Mateo 28

Ko ja Jesús jyuukpyiky

Mr 16:1-8; Lc 24:1-12; Jn 20:1-10

1Ko ja po'kxënxëëw nyäjxy, ko xyiinytyäky tominkë xëëwpë, sëmaan'ëjxy. Ja Maria Magdalena mëët wiinkpë ja Maria, ojts nyëjkxtë jam ma ja o'kpëjutën ets t'ixa'antë. 2Ajotkumonë tyëjkëy naaxwiinyëtë yu'kxpë, jä'ä ko tu'uk ojts ja Tios ja y'anklës tsyoony tsajpjotm ets kyëtäky naaxwiinyëtë, jam jut'ëkë'ëm nyäpyëjktakë ets tjëkëëy ja mëjtsaa mëti'ipë ënäty ja jut y'akë'ë'ajtypyën. 3Jëtu'un ja tsajpjotmëtë kukäjpxy y'ajajy ijxtëm tu'uk wëtsukën ets poop ja wyit ijxtëm yë tsajp'o'pykyën. 4Ko ja tsiptuunpë t'ijxtë, tääts tsyëtyuupyëjktë mëët ja tsë'ëkë, o'kpën ojts kya'ata'atë. 5Ënät ja tsajpjotmëtë kukäjpxy t'ënëmaay ja to'oxytyëjktëjkëty:

Këtii mtsë'ëkëtë. Nija'apës ko miitsëty Jesús m'ixtaaytyëp mëti'ipë ojts ja ja'ay yajkruutspetyën. 6Ka'ap ja yaa pën, tëë ja jyuukpyiky ijxtëm y'ënänyën. Min ixtë ma ojts yajpëjktä'äkyën. 7Nëjkxtë jotëkoy ets xytyuk'ëwaanëtëty ja y'ijxpëjkpëtëjk: Tëë ja Jesús jyuukpyiky tam ja nyijkxy Galilea ets jam myajtu'ukmuka'anëtë. Jam xy'ixtëty. Ya'atë ënäty miits ëwaanëjantëp.

8Tääts ja to'oxytyëjkëty tsyo'ontë jotëkoy ma ja o'kpëjutën, tyam jyatsë'ëkëtë ets tyam jyaxoonta'aktë, pëyi'ikyë ojts nyëjkxtë ets tuk'ëwaanëja'antë ja Jesús ja y'ijxpëjkpëtëjk mëti'ipë ënäty të nijawëtën. 9Tääts ja Jesús ojts wya'këxë'ëky ajotkumonë ma yë'ëjëtyën ets ojts kyajpxpo'kxëtë, ënät ja to'oxytyëjkëty tmëwinkoontë ja Jesús ets ojts t'ëwtatë ets ja tyeky ojts tsu'kxëtë, 10ets y'ënëmaayëtë:

Këtii mtsë'ëkëtë. Nëjkxtë ets xytyuk'ëwaanëtëty ja nmëku'uktëjkës wä'än tnëjkxta'atë jam Galilea etsës jam xy'ixtëty.

Ma ja tsiptuunpë yajmeenymyo'otën

11Tam ënäty ja to'oxytyëjk nyëjkxtë, ko ja soltaatëtëjkëty näjyëtu'un ojts nyëjkxtë jam kajpnjotm, mëti'ipë ënäty ja o'kpë jut të tkëwent'atën ets tukmëmëtyaktaaytyë ja teetytyëjkëty, wintsëntëjkëty mëti'ipë ënäty të tyuny të jyätyën. 12Ja teety wintsënëty ojts nyämyukëtë mëët ja mëjja'aytyëjkëty ets tkäjpxy'ajtë ko ja soltaatëtëjk may ja meeny tmo'oja'antë, 13ets t'ënëmaaytyë:

Jëtu'un m'ëna'antëty ko tap ënäty mma'atë ko ja Jesús ja y'ijxpëjkpëtëjk të myintë ets të tmäätstë ja o'kpë. 14Pën nyija'awëp ok yë Pilato, ëëts nwinkuwa'akëtëp ets ntukupëktëtyës ya'atë winma'any, këtiipë miits xymyëtsiptëkëtëty.

15Ja këwent'ajtpëty ojts ja meeny t'ëxajëtë ets tpatuuntë tä ënäty të yaj'ënëëmëtën. Tyampaat je'eyëm jëtu'unpë ayuk tmëët'atë yë jutiiyës ja'ayëty.

Mëti'ipë ja Jesús ojts tuk'ëne'emy ja y'ijxpëjkpëtëjk

Mr 16:14-18; Lc 24:36-49; Jn 20:19-23

16Ënät ja Jesús ja y'ijxpëjkpëtëjk nyëjkxtaaytyë jam kopkëjxm, ma Galilea y'itjotmën, ma ja Jesús ënäty të tyuk'ënë'ëm'xëtën. 17Ko t'ijxtë ja Jesús, tääts t'ëwtajtë, je'eyëp ko tam ja mëti'ipë ka'ap oy myëpëkyën. 18Tääts ja Jesús myëwinkoonëtë ets y'ënëmaayëtë:

Tëës ja Tios xymyooytyä'äy ja kutujkën jam tsajpjotm ets naaxwiinyëtë. 19Nëjkxtë naaxwiinyëtë apëtsëmy ets xyaj'awinpitëty yë ja'ay ëjts n'ijxpëjkpë; yajnëëpätë mëët yë Tios yë xyëëw, Tios U'unk ets mëët yë Kënu'kxymyëkajtën yë xyëëw, 20ets xytyuk'ijxpëktëty wi'ix tpatuntëtyën tu'kë'ëyë mëti'ipë miitsëty të ntuk'ënä'ämtën. E ëjts jëtu'unës n'ëna'any ko yajpaataanpës xëmë ma miitsëtyën mapaat yë naaxwiinyëtë jyää'atyën.

Currently Selected:

Mateo 28: QUETZMIXE

Highlight

Copy