Mateo 9
9
Ko Jesús tyajtso'oky ja kë'ëxujxpë tekyxyujxpë
1Tääts ja Jesús tyëjkëy kepy nëëwinye'epyëjoty ets ojts nyijkxy jamtsow nëë'awinm, jam Capernaúm ma ënäty tsyëënën. 2Jamts ja ja'ay jya'ajtë mëti'ipë kyiiyjya'ajtën maapäjnkëjxm tu'uk ja pa'amja'ay, kë'ëxujxpë tekyxyujxpë. Ko ja Jesús t'ijxy ja ja'ay ko mëpëjkp, tääts t'ënëmaay ja kë'ëxujxpë tekyxyujxpë:
U'unk amëk jotmëk yajpaat, yë mpoky tëë yajme'kxy.
3Ënät myäytyë tyajtë ja ja'ayëty mëti'ipë ja ënä'ämën tëyajtën nyiwintsën'ajtëpën: Ijxtëm kyäjpxyën myëtyä'äkyën, Tios yë'ë myëkajpxtëkoopy.
4Nyija'awëy ja Jesús wi'ix ënäty myäytyë tyajtën. Tääts yajtëëwëtë:
¿Tii ko ëxëëk winma'any xymyëët'atë? 5¿Mëti'ipë ka'ap tsyipëty, koos n'ëna'anëty: Tëë mpoky yajme'kxy, ëkë koos n'ënëëmëtyë: Pëtë'ëk ets ye'ey? 6Tyam miits ntuk'ixa'antë koos ja kutujkën nmëët'aty yaa naaxwiiny eetsës ja poky nma'kxëty, ëjts, naaxwiinyëtë ja'ay y'U'unk.
Ënät ja kë'ëxujxpë tekyxyujxpë t'ënëmaay:
Pëtë'ëk, këëyë'ëk yë maapäjn ets nëjkx ma mtëjkën.
7Tääts ja kë'ëxujxpë tekyxyujxpë pyëti'ky ets ojts nyijkxy ma tyëjkën. 8Mëj'ixy ja mayjyä'äy t'ijxtë ets ja Tios tmëjja'awëtyë ko jëtu'un ja ja'ay ja kutujkën të yajmo'otë.
Ko Jesús twoy ja Mateo
9Ko ja Jesús jam tsyo'ony, ënät ojts t'ijxpaaty tu'uk ja ja'ay mëti'ipë xyëëwajtypyën Mateo. Jam ënäty ja Mateo y'u'unyë ma ja Roma yajkutujkpë yajmëkëpetyën ets t'ënëmaay:
Pamiinkës.
Ënät ja Mateo wya'kujkëy ets tpatso'ony.
10Jëtu'un ojts tëkok jyäty kyëpety ma tu'uk yë tëjkën, kääpy ënäty yë Jesús jam ko myäymyiintë yajkukëpäjtpëtëjkëty, Roma myëtuuntëp ets ja ja'ay mëti'ipë yajtijtëpën pokyjä'äytyëjkëty ets nyaaxwä'tstë mëët ja Jesús ets ja y'ijxpëjkpëtëjk. 11Ko ja fariseë ja'ayëty jëtu'un t'ijxtë, ënät tyajtëëwtë ja Jesús ja y'ijxpëjkpëtëjk:
¿Tii ko yë mwintsën tmëëtkay tmëët'uuky yë yajkukëpäjtpëtëjk ets pokyjä'äytyëjk?
12Jesús ojts tmëtoy ets y'ënëmaayëtë:
Mëti'ipë oyëty mëkëtyën ka'ap yë tsooyëpë tyaj'ëmaaytya'aktë, yë'ë tëy mëti'ipë pëjkëtëpën. 13Nëjkxtë ets xy'ijxpëktëty ja Tios ja y'aaw y'ayuk ma y'ënä'änyën: Yë'ëjës ntsojkpy ets ja'ay tmëët'atëty ja pa'ëyo'owën, ka'ap yë'ëjëty ma wintsë'kën xymyo'otëtyës. Jä'ä ko ka'apës yë'ëjëty të niminy yë oyjyä'äytyëjk, pokyjyä'äytyëjkës të niminy.
Ma tyajtëwtën ja Jesús tii ko kya'ëyuu'atë
14Ënät ja Juan Yajnëëpäjtpë ja y'ijxpëjkpëtëjk myiintë ma ja Jesús ets tyajtëëwtë:
Ëëtsëty ets ja fariseë ja'ayëty ayuu'ajtëpës mëk. ¿Tii ko yë m'ijxpëjkpëtëjk ka'ap y'ayuu'atë?
15Tääts ja Jesús y'ëtsoowëtë:
¿Mëpaat jëtää ja ja'ay myontë tyuktë mëti'ipë kaaytyëp uktëp ma ja pëjkën ukën y'ityën ets pën jam yajpaaty ja ye'etyëjk mëti'ipë pëjkpën? Temë pyatäämpy ja xëëw jëmëjt ma nëjkx yajjëwoyën ja ye'etyëjk mëti'ipë pëjkpën, jäänëm tëy, jyëkyejpy mjanty ayuu'atëty.
16Ka'ap pën ja pakwit t'akëyë mëët yë jemywyit, jä'ä ko yë jemywyit ko nyëmuky nyajtskë'tsëp ja pakwit. 17Ets nän ka'ap ja tsatsym nyëë pën t'atämë tuk po'ojoty, jä'ä ko yë tuk po'o kë'tsp yë'ë, tääts tyëkoy ja po'o ets ja tsatsym nyëë. Paaty yë jempyë tsatsym nyëë jap yaj'atämë ma jempyë po'ojën ets jëtu'un mäjtskpëky oy y'ity.
Ja to'oxytyëjk mëti'ipë pëjkëpën ets ja Jairo ja myaank
Mr 5:21-43; Lc 8:40-56
18Tam ënäty ja Jesús myëëtmëtya'akëtë ko tu'uk ja Israel wintsën jyä'äjty ets nyäkyoxtënaaytyakë ets y'ënëmaayë:
Tapës ja nnëëx tyim'o'këtä'äky ets pën mmiimp mijts ets mkë'ë xypyëjkta'akëty ma yë'ëjën, juuky'atëp jatëkok.
19Tääts ja Jesús wya'kujkëy mëët ja y'ijxpëjkpëtëjk ets ojts tpanëjkxtë ja Israel wintsën. 20Ënät tu'uk ja to'oxytyëjk myiiny jëxkë'ptsow ma Jesús ets ja wyitnijän ojts wäänë toonë. Tyaapë to'oxytyëjk jä'ä ënäty pyëjkënë majkmäjtsk jëmëjt, taxyë ënäty myëët'ajtyp ma y'ëmaay'ajtënën. 21Jëtu'un ënäty myäy tyäjy: Mëët yi'iyë koos yë wyit ntoonëty, tso'okëpës yë'ë. 22Tääts ja Jesús wya'akwinpijty ets tni''ijxwinpijty ja to'oxytyëjk ets t'ënëmaay:
Nnëëxës, jotkujk yajpaat, yë mmëpëjkën yë'ë të myajtso'okyë. Ënätyë tsyoky ja to'oxytyëjk.
23Ko ja Jesús jyä'äjty ma ja Israel ja'ay wintsën ja tyëjkën ets t'ijxy ja xuxpë wojpë tam nyänyipëjktaakëtë ets tyajnaaxtëkëja'antë ja o'kpë ets ja ja'ay jyë'ëtë ya'axtë, 24ënät y'ënäny:
Pëtsëmtë yaa, yë kiixy u'unk ka'ap yë të y'ooky, maap yë je'eyë.
Tääts ja ja'ay je'eyë tukxiktë ja Jesús. 25Ko tkäjxpëtsëëmtaay ja mayjyä'äy, tä tyëjkëy jap tëkoty ma ja kiixy u'unkën ets ojts kyë'ëkëjxy tmatsy ets twijtsë'ky. 26Ets ma tääpë ja it naaxwiinyëtën ojts ja ja'ay tnija'awëtya'atë mëti'ipë ënäty të tyuny të jyätyën.
Ko ja Jesús tyaj'ijxë'ëky nimäjtsk ja ja'ay wiintspë
27Ko ja Jesús jam tsyo'ony ets ja ja'ay wiintspë nimäjtsk pyatso'onë yaxp jojkp:
Pa'ëyoowtëkës, David yë myaank.
28Ko ja Jesús tyëjkëy tëkoty, tääts ja ja'ay wiintspë myëwinkoonëtë ets ja Jesús tyajtëëy:
¿Mmëpëjktëp miitsëty koos xymyäyëpës ya'atë ntunëtyë?
Tääts y'ëtsoowtë:
Wintsën, nmëpëjktëp ëëts.
29Tääts ja Jesús ojts ja wyiin tyo'onxëtë ets y'ënëmaayëtë:
Wä'än jëtu'un tunyë tjatyë tä ja mëpëjkënëtyën.
30Ënät ojts y'ijxë'ëktë ets ja Jesús mëktä'äky y'ënëmaayëtë:
Këtii tëy pën xytyuknijawëtëty.
31Tim je'eyë jam tsyo'ontë ets tmëtyaakëtijtaatyë ko ja Jesús ënäty tëë yaj'ijxpëkëtë.
Ko ja Jesús tyajtso'oky tu'uk ja ja'ay uumpë
32Tam ënäty kyatsoontënëm ja ja'ayëty mëti'ipë të y'ijxë'ëktën, ko twoowmiintë ma ja Jesúsën tu'uk ja ja'ay uumpë, ku'oypyë myëët'ajtyp. 33Ko ja Jesús t'ixkejxy ja ku'oypyë, tääts ja uum kyajpxë'ky. Janty mëj'ixy ja ja'ay t'ijxtë ets y'ënantë:
Nijëna'a jëtu'unpë kyayaj'ixynyëm yaa Israel y'itjoty.
34E ja fariseë ja'ayëty jä'ä ja y'ënantëpë:
Ku'oypyë wintsën ya'atë ja'ay, paaty yë mëk'ajtën tmëëtëty ets t'ixkäxëty yë ku'oypyë.
May ja pëjktä'äky
35Tyukjëtijtëtyääy ja Jesús ja naax kajpn mëj mutsk ets yaj'ixpëky tsajptëkoty maajëty tu'uktu'uk ja kajpnën ets tuk'ëwaanë ja ja'ay aaw ayuk oypyë ma Tios kyutujkën yajnimëtyä'äkyën ets tyajtso'oky oymyëti'ipë pa'amëty ets pëjkën ato'onën. 36Ko ja Jesús t'ijxy ja mayjyä'äy, tääts tpa'ëyooy ko tëë y'ënu'kxëtë ets ka'ap ja mëtakën t'ëkmëët'ajnëtë, jëtu'un tä may kupixynyën mëti'ipë ka'ap ja nyi''ijxpë nyikëwent'ajtpë. 37Ënät t'ënëmaay ja y'ijxpëjkpëtëjk:
May ja pëjktä'äky pyëtë'ëka'any. Yë'ë ka'ap myäyëty ja tuunpëtëjk mëti'ipë ja pëjktä'äky yajpëtë'ktëpën. 38Paaty miitsëty amëtowtë ja mëti'ipë nyiWintsën'ajtypyën ja pëjktä'äky ets tkäxëty may ja tuunpë mëti'ipë ja pëjktä'äky yajpëtë'ëktëpën.
Currently Selected:
Mateo 9: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
