Marcos 2

Ko Jesús tyajtso'oky ja kë'ëxujxpë tekyxyujxpë

1Komjeky, ënät ja Jesús tyëjkëy jatëkok Capernaúm ets ja ja'ay tnija'awëtyë ko ënäty të jyä'ty jam tëjkwintum. 2Tääts ja ja'ay may myujktë, a'ujtsnajx ja tëjk, ni ma kya'ëwaatsëty ma tëjk'aawën. Ja Jesús jä'ä nyikäjpxyp nyimëtyäkpy ja Tios ja y'aaw y'ayuk, 3Ënät jyajtë nimajktaxk mëti'ipë kyiiyjmyiintëpën tu'uk ja ja'ay kë'ë xuxypyë tekyxyuxypyë. 4E komë nëkooyë ënäty ja ja'ay nyimay'ajnë, ka'ap tjëkyepy wi'ix ja Jesús tmëwinkontëty. Ënät ojts tyaj'ëwa'atstë jap tëjkkëjxy. Japts ja pa'amja'ay tkutëëynyajxtë mëët ja myaapäjn. 5Ko ja Jesús t'ijxy ko myëët'ajtëp ja mëpëjkën, ënät ja pa'amja'ay t'ënëmaay:

U'unk maay, pokymye'kxy mijts mwë'ëmy.

6Tam ënäty ja tsajptëkotyëtë yaj'ijxpëjkpë y'u'unyëtë, ënät myäytyë tyajtë: 7¿Tii ko ya'atë ja'ay jëtu'un y'ënaanpë? Tios yë myëkajpxtëkoopy, Tios tu'ukyë pokymyä'kxp.

8Näy ënätyë ja Jesús tnija'awëy ko ja ja'ay jëtu'un myäytyë tyajtë ets t'ënëmaay:

¿Ti ko miits jëtu'un mmaytyë mtajtë? 9¿Mëti'ipë ka'ap tsyipëty? ¿koos yë pa'amja'ay n'ënëëmëty: npokymye'kxyp mijts ëkë koos n'ënëëmëty.

Pëtë'ëk, këëyë'ëk yë maapäjn ets mye'eyëty? 10Paatyës jëtu'un n'ëna'any ets xynyijawëtëty ko ja naaxwiinyëtë ja'ay ja y'U'unk myëët'ajtyp ja kutujkën ets tmä'kxëty ja poky.

Tääts t'ënëmaay ja kë'ëxujxpë tekyxyujxpë:

11Mijts nëmääpy: Pëtë'ëk, këëyë'ëk yë maapäjn, ets nëjkx ma mtëjkën.

12Pëtë'k ja pa'amja'ay ets ja myaapäjn tkëëyi'ky ets tsyo'onë mayjyä'äyjotm. Paaty ja ja'ay ni'ëmukë mëj'äämpy t'ijxtë ets ja Tios tmëjja'awëtyë tjaantyjya'awëtyë ets y'ënantë:

Nijëna'a ëëts ya'atë jëtu'unpë nka'ixynyëm.

Ko Jesús tmëkäjpxy ja Leví

13Tso'on ja Jesús jatëkok ets ojts nyijkx nëë'akëyë pa'ajën, mayjyä'äy ojts nyiminyë ets tyaj'ijxpëjky. 14Najxp ënäty ja Jesús ko t'ijxpaty ja Leví, Alfeo y'u'unk. Tam ënäty y'u'unyë ma yajkukëpetyën. Tääts ja Jesús t'ënëmaay ja Leví:

Patso'onkës.

Ënät ja Leví ënätyë wya'kujkëy ets ja Jesús tpatso'ony.

15Mëkääpy ënäty ja Jesús jam ma Leví tyëjkën mëët ja y'ijxpëjkpëtëjk ets ja yajkukëpäjtpëtëjk ets ja ja'ayëty mëti'ipë yajtijtëpën pokyjyä'äy, jä'ä ko may ënäty ja ja'ayëty mëti'ipë Jesús pajëtijtëpën. 16Ja fariseë ja'ayëty, mëti'ipë tuk'ijxpëjktëpën ja jutiis ja y'ënä'ämënëty, ko t'ijxtë ko ja Jesús ënäty tmëëtkay ja yajkukëpäjtpëtëjk ets mëti'ipë yajtijtëpën pokyjyä'äy, ënät tyajtëëwtë ja Jesús y'ijxpëjkpëtëjk:

¿Tii ko yë mwintsën tmëëtkay yë yajkukëpäjtpëtëjk ets pokyjä'äytyëjk?

17Ko ja Jesús tmëtooy, ënät y'ënäny:

Mëti'ipë ja'ay oy mëkën, ka'ap yë tsooy tyajm'ëmaaytyä'äky; yë'ë tsooy yaj'ëmaaytyäkpy mëti'ipë pëjkëpën. Ëjts ka'apës yë'ëjëty të niminy wa'ats ja'aytyëjk, pokyjya'ayës të niminy.

Ko tyajtëwtë ja Jesús tii ko ja'ay y'ayuu'atë

18Tam ënäty ja Juan y'ijxpëjkpëtëjk y'ayuu'atë mëët ja fariseë ja'ayëty y'ijxpëjkpëtëjk. Ënät ja ja'ay tnimiintë ja Jesús ets t'ënëmaaytyë:

¿Tii ko yë Juan Yajnëëpäjtpë y'ijxpëjkpëtëjk y'ayuu'atë ets ja fariseë ja'ayëty y'ijxpëjkpëtëjkëty näjyëtu'un, e mijts yë m'ijxpëjkpëtëjk ka'ap y'ayuu'atë?

19Tääts ja Jesús y'ëtsoowëtë:

¿Mëpaat jëtää ja ja'ay y'ayuu'atë tëëpë yajwow yajwitstën ma pëjkën ukën y'ityën ets pën jam ja ye'etyëjk mëti'ipë pëjkpën? Pën jam ja ye'etyëjk yajpaaty mëti'ipë pëjkpën ka'ap tjëkyepy pën y'ayuu'atëty 20E pyatäämpy ja xëë po'o ko ja ye'etyëjk mëti'ipë pëjkpën yajpëjkëtëty, jäänëmts tëy y'ayuu'atëty.

21Ka'ap pën ja pakwit t'akëyë mëët ja jemwyit; jä'ä ko yë jemwyit nyëmuky ets jyaak najtskëëtsë ja pakwit. 22Näyjyëtu'un ka'ap ja jemy tsatsym nyëë jap pën t'atämë ma ja pak po'ojën, jä'ä ko yë jempyë ja tsatsym nyëë nyajtskë'tsëp ja pak po'o ets wyintëkoy ja tsatsym nyëë mëët ja pak po'o. Paaty ja tsatsym nyëë jempyë jap yaj'atämë ma ja po'o jempyën.

Ko ja Jesús ja y'ijxpëjkpëtëjk twijxë'ëktë ja tsajpmok yon po'kxënxëëwjoty

23Po'kxënxëëw ënäty, ko ja Jesús ojts nyäxy tsajpmok yon kamjotm mëët ja y'ijxpëjkpëtëjk. Tääts ja y'ijxpëjkpëtëjk ojts twijxë'ëktë ja tsajpmok yon ko jam nyajxtë. 24Ko ja fariseë ja'ayëty t'ijxtë ko jëtu'un y'ëtë'ëtstë, tää t'ënëmaaytyë ja Jesús:

Mëtow, ¿tii ko yë m'ijxpëjkpëtëjk tuntë po'kxënxëëwjoty mëti'ipë ka'ap kyutukyëtyën?

25Tääts ja Jesús y'ëtsooy:

¿Këtii xykyajpxtënëm tii ja David tyuunën mëët ja myëku'uktëjk ko ja yuu pyatëtë, ko ënäty nitii tkamëët'atë? 26Tsajptëkoty ojts ja tyëkëtë, ma ja Abiatar ënäty tyeetywyintsën'atyën, ënät tkaaytyë ja tsajpkääky kënu'kxypyë mëti'ipë ënäty ka'ap kyutukyëtyën pën tkayëty, teety yi'iyë kyääytyëp, ojts näjyëtu'un tmo'oy ja myëku'uktëjk. 27Tääts ja Jesús jyaak'ënany:

Yë'ëkyëjxm yë po'kxënxëëw yajpëjktäky ets ja ja'ay yajputëkëty, ka'ap yë'ëkyëjxmëty ets ja ja'ay jää ni'ikyë y'ëyoowtëkëty. 28Paaty ja naaxwiinyëtë ja'ay ja y'U'Unk tmëët'aty ja kutujkën ets tii tunëty sápëtë xëëw.

Currently Selected:

Marcos 2: QUETZMIXE

Highlight

Copy