Mateo 8

Ko ja Jesús tyajtso'oky ja ja'ay pu'uts mëëtpë

1Ko ja Jesús kyëtäky jam kopkwinm, may ja ja'ay ojts pyatsoonyë. 2Tääts ja ja'ay ojts tu'uk nyiminyë mëti'ipë pu'uts pa'am pëjkëpën ets nyäkyoxtënaaytyakë Jesús wyintuuy ets y'ënäny:

Wintsën, pën mtsojkpy, yajtsokës ets yajwatskës.

3Tääts ja Jesús ojts tony ets t'ënëmaay:

Ntsojkpyës ets mtso'okëty ets mwa'atsëty. Tso'ok ets wë'ëm wa'ats.

Je'eyë ja Jesús jëtu'un y'ënäny ets ja ja'ay ja pyu'uts ënätyë tsyokaay ets wyatstaay ja nyini'kx. 4Tääts ja Jesús jyaak'ënany:

Ix, ka'ap pën xytyuk'ëwaanëty. Nëjkx ma teety wyintsënën ets xytyuk'ixëty ko tëë mtso'oky ets mënëjkxëp ja mwintsë'kën mëti'ipë ja Moisés nyi'ënä'ämëyën, jëtu'un ja ja'ay nijawëtëty ko tëë mtso'oky ets të mwa'atsy.

Ko ja Jesús tyajtso'oky tu'uk ja tsiptuunpë wintsën ja tyuunpë

5Ko Jesús tyëjkëy Capernaúm ets tu'uk ja Romë tsiptuunpë wintsën nyimiinë, tääts myënu'kxtakë:

6Wintsën, tapës tu'uk ja ntuunpë pya'amko'knë tëkoty, mujkp xujxp ets nëkooyë y'ëyoownë mëët ja pëjkën ijxën.

7Tääts ja Jesús y'ëtsoowë:

Oyës nëjkx nyajtso'oky.

8Ets ja tsiptuunpë wintsën y'ëtsooy:

Wintsën, ka'apës xypyaat'aty ets mtëkëty ntëkotyës, je'eyë xynyi'ënä'ämëty etsës ja ntuunpë tsyo'okëty. 9Jä'ä ko ëne'emyës näjyëtu'un n'ity maas ja nwintsënënm, ets ëjts nän tamës yë ntsiptuunpëjk mëti'ipës n'ëne'empyën. Koos nitu'uk t'ënëëmë nëjkx, tääts nyijkxy; ets koos nitu'uk n'ënëëmë min, tääts myiny; ets koos ja ntuunpë tii ntuk'ëne'emy, tyuunpy jä'ä.

10Ja Jesús mëjmëtoy ojts tjawë ko jëtu'un y'ënä'äny ja ja'ay, paaty t'ënëmaay ja mëti'ipë jam pajëtijtëpën:

Tëy miits nëëmëtë ko ni tu'ukës ja'ay jëtu'unpë të nkapaaty yaa Israel ijxtëm ya'atë ye'etyëjkën, mëti'ipë mëj këjää tyuk'ijxpejtypyën yë Tios. 11Tyam miits n'ënëëmëtë ko may ja ja'ay nëjkx myintë xëëwpëtsëmy ets xëëwkëtä'äky ets nyaaxwäätstëty kääpyë ukpë mëët ja Abraham, Isaac ets ja Jacob ma ja tsajpjotmëpë kutujktaknën. 12E mëti'ipë japaat'ajtëtëp jeexyë yajpaatë ma ja kyutujktaknën, nëjkxëp yajpëjkta'aktë akootstuuy tëja'p. Tääts tyëkëtëty jëëpyë yaxpë ets ka'ap nëjkx tmëmëta'aktë.

13Tääts ja Jesús t'ënëmaay ja tsiptuunpë wintsën:

Nëjkx ma mtëjkën, wä'än jëtu'un tunyë tjatyë ijxtëm të xymyëpëkyën.

Näy jää mëtëy ja tsiptuunpë wintsën ojts ja tyuunpë tsyo'oky.

Ko Jesús tyajtso'oky ja Simón Pedro ja tyaak më't

14Tääts ja Jesús ojts nyijkxy ma Pedro tyëjkën. Jam ojts tpaaty ja Pedro ja myë't to'oxytyëjkpë maapäjnkëjxy, jëënpëjkëp. 15Tääts ja Jesús toony ja to'oxytyëjk ja kyë'ë ets ja jëënpa'am nyiwatsë. Tääts ja to'oxytyëjk pyëti'ky ets yajkaay yaj'uukëtë.

Ko Jesús tyajtso'oky may ja pa'amja'ay

16Ko tsyu'ujënë, tääts ja Jesús ojts tukninëjkxtë may ja ja'ay mëti'ipë ku'oypyë myëët'ajtëpën. Tu'k'aawkäjpxyëty ojts t'ixkexy ja ku'oypyë ets näjyëtu'un tyajtsoky ni'ëmukë ja pa'amja'ay. 17Paaty ya'atë jëtu'un tyuunë jyajtë ets y'atëwëty ko ja Tios ja kyäjpxynyajxpë Jeséas ojts y'ënä'äny: Yë'ë yajnëjkxtaay tu'kë'ëyë ëëts ja mpa'am'ajtëm ets ja n'ëyo'on'ajt njotmay'ajtëm.

Wi'ix ja Jesús yajpanëjkxëty

18Ko ja Jesús t'ijxy ko ja mayjyä'äy nyapikëty, tääts ja y'ijxpëjkpëtëjk ojts t'ënëëmë ets nyëjkxtëty jamtsow nëë'awinm meynyëë awinaxy. 19Tääts tu'uk nyimiinë ja tsajptëkotyëtë yaj'ijxpëjkpë ets y'ënëmaayë:

Wintsën, mpanëjkxäämpy mijts pën maa mnëjkxy.

20Tääts ja Jesús y'ëtsooy:

Nikë tää wax ja jyut ets joon yë pyä'än; e ëjts, naaxwiinyëtë ja'ay y'U'unk, ni yë'ëjës tkamëët'aty maas yë nkëpajk nkëxkonëtyën.

21Tä wiinkpë ja y'ijxpëjkpë y'ënäny:

Wintsën ëxmajtskës, nëjkxës jëwyiin ja nteety n'ëkyajnaaxtëkë.

22Tääts ja Jesús y'ëtsoowë:

Patso'onkës, wä'än aak o'kpë tnäyajnaaxtëkëtë.

Ko Jesús ja mëkpoj tyajnaxy

23Tääts ja Jesús tyëjkëy kepy nëëwinye'epyëjoty mëët ja y'ijxpëjkpëtëjk. 24Ënät ja mëkpoj ajotkumonë myiiny jam mejyjyotm. Ojts ja kepy nëëwinye'epyë y'ujtsta'ay mëët ja nëë. Maap ënäty ja Jesús. 25Ënät ja y'ijxpëjkpëtëjk yujxëtë ets y'ënëmaayëtë:

Wintsën, yaj'ëwaatsëpëtsëëmtëkës. Tyamës nëëji'kxnëtë.

26Tääts ja Jesús y'ëtsooy:

¿Tii ko mtsë'ëkëtë, wäänë miits ja mëpëjkën xymyëët'atë?

Ko jëtu'un y'ënäny, tääts tyënaakyujkëy ets ojts twinkukajpxë ja poj ets ja mejy ets pyojmoony. 27Mëj'ixy ja ja'ay t'ijxtë ets nyäyajtëëwëtë:

¿Pën ya'atë ja'aynyë? Pojpaat mejypyaat myëmëtoowënë.

Gadara ja'ayëty mëti'ipë ja ku'oypyë myëët'ajtëpën

28Ko ja Jesús jyä'äjty jamtsow nëë'awinm mejy ëkë'ëm, Gadara naaxjoty, jam nimäjtsk pyëtsëëmtë ja'ay ku'oypyëmëëtpë mëti'ipë tsënaaytyëpën ma o'kpë nyaaxtëkëtën ets ja Jesús tmëwinkoontë. Nëkooyë ijty tsyiptunanëtë ka'ap tjëkyepy jam pën nyaxëty ma ja tu'ujën. 29Ets tyëjkëtyë yaxpë jojkpë:

Këtii nëkoo yaa miny ma ëëtsëtyën etsës xymyëmayëtëty, Tios mijts m'u'unk'ajtëp. ¿Ëkë yë'ë mnimiimpy ets xyaj'ëyowa'antësë? Tyam ka'ap ja xëëw po'o tpaatynyëm.

30Tam ënäty jëkämtëkë ja may ëtsëm jyë'kxtë. 31Ënät ja ku'oypyë tmëpëjktsoowtë ja Jesús:

Pën xy'ixkäxantëp ëëts, ëxmajtstëkës etsës jap ntëkëtëty ëtsëm jootjoty.

32Tääts ja Jesús y'ënëmaayëtë:

Nëjkxtë.

Tääts ja ku'oypyë t'ëxmajtstë ja pa'amja'aytyëjk ets tuktëjkëtyë ja may ëtsëm. Ja ëtsëm jap kyupëyë'knajxtaatyë ja'awjoty ets nëëjoty kyëtaktë. Japts jyi'kxtaaytyë.

33Ja ëtsëm këwent'ajtpë, ojts kyäkta'atë ets ko jya'ajtë ma ja kajpnën, ënät tnimëtyaktaaytyë tii ënäty të tyuny të jyätyën, näjyëtu'un wi'ix ënäty të jyatën ja ja'ay mëti'ipë ja ku'oypyë myëët'ajtëpën. 34Tääts ja ja'ay jam ni'ëmukë tsyo'ontaaytyë kajpnjotm ets ojts nyëjkxtë ma ja Jesúsën ets ko jëtu'un t'ijxtë, ënät ja Jesús tmëpëjktsoowtë ets pyëtsëmëty jam y'itjotmëty.

Currently Selected:

Mateo 8: QUETZMIXE

Highlight

Copy