota'mbʌ. Pero ñe'cʌ'sta'm tumo'pyʌ quipsoquiuyji'ŋ quiʌ'miñaju te' Herodes. Y ñu'cšaju Blasto, te' re'yis 'yʌŋguytyʌc copujpawʌ's quiowi'na, wa'y te'wʌ's minu wya'cu wa'y yaju te' qui'nisoquiuy, porque te' re'yis inʌc ñajsojmoc minba cu'tcuy te' Tiro y Sidoŋ-gumguquiotoya. 21Y te' chamjayatʌjupʌ jamo'oyj wa'y tyu'mʌyaju, pijche'c tzi'nmequia'u te' Herodes rey-pyamapit y pocsu 'yaŋgui'mʌtʌjcu'yojmo, y tey chamneŋeca'mbʌ'u tiyʌta'm šunu. 22Y wejyajpa inʌc te' cumgupyʌn y nʌmyaju: Diojsisyʌ' 'yotowe, ja'nyʌ' pʌ'nisñe'. 23Pijche'ctij quiotjayu toya tʌ Ngomi's 'yangelejsis porque jawyʌcotzamʌ Dios. Y tza'nis quiu'tca'u.

Te' Bernabé y te' Saulo

24Pero wʌwʌ pʌ'nis nʌ inʌc pyʌjcʌchoŋjayaju tʌ Ngomi's chame y nʌ inʌc pyucšaju. 25Y tzu'cumyajque'tu Jerusale'ŋojmoc te' Bernabé y Saulo, chʌcta'ñaju'cande' te' yoscuy. Y ñʌmaŋyaju Juan, te' a'ŋʌyupʌ's inʌc ñʌy Marcos.

Currently Selected:

Hechos 12: ZCNT

Highlight

Copy