MATEO 8

Jesus la slekutes jtul kꞌaꞌel-chamel

1Kꞌalal koj tal ta wits te Jesuse, bayal genteetik tsꞌakliyot yuꞌun. 2Sok tijilaj tal ta stojol jtul winik te yichꞌoj kꞌaꞌel-chamele. La skejan sba ta sit te Jesuse. Jich a yal:

—Kajwal, te jichuk ya skꞌan awoꞌtan te ya akoltayone —xchi.

3Jich te Jesuse la skajanbe skꞌab ta sjol sok la yalbe:

—Jichuk. Ya xkolat ta chamel —xchi. Te kꞌalal la yal jich te Jesuse, lekub ta ora te stiꞌbalule. 4Te Jesuse la yalbe te winike:

—Ya kalbeyat, ma me machꞌa xꞌawalbe yaꞌi. Jaꞌ nax baan ta stojol te saserdotee. Akꞌa aba ta ilel yuꞌun. Sok ichꞌa bael te smajtan Diose jich te tutꞌil la yal ta mantal te Moisese. Jich me ya snaꞌbeyik sluwar te genteetike te lekubenix te achamele —xyut bael.

Jesus la slekutesbe te yaj-aꞌtel te statal-soltaroe

5Kꞌalal yipal ochel bael ta jtejklum Capernaum a te Jesuse, tijilaj tal ta stojol jtul statal-soltaro yuꞌun Roma. Tal skꞌambey pawor te Jesuse. 6Jich a yalbe:

—Kajwal, ay jtul kaj-aꞌtel te chawal ta swayib ta jna yuꞌun kꞌolbil xchial yok-skꞌab y ben oꞌol sba yuꞌun te skꞌuxule —xchi.

7La yal te Jesuse:

—Ya xba jlekutesbe te xchamel abi —xchi.

8Te statal-soltaroe la yal:

—Kajwal, kꞌax chꞌin ayon ta atojol ya kaꞌi. Jich ma xjuꞌ te ya xbaat ta jnae. Jaꞌ nax teme ya awal mantale, jich me ya xkol te kaj-aꞌtele. 9Jich te joꞌone, jaꞌ nax ayon ta xchꞌuunel mantal ta stojol te machꞌa tulan kuꞌune. Sok ay ta jkuenta te ya jpas ta mantal te soltaroetike. Teme ya kalbe te jtule: “Baan”, teme ya kute, ya xbajt. Teme ya kalbe te yane: “Laꞌ”, teme ya kute, ya xtal. Teme ay tut ya kaꞌbey spas te kaj-aꞌtele, jich ya spas —xchi te statal-soltaroe.

10Kꞌalal la yaꞌiybe sluwaril te Jesuse, bayal a aꞌabiyan yoꞌtan yuꞌun. Jich a yalbe te machꞌatik stsꞌakliyejik tale:

—Jamal ya kalbeyex: Ni jtuluk jtaoj ta Israel te jich xchꞌuunej yoꞌtan te spisil ya xuꞌ kuꞌune jich tutꞌil te winik to. 11Pe ya kalbeyex: Ay me bayal ya xtal ta slokꞌib kꞌajkꞌal sok te ba xchꞌay kꞌajkꞌal y ya xtal sjoyinik ta weꞌel te jꞌAbrahame, te jꞌIsaake, te Jacobe te ba ay ta mantal te Diose. 12Pero te machꞌatik skꞌoplal ya xꞌochik te ba ay ta mantal te Diose, jaꞌ me ya yichꞌik chꞌojel bael ta ijkꞌal kꞌinal. Teꞌ me ya xkꞌo yokꞌetay sbaik a, sok teꞌ me ya xkꞌo skꞌuxilan yeꞌik a —xchi te Jesuse.

13Te Jesuse la yalbe bael te statal-soltaroe:

—Baan, sujtan bael ta ana. Jich me ya spasbelat te tutꞌil xchꞌuunej awoꞌtane —xyut bael. Te tut ora a yal te Jesuse, jich ora kol te yaj-aꞌtele.

Jesus la slekutes ta chamel te smeꞌnial te jPedroe

14Bajt ta sna jPedro te Jesuse. Teꞌ kꞌo yil a te chawal ta swayib yuꞌun kꞌakꞌ te smeꞌniale. 15La xchechbe skꞌab, jicha kom te skꞌajkꞌale. Jich a jajch ta ora te meꞌele sok lijk ta makꞌlinwanej.

Jesus la slekutes bayal jchameletik

16Xꞌijkꞌubix a la yikꞌik tal ta stojol Jesus bayal ta jtul machꞌatik ay pukuj ta yoꞌtanike. Jujupꞌal nax skꞌop la slokꞌeslan te pukujetik te ay ta yoꞌtanike, y la slekutesbe xchamelik spisil te machꞌatik ayik ta chamele. 17Jicha kꞌot ta pasel te tut tsꞌibabil jilel yuꞌun te jꞌalwanej yuꞌun Dios te jꞌIsaias sbiil, te jich a yale:

“Stukel a yichꞌbotik bael te jchameltike, sok la xchꞌaybotik spisil te tut kꞌux ya kaꞌitike”, xchi me.

Te machꞌatik kꞌan stsakliyik te Jesuse

18Te Jesuse kꞌalal la yil te bayal genteetik te jumbil yuꞌune, jich a yal mantal te ya xkꞌaxik bael ta jejch mar. 19Ja tsꞌin to ay tijilaj tal ta stojol jtul maestro yuꞌun te mantaliletike. Jich a yal:

—Maestro, ya jkꞌan joyinat te bayuk ya xbaate —xchi.

20La sjakꞌ te Jesuse:

—Te soroetike ay snaik ta chꞌen, sok te teꞌtikil mutetike aylan xpechechik stukelik. Yan te Nichꞌanile ma sta ba ya xway kꞌael —xchi te Jesuse.

21Sok ay yan te nopojel te jich la yale:

—Kajwal, akꞌaon ba nailuk te ya xba jmuk jilel te jtate —xchi.

22Te Jesus la yalbe:

—Tsꞌakliyaon bael. Jaꞌ me aꞌ smuk te machꞌa pajal chamenik soke —xyut.

Jesus la skom te ikꞌe sok te spuersa jaꞌe

23Jich a mo ta barko te Jesuse. Te jnopojeletik yuꞌune la sjoyinik ochel. 24Te ba yolil mare tal tulan ikꞌ. Jich a kꞌan mukek ta jaꞌ te barkoe. Yan te Jesuse wayal stukel. 25Te jnopojeletik yuꞌune ba stijik jajchel. Jich a yalbeyik:

—¡Kajwal, koltayaotik! ¡Ya skꞌan smulotik jaꞌ! —la yutik.

26La yal te Jesuse: —¿Tut yuꞌun te ben xiꞌexe? Maꞌyuk tut xchꞌuunej awoꞌtanik ya kil —xchi.

Jich a stejkꞌan sba jajchel, la skom te ikꞌe sok te jaꞌe, y ben tsaꞌam a jil. 27Bayal aꞌabiyan yoꞌtanik yuꞌun te jnopojeletike. La yalik:

—¡Tut xan winikil a to, te tsꞌin ya xkom yuꞌun te ikꞌe y asta ya xchꞌuunbot smantal yuꞌun te mare! —xchiik.

Te Gadara-winketik te ay pukuj ta yoꞌtanike

28Te Jesuse lokꞌ kꞌoel te ba jejch mar te ba slumik te gadaraetike. Tal taek yuꞌun cheb winketik te lijkik tal ta kampusanoe. Te xchebalik ay pukuj ta yoꞌtanike. Lom bayal spuersaik. Maꞌyuk machꞌa ya xjuꞌ yuꞌun te ya xkꞌaxik te ba bee. 29Lijk awunikuk te winketike, jicha yalik:

—Jesus, ¿tuꞌun te tal awochintayotike?, jaꞌat te Xnichꞌanat Diose. ¿Me yuꞌun tal awilbajinotik te ma to sta skꞌaalele? —xchiik ta aw.

30Ay bayal chitametik te stsoboj sbaik ta weꞌel te chikan ta ilele. 31Te pukujetike la skꞌanbe pawor te Jesuse: —Teme ya alokꞌesotik baele, akꞌaotik ochel ta yoꞌtanik te chitametike —xchiik.

32Te Jesuse la yalbe:

—Baanik abi —xchi.

Jich te pukujetike lokꞌ ta yoꞌtan te winketike. Ba ochuk ta yoꞌtan te chitametike. Ora nax spisil te chitametike lijk animajuk ta koel. La xchꞌoj sbaik ochel ta yut jaꞌ. Teꞌ kꞌo sjikꞌtalanik jaꞌ a.

33Te jkanan-chitametike anik ochel ta jtejklum. Lijk spujkutesik ta alel spisil te tuti pasbot te winketik te lokꞌix pukuj ta yoꞌtanike. 34Jich a lokꞌik tal spisil te jtejklume, talik te ba ay te Jesuse. Te kꞌalal la yilike, la skꞌanbeyik pawor te yauk xlokꞌ bael ta ba slumalike.

Currently Selected:

MATEO 8: AMANNT

Highlight

Copy