Marcos 1

Ko Juan Yajnëëpäjtpë tnikäjpxy ja Jesús

1Jëtu'un tsyo'ontä'äky ja oy aaw oy ayuk ma yajnimëtyä'äkyën ja Jesukristë, Tios U'unk.

2Ijxtëm ja Tios ja kyäjpxynyajxpë Jeséas ja nyoky y'ënä'änyën:

Nkejxypyës yë nkäjpxynyajxpë ma mijtsën jëwyiin jëyëjp, mëti'ipë ja tu'u nyipëjktakëpën.

3Tu'uk ja aaw ayuk yajmëtoy jam të'ëts'itjotm:

nipëjktaakëtë ja Wintsën ja nyë'ë tyu'u,

yaj'ëwa'atstë tëy ja nyë'ë tyu'u.

4Jëtu'un ja Juan nyäkyajpxkëxë'kyë jam të'ëts'itjotm; aakjëtu'un ja ja'ay t'ënëëmë ets jyotwinpitëty ma Tiosën ets nyëëpätëty, jëtu'unts ja Tios pyokymyä'kxëtëty. 5Tu'kë'ëyë ja ja'ay jampë Judea ets Jerusalén tsyoontën ojts myintë ets tmëtoow'itë. Ojts tmaaywyatstë ja nyëë pyokyëty ets ja Juan yajnëëpäjtëtë jam ma Jordán mëjnëëjën.

6Yë Juan yë wyit yë'ë ijty mëët y'oytyunyëty yë jëyujk jëku'ux jyëmk ets po'o wyëën'ajtyp; pujtpë tyukääpy ets uuxpa'ak tyukpa'ukpy. 7Ma kyë'ë'ëmayën jëtu'un ijty y'ënä'äny:

Tää myiny ok, mëti'ipë ni'ik yë mëk'ajtën myëët'ajtypyën këtiinëm ëjts, mëti'ipë ta'tspëky ja kyë'ëkën, ka'apë pën myäyëtëty t'akäjëty. 8Tëë miits nyajnëëpätë mëët yë nëë; yë'ë, Kënu'kxymyëkajtën mëët myajnëëpäta'anëtë.

Jesús nyëëpety

Mt 3:13-17; Lc 3:21-22

9Jää it ja Jesús tsyo'ony jam Nazaret, Galilea y'itjotm ets ojts ja Juan yajnëëpetyë ma Jordán mëjnëëjën. 10Ko pyëtsiimy nëëjotm, ënät ënätyë ja tsajp y'ëwatsy ets ja Kënu'kxymyëkajtën nyikëtakë ijxtëm tu'uk ja pakën, 11ets yajmëtooy tu'uk ja ayuk jam tsajpjotm y'ënä'äny: Mijts n'u'unk'ajtyp, mëti'ipës ntsojkpyën, tëëpës.

Jesús yajpaaty jam të'ëts'itjotm

Mt 4:1-11; Lc 4:1-13

12Ok ojts ja Jesús yajnëjkxyë ja Tios ja Kyënu'kxymyëk'ajtën jam të'ëts'itjotm, 13Jam y'ijty wëxtyikxy xyëëw wëxtyikxytsu'um, jyuuky'äjty ma ja jëyujkën, ojts ja ku'oypyë wyinma'any'ixyë, ja anklëstëjk ojts pyutëkëty.

Ko ja Jesús tyajtso'ontä'äky ja tyuunk jam Galilea

Mt 4:12-17; Lc 4:14-15

14Ko ja Juan ënäty të yajtsumy, ënät ja Jesús tsyo'ony ets ojts nyijkx Galilea y'itjotm. Jamts ojts tkajpxwä'kxy ja oy aaw oy ayuk ma Tios yajnimëtyä'äkyën, 15ets y'ënäny:

Tëë ja xëëw jëmëjt tpaaty, wiinkoonp ja Tios ja kyutujkën. Jootwinpitë ma Tiosën ets ëxajëtë mëët ja mëpëjkën ja oy aaw oy ayuk.

Ko Jesús tmëkäjpxy ja nimajktaxkpë ja ajkxmajtspë

Mt 4:18-22; Lc 5:1-11

16Jam ënäty ja Jesús nyäxy Galilea mejypyë'am ko t'ijxpaty ja Simón mëët ja y'uty Andrés, ajkxmajtsk tyuunk'ajtëp, tsaay ënäty nyëëkuwijtstëp mëti'ipë tyuk'ajkxmajtstëpën. 17Tääts ja Jesús y'ënëmaayëtë:

Pamiintëkës, jä'ä miits nyaj'awinpita'antë ja'aymyajtspë.

18Ënätyë ja tsyääy t'ijxmajtstë ets tpatso'ontë ja Jesús.

19Wäänë ojts nyajtsnëjkxëtë tääts ja Jesús t'ijxpaty ja Santiagë ets ja y'uty Juan, Zebedeo y'ëna'k, kepy nëëwinye'epyëjoty ënätyëty, tsaay y'atakëtyëp. 20Tääts ojts myëkajpxëtë. Ojts ja tyeety Zebedeo t'ëxmatstë mëët ja tyuunpëtëjk jap ma ja kepy nëëwinye'epyën ets ojts tpanëjkxtë ja Jesús.

Ko Jesús t'ixkexy tu'uk ja ku'oypyë

Lc 4:31-37

21Tääts ojts jya'të jam Capernaúm. Po'kxënxëëw ënäty të tpaaty ko ja Jesús jap tyëjkëy ma ja Judá ja'ay y'ijxpëktën ets tyëjkëy yaj'ijxpëjkpë. 22Mëj'äämpy ja ja'ay t'ijxtë ko ja Jesús oy yaj'ixpëky, jä'ä ko yaj'ixpëky kutujkën mëët, ka'ap jyëtu'unëty ijxtëm ja tsajptëkotyëtë yaj'ijxpëjkpëtëjkën. 23Japts ënäty tu'uk ja ja'ay tsajptëkoty mëti'ipë ku'oypyë myëët'ajtypyën, ënätyë ojts mëk tyëkë yaxpë jojkpë:

24Jesús, Nazaretëtë ja'ay, ¿tii mtsojkpy mëët ëëtsëty? ¿Yë'ë mijts të xynyiminy etsës xyajkutëkoya'antë? Wa'ats mijts n'ixy'äty; mijts Wa'ats yë Tios myajnaxyë.

25Tääts ja Jesús mëj'äämpy twinkukajpxëy ja ku'oypyë:

Amonyë, ëxmats ya'atë ja'ay.

26Mëk'äämpy ja ku'oypyë tyajtsëtyuupyijky ja ja'ay ets mëk yäxy jyojyky, ënät ja ku'oypyë pyëtsiimy. 27Mëj'ixy ja mayjyä'äy t'ijxtë ets jaxim jayam nyäyajtëëwëtë:

¿Tii jëtää ya'atë? Jempyë ijxpëjkën ya'atë ets kutujkën mëët, ku'oypyë paat t'ëne'emy ets myëmëtoyë.

28Pojën ja ja'ay tnija'awëtyë jam Galiletë y'itjotm mëti'ipë ja Jesús tyuunpy kyäjpxypën.

Ko ja Jesús tyajtso'oky ja Simón Pedro tyo'oxtyëjkmë't

29Ko ja Jesús pyëtsiimy tsajptëkotm ets ojts mëët nyijkx ja Santiagë ets Juan ets tyëjkëtyë ma Simón ets Andrés ja tyëjkën. 30Jamts ënäty ja Simón ja tyo'oxtyëjkmë't maapäjnkëjxy, jëënpa'am pëjkëp ets ja Jesús tuk'ëwa'anëtyë ko pyikyë. 31Tääts ja Jesús tmëwinkoony ja pa'amja'ay ets ojts twijtsë'ëky, ënätyë ja jëënpa'am nyiwatsë ets tyëjkëy kuwijts kukë'ëyëpë.

Ko ja Jesús tyajtso'oky ja maypya'am ja'ay

32Wäänë y'ijty ko ja xëëw kyëtäky, koots, ënät ja Jesús yajtuknimiiny ni'ëmukë ja pa'amja'ay ets mëti'ipë ënäty ja ku'oypyë myëët'ajtëpën. 33Ni'ëmukë ja kajpn myiintë tëjk'ëkë'ëm ma ja Jesús ënätyën. 34May tyajtsoky ja pa'amja'ay wi'ixëty ja pa'am ets may ja ku'oypyë t'ixkejxy. Ka'ap tkupëjky ets ja ku'oypyë kyajpxëty, jä'ä ko ixy'ajtëp ja ku'oypyë.

Ko ja Jesús tkajpxwä'kxy ja Tios ja y'aaw y'ayuk jam Galilea

35Jopyëp, tsojk ojts ja Jesús myä'äypyëti'iky ets tsyo'ony jam kajpnjotm, Tääts ojts nyijkx Tios mëkajpxpë të'ëts'itjotm, 36ets ja Simón tsyo'ontë mëët ja myëku'uktëjkëty, Jesús yaj'ixtääpy.

37Ko tpatë ets t'ënëmaaytyë:

Nëkooyë myaj'ixtaaynyë.

38Ënät ja Jesús y'ënëmaayëtë:

Ja'amtë ëpëkykyajpn mëti'ipë wiinkonën, etsës jam näjyëtu'un nkajpxwa'kxëty ja Tios ja y'aaw y'ayuk, yë'ëjës të niminy.

39Jëtu'un ja Jesús t'aye'eytyääy ja kajpn Galilea y'itjotmëpë ets ja Tios ja y'aaw y'ayuk tkajpxwa'kxë jam tsajptëkotm ets t'ixkejxy ja ku'oypyë.

Ko Jesús tyajtso'oky ja ja'ay mëti'ipë lepra pu'uts pëjkëpën

Mt 8:1-4; Lc 5:12-16

40Tääts ja Jesús nyimiinë tu'uk ja ja'ay lepra pu'uts pa'am pëjkëp, ojts nyäkyoxtënaaytyakë ets y'ënëmaayë:

Pën mtsojkpy, oy xyajtso'okëtyës.

41Tääts ja Jesús pya'ëyoowë, ojts kyë'ënixajyë ets y'ënëmaayë:

Ntsojkpyës ets mtso'okëty, tso'ok.

42Je'eyë ja Jesús jëtu'un y'ënäny ets ja ja'ay ja leprë pu'uts ënätyë nyiwatsë ets tsyoky.

43-44Ënät ja Jesús ojts nyäjyëkäjpxyë ma yë'ëjën ets mëktä'äky y'ënëmaayë:

Ix, ka'ap pën xytyuk'ëwaanëty. Nëjkx yë teety wintsën ix ets xytyuk'ixëty ko të mtso'oky ets xytyukmëyoxëty ja Tios ja wyintsë'kën mëti'ipë ja Moisés nyi'ënä'ämëyën, jëtu'un ja ja'ay nijawëtëty ko të mtso'oky.

45E ja ja'ay ni'ikyë ojts tmëtyaakwä'kxy wi'ix ënäty të tsyo'okyën. Paaty ja Jesús ka'ap oymyaajëty y'ëktëjkënë kajpnjoty, jëkäm jyëtity ma apak itën. Oyjyënu'un jyajëkämëty, ninëjkxëp ja ja'ay, oy tyimmaajëty tsyoontë.

Currently Selected:

Marcos 1: QUETZMIXE

Highlight

Copy