San Juan 7

Jesús ije̱wajyat iguigacupʉjcap

1Mit cʉs̈ Jesús yo'y Galileajway na̱s̈. Igawanu iyo'ywa'n Judeajway na̱s̈ ni'c judíujat iguiche'ngap pa igui-ago'jcáj. 2Wejpu'n tomo'c ayé ma̱s̈ʉjw itsowí̱jcapay judíujat pa iguinijawigawa'n ayé titictʉcwájat mam itsʉ̱ngaj ampay jayajwat. 3Mit iguinʉmgajau ije̱wajyat:

—Pichin yam mit nʉs̈ Judeajway na̱s̈ pa impʉctampajyat ma e'pca-ey lo que inwatpay. 4Ni'c nepʉn igawatp neti anu'mu te iwamp nu'pʉjʉn igui-is̈capcáj. Te inwatp ayʉ̱́j, acniguque's̈ʉ pa nu'pʉjʉn jayajwat ma e'pca.

5Ni'c ne ije̱wajyat igacupʉjcawu je'. 6Cʉs̈ Jesús inʉmgʉs̈au:

—Canicoyp tu'c tiempu oyway pa ʉ̱, po mijchat inaguepí̱jcap tiempu. 7Jayajwat ayʉ̱́j mundujway ca-oyap is̈-angap mijchat, po ʉ̱ tʉs̈-angap ni'c tʉnactujawigʉs̈p ni'c iwatcap mal. 8Nʉs̈iga mijchat ma̱s̈ʉuni'c. Ʉ̱ tʉganinʉs̈áj ayé ma̱s̈ʉjw ni'c tʉs̈canicojyap tu'c tiempu oyway.

9Iguinʉmgʉ́s̈aj wename, je' tan Galileajway na̱s̈.

Jesús en ayé ma̱s̈ʉjw

10Po cʉs̈ inʉ́s̈caj ije̱wajyat, je' nʉcs̈ey ma̱s̈ʉuni'c, po iga-actujawiwu nepʉn, ni'c nʉcs̈ anu'mu. 11Mit judíujat iguiche'ngau je' ma̱s̈ʉuni'c, mit inʉmgau:

—¿Jʉm itsʉ̱na aye?

12Mit ayé jayaujuc ni-ucyo'tcʉjʉu ti iwatpay Jesús. Una̱c inʉmgau ni'c iwatp oy, po ja-una̱c inʉmgau ni'c ca̱j, ni'c je' iwe̱jta̱jcʉs̈puc jayajwat.

13Po nu'pʉjʉjnat anu'mu i-ampiuga de je', nic ipʉ̱tcau judíujat.

14Po icojy es̈pu̱t ma̱s̈ʉjw, Jesús tʉgʉy templuni'c mit i-ajque's̈cʉs̈au. 15Mit nigu-épigʉjʉu judíujat, inʉmgau:

—¿Nat iguijato'c ayʉ̱́j jayau? ni'c cani-estudia̱tp as̈am ʉjtsat.

16Jesús ipo'ngʉs̈:

—Ayʉ̱́j ama̱s̈an tʉnajque's̈pay caje' tʉnje', po ije' ayé Dios jeme tʉs̈ajyu'tway. 17Jeme iwampay iguiwatwa'n Dios iwampay, je' ijawiyáj te Dios iyac ayé ama̱s̈an o te ʉ̱jyu tʉcotsp. 18Jeme cotspay je'yu, iche'mp pa jayajwat igui-oyninʉmgáj, po jeme iche'mpay ma igui-oyninʉmac ayé igui-ajyu'tway, ayé jayau iwatp iyacs̈ta'cway, mit igawe̱tp nepʉn.

19’¿Is̈camoygawu ley Moisés? Mit netu'c jayau mam mijchat igajayaumayp ayé ley. ¿Tini'c is̈che'ngap pa is̈ago'jcáj?

20Iguipo'ngau ayé jayaujuc mit inʉmgau:

—Inaguep demo̱nyu, ¿pʉn is̈che'mp pa is̈ago'gáj?

21Jesús ipo'ngʉs̈:

—Tʉnwat tu'c cosa mit minigu-épigʉjʉp minu'pʉjʉjnat. 22Iyacs̈ta'cway Moisés iyac orden pa is̈marca̱tcawa'n tu'c jayau. Po ayé caje' Moisés iyac, iyac inte̱jtat ámbanuway. Mit inmarca̱tcap tu'c jayau po'cs̈ans̈ʉuni'c. 23Te inmarca̱tcap tu'c jayau po'cs̈ans̈ʉuni'c pa is̈cumplia̱tcajawa'n Moisés iley, ¿is̈mu-awa'nigap ni'c tʉnac-oytamp jaran tu'c jayau po'cs̈ans̈ʉuni'c? 24Camtʉ'tsjuzga̱tca as̈am ique's̈ tu'c jayau, po juzgá̱tca iyacs̈ta'cway.

¿Ayʉ̱́j ayé Cristu?

25Mit cʉs̈ una̱c jayajwat Jerusalénway inʉmgau:

—¿Caje' ayʉ̱́j ayé iche'ngapay pa igui-ago'jcawa'n? 26E'pca ni'c je' cotsp mam igui-e'pca nu'pʉjʉjnat mit iganʉmgajap neti. ¿Is̈jawiga autoridajat ijawigap ni'c iyacs̈ta'cway ayʉ̱́j ayé Cristu i-ajyu'támpay Dios. 27Po ayʉ̱́j jayau najawigap jʉm imijn, po imi'nwa'n Cristu, nepʉn igajawiyáj jʉm imijn.

28Cʉs̈ Jesús i-ajque's̈ templuni'c, je' cots mʉgʉc mit inʉmgʉs̈au:

—Ʉ̱ is̈-is̈capcap mit injawigap jʉm tʉmijn, po tʉgaminu ʉ̱jyu, po Dios jeme tʉs̈ajyu'tway, ayé iwatp iyacs̈ta'cway mit ayé inga-is̈capcap. 29Po ʉ̱ tʉnis̈cap je', ni'c tʉmín mam je', mit je' tʉs̈ajyu't.

30Mit cʉs̈ iche'ngajau ilaj pa igui-actangawa'n, po nepʉn iga-actanu ni'c canicoyp hora. 31Mit mayo'c ayé jayaujuc icupʉjcaway je', mit inʉmgau:

—Minway Cristu, mit iwatway may milagru ni'c itpate ti iguiwatwa'n.

I-ajyu'tcap comandantejat pa igui-actangawa'n Jesús

32Fariseujat imaraugau ayé jayaujuc ni'c we'n ini-ucyo'tcʉjʉ de Jesús, mit judíujat imʉjpa̱nijat mit fariseujat i-ajyu'tcau comandantejat pa igui-actangawa'n. 33Mit cʉs̈ Jesús inʉmgʉs̈au:

—Tʉtsʉ̱námnaj mit mijchat jatu'c tiempuwáyu, mit cʉs̈wa'n tʉnʉs̈áj mam itsʉ̱na Dios jeme tʉs̈ajyu'tway. 34Ʉ̱ is̈che'ngáj, mit is̈capa̱tcáj. Mit mam tʉtsʉ̱nawa'n, mijchat ca-oyáj incóyga.

35Cʉs̈ judíujat inʉmgau je'jatu:

—¿Pa jʉm inʉs̈wa'n ayʉ̱́j ni'c nagapa̱tcáj? ¿Nʉs̈ámpa'p mam itsʉ̱nga judíujat s̈is̈cada'guicway mam itsʉ̱nga pe'ta̱majyat, mit i-ajque's̈cʉs̈áj pe'ta̱majyat? 36¿Ti inʉmo'jcʉp ayʉ̱́j inʉmway: “Ʉ̱ is̈che'ngáj mit is̈capa̱tcáj, mit mam tʉtsʉ̱nawa'n, mijchat ca-oyáj incóyga”?

Mʉjnʉ' iyacpay vida

37Icojy últimu s̈ʉjw cuandu iguitsóugaj más oymanac ayé ma̱s̈ʉjw, Jesús nitenda̱jcʉu mit cots mʉgʉc, inʉm:

—Te tu'c jayau nʉ-u̱go'jcʉp, ma mi'n mit ʉ̱, mit ma u'c. 38Ni'c jeme nʉ-u̱cpay, ayé as̈am jeme tʉs̈cupʉcpay. As̈am itsʉ̱na ja'yic: tanáj ijo̱tni'c as̈am tu'c mʉjnʉ' pujʉ'cpay pa iguimo'áj vida pa siempre.

39Ayʉ̱́j inʉmo'jcʉu pa jeme ipʉctsougámpay ayé Espíritu Santu jeme iguicupʉjcapay je', ni'c canimimp Espíritu Santu ni'c Jesús canicu'tp oymanac tsajpni'c.

Jayajwat catsʉ̱ngap en acuerdu

40Mit cʉs̈ una̱c de ayé jayaujuc iguimáraugaj inʉmway Jesús, inʉmgau:

—Iyacs̈ta'cway ayʉ̱́j ayé profeta i-ajyu'tway Dios.

41Ja-una̱c inʉmgau:

—Ayʉ̱́j ayé Cristu jeme nʉmicway pa imi'nwa'n.

Po ja-una̱c inʉmgau:

—¿Is̈jawiga Galilea imi'nwa'n ayé Cristu jeme i-ajyu'támpay Dios. 42Ja'yic itsʉ̱na Dios ilibru ni'c Cristu pichináj rey David ifamiliani'c, mit mi'náj nʉ'jcopacni'c Belén mam itsʉ̱naj David.

43Mit cʉs̈ ayé jayajwat catsʉ̱ngawu en acuerdu nat imijn Jesús. 44Mit una̱c iwangau igui-actangawa'n je', po nepʉn ca-oyawu igui-actamp.

Autoridajat igacupʉjcap Jesús

45Mit comandantejat pitujcawatu mam itsʉ̱nga judíujat imʉjpa̱nijat mit fariseujat, mit je'jat iguinʉmgajau:

—¿Tini'c is̈camumínga ayé jayau?

46Comandantejat ipo'ngau:

—¡Nunca cani-itp tu'c jayau cotspay as̈am ayʉ̱́j jayau icots!

47Cʉs̈ fariseujat iguipo'ngau:

—¿Mijchat is̈we̱jta̱jcawayey? 48¿Is̈jawiga itáj tu'c jefe o tu'c fariseu icupʉcpay ayé? 49Po ayʉ̱́j jayajwat iga-is̈capcapay ley, maldicioná̱tijcat ayé.

50Mit Nicodemo jeme oyway tsu'm mam Jesús, imunipʉjcʉs̈ʉwey je'jat, mit inʉmgʉs̈au:

51—¿Is̈jawiga nalejyat natujuzga̱tcap tu'c jayau te nagamarajwʉ'cp, mit te nagajawip ti iwatway?

52Je'jat iguipo'ngau:

—¿Is̈jawi mi̱ migalileajwayey? Che'n mam itsʉ̱na ja'yic Dios ilibruni'c, mit in-e'páj ni'c nunca canimimp tu'c profeta Galileajway na̱s̈ i-ajyu'tway Dios.

53Mit cada jayau nʉs̈cau itʉcmat.

Currently Selected:

San Juan 7: PSNT

Highlight

Copy