Marcos 5

Gerasa ja'ay mëti'ipë ku'oypyë myëët'ajtypyën

1Tääts tuknajxtë ja mejy ets jyajtë Gerasa nyaaxjoty. 2Ko ja Jesús pyëtsiimy kepy nëëwinye'epyëjoty, ënät ojts tu'uk ja ja'ay nyiminyë mëti'ipë tso'ompën ma ja o'kpë nyaaxtëkëtën, ku'oypyë ënäty myëët'ajtyp. 3Jam tsyëënë ma ja o'kpë nyaaxtëkëtën, Ni pën kyamayë kyë'ëtsumëtëty, ni pujxntejpxy mëët. 4Jä'ä ko tëë ënäty kanaak ok jyayajtsumy, ënätyë tukpotë tuknukë. Ni pën kyamayë. 5Xëmë muum yä'äxy jyoky xëënaxy tsunaxy, kopkëjxm ets ma ja o'kpë nyaaxtëkëtën ets ja tsaa kë'ëm nyätyukyajtsëtyutyë. 6Ko ja Jesús jëkäm t'ijxpaty, ënät ojts pëyi'ikyë tninëjkxy ets nyäkyoxtënaaytyakë. 7Tääts ayaxp ajojkp t'ënëmaay:

¿Tii mtsojkpy mëët ëjts? Tios ni'ik këjxmëpë y'u'unk. Nmënu'kxtäkpy mijts, tun ja mëyajtën Tioskëjxm, këtiis xyajjotkëxy.

8Jä'ä kyu'ëna'anëp, jä'ä ko tëë ënäty ja Jesús y'ënë'ëmxëty:

Ku'oypyë, ëxmats yë ja'ay.

9Tääts ja Jesús tyajtëëy:

¿Ti mxëëw'ajtyp?

Ets ja ku'oypyë y'ëtsooy:

Legiónkës nxëëwajtyp, jä'ä koos nimay'atë.

10Kanaak ok tmënu'kxtäky ja Jesús ets ka'ap kyäjxpëtsëmëtëty nyaaxjotm ma ënäty tsyëënëtën. 11Tam ënäty ja may ëtsëm jyë'kxtë kopkwinm. 12Tääts myënu'kxtakëtë ja ku'oypyë:

Käjxtëkës jam ma ëtsëmëtyën, wä'änës yë'ë ntuktëkëtë.

13Tääts ja Jesús tyajkutujky ets ja ku'oypyë t'ijxmajtstë ja ja'ay ets ja ëtsëm tuktëjkëtyë. Nimäjtsk milën ënäty ja ëtsëm jam. Jamts y'apëyë'knajxtë ja'aw ëkë'ëm ets nëëjoty kyëtaktaatyë. Japts jyi'kxtaaytyë.

14Mëti'ipë ja ëtsëm kyëwent'ajtëpën ojts kyäkta'atë ets ojts tnimëtya'aktë jam naaxjotm kajpnjotm mëti'ipë ënäty të tyuny të jyätyën. Tääts ja ja'ay tnitso'ontë ets t'ixa'antë tii të tyuny të jyätyë. 15Ko jyajtë ma ja Jesús jamën, ënät ojts t'ixtë ja ja'ay mëti'ipë ënäty të tmëët'atyën ja ku'oypyë, ko tam y'u'unyë xoxy pëky, tëë wyijnë kyäjnë. Ënät ja ja'ay tsyë'këtyë. 16Pënjaty ënäty të t'ixtën, ojts nimëtya'aktë wi'ix ënäty të jyäty të kyëpetyën ja ja'ay mëti'ipë të t'ëkmëët'ajtpën ja ku'oypyë ets wi'ix ënäty ja may ëtsëm të jyatën. 17Ënät ja Jesús tmëpëjktsoowtë ets jam tsyoonëty ma nyaaxjotëtyën.

18Ko ja Jesús wyimpijty kepy nëëwinye'epyëjoty, ënät ja ja'ay y'ënëmaayë mëti'ipë ja ku'oypyë ënäty të t'ëkmëët'ajtpën ko pyatsoona'anyë. 19Ka'ap ja Jesús tkupëjky, je'eyë t'ënëmaay:

Nëjkx ma mtëjkën, ninëjkx ja mjëëky mmëku'uk ets xytyuk'ëwaanëty ko tëë ja Tios mpa'ëyoyë.

20Tääts ja ja'ay ojts nyijkx ets tmëtyaakëtijty kajpn kajpn jam Decápolis y'itjotm wi'ix ja Jesús ënäty të yajtso'okyën. Ja ja'ayëty janty mëj ixy ojts t'ijxtë.

Jairo nyëëx ets ja to'oxytyëjk mëti'ipë tyoonën ja Jesús ja wyit

21Ko ja Jesús wyimpijty kepy nëëwinye'epyëjoty ets jyä'äjty jatëkok jam nëë'akëyë pë'am, ënät ja ja'ay janty nimay myujktë. 22Tääts ja ja'ay ojts tu'uk myiny mëti'ipë wintsën'ajtpën jam tsajptëkotm, Jairo xyëëwajtyp. Ko t'ijxpaty ja Jesús, ënät nyäkyoxtënaaytyakë jam Jesús wyintum. 23Ënät tmënu'kxtäky, jëtu'un t'ënëmaay:

Ookaanpës ja nnëëx. Mëta'ak jaamkoj timtyämyë ets xykyë'ënixajëty wä'än tso'oky ets jyaak juuky'atëty.

24Tääts ja Jesús ojts mëët nyijkxy ja Jairo. Nimay ja ja'ay ojts pyatsoonyë; yajxon y'atijmujkënë mayjyä'äy. 25Jamts ja to'oxytyëjk ënäty tu'uk mayjyä'äyjotm mëti'ipë pëjkëpën. Majkmäjtsk jëmëjt ënätynyë ma ja pyo'omayë pyatënën. 26Yajxon ënäty të tku'ëyo'owënë ja pa'am ko ja tsooy may tjë'kxnë, tëë ja myeeny ënäty tyajkëjxnë mëti'ipë myëët'ajtypyën ets nijënu'un kyatso'oky, ni'ikyë ja pya'am myëjtaknë. 27Ko ojts tmëtoy ko yajnimëtyä'äky ja Jesús, ënät tpamiiny ja mayjyä'äy ets ojts toonë ja Jesús ja wyit. 28Jä'ä ko jëtu'un ënäty myäy tyäjy: Mëët je'eyë koos ja Jesús ja wyit ntoonëty, tso'okëpës yë'ë. 29Ënätyë ja ne'pny y'ëtujky ets ja pya'am nyäjxy, tyimja'awëy kë'ëm ko ënäty të tsyo'oky.

30Tääts ja Jesús janty mëk tja'awëy ko tëë ja myëk'ajtën tyukpëtsëmyë, ënät ënätyë y'ijx'ëwëtijty ma ja mayjyä'äyën, ets ojts tyajtëy:

¿Pën yë nwitës të ttony?

31Ënät ja y'ijxpëjkpëtëjk y'ëtsoowtë:

M'ijxyp ko ja'ay m'atijmukyë xii yaa ets m'ëna'any:

¿Pën yës nwitës të ttony?

32E ja Jesús, ni'ikyë y'ijx'owëtity ets t'ixa'any pën ënäty të tyonyë. 33Ënät ja to'oxytyëjk tsyëyuuypyijky mëët ja tsë'ëkë, nyija'awëp tii tuunëp jajtëpën. Tääts ojts nyijkxy ets nyäkyoxtënaaytyakë ma ja Jesús ets tuk'ëwa'anëy ja tëyajtën. 34Tä ja Jesús t'ënëmaay ja to'oxytyëjk:

U'unk, paaty të mtso'oky jä'ä koos të xymyëpëky. Nëjkx akujk jotkujk ets tso'oky akëtä'äky xëmë m'itëty.

35Tam ënäty ja Jesús kyäjpxynyëm ko ja ja'ay jyajtë mëti'ipë tso'ontëpën ma ja Jairo ja tyëjkën. Tääts ja Jairo yajnëmaay:

Tëë ja mnëëx y'o'knë. ¿Tii nëkoo Wintsën xy'atsipy?

36E ka'ap ja Jesús tmëjpëjktäky ko jëtu'un y'ëna'antë. Tääts ja Jesús t'ënëmaay ja tsajptëkotyëtë wintsën:

Këtii mtsë'ëkë, je'eyëp ko mëpëky.

37Ka'ap t'a'ijxëy ets nimay pën pyanëjkxëtëty, yi'iyë wyoow Pedro, Santiagë ets Juan, yë Santiago y'uty. 38Ko jyajtë ma ja Jairo ja tyëjkën, ënät ojts t'ixy ko ja ja'ay nëkooyë nyä'ämnëtë ko ya'axtë. 39Tääts ja Jesús tyëjkëy tëkoty ets t'ënëmaay ja ja'ayëty:

¿Tii ko mnä'ämtë, ets mya'axtë? ka'ap yë kiixy u'unk të y'ooky, maap je'eyë.

40Ënät ja ja'ay ojts je'eyë tukxi'iktë ja Jesús, e yëë ojts tkäjxpëtsëëmta'ay ja ja'ay; ënät twoowë'ky ja u'unktaak, u'unkteety ets mëti'ipë ënäty jam mëëtëtyën ets tyëjkëtyë ma ja kiixy u'unk ënäty japën, 41ets ojts kyë'ëkëjxy twijtsë'ëky ets t'ënëmaay:

Talitá, cum, jä'ä nyiwijy: Kiixy u'unk, mijts n'ënëmääpy, pëtë'ëk.

42Tääts ja kiixy u'unk ënätyë pyëti'ky ets ye'eypyijky, jä'ä ënäty ja jyëmëjt majkmäjtsk. Ënät ja ja'ay janty mëj ixy t'ijxtë ets amonyë ojts tyimwë'ëmtë. 43Ja Jesús mëk'äämpy ojts tuk'ëne'emy ja ja'ayëty ets ka'ap pën tuk'ëwaanëtëty ko ënäty jëtu'un të tyuny të jyätyë ets ja u'unkteety u'unktaak yaj'ënëmaaytyë wä'än tyajkaytyë ja kiixy u'unk.

Currently Selected:

Marcos 5: QUETZMIXE

Highlight

Copy