Mateo 6

Ma Jesús tyukni''ixën wi'ix mëpaat ja'ay mputëjkëmë

1Ko yë mmëku'uk xypyutëkëty ijxtëm pyaat'atyën, ka'ap nikëxë'ëky tii xytyuntëty ets ja'ay t'ixtëty. Ko nikëxë'ëky tii xytyuntëty, ka'ap ja mTeetyëty tsajpjotmëpë mmo'ojëtëty ja kuma'ayën.

2Paaty, ko ja ëyoopëja'ay xypyutëkëty këtii xiitsow yaatsow xymyëtyaakwa'kxëty ijxtëm y'ëtë'ëtstën tsajptëkotypë tyuntën mëti'ipë nätyijëtëp oyjyä'äy ets në'ëjoty tu'ujoty nyäpyëjkta'akëtë ets ja ja'ay wyintsë'ëkëtëty. Tëy miits n'ënëëmëtë ko yi'iyë jëtu'un kyuma'ayën'atantëp. 3Ko ja ëyoopëja'ay xypyutëkëty, ka'ap pën xytyuknijawëty, 4yu'utsy y'itëty mëti'ipë mtuumpyën. Jëtu'unts ja mTeety mëti'ipë y'ijxypyën tii yu'utsy, mmo'ojëtëty ja mkuma'ayën.

Jesús ets ja Tios mëkajpxën

5Ko miits ja Tios xymyëkajpxtëty, ka'ap jëtu'un m'ëtë'ëtstëty ijxtëm mëti'ipë oyjyä'äy nätyijëtëp, tsyojktëp ets ja Tios tmëkajpxtëty tënääpy tsajptëkoty, në'ëjoty tu'ujoty, ets ja ja'ay y'ixëtëty. Tëy miits n'ënëëmëtë ko yi'iyë jëtu'un kyuma'ayën'atantëp. 6Temë ko mijts ja Tios xymyëkajpxëty, tëkë mtëkoty, yaj'ëtuk ja mtëjk ets ja'amyäts ja Tios Teety mëti'ipë ka'ap yaj'ixyën. Ënät ja Tios Teety, mëti'ipë y'ijxypyën tii mtuumpy ayu'utsy, yë'ë mmo'ojëtëp ja kuma'ayën.

7Ko ja Tios xymyëkajpxtëty ka'ap tii xykyajpxwinpit xykyajpx'ëtëjtëty, ijxtëm ja ja'ay y'ëtë'ëtstën ka'apë ja Tios tnijawëtën, mëti'ipë winmaaytyëpën ko pën jeky ja Tios tmëkajpxtë ni'ik ja Tios myëtowa'anëtë. 8Ka'ap miits jëtu'un mja'ay'atëty ijxtëm yë'ëjëtyën, jä'ä ko ja mTeety tëë tnijawë tii myajmëyajtëp oy ka'anëm xy'amëtowtë. 9Jëtu'un ja Tios xymyëkajpxtëty:

Tatë Tios tsajpjotmëpë m'ityën,

wintsë'ëkë ja mxëëw y'itëty.

10Yajmin ja mkutujkën.

Wä'än tunyë tjatyë naaxwiiny tä mijts të xytyuknipëjktaakën jam tsajpjotm.

11Mooytyëkës tyam ja ka'ayën ukën mëti'ipës nyajmëyajtëpën.

12Pokynyimä'kxtëkës maas ëxëëk tii ntuntën nkajpxtën, jëtu'un tääjës të mpokymyä'kxtën ja mëti'ipës ëxëëk të xytyuntën.

13Ka'ap mëpaat ëxëëk n'ëtë'ëtstë n'ëna'antës, ni'ikyës jap xyjyuutëty ma ja ëxëëkpën.

14Jä'ä ko pën miitsëty mpokymyä'kxtëp ja ja'ay mëti'ipë ëxëëk mtuunëtëpën, ja mTeety tsajpjotmëpë näjyëtu'un mpokymyä'kxa'anëtë; 15e pën miitsëty ka'ap xypyokynyimä'kxtë ja wiinkëtypë, nän ka'ap ja mteety mpokymyä'kxa'anëtë.

Jesús tukni''ixë ja'ay wi'ix y'ayuu'atëtyën

16Ko miits m'ayuu'atëty, ka'ap ja mwiin mjëjp xypyëjkta'aktëty yaj'ëyow yaj'ama'at, ijxtëm y'ëtë'ëtstën mëti'ipë oyjyä'äy nätyijëtëp ets ja ja'ay y'ixëtëty ko y'ayuu'atë. Tëy miits n'ënëëmëtë ko yi'iyë kyuma'ayën'atantëp. 17Temë ko mijts m'ayuu'atëty, puj ja mwiin mjëjp ets näkyaaxët, 18ets ja ja'ay ka'ap nijawëtëty ko mijts m'ayuu'aty. Temë ja mTeety tsajpjotmëpë, mëti'ipë ka'ap yaj'ixyën, nyijawëp jä'ä mëti'ipë yajtuunpën ayu'utsy. Yë'ëts mmo'ojëtëp ja kuma'ayën.

Jotkujkajtën tsajpjotmëpë

19Ka'ap ja wit meeny xynyipëjkpätëty yaa naaxwiiny, ma winë myä'ätyën ets tyënë'kën ets ma ja mä'tspë tyëkëtën ets myäätstën. 20Nikë jam yë wit meeny nipëjkpätë tsajpjotm ma ja pëjktä'äky ka'ap tyënë'kën ets ka'ap wyintëkoyën ets ma ja mä'tspë ka'ap tyëkëtën ets myäätstëty. 21Jä'ä ko ma ja mwit mmeeny y'ityën, jam näjyëtu'un ja mjot mwinma'any yajpaaty.

Mëti'ipë ja jot nini'kx kyutë'kxn'ajtypyën

22Yë wiin yë'ë kutë'kxn'ajtp ma jot nini'kxën. Paaty mijts pën oy ja mwiin, kutë'kxy ja mjot mnini'kx yajpaatëty, 23e pën ka'ap ja mwiin y'oy'ixy, akootstuuy ja mjot mnini'kx yajpaata'any. Pën ja të'kxën mëti'ipën jam ma mijtsën akootstuuy y'awinpity, nëkooyë ja kootspuknë y'ita'any.

Tios ets ja wit meeny

24Ka'ap pën myëta'akëty, nimäjtsk ja wintsën tmëtunëty. Jä'ä ko tu'uk nëjkx t'oyjyawë ets tu'uk ka'ap, tu'uk nëjkx tmëjpëjktä'äky ets tu'uk ka'ap. Näyjyëtu'un miitsëty, ka'ap tjëkyepy yë Tios xymyëtuntëty ets näjyëtu'un mkumeeny'atantëpëty.

Tios y'ijx'ijtyp ja y'u'unk y'ëna'k

25Paaty n'ënëëmëtë: Ka'ap xymyëmay xymyëtajtëty tii mkaytyëp m'uuktëp ets mjuuky'atëty ets ja mwitëty mxoxëty mëti'ipë ja mjot mnini'kx mtuk'ëtujktëpën. ¿Këtii jëtää ja juukyajtën këjää tsyowpaaty këtiinëm ja kääky uuky, ets ja ni'kx kopk këtiinëm ja wit xoxë? 26Ixtë ja joon mëti'ipë kääkjëtijtëpën pojotm: Ka'ap nyi'iptë kyojtë ets ka'ap tiipëjktä'äky tyajpëtë'ëktë ets muum tpëjkë'ëktë tëkoty, miits yë mTeetyëty tsajpjotmëpë yë'ë putëjkëtëp ets jyi'kxypyaatëty. Miitsëty wäänëni'ik mtsoowpaatë këtiinëm yë joonëty. 27Oy pën jënu'un tjamëmay tjamëtajy jyuukyajtën, ¿tii jä'ä pën tyajyonëty yë jyuuky'ajtënën?

28¿Wi'ix ko xymyëmay xymyëtajtë ja wit? Ëk'ixtë ja pëjy wi'ix yontë aayjoty ujtsjoty; ka'ap tyuntë, ka'ap pyiitë. 29Jëtu'un miits n'ënëëmëtë ko oy ja yajkutujkpë Salomón ni'ik ja mëj'ajtën jaanty'ajtën tjamëët'ajty, ka'ap nyäxyojxë tsuj ijxtëm yë pëjy kyëxë'ëkyën. 30Pën Tios xyojxyp ja aay ujts mëti'ipë tyam yoonp aayjoty ujtsjoty ets jëpom tëë ënäty tsijtkjoty nyanitooynyë. Ja Tios ni'ik ja mmo'oja'anëtë tii mnätyukxoxëtëpën Wäänë miits ja mëpëjkën xytyimmëët'ajnëtë. 31Paaty këtii xymyëmay xymyëtajtëty ets mnäyajtëwëtëty: ¿Tii ënät nkä'ämyëp n'ukmëp?, ëkë ¿tii ënät nwit'ajt nxox'ajtmëp? 32Pën ja Tios ka'ap nijawëtë, yë'ë jëtu'unpë myëmaay myëtajtëp; miitsëty mëët'ajtëp ja mTeetyëty tsajpjotm mëti'ipë nyija'apën tii myajmëyajtëp. 33Jamts miits jëyëjp xypyëjkta'aktëty ja mjot mwinma'anyëty ma ja tsajpjotmëpë kutujkën ets xytyuntëty mëti'ipë Tios tsyojkpy ets xy'ëxajëtëty tëkokyë ya'atë jotkujk'ajtën. 34Ka'ap xymyëmay xymyëtajtëty pën tii jëpom wëxtëjkm miimp wiinkoonp, jä'ä ko winjëpom miits xymyëët'atë mëti'ipë mmëmay mmëtajtëpën. Tu'uktu'uk xëëw nyäxy aak myëët'ajtyp ja mëti'ipë yajmääpy yajtajpën.

Currently Selected:

Mateo 6: QUETZMIXE

Highlight

Copy