JUAN 9
9
Te Jesuse la slekutes jtul winik te chok a ayine
1Te kꞌalal yipal kꞌael ta kꞌaxel ta jun luwar a te Jesuse, la yil jtul winik te chok ayineme. 2Te jnopojeletik yuꞌune la sjojkꞌobeyik:
—Maestro, ¿tut yuꞌun te chok a ayin te winik to? ¿Me jaꞌ smul te state o stukel ta smul? —xchiik.
3Te Jesuse la sjakꞌtalanbe:
—Ma ta skajuk smul, ni ma ta skajuk smul te smeꞌ-state. Yuꞌun nax jich ya xꞌakꞌot ta ilel te tut ya xjuꞌ ya spas a te Diose. 4Te tutꞌil ayotik to ta kꞌajkꞌaltike, puersa me ya jpasbe yaꞌtel te Machꞌa la stikonon tale. Yuꞌun ya xꞌijkꞌub te kꞌinale, te kꞌalal maꞌyukix machꞌa ya xꞌaꞌtej ae. 5Te tutꞌil liꞌto ayon ta balmilale, joꞌon sakil kꞌinalon yuꞌun te genteetik ta balmilale —xchi.
6Laj yoꞌtan ta yalel a to, te Jesuse la stubutay koel te lume. La spas ta ajchꞌal te yaꞌlel stiꞌe, y la sbekbe ta sit te choke. 7Te nax a la yalbe:
—Baan, ban poka asit lum ba estanke yuꞌun Siloe sbiile —xyut. Te Siloee, “Tikonbil”, xchi kꞌoem.
Te choke bajt ba spokel sit, y te kꞌalal sujt baele ya yilix kꞌinal a. 8Te sbersinatake sok te machꞌatik ilbil yuꞌun te ya xkꞌanbaje la sjojkꞌobe sbaik:
—¿Me ma wan jaꞌuk te ya snajkan sba ta kꞌanojel to? —xchiik.
9Ay yan la yalik:
—Jaꞌ a nix a —xchiik.
Te yane la yalik:
—Manchuk me pajal sok, pero ma jaꞌuk —xchiik.
Pero stukel mismo la yal sba:
—Joꞌon a nix a —xchi.
10Jich a sjojkꞌobeyik:
—¿Tutꞌil ay te ya awilix kꞌinale? —xyutik.
11Te winik la sjakꞌtalanbe:
—Jaꞌ te winik te Jesus sbiile la spas ajchꞌal, sok la sbekbon ta jsit, y la yalbon: “Baan lum ba estanke yuꞌun Siloe y poka asit”, xyuton. Boon, y te kꞌalal la jpok jsite, jich a kil kꞌinal —xchi.
12Jich a sjojkꞌobeyik xan:
—¿Ba ay te winik ya awale? —xchiik.
Te winike la yaltalanbe:
—Ma jnaꞌ ba ay —xchi.
Te fariseoetike la sjojkꞌobeyik tutꞌil a lekub te site
13La yikꞌik bael ta stojol fariseoetik te machꞌa jambot sit yuꞌun te Jesuse. 14Skꞌaalel kuxo-oꞌtan a te la spas ajchꞌal te Jesuse sok te la sjambe sit a te choke. 15Te fariseoetike la sjojkꞌobeyik tutꞌil ay te ya yilix kꞌinale. La sjakꞌtalanbe:
—La yaꞌbon ajchꞌal ta sit, y la jpok te jsite, y jich a kil kꞌinal —xchi.
16Ay chaꞌox tul fariseoetik te la yalbeyike:
—Te machꞌa jich a spas to ma ta skuentauk Dios, porke ma xyakꞌ ta jkuenta te skꞌaalel kuxo-oꞌtane —xchiik.
Pero te yane la yalik:
—¿Tutꞌil ya xjuꞌ yuꞌun spasel te seña milagroetik teme jmulawile? —xchiik.
Jich maꞌyuk akuerdo a kꞌot yuꞌunik. 17La sjokꞌobeyik xan te machꞌa chok te nail toe:
—Jal tsꞌin jaꞌate, ¿tut xchat yuꞌun te machꞌa la sjambeyat asite? —xyutik.
Te machꞌa jamenix site la sjakꞌ:
—Te joꞌone ya kal te jaꞌ jꞌalwanej yuꞌun te Diose —xchi.
18Pero te juriyoetike maꞌ skꞌan xchꞌuunik teme jaꞌa nix a te chok te nail toe te ya yilix kꞌinale. Jaꞌ yuꞌun ba yikꞌbeyik tal te smeꞌ-state, 19y la sjojkꞌobeyik:
—¿Me jaꞌ anichꞌan to te ya awalik te chok a ayine? ¿Tutꞌil ay a te ya yilix kꞌinal te ora to? —xchiik.
20Te smeꞌ-state la sjakꞌtalanbey:
—Jnaꞌojtik te jaꞌ kal jnichꞌantik te chok a ayine. 21Pero ma jnaꞌtik tutꞌil ay te ya yilix kꞌinal te ora to, y ni ma jnaꞌtik machꞌa jambot sit yuꞌun. Jojkꞌobeyaik stukel, porke winikix. Stukel ya yalbeyex tutꞌil ay —xchiik.
22Te smeꞌ-state jich a yalik yuꞌun xiꞌik yuꞌun te juriyoetike. Jaꞌ yuꞌun te juriyoetik snopojikix te ya xchꞌojik lokꞌel ta sinagoga machꞌauk a teme ya yal te jaꞌ Cristo te Jesuse. 23Jaꞌ sluwar te la yalik te smeꞌ-state: “Jojkꞌobeyaik awaꞌi stukel, porke winikix” te xchiike.
24Te juriyoetike la yikꞌik xan tal te winik te machꞌa chok nail toe, y la yalbeyik:
—Albotik jamal ta stojol Dios te machꞌa la sjambeyat te asite. Te joꞌotike jnaꞌojtik te jmulawil te winik ya awale —xchiik.
25Te machꞌa jamenix site la sjakꞌtalanbe:
—Te joꞌone ma jnaꞌ me jmulawil o ma jmulawiluk. Jaꞌ nax ya jnaꞌ te joꞌone te chokon te nail toe, pero te ora to ya kilix kꞌinal —xchi.
26La sjojkꞌobeyik xan:
—¿Tuti yut te la sjambeyat te asite? —xchiik.
27La sjakꞌtalanbe:
—La kalbeyexix, pero ma xꞌawakꞌik ta jkuenta. ¿Tuꞌun te ya akꞌanik te ya jchaꞌalonbeyexe? ¿Me yuꞌun ya akꞌan ya atsꞌakliyik euk? —xyut.
28Jicha lijk yutik te winike y la yalbeyik:
—Te jaꞌate jaꞌ atsꞌakliyej te winike, pero te joꞌotike jaꞌ sigue ya jtsꞌaklitik te jMoisese. 29Te joꞌotike jnaꞌojtik te Dios a kꞌoponot yuꞌun te jMoisese, yan te machꞌa ya awale, ni ma jnaꞌtik ba talem —xchiik.
30Pero te winik la sjakꞌtalanbe:
—Lom yan ya kaꞌi te ya awalik te ma xꞌanaꞌik ba taleme. Yan te joꞌone la sjambonix jsit. 31Lom lek ya jnaꞌtik te Diose ma xyaꞌibe skꞌop te mulawiletike. Jaꞌ nax ya yaꞌibe skꞌop te machꞌatik ya xchꞌuunik sok te ya spasbe te sboluntare. 32Maꞌyuk ba ya kaꞌitik xꞌalot ni jtuluk te ya sjambe sit te machꞌa chok ya xꞌayine. 33Te jichuk ma talemuk ta stojol Dios te winike, ma tut xjuꞌ yuꞌun spasel —xchi.
34Jich a altalanbot yuꞌunik:
—Te jaꞌate nojel ta mulil a ayinat. ¿Me yuꞌun ya akꞌan ya apꞌijutesotik? —xyutik. Y jich a stenik lokꞌel ta sinagoga.
Te machꞌatik chok ta stojol Dios
35Te Jesuse la yaꞌi te tenotix lokꞌel a te machꞌa chok ta nail toe. Te kꞌalal la sta sba soke, la sjojkꞌobe: —¿Me ya achꞌuun te Nichꞌanile? —xchi.
36Te winik la yal:
—Kajwal, albon machꞌa a, yuꞌun jich ya jchꞌuun —xchi.
37Te Jesuse la sjakꞌbe:
—Awilojix. Joꞌon te yipalat sok ta kꞌope —xchi.
38Jich te winike la skejan sba ta sit te Jesuse y la yalbe:
—Ya jchꞌuun, Kajwal —xchi.
39Te nax a la yal te Jesuse:
—Joꞌon te talemonix liꞌ ba balmilal to yuꞌun jich me ya xchiknaj a te machꞌa leke sok te machꞌa ma lekuke. Yuꞌun jich te machꞌatik chokike ya me yilik kꞌinal; y te machꞌatik ya yilik kꞌinal ta skꞌopike, ya me xlaj sujt ta chok —xchi.
40Ay chaꞌoxtul fariseoetik te teꞌeyik sok ae la yaꞌiyik te jich a yale. La sjojkꞌobeyik:
—¿Me yuꞌun wan chokotik euk te joꞌotike? —xchiik.
41Te Jesuse la sjakꞌtalanbe:
—Te chokukex te jaꞌexe, maꞌyuk amulik te jichuke. Pero ya awalik te ma chokukexe. Jaꞌ ma xchꞌay amulik yuꞌun —xchi te Jesuse.
Currently Selected:
JUAN 9: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
