JUAN 13

Te Jesuse la spokbe yok te jnopojeletik yuꞌune

1Pajel xanix ya xlijk a te kꞌin Pascuae. Te Jesuse snaꞌoj te kꞌotix yorail te ya sjiles te balmilal to, yuꞌun ya sujt bael te ba sTate. Te Jesuse sil tiempo kꞌux a yaꞌiy ta yoꞌtan te machꞌatik ay yuꞌun ta balmilale, y jich lom kꞌux ta yoꞌtan jaꞌto te kꞌalal bajte.

2-4Te pukuje ochemix ta yoꞌtan a te Judas, te xnichꞌan te Simon Iscariote, te snopoj ya yakꞌ entregal te Jesuse. Te Jesuse snaꞌoj te talem ta stojol Dios sok te ya sujtix bael ta stojol Diose, y snaꞌoj ta yoꞌtan te aꞌbilix tulan yaꞌtel yuꞌun te sTate. Jaꞌ yuꞌun te yipalik to ta weꞌel ta mexae, tejkꞌa jajchel, la slokꞌes te xkamixe y la xchuk ta xchꞌujt te jun toayae. 5Te nax a la skꞌeb jaꞌ ta jun basija y lijk spokbe yok te jnopojeletik yuꞌune, y la stakutesbe ta toaya te chukul ta xchꞌujte. 6Te kꞌalal kꞌan kꞌo spokbe yok te Simon Pedroe, jich a yal te jPedroe:

—Kajwal, ¿me jaꞌat wan ya apokbon te koke? —xyut.

7Te Jesuse la sjakꞌbe:

—Te ora to ma xꞌanaꞌbe sluwaril te tut ya jpase, pero ta patil ya anaꞌbe sluwaril —xchi.

8Te jPedroe la yal:

—Te joꞌone ma xkaꞌbeyat apokbon te koke —xchi.

La yal te Jesuse:

—Teme makꞌ jpokbeyate, ma spas te jun nax ya xkꞌootike —xchi.

9La yal te Simon Pedroe:

—Teme jich Kajwal, ma me jaꞌuk nax ya apokbon te koke, ya me apokbon jkꞌab sok jol —xchi.

10Pero te Jesuse la sjakꞌbe:

—Te machꞌa nuxemixe ma puersauk te ya xpokot xan skojtole. Tey a teme ya xpokbot te yoke, porke skojtolix sakuben. Y te jaꞌexe sakubenexix, aunke ma apisilikuk —xchi. 11Te tutꞌil jich a yal te Jesuse, yuꞌun snaꞌoj te ma spisilikuk te sakubenikixe, yuꞌun ya snaꞌ te machꞌa ya xꞌakꞌot entregal yuꞌune.

12Ta patil te laj yoꞌtan ta spokbeyel yok te jnopojeletike, te Jesuse la slap xan te xkamixe, ba nakluk xan ta snaktajib te ba mexae. Y la yaltalanbe:

—¿Me ya anaꞌbeyik sluwaril te tut la jpasbeyexe? 13Te jaꞌexe ya awalbikon: “Maestro” y “Kajwal”. Ay rason te jich ya awalike, yuꞌun joꞌon a nix a. 14Jaꞌ yuꞌun ya skꞌan ya apokbeya aba awokik jich tutꞌil te la jpokbeyex awokik te joꞌon te maestroon awuꞌunike sok te Ajwalilon awuꞌunike. 15Te joꞌone la kaꞌbeyex awilik jun ejemplo yuꞌun jich me ya apasik te tut la jpas la awilike. 16Jamal ya kalbeyex: Ni jtuluk aj-aꞌtelil te mas kꞌaxem yuꞌun te yajwale. Sok ni jtuluk te machꞌa tikonbil te jaꞌ mas kꞌaxem ta stojol te machꞌa tikonbil tal yuꞌune. 17Teme kꞌot ta awoꞌtanike, sok teme jich ya apasike, ben me tsaꞌam alekilik. 18Ma apisilikuk te jich ya kalbeyexe, yuꞌun jnaꞌoj te machꞌatik jtsaoje. Pero puersa me ya xkꞌot ta pasel te tut tsꞌibabil ta Sjun te Diose: “Te machꞌa jun nax ya xweꞌon soke, sujtix ta jkontra”, xchi me. 19Nail me ya kalbeyex, yuꞌun te kꞌalal ya xkꞌot ta pasele, jich me ya xchꞌuun awoꞌtanik te yuꞌun nanix joꞌon ae. 20Jamal ya kalbeyex: Te machꞌa ya yakꞌ ta jkuenta te machꞌa joꞌon ya jtikone, joꞌon a yakꞌonix ta jkuenta abi. Y te machꞌa ya yakꞌon ta jkuentae, jaꞌ a yakꞌix ta jkuenta euk te Machꞌa la stikonon tale —xchi te Jesuse.

Te Jesuse la yal te ya xꞌakꞌot ta entregal yuꞌun te Judase

21Patil te laj yal to te Jesuse, bayal a yakꞌ yajtal yoꞌtan, y jamal a lijk yal xan:

—Jamal ya kalbeyex: Ay jtul te jaꞌexe te ya awakꞌikon entregale —xchi.

22Te jnopojeletike lijk skꞌelube sba sitik, yuꞌun ni ma snaꞌik te machꞌa skꞌoplal te ya xꞌalote. 23Ay jtul te jnopojeletike te bayal skꞌanoj ta yoꞌtan te Jesuse te lotol ta weꞌel soke, 24y te Simon Pedroe la yaꞌbe yil ta xchꞌin seña ta sjojkꞌoyel machꞌa skꞌoplal te la yale. 25Jich te machꞌa ben lek yil sba sok te Jesuse tijilaj bael ta sjojkꞌoyel:

—Kajwal, ¿machꞌa wan a? —xchi.

26Te Jesuse la sjakꞌbe:

—Jaꞌ te machꞌa ya jmulbe xejtuk waj te ya kaꞌbe sweꞌe. Jaꞌ me abi —xchi.

Jicha smulbe xejt waj y la yaꞌbe te Judas te xnichꞌan Simon Iscariotee. 27Y te Judase ora stsak te waje y och Satanas ta yoꞌtan. Te Jesuse la yalbe:

—Te tut ya apase, pasa me ta ora —xyut.

28Pero ni jtul te machꞌa yipalik sok ta weꞌel ta mexae ma yaꞌibeyik sluwar tuꞌun te jich a yalbeye. 29Yuꞌun te Judas jaꞌ skanantayej te yawil stakꞌinike, jaꞌ yuꞌun la skuyik te ay tut ya yakꞌ xan tal ta manel te Jesuse yuꞌun te kꞌine, o yuꞌun ay tut ya yaꞌbeyik xan chꞌinuk te meꞌbaꞌetike. 30Te Judase stsakojix a te waje lokꞌ bael ta ora. Y ajkꞌubalix a.

Te achꞌ mantale

31Lokꞌemix bael a te Judase, te Jesuse la yal:

—Te ora to ya xꞌakꞌot ta ilel te slekilal te Nichꞌanile, y te slekil te Diose ya xchiknaj ta stojol. 32Teme jaꞌ te Nichꞌanile ya yakꞌ ta ilel slekilal te Diose, jich te Diose ya yakꞌ ta ilel slekilal. Y jich me ya xkꞌot ta pasel ta ora. 33Jchꞌin kuntikil, ma jalukix kꞌaal te joyinejexe. Te jaꞌexe ya aleikon, pero jich mismo te la kalbe te juriyoetike, ora to jich ya kalbeyex euk: Ma spas ya xbaex te ba ya xboone. 34Ya kaꞌbeyex te achꞌ mantal to: Te kꞌux me xꞌawaꞌi abaik ta juju-tule, jich te tutꞌil kꞌux a kaꞌiyexe, jich me kꞌux ya awaꞌi abaik ta juju-tul te jaꞌexe. 35Teme kꞌux ya awaꞌi abaik ta juju-tule, spisil genteetik ya me snaꞌik te jnopojelex kuꞌune —xchi te Jesuse.

Te Jesuse la yal te ya xmukot ta yoꞌtan yuꞌun te jPedroe

36Te Simon Pedroe la sjojkꞌobe te Jesuse:

—Kajwal, ¿ba ya xbaat? —xyut.

La sjakꞌ te Jesuse:

—Te ba ya xboone, te ora to ma spas ya atsꞌakliyikon bael. Pero ta patil ya me atsꞌakliyikon bael —xchi.

37Te jPedro la yal:

—Kajwal, ¿tuꞌun te ma spas ya jtsꞌakliyat bael te ora to? Dispuesto ayon te ya kakꞌ jba ta milel ta akaje —xchi.

38Te Jesuse la sjakꞌbe:

—¿Me jicha ya awal te dispuesto ayat te ya awakꞌ aba ta milel ta jkaje? Yuꞌun jamal ya kalbeyat: Antes ma to xꞌok a te tat kꞌoe, oxmelix la amukon ta awoꞌtan a —xyut.

Currently Selected:

JUAN 13: AMANNT

Highlight

Copy