LUCAS 4
4
Te Jesuse tal ilbek yoꞌtan yuꞌun te pukuje
1Te Jesuse nojel ta yoꞌtan te Chꞌul Espiritue. Jil yuꞌun te ukꞌum Jordane, ikꞌot bael ta tꞌantꞌan kꞌinal yuꞌun te Espiritue. 2Kuarenta kꞌaal teꞌey a, sok ay ta ilel yoꞌtan yuꞌun te pukuje. Ni maꞌyuk a weꞌ te jich yipal kꞌaale. Ta patil aꞌbot wiꞌnal. 3Te pukuje jicha albot yuꞌun:
—Teme jich te jaꞌat Xnichꞌanat te Diose, albeya te tonetik to aꞌ kꞌajtajuk ta waj —xchi.
4La sjakꞌ te Jesuse:
—Tsꞌibabil ta Sjun Dios te “ma ta wajuk nax kuxulik te genteetike. Jaꞌ ya xkuxuyinik yuꞌun spisil te tut yaloj ta stiꞌ te Diose”, xchi me —xchi te Jesuse.
5Ikꞌot xan bael ta jol wits yuꞌun te pukuje. Tsꞌina ba aꞌbek yil spisil te stsaꞌamul te balmilale. 6Te pukuje la yal:
—Ya kaꞌbeyat ta akuenta spisil te stsaꞌamul skꞌulejal te balmilale, porke joꞌon ay ta jkuenta spisil. Joꞌon chikanon jtukel te machꞌa ya kaꞌbeye. 7Jaꞌ yuꞌun teme ya akejan aba ta jtojole, spisil awuꞌun ya xkꞌot —xchi.
8Te Jesuse la sjakꞌbe:
—Kꞌeja aba ta jtojol Satanas, porke tsꞌibabil jilel ta Sjun Dios: “Jaꞌ nax me ya akejana aba ta stojol te Kajwaltik Dios awuꞌune. Sok jaꞌ nax me xꞌawakꞌ aba ta mantaltesel yuꞌun stukel”, xchi me —xchi.
9Patil ikꞌot xan bael ta Jerusalen yuꞌun te pukuje. Jich ikꞌot moel ta jol templo te ba mas toyole. Jicha albot yuꞌun te pukuje:
—Teme jaꞌat Xnichꞌanat te Diose, chꞌoja aba koel liye. 10Porke tsꞌibabil ta Sjun Te Diose:
“Te Diose ya stikon tal te chꞌul angeletik yuꞌune, ya skanantayat y ya skoltayat. 11“Ya me xchoyat ta skꞌabik, jich me makꞌ xko kꞌaj awok ta ton”, xchi me
—xchi te pukuje.
12Te Jesus la sjakꞌbe:
—Sok jich ya yal euk te Sjun Diose: “Ma me xꞌawilbe yoꞌtan te Kajwaltik Dios awuꞌune”, xchi me —xchi.
13Kꞌalal ma sta tut ya yilbe xan yoꞌtan te Jesus te pukuje, jich a yijkitay jilel jun chebuk kꞌaal.
Te Jesuse la slijkes yaꞌtel ta Galilea
14Te Jesuse sujt bael ta Galilea ta skuenta spoder te Chꞌul Espiritue. Pujk skꞌoplal ta sjoylejal ta spisil te estadoe. 15Nojpeswan ta sinagoga ta jujun jtejklum, y spisilik ben jun yoꞌtanik yuꞌun.
Te Jesuse kꞌot ta jtejklum Nazaret
16Te Jesuse bajt ta jtejklum Nazaret te ba chꞌie. Ta skꞌaalel kuxo-oꞌtan bajt ta sinagoga jich te tutꞌil kꞌayem ta spasele, y la stejkꞌan sba ta yilel te Sjun Diose. 17Aꞌbot ta skꞌab te Sjun Isaias te antibo jꞌalwanej yuꞌun te Diose. La sjam te june, jaꞌ a sta ta ilel te tut tsꞌibabil jilele:
18“Te Espíritu yuꞌun te Kajwaltike julix ta jtojol, yuꞌun tsabilon ta yalel te lek achꞌ kꞌop ta stojol te meꞌbaꞌetike. Tikonbilon tal ta skoltayel te machꞌatik ay swokolik ta ajtal-oꞌtane. Sok tikonbilon tal yuꞌun tal kalbey tutꞌil ya xkolik ta libre te machꞌatik ayik ta prexoe, sok te ya jambe sitik te choketike, sok ya jkoltay te machꞌatik mosoimbile, 19sok te ya jpuk ta alel te yorailix kolel yuꞌun te Kajwaltike” xchi me,
—xchi ta yalel te Jesuse.
20La stsꞌus te jun te la yile, la yaꞌbey te machꞌa skanantayej te junetik yuꞌun te sinagogae, y la snajkan sba. Spisilik te machꞌatik ayik ta sinagogae la skꞌelubeyik sit te Jesuse. 21Te Jesuse lijk ta kꞌop, jich a yal:
—Te kꞌaal to jaꞌa kꞌotix ta pasel ta atojolik te tut la awaꞌibeyik sluwar te tsꞌibabil jilel ta Sjun te Diose —xchi.
22Spisilik lek skꞌoplal yuꞌunik te Jesuse, sok toj cham a yaꞌiyik yuꞌun te ben tsaꞌam te skꞌope. Sok la sjojkꞌobe sbaik:
—¿Me ma wan jaꞌuk te xnichꞌan Jose te winik to? —xchiik.
23Te Jesuse lijk yaltalanbe:
—Jich me ya awalbikon ta puersa: “Te tutꞌil ya akuy aba ta jpoxtawaneje, poxtaya aba atukel”, xchaex me. “Te tut la apas ta Capernaum te la kaꞌitike, jich me xꞌapas euk liꞌ ba alumale”, ya me awutikon —xchi te Jesuse.
24Sok la yaltalanbe:
—Jamal ya kalbeyex, ma xꞌakꞌot ta jkuenta ta slumal te machꞌa jꞌalwanej yuꞌun te Diose. 25Batsꞌi jich ya kalbeyex, ay bayal meꞌbaꞌ-antstik ta Israel te kꞌalal ay ta jꞌalwanej a te jꞌEliase, te kꞌalal maꞌyuk a yakꞌ jaꞌal oxeꞌ jaꞌbil sok olil y tal bayal wiꞌnal ta spisil balmilal. 26Pero te jꞌEliase ma teyuka tikonot bael te ba ay te meꞌbaꞌ-antstik te ayik ta Israele. Teꞌ tikonot bael yuꞌun Dios te ba sna jtul meꞌbaꞌ-ants te ay ta jtejklum Sarepta te nopol ay sok Sidon. 27Jaꞌ jich ekꞌa te kꞌalal ay ta jꞌalwanej te Eliseoe. Bayal machꞌa staoj kꞌaꞌel-chamel te ba Israele. Pero jtul nax te machꞌa lekutesote, jaꞌ nax te jNaamane te talem ta nasion Siriae —xchi te Jesuse.
28Kꞌalal la yaꞌiybeyik sluwar te jich a yal te Kajwaltike, laj ilin yuꞌun spisil te machꞌatik ayik ta sinagogae.
29Jajch stenik lokꞌel ta tiꞌ jtejklum te Jesuse. La yikꞌik bael ta mera jol wits, yuꞌun ta wits ay te jtejklume, yuꞌun teꞌ kꞌan xchꞌojik koel a. 30Pero te Jesuse kꞌax bael ta yolil te genteetike y bajt.
Jtul winik te ay pukuj ta yoꞌtane
31Te Jesuse koj bael ta jtejklum Capernaum te ay ta estado Galileae. Ta skaalel kuxo-oꞌtan la spꞌijuteslan te genteetike. 32Lom cham a yaꞌiyik yuꞌun te tuti yal ta pꞌijuteswaneje, yuꞌun jicha kꞌopoj te tutꞌil machꞌa yichꞌoj tulan yaꞌtele.
33Ay talem ta sinagoga jtul winik te ochem pukuj ta yoꞌtane. Tulan a awun:
34—Jesus Nazaret, ¿tut yuꞌun tal awochintayotike? ¿Meꞌn tal amilotik? Ya jnaꞌbeyat aba te jaꞌat te Chꞌul Nichꞌanat te Diose —xchi ta aw.
35Te Jesuse la skom ta kꞌop te pukuje, jich a yalbe:
—¡Chꞌenan! ¡Lokꞌan tal te ba yoꞌtan te winike! xyut.
Te winike chꞌojot ta lum yuꞌun te pukuje te ba yolil te genteetike, jicha lokꞌ ta yoꞌtan te winike. Maꞌyuk a ejchenaj jilel. 36Spisilik a xiꞌik yuꞌun, y lijk yalbe sbaik:
—¿Tut skꞌopil a to? Te winik to yichꞌoj yaꞌtel sok ay spoder yuꞌun slokꞌesel pukujetik, yuꞌun ya nax yal mantal y ora ya xlokꞌ —xchiik. 37Pujk skꞌoplal Jesus ta bayuk nax te ba estadoe.
Te Jesuse la slekutesbe xchamel te smeꞌnial te Simon Pedroe
38Lokꞌ tal ta sinagoga te Jesuse, bajt ta sna Simon. Te smeꞌnial te Simone ben tulan tabil ta kꞌajkꞌ. La skꞌambeyik pawor te Jesuse te yauk slekutesbe te skꞌajkꞌe. 39Te Jesuse la snijan sba, la skꞌelube sit, la skombe te skꞌajkꞌe, y ora lekub. Tsꞌina jajch te meꞌele, lijk ta makꞌlinwanej.
Te Jesuse la slekutes bayal jchameletik
40Te kꞌalal xchꞌayix a te kꞌajkꞌale, spisil te machꞌatik ay yaj-chamelike te tutikuk nax chamelil yichꞌojike la yikꞌik tal ta stojol te Jesuse. La skajanbe skꞌab ta sjol jujutul, jicha lekub te xchamelike. 41Sok lokꞌ pukujetik ta yoꞌtanik te machꞌatik ayik ta chamele. Awun te pukujetike:
—Jaꞌat Xnichꞌanat te Diose —xchiik ta aw.
Pero te Jesuse la skom ta kꞌop te pukujetike, yuꞌun snaꞌojik ta jaꞌ te Cristoe.
Te Jesuse la yal skꞌop Dios ta estado Galilea
42Kꞌalal sakubix a te kꞌinale, lokꞌ bael ta jtejklum te Jesuse. Bajt te ba jochol te luware. Pero te genteetike lijk sleik. Te kꞌalal la staik te ba aye, kꞌan skomik te manchuk ya xbajte. 43Pero te Jesuse la yaltalanbe:
—Puersa ya xba kal te ba jtejklumetik te lek achꞌ kꞌop yuꞌun Diose te ya xlijkix ta mantale, porke jaꞌ sluwar te tikonbilon tal yuꞌune —xchi.
44Jicha lijk yal bael te Jesus te lek achꞌ kꞌop ta sinagogailtik te ay ta spꞌejel estado Galileae.
Currently Selected:
LUCAS 4: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
