JUAN 14

Te Jesuse jaꞌ sbeelel te ba ay te Tatile

1La yal xan te Jesuse:

—Ma me wakꞌ yajtal awoꞌtanik. Ja me xꞌachꞌuunik te Diose, y chꞌuunaikon me euk te joꞌone. 2Te ba sna te jTate ay bayal luwar te ba ya xꞌanexe. Te jichuk ma jichuke, makꞌ ya kalbeyex te ya xba jchap jun luwar awuꞌunike. 3Y ta patil teme boone, y teme chajpay te jun luware, ya me xchꞌatalon xan yuꞌun ya xtal kikꞌex bael. Jich te jaꞌexe teꞌ me ya xkꞌoex a te ba ya xkꞌoon te joꞌone. 4Te jaꞌexe ya anaꞌik te ba ya xboone y ya anaꞌik te bee —xchi te Jesuse.

5Te jTomase la yalbe te Jesuse:

—Kajwal, ma jnaꞌtik te ba ya xbaate. ¿Tutꞌil kꞌan jnaꞌtik te bee? —xchi.

6Te Jesuse la sjakꞌbe:

—Joꞌon te beone, y joꞌon te tut batsꞌi jiche, y sok te kuxlejale. Maꞌyuk machꞌa ya xkꞌot ta stojol te jTat teme ma joꞌukon ta jkuentae. 7Te jaꞌexe teme ya anaꞌbikon jbae, jich ya anaꞌbeyik sba euk te jTate. Te ora to ya anaꞌbeyikix sba, yuꞌun yipalexix ta yilel —xchi.

8Te Felipe jich a yalbe:

—Kajwal, aꞌbotik kiltik te jTatike, y teyotik abi —xchi.

9Te Jesuse la sjakꞌbe:

—Felipe, bayalix kꞌaal te joyinejexe. ¿Ma to ya anaꞌbikon jba? Te machꞌa la yilonixe, yilojix euk te jTate. ¿Tuꞌun te ya akꞌan ya kakꞌ awil te jTate? 10¿Meꞌn ma xꞌachꞌuun te jun nax ayon sok te jTate? Te tutꞌil ya kalbeyexe, ma joꞌukon jkꞌop te tut ya kale. Te jTat, te jun nax ayon soke, stukel yaꞌtel te ya spase. 11Chꞌuunaik te jun nax ayon sok te jTate. Teme ma xꞌachꞌuunike, jaꞌukix ya achꞌuunon ta skuenta te tut ya awilik ya jpase. 12Jamal ya kalbeyex: Te machꞌa ya xchꞌuunone jich me ya spas euk te tut yipalon ta spasele. Y mas mukꞌ xan tut ya spas stukel, porke ya xboon te ba ay te jTate. 13Y spisil te tut ya akꞌanik ta jbiile, ya me kaꞌbeyex. Yuꞌun jich me ya xchiknaj slekilal a te Dios Tatil ta skuenta te Nichꞌanile. 14Joꞌon ya kaꞌbeyex te tutik ya akꞌanik ta jbiile.

Te Jesuse la yal te ya stikon tal te Chꞌul Espiritue

15“Teme kꞌux ya awaꞌiyikone, ya achꞌuunik spisil te jmantale. 16Y joꞌon ya jkꞌanbe te jTate te ya stikonbeyex tal yan Joyinwanej te sil tiempo ya sjoyinex stukele, 17jaꞌ bi jaꞌ te Espíritu te ya yakꞌ ta naꞌbeyel sluwaril te tut batsꞌi jiche. Te machꞌatik ayik ta skuenta balmilale, ma xjuꞌ ya yikꞌik te Espiritue, porke ma xyilik y ni ma snaꞌbeyik sba. Pero te jaꞌexe ya anaꞌbeyik sba porke sjoyinejex, sok ya me xꞌayin ta awoꞌtanik sil tiempo. 18Makꞌ me jilesex atukelik. Ya xtal joyinex. 19Liꞌ xanix ta jtsꞌine, te machꞌatik ayik ta skuenta balmilale makꞌ me yilbikonix jsit. Pero te jaꞌexe ya to awilikon; y ya xkuxuyinex porke kuxulon. 20Te tut kꞌaalil te jich ya xkꞌot ta pasele, te me ya anaꞌbeyik sluwaril a te jun nax ayon sok te jTate y te jaꞌexe jun nax ayotik euk. 21Te machꞌa yichꞌojbon spisil te jmantale y teme ya xchꞌuune, te me ya xchiknaj a te batsꞌi jich te kꞌuxon ta yoꞌtane. Y te jTate ya xkꞌuxutay te machꞌa kꞌuxon ta yoꞌtane. Y te joꞌone ya me jkꞌuxutay euk, y ya me kakꞌ snaꞌbon jba —xchi te Jesuse.

22Te Judas, (te ma jaꞌuk te Iscariotee) la sjojkꞌobe:

—Kajwal, ¿Tuꞌun te ya awakꞌ aba ta ilel ta jtojoltike? ¿Tuꞌun ma jaꞌuk ya awakꞌ aba ta ilel yuꞌun te genteetik ta balmilale? —xchi.

23Te Jesuse la sjakꞌbe:

—Te machꞌa kꞌuxon ta yoꞌtane, ya yakꞌ ta jkuenta te jkꞌope, y kꞌux ya xꞌaꞌiyot yuꞌun te jTate. Y te jTate sok te joꞌone yax tal joyintik. 24Te machꞌa ma kꞌuxukon ta yoꞌtane, ma xyak ta jkuenta te jkꞌope. Te kꞌop te yipalex ta yaꞌiyel te jaꞌexe, ma joꞌukon kuꞌun; jaꞌ yuꞌun te jTat te Machꞌa la sikonon tale.

25“Jich me ya kalbeyex awaꞌiyik spisil to mientras joyinejex toe. 26Pero te Chꞌul Espiritue, te Joyinwanej awuꞌunike te ya xba stikon tal te jTat ta joꞌon jbiile, jaꞌ me ya yaꞌbeyex anopik spisil stukel, sok jaꞌ me ya yaꞌbeyex anaꞌik spisil te tut kalojbeyexe.

27“Teme boone, ya me kaꞌbeyex jilel te bujtsꞌan kꞌinale. Joꞌon ya kaꞌbeyex te butsꞌan kꞌinal ya awaꞌiyike: pero ma me pajaluk sok te machꞌatik ya yakꞌ te ayikta skuenta te balmilale. Ma me wakꞌ yajtal awoꞌtanik y ma me xiꞌanik. 28La me awaꞌiyikix te ya xboone y te ya xchaꞌtal joyinex xane. Teme batsꞌi jich te kꞌuxon ta awoꞌtanike, butsꞌanix kꞌinal ya awaꞌiyik te jichuke, porke la kalix te ya xboon te ba ay te jTate yuꞌun jaꞌ mas mukꞌ stukel ke te joꞌone. 29Nail a kalbeyex jilel yuꞌun jich me ya achꞌuunik te kꞌalal jich ya xkꞌot ta pasele.

30“Ma spasix te jal ya xꞌaꞌabiyanotike, porke talix te machꞌa ya spas mantal liꞌ ba balmilale. Maꞌyuk tut ya xjuꞌ te ya spasbon ta jtojole. 31Pero puersa me jich ya xkꞌot ta pasel, yuꞌun jich me ya snaꞌbe luwar a te genteetik te kꞌux ta koꞌtan te jTate y ya jpas te tut yalojbon tal ta mantale. Jajchanik, konikik liye —xchi te Jesuse.

Currently Selected:

JUAN 14: AMANNT

Highlight

Copy