Mateo 7

Këtii mmëku'uk pyoky xytyukwinmëtowëty

1Këtii mmëku'uk pyoky xytyukwinmëtowtëty, këtiipë Tios yë mpoky mtukwinmëtowëtëty. 2Jä'ä ko yë Tios näjyëtu'un yë mpoky mtukwinmëtowa'anëtë tä ja mmëku'uk ënäty ja pyoky të wytyukwinmëtowtën; jëtu'un tä ja mmëku'uk xytsyoktën jyä'äy'atëty näjyëtu'un miitsëty ja'ay'atë. 3¿Këtii yi'iyë xy'ix'ix xypya'ixtëty ja mmëku'uk ja pyu'uxm wyiinjotypë yajpaatyën, yë'ë ix ja mëj kepy mëti'ipë japën mwiinjoty? 4N'ëkpëjktakmëty tu'uk ja ijxpäjtën: Pën mijts jap ja mëj kepy xymyëëtëty mwiinjoty, ¿wi'ix ja mmëku'uk xy'ënëëmëja'any? Ka'ap tjëkyepy pyu'uxm xyjyu'tëty. 5Winma'anytyuk. Jëyëjp ja mëj kepy juut ma mwiinën, täänëm ja mmëku'uk ja pyu'uxm xyjyu'tëty jap wyiinjoty.

6Këtii uk xymyo'otëty mëti'ipë tëë yajkënu'kxyën, këtiipë mnipëtë'ëkëtëty ets mtukwëtsëtëty. Näyjyëtu'un yë ëtsëm këtii xymyo'otëty mëti'ipë tsowëtyën, këtiipë je'eyë tnaaxtäänëty.

Amëtowtë, ixta'atë ets pijkxnoktë ja tëjk'aaw

Lc 11:9-13; 6:31

7Amëtowtë ets myajmo'otëty; ixta'atë ets xypyaatëty; pijkxnoktë ja tëjk'aaw ets m'ëwatsxëtëty. 8Jä'ä ko pën tii y'amëtoopy, yajmoopy; ko pën tii t'ixta'ay, pyätyp; ets pën pyijkxnojkpy ja tëjk'aaw, ëwatsxëyëp.

9¿Wä'än jëtää miitsëty yë m'u'unk xymyo'otëty yë tsaajë pën tsajpkääky m'amëtoowëtëpë? 10¿Ëkë xymyo'otëty yë tsa'anyë pën nëë jëyujk m'amëtoowëtëpë? 11Oy miits m'ëxëëk ja'ay'atë, mjajtëp ja m'u'unk xymyo'otëty mëti'ipë oyën, ¿ets wi'ixts ja mTeety tsajpjotmëpë tkamo'ojëtëty ja oypyë mëti'ipë m'amëtoowtëpën?

12Ijxtëm miits xytsyoktë ja'ay mëtunëtëty, jëtu'un ja mmëku'uk mmëtuntë, yë'ë jëtu'unpë tuunk ojts t'antijtë ja käjpxynyajxpëtëjkëty ets ja ënä'ämën tëyajtën.

Ja najxtakn xu'utspë

13Jap mtëkëtëty ma ja najxtaknën xu'utspë, jä'ä ko mëj ja najxtakn ets ja tu'u mëti'ipë nëjkxpën ëyoowtaknjoty. May ja ja'ay jap tyëkëtë. 14Temë ja najxtakn ets ja tu'u mëti'ipë nëjkxpën ma ja juukyajtën xëmëkyëjxmëpë, xu'uts jä'ä ets wäänë ja ja'ay tpaatë ets jap tyëkëtë.

Ma ja'ay winë tunyën yë'ë yajktujk'ijxkajp wi'ix jyä'äy'ätyën

15Näkyëwent'atëtë ma tääpë win'ë'ëmpëtëjkëtyën mëti'ipë nätyijëtëp ko Tios myëtuuntëp. Jëtu'un janty yujy janty tëtä'äky mniminëtë kupixynyën, e jap jyootjoty jëtu'un jyä'äy'atë pa'ukën. 16Yë'ë mtuk'ixtëp wi'ix tii tuntën. Jëtu'un ijxtëm yë tsatym tsya'amën ka'ap jyamëty yajtuky muum kepykyëjxm, ni yë'ë ja higo tëëm kyayajtuky jam muum äpnykyëjxm. 17Jëtu'un, ja oy kepy, aak'oy ja tyëëm tyäky; ets ja ëxëëk kepy, ëxëëk ja tyëëm tyäky. 18Ka'ap ja oy kepy ëxëëk tyëëm'aty, ets ka'ap ja ëxëëk kepy oy tyëëm'aty. 19Tu'kë'ëyë kepy mëti'ipë tëëm'ajtpën ëxëëk, yajpujxp yë'ë ets yajnino'oky. 20Jëtu'un miits ja ja'ay xy'ixkaptëty wi'ix jyä'äy'ätyën.

Ko pën tyëkëja'anëty ma ja tsajpjotmëpë kutujkën

21Ka'ap nyi'ëmukëty tyëkëja'antë ja ja'ay ma ja tsajpjotmëtë kutujkënën mëti'ipës janaam jatsojk xy'ënëmaaytyëpën Wintsën. Yi'iyë jam tëkëjantëp mëti'ipë pyatuuntëpën ja nteetyës tsajpjotmëpë ja tsyojkën. 22Ko ja ja'ay yajpaye'etyëty, may nëjkx y'ëna'antë: Wintsën, Wintsën, mijts mxëëwkyëjxmës të nkajpxwa'kxtë ja Tios ja y'aaw y'ayuk, mijts mxëëwkyëjxmës ja ku'oypyë të n'ixkäxtë ets mijts mxëëwkyëjxmës may ja Tios ja myëj'ajtën të nyaj'ijxëtë. 23Ënätës n'ëtsowa'any: Nijëna'a miits të nka'ixy'atë. Winwa'ktutëkës miits pokyjä'äytyëjkëty.

Mäjtskpë potsy'ëjx

24Paaty n'ënëëmëtë, pën y'amëtoow'ijtypyën ëjts ja n'ayuk ets tpatuny mëti'ipës nkäjpxypën, jëtu'un jä'ä ijxtëm ja ja'ay wijypyë kujkpën mëti'ipë ja tyëjk kyojën ets tsaakëjxy tpojtsë'ky. 25Miin ja tuu, koom ja nëë ets ja mëkpoj y'ëtëtstäky y'ënaantäky ma ja tëjkën ets kä'äpyëm ojts kyëtäy, jä'ä ko tsaakëjxy pyojtsë'ëkyëty. 26Temë pën y'amëtoow'ijtyp ja n'ayukës ets ka'ap tpatuny mëti'ipës nkäjpxypën, jëtu'un jä'ä ijxtëm tu'uk ja tsuuja'ayën mëti'ipë ja tyëjk kyojën pu'ujoty jinjoty. 27Miin ja tuu, koom ja nëë ets ja poj myiiny ma ja tëjkën, tääts kyëtääy. Atsë'ëk ajawë wyintëkooy.

28Ko ja Jesús kyajpxtaay, mëjmëtoy ja ja'ay tja'awëtyë ko jëtu'un yaj'ijxpëjkëtë, 29jä'ä ko kutujkën mëët yaj'ixpëky ets ka'ap jyëtu'unëty ijxtëm ja tsajptëkotyëtë yaj'ijxpëjkpëtëjkëtyën.

Currently Selected:

Mateo 7: QUETZMIXE

Highlight

Copy