LUCAS 2

Jicha ayin te Jesuse

1Jaꞌ stiempo a te la yal mantal te mukꞌul rey César Agusto te ya yichꞌ pasel senso ta spisil te nasion yuꞌune. 2Jaꞌ primero senso te la spas te ay yaꞌtel ta gobiernoil ta estado Siria te Cirenio sbiile. 3Spisil genteetik puersa ba yakꞌ ta najkanel sbiilik te ba slumal te smeꞌ-statike. 4Jich te Josee lokꞌ bael ta jtejklum Nazaret te ay ta estado yuꞌun Galilea. Bajt ta Belen ta estado Judea, yuꞌun jaꞌ slumal te antibo rey David, sok jaꞌ stsꞌumbal jDavid te Josee. 5Teꞌ ba yakꞌ ta najkanel sbiil a sok te xMariae te trate ya xnujpun soke, te ayix tut staoje. 6Te tutꞌil ayik ta Belen ae, la sta skꞌaalel te ya xpajt yoꞌtan te xMariae. 7Teꞌ ayin a te xchꞌin ba-yale. La sbetsꞌ ta pakꞌ y la swayan ta yawil sweꞌel wakax, yuꞌun ma staikix ta majanel te lekil nae te ba ya xwaye.

Te chꞌul angeletike sok te jkanan-karneraetike

8Nopol ta jtejklum Belen ay jkanan-karneraetik. Spꞌejel ajkꞌubal yipalik ta skanantayel skarneraik ta stenle. 9Ora chiknaj tal ta stojolik jtul chꞌul ángel yuꞌun te Kajwaltike. Xlemet julel xojobil te Kajwaltik ta sjoylejal te ba ayike. Beno xiꞌik yuꞌun. 10Pero altalanbot yuꞌun te chꞌul ángele:

—Ma me xiꞌanik, porke ay me tut kichꞌojbeyex tal te ben tsaꞌam ya kalbeyexe. Ben me sniꞌ xꞌawaꞌiyik yuꞌun ta apisilik. 11Tsꞌin to nax a ayin te ba slumal jDavid te jkoltawane awuꞌunike, jaꞌ te Kajwaltik Cristoe. 12Jaꞌ seña xkꞌo awilik te alale te potsbil ta pakꞌ y wayal ta yawil sweꞌel wakax te ba sna te wakaxe —xchi te chꞌul ángele.

13Ora nax a chiknaj tal ta xujk te jtul chꞌul ángel bayal chꞌul angeletik yuꞌun te chꞌulchane. Yipalik ta skꞌayojinel te Diose, jich a yalik:

14“¡Ben tsaꞌam slekil te Dios te ay ta chꞌulchane! Ya yakꞌ bujtsꞌan kꞌinal ta balmilal ta stojol te machꞌatik ayik ta kꞌuxutayel yuꞌune”, xchiik.

15Kꞌalal laj sujt bael ta chꞌulchan te chꞌul angeletike, te jkanan-karneraetike lijk yalbe sbaik ta jujutul:

—Konik ta Belen abi. Yax ba kiltik te tut kꞌoemix ta pasel te la yalbotikix te Kajwaltike —xchiik.

16Jicha laj bajt ta ora. Y kꞌo staik te xMariae sok te Josee y sok te chꞌin alale te wayal ta sna wakaxe. 17Te kꞌalal la yilike lijk yaꞌabiyanbeyik te tuti altalanbot yuꞌun chꞌul ángel te skꞌoplal chꞌin alale. 18Spisil te machꞌatik la yaꞌibe sluware toj cham a yaꞌiyik yuꞌun te tuti yal te jkanan-karneraetike. 19Yan te xMariae spisil a snaꞌulan ta yoꞌtan sok la snopilan te tut kꞌoem ta stojole. 20Te jkanan-karneraetike kꞌalal sujtik baele la skꞌayojimbeyik slekilal te Diose yuꞌun te tuti yaꞌibeyik sluwarile sok te tuti yilik ta sitike. Yuꞌun spisil a kꞌot ta pasel te tuti altalanbot yaꞌiyike.

Te chꞌin alal Jesuse akꞌot ta stojol Dios ta templo

21Ayix waxkeb kꞌaal a te ayin te chꞌin alale, la yaꞌbeyik sirkunsision ta stiꞌbalul. Jesus a yaꞌbeyik sbiilin, jich te tut albil yuꞌun chꞌul ángel te xMariae te kꞌalal ma to ayuk tut staoj aye.

22Te kꞌalal kꞌaxix a te jayeb kꞌaal te ya skanantay sba, jich tutꞌil ya yal te mantal yuꞌun te jMoisese, la yikꞌik bael ta Jerusalen te alale yuꞌun ba yakꞌik ta stojol te Kajwaltike. 23Jicha kꞌo spasik, yuꞌun jich tsꞌibabil jilel ta smantal te Kajwaltike: “Spisil ba alal te ya xꞌayine teme kereme jaꞌ me yuꞌun te Kajwaltike”, xchi me. 24Jicha kꞌo yaꞌbeyik smajtan Dios te tut ya yal ta smantal te Kajwaltike, chikan teme chaꞌkojt purise o chaꞌkojt paloma.

25Ay jtul mamal te ay ta Jerusalen te Simeon sbiile. Toj ta mamalil, sok lek xchꞌuunej te Diose. Jun yoꞌtan yipal ta smaliyel te tut ora ya xkoltayot te jꞌisraeletike. Te Simeone joyimbil yuꞌun te Chꞌul Espiritue. 26Aꞌbot snaꞌbe sluwar yuꞌun te ma to xcham a te ya yilbe sit te Cristo te ya xtikonot tal yuꞌun te Kajwaltike. 27Jicha ikꞌot tal ta templo yuꞌun te Chꞌul Espíritu te mam Simeone te tut kꞌaalil a laj tal te smeꞌ-stat te alal Jesuse, tal spasbeyik te tut ya yal te mantaliletike. 28Te mam Simeone la spet te alale y la yalbe slekilal yaꞌtel te Diose. Jich la yal:

29—Te ora to Kajwal, kꞌotix ta pasel te tuti awalojbone. Jun koꞌtan xchamon joꞌon te awaj-aꞌtelone.

30Porke la kilix ta sit te tutꞌil ay te jkoleltik awuꞌune.

31Chapalix awuꞌun ta stojol spisil te nasionetike.

32Ya me sakub kꞌinal yuꞌun te ba ay te yan jtejklumetike, y ay me slekilal ya xkꞌot yuꞌun te jtejklum Israel awuꞌune

—xchi te mam Simeone.

33Te Jose sok te smeꞌ te Jesuse lom cham a yaꞌiyik yuꞌun te tuti yal te mam Simeon yuꞌun te alale. 34Te mam Simeone la skꞌambe bendision ta stojolik, sok la yalbe te xMaria te smeꞌ te alal Jesuse:

—Aꞌiybeya awaꞌi sluwar, ta skuenta te alal to ay me bayal te jꞌisraeletike ya xjim yuꞌun, y ay me bayal ya xtojob yuꞌun. Te alale jaꞌ seña yakꞌoj Dios te bayal machꞌa ya xpꞌajot yuꞌune. 35Ya mex chiknaj te tut ay ta yoꞌtanik te jujutule. Y te jaꞌate ya me xkꞌax awokol ta ajtal-oꞌtan yuꞌun. Jaꞌ me pajal kꞌoem sok ya awaꞌi te lowel ta puñale —xchi te mam Simeone.

36Sok ay jtul ants teꞌa te xꞌAna sbiile te jꞌalwanej yuꞌun te Diose. Jaꞌ yantsil-nichꞌan te Fanuele te stsꞌumbal Asere. Lom meꞌelix. Te kꞌalal bikꞌit to ae nujpun, pero ma jalaj sok te smamlale. Yal jukeb jaꞌbil a kuxuyin sok. 37Ayix 84 jaꞌbil yaꞌbilal a te jil ta biudae. Sil tiempo ay ta templo. Kꞌajkꞌal ajkꞌubal ay ta abatinel yuꞌun te Kajwaltike y ya skomilan sweꞌel ta skꞌoponel te Diose. 38Te kꞌalal yipal ta kꞌop a te mam Simeone, tal euk te xꞌAnae. La yalbe kola yal Dios yuꞌun te alal Jesuse. Sok la yalbe skꞌoplal te alal ta stojol spisil te machꞌatik yipal ta smaliyel te tutꞌil ya xkol te Jerusalene.

Sujtik bael ta Nazaret

39Kalal juꞌ yuꞌunik spasel spisil te tut ya yal ta smantal te Kajwaltike, jich a sujtik bael ta Galilea te ba slumalik, jaꞌ te jtejklum Nazarete. 40Yipal ta chꞌiel te alale y yipal ta yichꞌel spuersa, y yipal ta pꞌijubel. Y yichꞌoj bayal bendision yuꞌun te Diose.

Te chꞌin kerem Jesuse xkꞌotuk ta templo

41Te smeꞌ-stat te Jesuse kꞌayemik te jujun jaꞌbil ya xbajtik ta spasel kꞌin Pascua ta Jerusalen. 42Jich te kꞌalal lokꞌ lajchayeb jaꞌbil yaꞌbilal te Jesuse, bajtik ta il-kꞌin ta Jerusalen, jich tutꞌil kꞌayemik ta spasel te smeꞌ-state. 43Te kꞌalal kꞌaxemix cheꞌoxeb kꞌaal a te kꞌine, sujtik bael. Yan te chꞌin kerem Jesuse jil ta Jerusalen. Te smeꞌ-state makꞌ snaꞌ me teꞌ jil a. 44La skuyik te ay kꞌael ta yolil genteetik te Jesuse. Jicha beenikix bael jun kꞌaal a. Lijk sleik te ba sbersinatake y sok te machꞌatik ya xnaꞌbot sba yuꞌune. 45Pero ma staik teꞌa. Jicha sujtik bael ta Jerusalen, ba sleik tal.

46Ta yoxebal to kꞌaal a kꞌo staik ta templo nakal sok te maestroeetik yuꞌun te mantaliletike. Te Jesuse yipal ta yaꞌiyel te tut ya yalike sok ya sjojkꞌobeyik sluwar. 47Spisil te machꞌatik la yaꞌibeyik sluwar skꞌop te Jesuse, lom cham a yaꞌiyik, yuꞌun beno spꞌijil ta sjakꞌel te aꞌabiyeje. 48Te kꞌalal ilot yuꞌun te smeꞌ-state, la sjikꞌ yoꞌtanik yuꞌun. Jicha albot yuꞌun te smeꞌe:

—Jchꞌin kal, ¿tuꞌun te jich la apasbotik to? Te atate sok te joꞌone beno yajtal koꞌtantik ya jlejtikat —xchi.

49La sjakꞌ te Jesuse:

—¿Tuꞌun te ya aleikone? ¿Me yuꞌun ma xꞌanaꞌik te ya skꞌan ya kaꞌtelin te tut ay yuꞌun te Jtate? —xchi te Jesuse. 50Pero maꞌ snaꞌik te tuti altalanbot yuꞌune.

51Jich te Jesuse la sjoyin sujtel ta Nazaret. Jun yoꞌtan a xchꞌuun mantal ta stojolik. Te smeꞌe la snaꞌulan ta yoꞌtan spisil te tuti kꞌot ta pasele. 52Yanyan yipal ta chꞌiel te Jesuse, sok yanyan ta pꞌijubel. Yanyan yipal ta mukꞌubel slekil yoꞌtan ta stojol Dios sok ta stojol te genteetike.

Currently Selected:

LUCAS 2: AMANNT

Highlight

Copy