JUAN 8
8
Te jkremiwejel antse
1Juju-tul a laj bajt ta sna, pero te Jesuse bajt ta wits Olivailtik. 2Te yan kꞌaal sakubix ta kꞌinal a chaꞌsujt bael ta templo. Te gentee laj tijilaj bael. La snajkan sba te Jesuse, lijk spꞌijuteslan. 3Te maestroetik yuꞌun te mantaliletike sok te fariseoetike jich a yikꞌik bael jtul ants te yipal ta kremiwejel a taote. La stejkꞌanik ta sitil komon ta yolil te machꞌatik teꞌelan ae, 4y la yalbeyik te Jesuse:
—Maestro, te ants to yipal ta kremiwejel a taot. 5Te mantaliletik kuꞌunik te la yaꞌbotik te jMoisese yakꞌoj mantal te ya yichꞌ milel ta wolel ta ton spisil te antstik te jich ya spase. ¿Tut xchat yuꞌun te jaꞌate? —xchiik.
6Te tutꞌil jich a yalbeyike yuꞌun ya yilbeyik yoꞌtan, yuꞌun jich ya slebeyik smul a. Pero te Jesuse la snijan sba koel, y lijk stsꞌiba ta lum sok yal skꞌab. 7Te tutꞌil sigue yipalik ta sjojkꞌoyele, te Jesuse jajch y la yaltalanbe:
—Machꞌauk a te jaꞌexe te maꞌyuk amulike, jaꞌa wakꞌ yaꞌbe ton nailuk te antse —xchi. 8Y la snijan sba xan koel y lijk stsꞌiba xan te lume.
9Kꞌalal la yaꞌiyik te tuti altalanbote, jtul ta cheb a laj bajt; jaꞌ primero a laj bajt te machꞌa mamalikixe. Jicha bajt spisilik, stukel nax a jil teꞌa te Jesuse sok te antse. 10Jajch te Jesuse sok la sjojkꞌobe tsꞌin te antse:
—Ants, ¿ba laj bajt te machꞌa ya slebeyat amule? ¿Me yuꞌun maꞌyuk machꞌa juꞌ yuꞌun te ya yakꞌat ta milele? —xyut.
11Te antse la sjakꞌ:
—Ni jtuluk, Kajwal —xchi.
Te Jesuse la yalbe:
—Jich te joꞌone, makꞌ kakꞌat ta milel. Ora to baan, y ma me mulawananix a —xyut.
Te Jesuse jaꞌ sakil kꞌinal yuꞌun te machꞌatik ay ta balmilale
12Te Jesuse chaꞌsujt xan bael te ba ay te gentee. Jich a yal:
—Joꞌon sakil kꞌinalon yuꞌun te genteetik ta balmilale. Te machꞌa ya stsꞌakliyone yichꞌojix te sakil kꞌinal te ya yakꞌ kuxlejale, y ni makꞌ xbeenix ta ijkꞌal kꞌinal —xchi te Jesuse.
13Te fariseoetike la yalik:
—Atukel nax ya awal aba akꞌoplal. Te tut ya awale ma baleuk —xchiik.
14Te Jesuse la sjakꞌtalanbe:
—Te tut ya kale bale stukel, aunke joꞌon nax mismo ya kal jba. Yuꞌun te joꞌone jnaꞌoj te ba talemone y jnaꞌoj te ba ya xboone. Yan te jaꞌexe ma xꞌanaꞌik ba talemon, y ma xꞌanaꞌik ba ya xboon. 15Te jaꞌexe jaꞌ nax lek skꞌoplal awuꞌunik te machꞌa lek ya awilike. Yan te joꞌone makꞌ ya kal te tut yilel te genteetike. 16Pero te tut ya kale, yuꞌun nanix batsꞌi jich a te tut ya kale. Porke te joꞌone ma joꞌukon nax te tut ya kale, yuꞌun jich ya yal euk te Tatil te la stikonon tale. 17Tsꞌibabil ta mantaliletik awuꞌunik teme pajal te tut ya yalik ta testigo, bale ya xkꞌot. 18Jich te joꞌone, joꞌon mismo testigoon yuꞌun te tut ya kale, y te Tatil te la stikonon tale jaꞌ jtul xan testigo —xchi te Jesuse.
19La sjojkꞌobeyik:
—¿Ba ay te atate? —xchiik.
Te Jesuse la sjakꞌtalanbe:
—Te jaꞌexe ma xꞌanaꞌbikon jba sok ma xꞌanaꞌbeyik sba te jTate. Teme ya anaꞌbikon jba te joꞌone, jich euk te jTate ya anaꞌbeyik sba —xchi.
20Te Jesuse jich a yal te kꞌalal yipal ta pꞌijuteswane ta templo te ba luwar ba yawil smajtan Diose. Pero ni jtul maꞌyuk machꞌa yal skꞌab ta stsakel, yuꞌun ma to xkꞌot yorail a.
Ay ba ya xbajt te Jesuse
21Te Jesuse la yal xan:
—Te joꞌone ya xboon, y te jaꞌexe ya xba aleikon. Pero akuchoj amulik ya xchamex. Te ba ya xboon te joꞌone, te jaꞌexe ma spas xbaex teꞌa —xchi.
22Te juriyoetike la yalbe sbaik:
—¿Me yuꞌun wan snopoj xba smil sba te ya yal te ma spas ya xbootik te ba ya xbajte? —xchiik.
23Te Jesuse la yaltalanbe:
—Te jaꞌexe liꞌiyex ba alane; pero te joꞌone lijkemon tal ta ajkꞌol. Te jaꞌexe skuenta balmilal ayex; pero te joꞌone ma skuentaukon te balmilal to. 24Jaꞌ yuꞌun la kalbeyex te akuchoj amulik ya xchamexe, porke teme ma xꞌachꞌuunik te batsꞌi ayon tutꞌil ya kale, akuchoj amulik ya xchamex —xchi.
25Jicha sjojkꞌobeyik:
—¿Machꞌaat a chee? —xchiik.
Te Jesuse la sjakꞌtalanbe:
—La kalbeyexix ta slijkibal to tal. 26Ay to bayal te tut ya kalbeyexe sok skꞌoplal te awaꞌtelike. Te Machꞌa la stikonon tale batsꞌi jich te tut ya yale, y te tut ya kalbe te genteetik ta balmilale, jaꞌ mismo te kaꞌiyej tal te tut ya yale —xchi.
27Pero ma yaꞌibeyik sluwar teme jaꞌ skꞌoplal te Tatile. 28Jaꞌ yuꞌun te la yaltalanbeye:
—Te kꞌalal toyol ya ajojkꞌanik te Nichꞌanile, te me ya anaꞌbonik jba a te joꞌon nanix ae. Sok ya me anaꞌik te ma joꞌukon ya kichꞌ ta koꞌtan te tut ya jpase; jaꞌ nax ya kal te tut yakꞌojbon jnop te Tatile. 29Porke sjoyinejon te Machꞌa la stikonon tale. Te jTate ma swolanejukon, porke jaꞌ ya jpas te tut lek yoꞌtan yuꞌune —xchi.
30Kꞌalal jich a yal te Jesuse, ben bayal machꞌa chꞌuunot yuꞌun.
Te yal xnichꞌan Diose sok te mosoetik yuꞌun te mulile
31Te Jesuse la yaltalanbe te juriyoetike te xchꞌuunejikixe:
—Te jaꞌexe teme jun awoꞌtanik yuꞌun te jkꞌope, batsꞌi jich te jnopojelex kuꞌun abi. 32Jich me ya anaꞌik te tut batsꞌi jiche, y te tut batsꞌi jiche ya me yakꞌex ta libre —xchi.
33La sjakꞌtalanik:
—Te joꞌotike jaꞌ stsꞌumbalotik te jꞌAbrahame, y maꞌyuk a ochotik ta mosoil asta te ora to. ¿Tutꞌil ay te ya awal te libre ya xkꞌootike? —xchiik.
34Te Jesuse la yaltalanbe:
—Jamal ya kalbeyex: Spisil te machꞌa ya xmulawe, jaꞌ mosoimbil yuꞌun te mulile. 35Te machꞌa ay ta mosoile maꞌyuk ba jmel nax staoj sna, pero te jtul nichꞌanile jmel nax staoj sna stukel. 36Jaꞌ yuꞌun teme ya yakꞌex ta libre te Nichꞌanile, te jaꞌexe batsꞌi libre me ya xkꞌoex yuꞌun. 37Jnaꞌoj te jaꞌexe jaꞌ stsꞌumbalex te jꞌAbrahame. Pero ya akꞌan ya amilikon, porke ma xꞌachꞌuunik te jkꞌope. 38Te joꞌone jaꞌ ya kal te tut yakꞌojbon kil te jTate; y te jaꞌexe jaꞌ ya apasik te tut yalojbeyex te atatike —xchi.
39Te juriyoetike la yalbeyik:
—Te joꞌotike ja jtatik te jꞌAbrahame —xchiik.
Pero te Jesuse la sjakꞌtalanbe:
—Te batsꞌi jichuk te xnichꞌanex te jꞌAbrahame, jich ya apasik te tutꞌil la spas te jichuke. 40Pero ya akꞌan ya amilikon, manchuk teme ya kalbeyex te tut batsꞌi jich snojpesejon te Diose. Te jꞌAbraham maꞌyuk a spas jich stukel. 41Te jaꞌexe jich mismo ya apasik te tut ya spas te atatike —xchi.
Te juriyoetike la yalbeyik:
—Te joꞌotike ma yuntikilukotik jmulawil ants. Ay jtul jTatik, jaꞌ te Diose —xchiik.
42Te Jesuse la sjakꞌtalanbe:
—Te batsꞌi jaꞌuk aTatik te Dios te jaꞌexe, kꞌuxon ta awoꞌtanik te jichuke. Porke te joꞌone talemon ta stojol Dios y liꞌ ayon to. Ma joꞌukon a jnop tal te talone. Jaꞌ a stikonon tal te Diose. 43¿Tut yuꞌun te ma xkꞌot ta awoꞌtanik te tut ya kalbeyexe? Yuꞌun ma xꞌakꞌanik ya awaꞌibikon sluwar te jkꞌope. 44Te atatik te jaꞌexe jaꞌ te pukuje; te jaꞌexe jaꞌ ya apasbeyik te tut ya skꞌan yoꞌtane. Te pukuje ja jmilaw kꞌalal ta slijkibal to tal. Makꞌ xtuun yuꞌun te tut batsꞌi jiche; maꞌyuk ya yal te tut batsꞌi jiche. Te kꞌalal ya sle lote, jaꞌ ya yal te tut stalel ay ta yoꞌtane. Porke loꞌlawane stukel y jaꞌ tatil yuꞌun te le-lote. 45Pero te joꞌone jaꞌ ya kal te tut batsꞌi jiche, y te jaꞌexe ma xꞌachꞌuunbikon. 46¿Me ay jtulukex te ya yakꞌ ta ilel te ay jmule? Teme ya kal te tut batsꞌi jiche, ¿tuꞌun te ma xꞌachꞌuunik teꞌ? 47Te machꞌatik yuꞌun te Diose ya yaꞌibe sluwar te skꞌop Diose. Pero ta skaj te ma yuꞌunukex te Diose, jich ma xꞌakꞌan xꞌawaꞌibeyik sluwar te skꞌope —xchi te Jesuse.
Te Cristoe stalel ayix te chiknaj te jꞌAbrahame
48Te juriyoetike jich a yalbeyik:
—Ay rason te ya kaltik te pajalat sok te samariaetike, y te ay pukuj ta awoꞌtane —xchiik.
49Te Jesuse la sjakꞌtalanbe:
—Ni maꞌyuk pukuj ta koꞌtan. Te tut ya jpase jaꞌ ya kakꞌ ta akꞌel ta jkuenta a te jTate. Yan te jaꞌexe ma baleukon ta awoꞌtanik. 50Te joꞌone ma yuꞌunuk ya jkꞌan akꞌel te jkuenta, pero ay Machꞌa ya skꞌan ya yakꞌon ta akꞌel ta jkuenta, sok stukel yichꞌojon ta jkuenta. 51Jamal ya kalbeyex, te machꞌa ya yakꞌ ta jkuenta te tut ya kale, sbajtel kꞌinal makꞌ xcham —xchi.
52Te juriyoetik la sjakꞌbeyik:
—Te ora to seguro ya jnaꞌtik te ay pukuj ta awoꞌtane. Te jꞌAbrahame sok spisil te jꞌalwanejetike chamik bael. Y te jaꞌate ya awal: “Te machꞌa ya yakꞌ ta jkuenta te jkꞌope makꞌ cham”, te xchate. 53¿Me yuꞌun wan jaꞌat mas kꞌaxemat ke te jtatik Abrahame? Cham stukel, y te jꞌalwanejetike laj chamik euk. ¿Jal tsꞌiin jaꞌate, machꞌa akuyoj aba a? —xyutik.
54Te Jesuse la sjakꞌtalanbe:
—Teme joꞌon nax ya jkꞌan ya kakꞌ jba ta akꞌel ta jkuentae, te tut ya kale ma baleuk ya xkꞌot. Pero jaꞌ ya yakꞌon ta akꞌel ta jkuenta te jTate, te jaꞌ mismo ya awalik te akuyojik te Dios awuꞌunike. 55Pero te jaꞌexe ma xꞌanaꞌbeyik sba; yan te joꞌone ya jnaꞌbe sba. Teme ya kal te ma jnaꞌbe sba, jich jle-loton euk ya xkꞌoon, jich tutꞌil te jaꞌexe. Pero batsꞌi jich te ya jnaꞌbe sbae, sok jaꞌ ya kaꞌbe ta jkuenta te skꞌope. 56Te jꞌAbraham, te antibo ameꞌ-atatike, ben jun yoꞌtan yuꞌun aꞌbot snaꞌ te ya xtalon ta balmilale. Y la yil te talone, y ben jun yoꞌtan a sujt yuꞌun —xchi.
57Te juriyoetike la yalbeyik te Jesuse:
—Ma to ayuk sinkuenta jaꞌbil awaꞌbilal, y ya awal te awilojix te jꞌAbrahame —xchiik.
58Te Jesuse la sjakꞌtalanbe:
—Jamal ya kalbeyex, te kꞌalal ma to ayuk a te jꞌAbrahame, jtalel ayonix a te joꞌone —xchi.
59Jich te juriyoetike la stamik ton yuꞌun kꞌan yaꞌbeyik te Jesuse, pero te Jesuse la snakꞌ sba y lokꞌ bael te ba temploe, y bajt.
Currently Selected:
JUAN 8: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
