Marcos 4
4
Ja nipë nyi''ijxpät
1Ënät jatëkok ja Jesús yaj'ijxpëjktso'ony mejypyë'am. Jä'ä ko ja ja'ay nëkooyë nyimay'ajnëtë mëti'ipë ojts ye'eymyuktën ma ja Jesús jamën, ënät tyëjkëy kepy nëëwinye'epyëjoty mëti'ipë ënäty japën nëëjoty. Ënät nyaaxwe'tsy ets ja mayjyä'äy wyë'ëmtaaytyë jam nëëpë'am. 2Jamts tyaj'ijxpëjky kanaakjëjp winë mëët ja ijxpäjtën.
Ma yaj'ijxpëkyën jëtu'un ja mayjyä'äy t'ënëmaay:
3Mëtowtë. Tu'uk ja ja'ay tsyo'ony tsajpmok wëjpë. 4Ko ja tsajpmokpajk ojts twëjjëtity, tu'kpëky ojts kyä'äy tu'ujotm. Ënät ja joon myiintë ets tpiiwmujktë. 5Jatu'kpëky ja tsajpmokpajk ojts kyä'äy tsaajotm ma ja naax ka'ap oy myäjpxyëtyën; yë'ë tsojk mujx jä'ä ko ka'ap ja naax myäjpxyëty. 6Ko y'aantäky, tääts ojts xyootsy ets ja tyitsy jä'äkyëjxm ko ja tyikts kyakëkëty. 7Jatu'kpëky ja tsajpmokpajk ojts kyä'äy äpny akujky. Ko ja äpny ojts yontë ojts nyi'a'ampety ets ja tsajpmok yon tyitsy, kä'äp tyëëmpejty. 8Jatu'kpëky ja tsajpmokpajk ojts kyä'äy jë'kxynyaaxjoty; jä'ä ojts oy yony ets tyëëmpejty. Tam mëti'ipë tyëëm yajkën i'px majk ja tu'ukpë ja tsajpmok yajnipyën, tam mëti'ipë tëkë'px tëëmpäjtën ets tam mëti'ipë mëko'pxën.
9Ko ja Jesús myëtyaktaay, tääts y'ënëmaayëtë ja mayjyä'äy:
Pën ja tyatsk tyukmëtoopy, wä'än tmëtoowkukë.
Tii ko ja Jesús myëtyä'äky mëët ja ijxpäjtën
10Ko ja Jesús ënäty jam yajpaaty mëët ja nimajkmäjtskpë ja y'ijxpëjkpëtëjk ets mëët ja wiinkëtypë mëti'ipë ënäty ja Jesús myëwinkon'ajtëpën, ënät tyajtëëwtë ja Jesús wi'ix nyiwijyën ja ijxpäjtën. 11Tääts ja Jesús y'ënëmaayëtë: Miitsëty tëë ja Tios mtuknijawëtë mëti'ipë ijty kayajnija'apën; temë mëti'ipë jëkäm yajpatëpën mëët ja ijxpäjtën winë yajtukmëmëtya'aktë. 12Jëtu'un ka'ap tja'akyukëtëty oy tii tja'ixtëty,
oy tii tjamëtowtë, ka'ap tmëtoowkukëtëty;
këtiipë jyootwinpitëty ma Tiosën ets ka'ap ja pyoky yajnimä'kxtëty.
Ko ja Jesús tkajpxtë'kxy ja nyi''ijxpät ma ja'ay nyi'ipyën
13Tääts ja Jesús tyajtëëy:
¿Ka'ap xyjyä'äkyukëtë ya'atë ijxpäjtën nyimëtyä'äkyë? ¿Wi'ix wiinkpë mëtyä'äky ijxpäjtënmëëtpë xyjyä'äkyukëja'antë? 14Mëti'ipë ja tsajpmokpajk wyijpyën, jëtu'un yë'ë ijxtëm ja ja'ay mëti'ipë ja Tios ja y'aaw y'ayuk kyajpxwä'kxypyën. 15Ja tëëmt mëti'ipë ka'ajën tu'ujotm, jëtu'un jä'ä ijxtëm ja ja'ayën mëti'ipë y'amëtoow'ijtëpën ja Tios ja y'aaw y'ayuk. Ko tmëtowtë, ënät ja mëjku'u ënätyë nyiminëtë ets pyëjkxëtë ja Tios ja y'aaw y'ayuk mëti'ipë të tjamëpëktën. 16Ja tsajpmokpajk mëti'ipë ka'ajën tsaajotm, jëtu'un jä'ä ijxtëm ja ja'ay mëti'ipë y'amëtoow'ijtëpën ja Tios ja y'aaw y'ayuk ets akujk jotkujk tkupëky. 17Jëtu'un jä'äjëty ijxtëm ja tsajpmokyonën mëti'ipë ka'ap tyiktsk kyëkëtyën. Ka'ap jeky y'ity jä'äkyëjxm ko ja Tios ja y'aaw y'ayuk tku'ëyo'onpatëtë ëkë yajpajëtijta'aktë ets ënätyë t'ëxmatstë mëti'ipë ënäty të tja'amëtoow'itën. 18Ja tsajpmokpajk mëti'ipë ka'ajën äpny akujky, jëtu'un jä'ä ijxtëm ja ja'ay mëti'ipë ja Tios y'aaw y'ayuk myëtoowtëpën, 19je'eyëp ko jä'ä myëmaay myëtajtëp wi'ixjaty yaa naaxwiiny ja ëyo'on jotmayën, ets ja meeny yajtukwin'ë'ëntë ets y'aaktsojktaaytyëp winë. Jëtu'unts ja Tios ja y'aaw y'ayuk ka'ap tyajwinkëxë'ëktë. 20E ja tsajpmokpajk mëti'ipë ka'ajën jë'kxynyaaxjoty, jëtu'un jä'ä ijxtëm ja ja'ay mëti'ipë ja Tios ja y'aaw y'ayuk y'amëtoow'ijtëpën ets tkupëktë ets tyajwinkëxë'ëktë ijxtëm ja tsajpmokpajkën tu'ukpë tyëëmpetyën i'px majk, tëkë'px ets mëko'px.
Ja kutë'kxn nyi''ijxpät
21Ënät ja Jesús jyaak'ënany:
Ko ja'ay ja kutë'kxn tyajtooypyiky, këjxm tyujkony ets jam kyutë'kxëty; ka'ap jap tpëjktä'äky kajjoonpa'tkë'p, ëkë maapäjn pa'tkë'p. 22Näyjyëtu'un, ka'ap tii yu'utsy'ity ka'apë yajnijawëtyën, të'kxy winë yajnija'awëtyä'äy. 23Pën myëët'ajtypyën yë tyatsk, wä'än tukmëtoy.
24Ets jyaak'ënany:
Mëmay mëtajtë yajxon pën tii mmëtoowtëp. Pën wi'ix ënäty miits ja'ay xytyuntë, näjyëtu'un ja Tios mtuna'anëtë. 25Pën tii myëët'ajtyp, jaaktimyajmo'ojaanp, ets pën tii wäänë myëët'ajtyp, jaaktimyajpëjkëjaanp.
Tsajpmokpajk nyi''ijxpät mëti'ipë mujxpën ets yoonpën
26Näyjyëtu'un y'ënäny:
Jëtu'un ja Tios ja kyutujkën ijxtëm ja ja'ay jyäjtyën ko ja tsajpmokpajk ojts twëjy naaxkëjxy. 27Maap ja ja'ay ets pyëti'iky tsojkyë, najxp ja xëëw tsuu, mujxp ets yoonp ja tsajpmokpajk je'eyëm. Ka'ap ja ja'ay tnijawë pën wi'ix myuxy ets yony, 28jä'ä ko ja aay ujts kë'ëm yë myäyë, jëwyiin ja nyikepy pyëtsimy, jam ja tyëëm tpëjktä'äky ets myëjay. 29Ko myëjay, ënät ja ja'ay nyëjkxtë ets tyajpëtë'ëka'antë ja pëjktä'äky jä'ä ko tëë ja nyixëëw nyipo'o tpaaty ets pyëtë'ëkëty.
Mostazëpajk ja nyi''ijxpät
30Näyjyëtu'un y'ënäny:
¿Tii mëtyä'äky ntukmë'ijxkijpxmëp ja Tios ja kyutujkën? 31Jëtu'un yë'ë ijxtëm ja mostazëpajkën. Nitii ujtspajk jëtu'un kyamutskëty ijxtëm yë'ëjën yaa naaxwiiny. 32E ko yajwëjy, tsuj yony, wäänë mëj yony këtiinëm ja wiink ujts. Yajxon mëj xyo'omwä'kxy, yë'ëpaat ja joon jap nyäpye'enyë ma ja xye'entyën.
Wi'ix ko ja Jesús yaj'ixpëky mëët ja ijxpäjtën
33Jëtu'un ja Jesús yaj'ijxpëjky mëët ja ijxpäjtën ijxtëm ya'atën, jëtu'un ijxtëm mëpaat naje'eyë yaja'akyukën. 34E xëmë ja Jesús ja ja'ay tyaj'ijxpëky mëët ja ijxpäjtën, ok ja y'ijxpëjkpëtëjk tukmëmëtyä'äky mëti'ipë jyatijpyën.
Ko Jesús tyajnaxy ja mëkpoj ets ja nëë tyajkëëy'awë
35Ko kyootsëjanë jä'ä xëëw, ënät ja y'ijxpëjkpëtëjk t'ënëmaay:
Oy nja'amëty jam nëë'awinm, mejypyë'am.
36Tääts ja ijxpëjkpëtëjk t'ëxmajtstë ja mayjyä'äy ets ja Jesús tyajtso'ontë kepy nëëwinye'epyëjoty, mëët ja wiinkëtypë ja kepy nëëwinye'epyë mëti'ipë panëjkxëtën. 37Ënät ja poj janty mëk myiiny ets ja nëë y'ëtëtstäky. Këjxm ja nëë jyänty jyä'ätsë'ëky ets kyujä'tsëy kepy nëëwinye'epyëjoty. Ujtspäjt ja kepy nëëwinye'epyë mëët ja nëë. 38Jamts ja Jesús ënäty myä'äy kepy nëëwinye'epyëjoty ix'am, tëë ënäty kyoy tpëjktä'äky. Ënät ja y'ijxpëjkpëtëjk ojts yuxyë ets y'ënëmaayë:
Wintsën. ¿Tii këtii xyjyawë ko nki'inëmë?
39Ënät ja Jesús pyëti'ky ets twinkukajpxëy ja poj ets ja mejy t'ënëmaay:
Mëtow, ka'ap myu'kxëty.
Ënät ja poj myoony ets tu'k'ityë ojts wyi'im. 40Tääts t'ënëmaay ja y'ijxpëjkpëtëjk:
¿Ti ko mtsë'ëkëtë, tii këtii mëpëktë?
41E ojts tsyë'ëkëtë, tääts nyäyajtëëwëtë nixim niyam:
¿Pën ja'ay tëy ya'atënë? Pojpaat ets mejypyaat myëmëtoowënë.
Currently Selected:
Marcos 4: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
