LUCAS 3

Lijk yal skꞌop Dios ta tꞌantꞌan kꞌinal te Juan Akꞌichꞌjaꞌe

1Ayix kinse jaꞌbil ochem ta mukꞌ rey a te jTiberio Cesare, te Poncio Pilatoe jaꞌ ay ta gobiernoil ta estado Judea a, te jHerodese ay ta gobierno ta estado Galilea a, sok ay ta gobiernoil ta estado Iturea sok ta estado Traconite te Felipe, yitsꞌin te jꞌHerodese. Sok jaꞌ ay ta gobiernoil ta estado Abilinia te Lisaniase. 2Sok ay ta statal saserdote a te jꞌAnas sok te Caifase. Jaꞌ stiempo a kꞌoponot yuꞌun Dios ta tꞌantꞌan kꞌinal te Juan te xnichꞌan mam Zacariase. 3Te Juane la yokli spisil te tiꞌtiꞌjaꞌ Jordane. La yalbe spisil te genteetik te a me sujtes yoꞌtanik yuꞌun te smulike sok a me yichꞌik jaꞌ, yuꞌun jich me ya spasbot perdon yuꞌun Dios te smulike. 4Jich a kꞌot ta pasel te tut tsꞌibabil jilel yuꞌun te jꞌalwanej Isaiase:

“Ya me xjilk ta tulan kꞌop ta tꞌantꞌan kꞌinal, jich me ya yal ta kꞌop: ‘Chapbeyaik me sbe te Kajwaltike, toj me xꞌajamik te sbee.

5“A me yichꞌ butꞌel te ba lomajtike, sok a me yichꞌ pajel te ba butajtike. A me yichꞌ tojutesel te kurva beetike, sok a me yichꞌ pajel te ba nelajtike.

6“Spisil genteetik ya me yil ta sitik te tutꞌil ay kolel yuꞌun te Diose,’ xchi me ta kꞌop”, xchi te jꞌIsaiase.

7Ay bayal genteetik talik ta stojol te Juane yuꞌun kꞌan skꞌanik ichꞌjaꞌ. Jich a yaltalanbe:

—Te jaꞌexe jaꞌ stsꞌumbal kꞌoemex te jtiꞌawal chanetike. ¿Machꞌa kꞌa yalbeyex awaꞌiyik te ya xjuꞌ ya akoltay abaik lokꞌel te ba tulan kastigo te ya xtalixe? 8A me chiknajuk ta ilel ta awaꞌtelik te tutꞌil sujtemix awoꞌtanik yuꞌun te amulike. Ma me xꞌawalik: “Te joꞌotike stsꞌumbalotik Abraham”, ma me xchanik. Yuꞌun jamal ya kalbeyex te ya xjuꞌ yuꞌun te Diose te ya sujtes ta stsꞌumbal jꞌAbraham te tonetik to. 9Pajal kꞌoemex sok te teꞌetik te chapalix yechejul ta tsꞌetele. Spisil ta jwol teꞌ te ma tsaꞌamuk sit ya yakꞌe ya me yichꞌ tsꞌetel sok ya me yichꞌ chikꞌel ta kꞌajkꞌ —xchi te Juane.

10Jich te genteetike la sjojkꞌoyik:

—¿Tut ya skꞌan ya jpastik tem jiche? —xchiik.

11La sjakꞌ te Juane:

—Te machꞌa ay chaꞌlijk skꞌuꞌ-spakꞌe aꞌ yaꞌbe jlijkuk te machꞌa ni maꞌyuk yuꞌune. Jich euk te machꞌa ay tut ya sweꞌe ya skꞌan ya yaꞌbe te machꞌa maꞌyuk yuꞌune —xchi.

12Ay a tal skꞌanik ichꞌjaꞌ euk te jkꞌan-tojemaletik yuꞌun Romae. La sjojkꞌobeyik te Juane:

—Maestro, ¿Tut ya skꞌan ya jpastik euk te joꞌtike? —xchiik.

13Te Juane la yaltalanbe:

—Te tojemal ya akꞌanike ma me kꞌaxemuk ya akꞌanik te tutꞌil mantal awichꞌojike —xyut.

14Ay a laj tal soltaroetik. Tal sjojkꞌoyik euk:

—Jal tsꞌin joꞌotik, ¿tut ya skꞌan jpastik? —xchiik.

La sjakꞌtalanbe:

—Ma me machꞌa xꞌapojbeyik stutik yuꞌun ta akꞌajkꞌalik. Sok ma me xꞌalebeyik smul te machꞌa maꞌyuk tut spasoje. Teyukex me a te atojolik te ya yaꞌbelexe —xyut.

15Te genteetike la smaliy yilik machꞌa a te Juane, yuꞌun ya yal ta yoꞌtanik teme jaꞌix te Cristoe. 16Pero te Juane la yaltalanbe spisil te genteetike:

—Te joꞌon jaꞌ nax ya kaꞌbeyex awichꞌik jaꞌ ta jaꞌ nax. Yan te machꞌa ya xtale jaꞌ me ya yaꞌbeyex awikꞌik te Chꞌul Espiritue sok kꞌajkꞌ. Mas tulan yaꞌtel yichꞌoj stukel ke te joꞌone. Jichon ma xjuꞌ te ay tut ya jpas chꞌinuk ta skuentae, ni ya jkujan jba ta spolbeyel te yakꞌil swawe. 17Te machꞌa ya xtale jich kꞌoem te tutꞌil machꞌa xbichoj spala-teꞌ ta skꞌab te ya yikꞌabe lokꞌel skꞌaꞌpalel a te striwue. Patil ya skꞌej ochel ta yawil te sbakꞌe. Yan te skꞌaꞌpalele ya me xchikꞌ ta kꞌajkꞌ te ma xtupꞌ sbajtel kꞌinale —xchi te Juane.

18Jich a yal ta stojol te genteetike, sok ay to xan bayal te tuti yalbe ta stojolik ta skuenta te lek yachꞌil kꞌope. 19Sok la yalbe ta jamal smul te gobierno Herodese, yuꞌun la yikꞌ yinamin te yinam yijtsꞌin Felipee, te xHerodias sbiile. Sok la yalbe spisil te tutik ma tsaꞌamuk spasoje. 20Pero te jHerodese la sle xan smul a te tutꞌil ba yakꞌ ta prexo te Juane.

Te Jesuse aꞌbot yichꞌ jaꞌ

21Te kꞌalal yipal to ta yaꞌbeyel yichꞌ jaꞌ a te genteetik te Juane, tal skꞌan yichꞌ jaꞌ euk te Jesuse. Kalal yipal ta skꞌoponel Dios a te Jesuse, jam te chꞌulchane. 22Jicha koj tal te Chꞌul Espíritu ta stojol te Jesuse, chiknaj ta ilel jich tutꞌil te palomae. Sok ay a aꞌiyot kꞌop ta chꞌulchan te jich a yale:

—Jaꞌat Jnichꞌanat te ben kꞌuxat ta koꞌtane. Ben tsaꞌam koꞌtan awuꞌun —xchi.

Te antibo meꞌil-tatiletik te stsꞌumbal te Jesucristoe

23Kꞌalal ayix treinta jaꞌbil yaꞌbilal a te Jesuse, lijk ta aꞌtel. Kuybil te jaꞌ xnichꞌan te Josee. Jich skajalskaj te stsꞌumbale: 24Eli, Matat, Levi, Melqui, Jana, Jose, 25Matatias, Amos, Nahum, Esli, Nagai, 26Maat, Matatias, Semei, Jose, Juda, 27Joanan, Resa, Zorobabel, Salatiel, Neri, 28Melqui, Adi, Cosam, Elmadam, Er, 29Josue, Eliezer, Jorim, Matat, 30Levi, Simeon, Juda, Jose, Jonam, Eliaquim, 31Melea, Mena, Matata, Natan, 32David, Isai, Obed, Booz, Sala, Naason, 33Aminadab, Admin, Arni, Esrom, Fares, Juda, 34Jacob, Isaac, Abraham, Tare, Nacor, 35Serug, Ragau, Peleg, Heber, Sala, 36Cainan, Arfaxad, Sem, Noe, Lamec, 37Matusalen, Enoc, Jared, Mahalaleel, Cainan, 38Enos, Set, Adan, Dios.

Currently Selected:

LUCAS 3: AMANNT

Highlight

Copy