Marcos 3

Ma Jesú tyajtso'okyën tu'uk yë pa'amja'ay sápëdë xëëw

1Tääts ja Jesús jatëkok tyëjkëy tsajptëkoty. Tap ënäty tu'uk ja ye'etyëjk mëti'ipë kyë'ëjën ooky tu'k'atu'um. 2Tap ja ja'ayëty mëti'ipë y'ijxtaaytyëpën ja winma'any pën tii y'ëktukni'ë'ënëtyëp ja Jesús, jä'ä nyijawëjantëp pën y'ëkyajktsokpy ja pa'amja'ay po'kxënxëëwjoty. 3Tääts ja Jesús t'ënëmaay ja ja'ay mëti'ipë kyë'ëjën ooky:

Pëtë'ëk, tänë jää itkujky.

4Tääts ja Jesús tyajtëëy mëti'ipë ënäty jamëtyën:

¿Mëpaat'ajtp po'kxënxëëwjoty ntu'unmëty ja oypyë ëkë ja ëxëëkpë, ko ja ja'ay nyajtsokmëty ëkë ko ja ja'ay nyaj'o'kmëtyë?

Amonyë ja ja'ay wyë'ëmtaaytyë. 5Tääts ja Jesús wyintë'kxëtë mëët yë joot'an ets moonp tujkp jä'äkyëjxm ko juun ja jyot wyinma'anyëty tpëjkta'aktë. Paaty t'ënëmaay ja ye'etyëjk mëti'ipë ënäty ja kyë'ëjën ooky:

Xajtëw.

Tääts ja ye'etyëjk xyajtëëy ets ja kyë'ë tsyoky. 6Ënät ye'epyëtsëëmtë ja fariseë ja'ayëty tsajptëkoty ets ënätyë tmëëtmëtyaktë ja Herodes ja jyä'äyëty ets tkäjpxy'ajtë wi'ix ja Jesús tyaj'ooktëtyën.

Ko Jesús tyajtso'oky ja mayjyä'äy mejypyë'am

7Tääts ja Jesús tsyo'ony mëët ja y'ijxpëjkpëtëjk ets ojts nyijkx mejy ëkë'ëm. Ënät may ja Galilea ja'ay pyanëjkxëtë. 8Ko tnija'awëtyë ja'ay mëti'ipë tyuunpy kyäjpxypën ja Jesús, tääts may ojts ninëjkxtë. Tam mëti'ipë tso'ontëpën Judea, Jerusalén, Idumea; tam mëti'ipë tso'ontëpën nëë'awinm ma Jordán mëjnëë nyäxyën ets tam mëti'ipë tso'ontëpën Tirë ets Sidón. 9Jä'ä ko ja ja'ay nyimayëty, paaty ja Jesús ojts t'ënëëmë ja y'ijxpëjkpëtëjk ets t'ëxta'atëty tu'uk ja kepy nëëwinye'epyë këtiipë mayjyä'äy y'atijmukëtëty, 10Jä'ä ko tëë ënäty kanaak tyajtso'oky ja ja'ay; jëtu'unts ni'ëmukë ja pa'amja'ay myäymyiintë, mëpaatëp ja Jesús tyajkëtaawnëtë ko tona'antë.

11Ko ja ëxëëk poj t'ijxtë ja Jesús, ënät twinkuxtënaaytyë ets mëk ya'axtë jyoktë:

Tios U'unk Mijts.

12Tääts ja Jesús ojts mëktä'äky y'ënë'ëmxëtë ets ka'ap pën tuk'ëwaanëtëty pën yë'ë.

Ko Jesús twinwitsy nimajkmäjtsk ja y'ijxpëjkpëtëjk

13Tääts ja Jesús pya'tëjkëy kopkëjxm ets ja ja'ay twoowtsooy mëti'ipë y'oyjya'apën. Tam ënäty ni'ëmukë yajpaatë. 14Ets twinwijtsy nimajkmäjtsk mëti'ipë xyëëwmooyën ijxpëjkpëtëjk, jëtu'unts y'itëty yë'ë mëët ets nyëjkxtëty Tios y'aaw y'ayuk kajpxwa'kxpë, 15ets ja kutujkën tmëët'atëty ets t'ixkäxtëty ja ku'oypyë. 16Yë'ë ojts ya'atë yajwinwitstë: Simón, mëti'ipë Jesús ojts tyajxëëpetyën Pedro, 17Santiagë mëët ja y'uty Juan, Zebedeo y'u'unk y'ëna'k, jä'ä yajxëëmooytyë Boanerges, jä'ä nyiwijy ënääw u'unk, 18Andrés, Felipe, Bartolomé, Mateo, Tomás, Santiagë, mëti'ipë Alfeo y'u'unk'ajtypyën, Tadeo, Simón mëti'ipë ja zelotë winma'any tyuk'ijtëpën, 19ets Judas Iscariote, mëti'ipë ja Jesús kyë'ëyajkën.

Ko Jesús yaj'ënëëmë ko mëjku'u myëk'ajtën tmëëtëty

20Tääts ja Jesús tyëjkëy tëkoty. Ënät ja mayjyä'äy ënätyë myujkpäjtë, ka'apaat ja Jesús y'ëkkaaynyë mëët ja y'ijxpëjkpëtëjk. 21Ko ja Jesús ja myëku'uktëjk tnija'awëtyë, ënät nyimiinëtë ets yajtsoona'anëtë jä'ä ko jëtu'un ënäty myäytyë tyajtë ko tëë lyokëjaty.

22Ja tsajptëkotyëtë yaj'ijxpëjkpëtëjk mëti'ipë tso'ontëpën Jerusalén, jëtu'un y'ëna'antë:

Beelzebú tääpë ja'ay myëët'ajtyp, ja ku'oypyë wintsën yë mëk'ajtën mooyëp, paaty yë ku'oypyë t'ixkexy.

23Tääts ja Jesús tmëkajpxmujky ja ja'ay ets tkajpxwatsy mëët tu'uk ja ijxpäjtën ets y'ënäny:

¿Wi'ix jëtää tu'uk ja mëjku'u t'ëk'ixkäxëty ja myëmëjku'u? 24Ko tu'uk ja naax kajpn nyäpyëjkwa'kxëtëty, ka'ap oy ja mëk'ajtën tmëët'atëty, 25näjyëtu'un jyäty ko ja'ay tu'kjëën tu'ktëjk tsyiptuny, ma'tp ja tsëna'ayën. 26Näyjyëtu'un yë ku'oypyë, pën nayajwa'kxëp ets aakyë'ë nyänyipëtë'ëkëtë, tëë ënäty ya'atë kutujkën y'atëkoy, ka'ap tjëkyepy wi'ix y'ijt'ëtë'ëtsëty.

27Ni pën kyatëkëty ma ja ja'ay ja tyëjkën ets tmäätsa'anëty tii jap myëët'ajtyp tyëkoty pën ka'ap jëyëjp tkë'ëxotsy tekyxyotsy.

28Tëy miits n'ënëëmëtë, yajpokymyä'kxantëp yë ja'ay tu'kë'ëyë yë pyokyëty ets kyajpxtëko'oyënëty, 29je'eyëp ko nijëna'a kyayajpokymyä'kxëty pën ja Tios ja myëjaaw myëk'ajtën myëkajpxtëkooyëp.

30Paaty ja Jesús jëtu'un y'ënä'äny ko ënäty të yaj'ënëëmë ko ku'oypyë tmëëtëty.

Jesús ja tyaak ets ja myëkä'äxtëjk

31Tääts ja Jesús ja myëkä'äxtëjk jyajtë ets ja tyaak, jap ojts tëjk ëkë'p wyë'ëmtë, je'eyë ojts tmëkajpxpëtsëmtë ja Jesús, 32ënät ja Jesús ja ja'ay ojts tyuk'ëwa'anxëty mëti'ipëty ënäty jap winkon mëët y'u'unyën:

Tap ja mtaak tëjk ëkë'p m'owëxityë mëët ja mmëkä'äxtëjk. Mijtsëk mmëkajpxanëtëp.

33Tääts ja Jesús y'ëtsooy:

¿Pën ntaak'ajtypës ets pën nmëkä'äx'ajtypës?

34Ënät ja Jesús twin'ijxë'ky ja ja'ay mëti'ipë winkon win'u'unyääyëtëpën ets t'ënëmaay:

Ya'atë ja'ayëty ntaak'ajtypyës ets nmëkä'äx'ajtypyës. 35Pën tyuunpy mëti'ipë ja Tios tsyojkpyën, yë'ë jëtu'un ëjts nmëkä'äx'ajtyp ets ntaak'ajtypyës.

Currently Selected:

Marcos 3: QUETZMIXE

Highlight

Copy