Popular Bible Verses from Mateo 6

Share

Jamts miits jëyëjp xypyëjkta'aktëty ja mjot mwinma'anyëty ma ja tsajpjotmëpë kutujkën ets xytyuntëty mëti'ipë Tios tsyojkpy ets xy'ëxajëtëty tëkokyë ya'atë jotkujk'ajtën.

Ka'ap xymyëmay xymyëtajtëty pën tii jëpom wëxtëjkm miimp wiinkoonp, jä'ä ko winjëpom miits xymyëët'atë mëti'ipë mmëmay mmëtajtëpën. Tu'uktu'uk xëëw nyäxy aak myëët'ajtyp ja mëti'ipë yajmääpy yajtajpën.

Paaty n'ënëëmëtë: Ka'ap xymyëmay xymyëtajtëty tii mkaytyëp m'uuktëp ets mjuuky'atëty ets ja mwitëty mxoxëty mëti'ipë ja mjot mnini'kx mtuk'ëtujktëpën. ¿Këtii jëtää ja juukyajtën këjää tsyowpaaty këtiinëm ja kääky uuky, ets ja ni'kx kopk këtiinëm ja wit xoxë?

Temë ko mijts ja Tios xymyëkajpxëty, tëkë mtëkoty, yaj'ëtuk ja mtëjk ets ja'amyäts ja Tios Teety mëti'ipë ka'ap yaj'ixyën. Ënät ja Tios Teety, mëti'ipë y'ijxypyën tii mtuumpy ayu'utsy, yë'ë mmo'ojëtëp ja kuma'ayën.

Jëtu'un ja Tios xymyëkajpxtëty: Tatë Tios tsajpjotmëpë m'ityën, wintsë'ëkë ja mxëëw y'itëty. Yajmin ja mkutujkën. Wä'än tunyë tjatyë naaxwiiny tä mijts të xytyuknipëjktaakën jam tsajpjotm.

Mooytyëkës tyam ja ka'ayën ukën mëti'ipës nyajmëyajtëpën.

Pokynyimä'kxtëkës maas ëxëëk tii ntuntën nkajpxtën, jëtu'un tääjës të mpokymyä'kxtën ja mëti'ipës ëxëëk të xytyuntën.

Ka'ap mëpaat ëxëëk n'ëtë'ëtstë n'ëna'antës, ni'ikyës jap xyjyuutëty ma ja ëxëëkpën.

Jä'ä ko pën miitsëty mpokymyä'kxtëp ja ja'ay mëti'ipë ëxëëk mtuunëtëpën, ja mTeety tsajpjotmëpë näjyëtu'un mpokymyä'kxa'anëtë

Ixtë ja joon mëti'ipë kääkjëtijtëpën pojotm: Ka'ap nyi'iptë kyojtë ets ka'ap tiipëjktä'äky tyajpëtë'ëktë ets muum tpëjkë'ëktë tëkoty, miits yë mTeetyëty tsajpjotmëpë yë'ë putëjkëtëp ets jyi'kxypyaatëty. Miitsëty wäänëni'ik mtsoowpaatë këtiinëm yë joonëty.

Ka'ap ja wit meeny xynyipëjkpätëty yaa naaxwiiny, ma winë myä'ätyën ets tyënë'kën ets ma ja mä'tspë tyëkëtën ets myäätstën. Nikë jam yë wit meeny nipëjkpätë tsajpjotm ma ja pëjktä'äky ka'ap tyënë'kën ets ka'ap wyintëkoyën ets ma ja mä'tspë ka'ap tyëkëtën ets myäätstëty. Jä'ä ko ma ja mwit mmeeny y'ityën, jam näjyëtu'un ja mjot mwinma'any yajpaaty.

Ka'ap pën myëta'akëty, nimäjtsk ja wintsën tmëtunëty. Jä'ä ko tu'uk nëjkx t'oyjyawë ets tu'uk ka'ap, tu'uk nëjkx tmëjpëjktä'äky ets tu'uk ka'ap. Näyjyëtu'un miitsëty, ka'ap tjëkyepy yë Tios xymyëtuntëty ets näjyëtu'un mkumeeny'atantëpëty.

Pën Tios xyojxyp ja aay ujts mëti'ipë tyam yoonp aayjoty ujtsjoty ets jëpom tëë ënäty tsijtkjoty nyanitooynyë. Ja Tios ni'ik ja mmo'oja'anëtë tii mnätyukxoxëtëpën Wäänë miits ja mëpëjkën xytyimmëët'ajnëtë.

Ko ja ëyoopëja'ay xypyutëkëty, ka'ap pën xytyuknijawëty, yu'utsy y'itëty mëti'ipë mtuumpyën. Jëtu'unts ja mTeety mëti'ipë y'ijxypyën tii yu'utsy, mmo'ojëtëty ja mkuma'ayën.

Ko yë mmëku'uk xypyutëkëty ijxtëm pyaat'atyën, ka'ap nikëxë'ëky tii xytyuntëty ets ja'ay t'ixtëty. Ko nikëxë'ëky tii xytyuntëty, ka'ap ja mTeetyëty tsajpjotmëpë mmo'ojëtëty ja kuma'ayën.

Ko miits m'ayuu'atëty, ka'ap ja mwiin mjëjp xypyëjkta'aktëty yaj'ëyow yaj'ama'at, ijxtëm y'ëtë'ëtstën mëti'ipë oyjyä'äy nätyijëtëp ets ja ja'ay y'ixëtëty ko y'ayuu'atë. Tëy miits n'ënëëmëtë ko yi'iyë kyuma'ayën'atantëp. Temë ko mijts m'ayuu'atëty, puj ja mwiin mjëjp ets näkyaaxët, ets ja ja'ay ka'ap nijawëtëty ko mijts m'ayuu'aty. Temë ja mTeety tsajpjotmëpë, mëti'ipë ka'ap yaj'ixyën, nyijawëp jä'ä mëti'ipë yajtuunpën ayu'utsy. Yë'ëts mmo'ojëtëp ja kuma'ayën.