MATEO 9

Jesus la slekutes jtul te machꞌa kꞌolbil xchial yok-skꞌabe

1Ta patil mo xan bael ta barko te Jesuse. Chaꞌkꞌax bael ta mar, chaꞌkꞌot xan te ba slumale. 2Ay jtul winik teꞌa te kꞌolbil xchial yok-skꞌabe xchoyojik tal ta kꞌabal-teꞌ ta stojol te Jesuse. Te kꞌalal la yil Jesus te tutꞌil xchꞌuunej yoꞌtanik te ya xlekuteswane, jich a yalbe te jchamele:

—Junuk awoꞌtan, jnichꞌan. Chꞌaybilix te amule —xchi.

3Ay maestroetik yuꞌun te mantaliletik teꞌa la yal ta yoꞌtanik te ya stoybakꞌoptay te Diose. 4Te Jesuse la snaꞌ te tut ya yal ta yoꞌtanike. Jich a yalbe:

—¿Tut yuꞌun te ma tsaꞌamuk te tut ay ta awoꞌtanike? 5¿Tut a te lek ta alel ya awaꞌiyik ta stojol te jchamele? ¿Me jaꞌ wan wokol te “Chꞌaybilix amul” te ya kute? ¿O jaꞌ wokol ya awaꞌiyik te “Jajchan, beenan” teme ya kute? 6Jaꞌ tsꞌin to ya me kaꞌbeyex awilik te tutꞌil ay tulan yaꞌtel yichꞌoj ta xchꞌayel mulil ta balmilal te Nichꞌanile —xchi te Jesuse.

Sok jich a yalbe te machꞌa kꞌolbil xchial yok-skꞌabe:

—Jajchan choya bael te akꞌabal-teꞌe, baan ta ana —xyut.

7Te machꞌa kꞌolbil xchial yok-skꞌabe jajch. Bajt ta sna. 8Kꞌalal la yilik te genteetike, xchiik yuꞌun. Lijk yalbeyik kola yal Dios yuꞌun te tutꞌil ay spoder aꞌbilik yuꞌun te genteetike.

Jesus la yikꞌ sjoyin te jMateoe

9Te Jesuse lokꞌ bael te ba jtejklume. Teꞌ kꞌo yil jtul winik a te jMateo sbiile. Teꞌ nakal te ba ya xtojot stojemal te tutike. Te Jesuse la skꞌopon:

—Laꞌ, tsꞌakliyaon —xyut.

Jajch bael te jMateoe. La sjoyin bael.

10Te kꞌalal yipal ta weꞌel ta na te Jesuse sok te jnopojeletik yuꞌune, ay bayal te jkꞌan-tojemaltik sok jmulawiletik tal sjoyinik ta weꞌel te Jesuse sok te jnopojeletik yuꞌune. 11Te kꞌalal la yilik te fariseoetike te jich yipal ta spasele, la sjojkꞌobe te jnopojeletik yuꞌune:

—¿Tuꞌun te ya sjoyin ta weꞌel te jkꞌan-tojemaletik sok te jmulawiletik te maestro awuꞌunike? —xchiik.

12Te kꞌalal la yaꞌi te Jesuse, jich a yal:

—Te machꞌatik lek ayike sok te machꞌatik bujtsꞌan kꞌinal ya yaꞌiyik sok te stiꞌbalulike, makꞌ xtuun yuꞌunik te jloktore. Jaꞌ nax puersa yuꞌunik jloktor te machꞌatik ayik ta chamele. 13Baan, nopaik te tut ya yal te Sjun Diose:

“Jaꞌ ya jkꞌan te ya xkꞌuxutaywanexe. Ma jaꞌuk ya jkꞌan te milbil jmajtane”, te xchie.

Ma jaꞌuk a tal kikꞌ te machꞌatik lek ta winikil ta skꞌopike. Jaꞌ a tal kikꞌ te jmulawiletike, jich me ya sujtes yoꞌtanik yuꞌun te smulike —xchi te Jesuse.

Tutꞌil ay te skomel weꞌelile

14Te machꞌatik stsꞌakliyejik te Juan Akꞌ-ichꞌjaꞌe talik ta stojol te Jesuse. Jicha tal sjojkꞌobeyik:

—Joꞌotik y sok te fariseoetike ben ya jkom jweꞌeltik. ¿Tuꞌun tsꞌin te makꞌ skom sweꞌelik te jnopojeletik awuꞌune? —xchiik.

15La yal te Jesuse:

—¿Me ya wan spas te ben triste ay te machꞌatik majanlanbil ta nupunele teme sjoyinej to sba sok te machꞌa ya xnujpune? Pero ya me sta yorail te ya xꞌikꞌot lokꞌel ta yolilik te machꞌa nujpunixe. Jaꞌ to me ya xlijk skom sweꞌelik a te jꞌil-nujpuneletike.

16“Te pakꞌ te kꞌaꞌixe maꞌyuk machꞌa ya spakꞌan ta achꞌ pak, porke te achꞌ pakꞌe ya stsꞌuj. Jich ya xchꞌiꞌ xan te kꞌaꞌ pakꞌe, y ya xmukꞌub xan a te xchꞌiꞌemale. 17Ni ma spas ta pulel te achꞌ bino ta nujkul te kꞌaꞌixe. Teme jich ya yichꞌ pulele, ya me xchꞌiꞌ te nujukule. Jich ya me xchꞌay te binoe sok te nujkule. Por eso ya skꞌan te achꞌ nujkꞌul ya yichꞌ pulel a te achꞌ binoe. Jich ya xtuun ta xcheꞌbal a —xchi te Jesuse.

Tutꞌil kol te yachꞌix Jairo sok jtul ants

18Te kꞌalal jich yipal ta yalel a te Jesuse, tal jtul juriyo winik te ay yaꞌtel ta statal yuꞌunike. La skejan sba ta yok sok la skꞌambe bayal pawor. Jich a yal:

—Te kantsil-nichꞌane jchamel to. Pero teme ya xtal akajanbe akꞌab tasjole, jich me ya xchaꞌkux xan —xchi.

19Jajch bael te Jesuse, la sjoyin bael te winike sok te jnopojeletike. 20Jaꞌ tsꞌin to ay jtul ants te ayix lajchayeb jaꞌbil te ma xkom te xchamel ya yile. Tijilaj bael ta spat te Jesuse, la spikbe te skꞌuꞌ-spakꞌe. 21Yuꞌun jich a yal ta yoꞌtan: “Te jaꞌuk nax ya jpikbe te skꞌuꞌ-spakꞌe, ya xlekubon a”, xchi ta yoꞌtan.

22Pero te Jesuse la sujtes sba, la skꞌeluy te antse. Jich a yalbe:

—Junuk awoꞌtan kantsil-nichꞌan. Te tutꞌil jich la achꞌuun ta awoꞌtane, jich kolatix —xchi. Mismo tiempo a kol te antse.

23Te kꞌalal kꞌotix ta sna te statal-juriyoetik, te Jesuse la yil te machꞌatik chapalix sok yamayik ta skꞌintayel te machꞌa ya xmujke, sok te genteetik te xꞌawlajan ta yokꞌetayele. 24La yal te Jesuse:

—Lokꞌanik bael, yuꞌun te achꞌixe ma chamenuk. Wayal nax —xyut. Te genteetike la stseꞌlayik te Jesuse. 25Te kꞌalal la stikonix lokꞌel a te genteetike, och bael te Jesuse. La xchechbe skꞌab, jicha jajch te achꞌixe. 26Ta spꞌejel estado pujk skꞌoplal te tuti kꞌot ta pasel yuꞌun te Jesuse.

Jesus la swikbey sit cheb choketik

27Te kꞌalal lokꞌ bael teꞌa te Jesuse, ay cheb choketik te la stsꞌakliyik bael. Lijk yawutayik:

—Kꞌuxutayaotik, jaꞌat te stsꞌumbalat te jDavide —xchiik.

28Te kꞌalal ochix ta na a te Jesuse, tijilaj tal ta stojol te choketike. Te Jesuse la sjojkꞌobe:

—¿Me achꞌuunejik te tutꞌil ya xjuꞌ kuꞌune? —xchi.

La yalik:

—Jich Kajwal, jchꞌuunejtik —xchiik.

29Te Jesuse la spikbe te sitike, sok jich a yalbe:

—Te tutꞌil jich xchꞌuunej awoꞌtanike jich me ya xkꞌot ta pasel —xchi. 30Jicha jam te sitike. Te Jesuse tulan a yaltalanbe bael:

—Ila me abaik, ma me machꞌa xꞌawalbeyik —xyut.

31Pero kꞌalal a lokꞌik bael tsꞌin a, lijk yalik bael ta spꞌejel luwar te tuti spas te Jesuse.

Jesus la slekutes jtul umaꞌ

32Ay machꞌatik la yikꞌik tal ta stojol Jesus jtul winik te ay pukuj ta yoꞌtan te ma xlokꞌ skꞌop yuꞌune. 33Te kꞌalal lokꞌix bael te pukuj yuꞌun te Jesuse, lijk kꞌopojuk ta ora te winike. Te genteetike lijk aꞌabiyanuk yoꞌtanik yuꞌun. Jich a yalik:

—Ni maꞌyuk ba kilojtik ta Israel jich tutꞌil to —xchiik yuꞌun.

34Pero te fariseoetike jich a yalik:

—Jaꞌ mero statal-pukuj. Jaꞌ yuꞌun ya xjuꞌ yuꞌun te ya slokꞌes te pukujetike —xchiik.

Te Jesuse la snaꞌbe yoꞌolil sba te genteetike

35Te Jesuse la yokliy spisil te mukꞌul jtejklumetike sok te chꞌin kolonyaetike. Nojpeswan ta sinagogaetik ta jujun jtejklum. La yaltalanbe te lek achꞌ kꞌop yuꞌun te ya xlijkix ta mantal te Diose. Sok la slekuteslanbe tutikuk nax chamelil te ay ta stiꞌbalulike sok spisil te tutik kꞌux ta aꞌiyele. 36Te Jesuse, kꞌalal la yil te genteetike, la snaꞌbe yoꞌolil sbaik, yuꞌun jich kꞌoemik a yil te tutꞌil karneraetik te maꞌyuk jkanantawanej yuꞌunike sok te oꞌolsbaik te juju-kojt ayike. 37Jich a yalbe te jnopojeletik yuꞌune:

—Bayal me te kꞌajoje. Yan te jkꞌajojetike maꞌyuk bayal. 38Jaꞌ yuꞌun kꞌanbeyaik te yajwal kꞌajoje aꞌ stikon ta aꞌtel te jkꞌajojetike —xchi te Jesuse.

Currently Selected:

MATEO 9: AMANNT

Highlight

Copy