JUAN 10

Te jkanan y sok te skarnerae

1Jich a yal te Jesuse:

—Jamal ya kalbeyex, te machꞌa ma ta tiꞌ koraluk ya xꞌoch te ba skoral te karneraetike, teme bayuk nax ya xꞌoche, jaꞌ me jꞌelekꞌ sok jꞌilbajinwanej abi. 2Pero te machꞌa ya xꞌoch ta tiꞌ korale, jaꞌ jkanan-karnera abi yuꞌun ya skanantay. 3Te jkanan-tiꞌ korale ya sjeꞌ te trankae, y te jkanane ya yikꞌ te juju-kojt te karnerae, ya sbiiltes, y ya xnaꞌbot sba skꞌop yuꞌun. Ya slokꞌes bael ta koral, 4y te kꞌalal lokꞌemix bael spisil ae, ya xnalaj bael te jkanane. Te karneraetike ya stsꞌakliyik bael, yuꞌun ya snaꞌbeyik sba te skꞌope. 5Yan teme ma jaꞌuk te jkanane, ma skꞌan stsꞌakliyik bael. Ya xlokꞌik ta anel, yuꞌun ma snaꞌbeyik sba te skꞌope —xchi te Jesuse.

6Jich a yal ta seña kꞌop te Jesuse, pero ma snaꞌbeyik sluwar te tuti yale.

Te Jesuse jaꞌ lekil jkanan

7Te Jesuse la yaltalanbe xan:

—Jaꞌ to jamal ya kalbeyex: Joꞌon te trankaon te ba ya xꞌoch te karneraetike. 8Spisil te machꞌatik nail a laj tal kuꞌune jꞌelekꞌetik y sok jꞌilbajinwanejetik. Pero te karneraetike maꞌ yakꞌik ta jkuenta. 9Joꞌon te tiꞌ korale. Te machꞌa ya xꞌoch ta jtojole ya me xkol. Jich me ya xkꞌot te tutꞌil jkojt karnera te ya xlokꞌ y ya xꞌoch te ya sta sweꞌele. 10Te machꞌa jꞌelekꞌe ya nax tal elkꞌajuk sok milwanuk sok ya xjimawan. Pero te joꞌone jaꞌ a talon yuꞌun te ya staik xkuxlejalike, yuꞌun jich me ben tsaꞌam ya sta xkuxlejalik.

11“Joꞌon te lekil jkananone. Te lekil jkanane ya yakꞌ sba ta milel yuꞌun te skarnerae. 12Yan te machꞌa jle-aꞌtel naxe, te kꞌalal ya yil xtal te teꞌtikil tsꞌiꞌe, ya xchꞌoj jilel te karnerae ya xlokꞌ ta anel, porke ma jaꞌuk te jkanane y ma yuꞌunuk te karnerae. Jich te teꞌtikil tsꞌiꞌe ya sitꞌes bael te karneraetike, y ya xpujke bael ta bayuk nax yuꞌun. 13Te machꞌa jle-aꞌtel naxe ya xlokꞌ ta anel, porke jle-aꞌtel nax, yuꞌun ma yocheluk te karneraetike.

14-15“Joꞌon te lekil jkananone. Jich tutꞌil te ya snaꞌbon jba te jTate y te joꞌone ya jnaꞌbe sba euk te jTate, jich euk te jkarnerae ya jnaꞌbe sba y ya snaꞌbikon jba euk te joꞌone. Te joꞌone ya kakꞌ jba ta milel yuꞌun te karneraetike. 16Ay xan yan karneraetik kuꞌun te ma to jaꞌuk skoral to, y puersa me ya kikꞌ tal euk. Jich me ya yaꞌibikon te jkꞌope, y jun nax me ya xlaj kꞌot, y jtul nax me jkanan ya xkꞌot yuꞌunik.

17“Te Tatile kꞌuxon ta yoꞌtan porke ya kakꞌ jba ta milel, yuꞌun jich me ya jchaꞌichꞌon xan te jkuxlejal jich tutꞌil te nail toe. 18Maꞌyuk machꞌa ya spojbon te jkuxlejale yuꞌun joꞌon mismo ya kakꞌ jba ta milel. Ya xjuꞌ ya kakꞌ jba ta milel sok ya xjuꞌ ya jchaꞌichꞌon xan te jkuxlejale. Jich spasojon tal ta mantal te jTate —xchi te Jesuse.

19Te kꞌalal la yaꞌiyik te juriyoetike te jich a kꞌopoje, jich maꞌyuk akuerdo a kꞌot yuꞌunik. 20Ay bayal te jich a yalike:

—¿Tuꞌun te ya awakꞌik ta jkuentae? Porke ya xjowiy, yuꞌun ay pukuj ta yoꞌtan —xchiik.

21Pero ay yan ya yalik:

—Te machꞌa ay pukuj ta yoꞌtane ma jichuk ya xkꞌopoj jich tutꞌil to. ¿Me ay wan jtuluk pukuj te ya sjambe sit te choketike? —xchiik.

Te juriyoetike la spꞌajik te Jesuse

22La sta yorail kꞌin ta Jerusalen te jaꞌ snaꞌojibal te tut ora a akꞌot ta stojol Dios te temploe. Jaꞌ stiempo a te ya xkomub kꞌaale. 23Te Jesuse ay ta templo teꞌey a ba skorredor Salomone. 24Jich te juriyoetike la sjoyin y la sjojkꞌobeyik:

—¿Jayeb xan kꞌaal te ya awakꞌ xꞌaꞌabiyan koꞌtantik awuꞌune? Teme jaꞌat te Cristoate, albotik ta jamal —xchiik.

25Te Jesuse la sakꞌtalanbe:

—La kalbeyexix te jaꞌexe, y ma la achꞌuunbikon. Te tut ya jpas ta skuenta te jTate jamal ya yakꞌ ta ilel. 26Pero te jaꞌexe ma xꞌachꞌuunik porke ma jkarneraukex jich tutꞌil te la kalbeyexe. 27Te jkarnera ya snaꞌbonik sba te jkꞌope, y te joꞌone ya jnaꞌbe sba, y ya stsꞌakliyikon. 28Te joꞌone ya kaꞌbe xkuxlejal sbajtel kꞌinal, y ni jaymel ya xchꞌay, ni maꞌyuk machꞌa ya xjuꞌ ya spojbon ta jkꞌab. 29Jaꞌ yakꞌojbon te jTate, sok jaꞌ mas mukꞌ ke spisil tut aye. Maꞌyuk machꞌa ya xjuꞌ ya spojbon lokꞌel ta jkꞌab. 30Te joꞌone sok te Tatile jun nax ayotik —xchi.

31Te juriyoetike la xchaꞌtamtalanik ton yuꞌun ya swolik ta ton te Jesuse. 32Pero te Jesuse la yaltalanbe:

—Ta spoder te jTate bayal a jpas te tutik lek ta asitike. ¿Tut a te ya awaꞌbikon ton yuꞌune? —xchi.

33Te juriyoetike la sjakꞌtalanik:

—Makꞌ kaꞌbetikat ton yuꞌun te tut lek apasoje. Jaꞌ ya kaꞌbetikat ton yuꞌun te tut ya awale te ya atoyba-kꞌoptay te Diose. Porke te jaꞌate winikat, y ya akuy aba ta Dios —xchiik.

34Te Jesuse la yaltalanbe:

—Te ba mantaliletik awuꞌunike, teꞌ tsꞌibabil a te tut ya yal te Diose: “te jaꞌex diosex”, xchi me. 35Y jnaꞌojtik te ma xjuꞌ ta chꞌayel te tut ya yal te Sjun Diose. Dios la yal te dios sbiilik te machꞌa ay ta skuenta te skꞌop Diose. 36Teme Dios a stꞌujon sok teme la stikonon ta balmilale, ¿Tut yuꞌun te ya awalbikon te ya jtoyba-kꞌoptay te Dios te la kal te xNichꞌanon Diose? 37Teme ma pajaluk sok yaꞌtel jTat te tut ya jpase, ma xꞌachꞌuunbikon. 38Pero teme jaꞌ yipalon ta spasele, aunke ma xꞌachꞌuunbikon te tut ya kale, jaꞌ ya xjuꞌ ya achꞌuunik a te tut aꞌtelil ya jpase. Yuꞌun te me ya anaꞌik a te jun nax ayon sok te Tatile, y te Tatile sjoyinejon —xchi te Jesuse.

39Jich kꞌan stsakik xan bael te Jesuse, pero kol bael ta skꞌabik. 40Te Jesuse sujt bael ta Jordan ta stojil ba xlokꞌ tal kꞌajkꞌale. Teꞌ jalaj a te ba luwar ba la yakꞌ ichꞌjaꞌ te nail to te Juane. 41Bayal genteetik a ba yilik, y la yalik:

—Te Juane maꞌyuk a spas seña milagroetik jich tutꞌil to; pero batsꞌi jich spisil te tuti yalbe skꞌoplal te winik to —xchiik. 42Y bayal a xchꞌuunik te Jesuse te ba luwar ba ayike.

Currently Selected:

JUAN 10: AMANNT

Highlight

Copy