San Juan 8
8
Tu'c to's̈ay chajyo'ypay
1Mit Jesús nʉcs̈ en ayé copac inʉ'jy los Olivos. 2Mit jopoyít pituc pa templuni'c mit nu'pʉjʉn jayajwat mingau mam je'. Mit initsʉ̱ndá̱jcʉj, i-ajque's̈cʉau. 3Mit cʉs̈ fariseujat mit jeme i-ajque's̈capay ley iguimumingajau tu'c to's̈ay icupa̱tigaway mam ichajyo'jy. Mit je' iyajcau es̈pu̱tum, 4mit inʉmgajau:
—Amayipay, ayʉ̱́j to's̈ay icupa̱tigau meru mam ichajyo'jy. 5Mit Moisés ileyni'c nas̈manda̱tcap napójcaja mit tsa' to's̈ajyat as̈am ayʉ̱́jway. ¿Mi̱j te, ti inyʉmp?
6Po inʉmgau wename ni'c iche'ngajap ilaj pa igui-acusa̱tcawa'n. Po Jesús inico'udá̱jcʉj, ituja'y icʉ'jʉjp na̱s̈ni'c. 7Mit siguia̱t igui-ucyo'tca, mit je' ca's̈ʉ'c mit inʉmgʉs̈au:
—Te itp tu'c jayau mam mijchat iganiwatpay mal, ma ca'jtsʉ'jca tu'c tsa' ayé to's̈ay.
8Mit inico'uda̱jcʉjatu, siguia̱t ja'ypay na̱s̈ni'c. 9Po je'jat iguimáraugaj we'n, nigujawigʉjʉu ni'c iwatcap mal, mit cʉjtu'c cʉjtu'c ipíchingaj desde na'waywájat hasta ya̱wayna'jat, mit Jesús je'yu tan mit ayé to's̈ay jeme iyajcaway es̈pu̱tum. 10Mit ica's̈ʉ'jc Jesús, igaja-is̈u nepʉn, aye'yu to's̈ay tan. Inʉjmau:
—To's̈ay, ¿jʉm itsʉ̱nga jeme is̈-acusa̱tcaway? ¿Is̈cacondena̱tu nepʉn?
11Je' iguinʉjmau:
—Nepʉn, Señor.
Cʉs̈ Jesús inʉjmau:
—Ne ʉ̱ tʉgacondena̱tpey. Nʉs̈ mit camjawat mal.
Jesús ayé luz ita'cs̈pay jayajwat
12Jesús imucotscʉs̈atu, inʉm:
—Ʉ̱ as̈am tʉluz tʉnta'cs̈cʉs̈pay nu'pʉjʉn jayajwat. Jeme tʉs̈natspoguipay cayo'yáj mam i-it ma̱jlat, ni'c ayé mal as̈am tu'c chitimic, po ijtʉ̱́j ayé luz igui-actu-e'pcámpay mam i-it vida cacʉs̈ámpay.
13Cʉs̈ fariseujat iguinʉmgajau:
—Mi̱jyu is̈actujawigap lo que inwatpay. Jemni'c caje' iyacs̈ta'cway lo que inyʉmpay.
14Jesús inʉmgʉs̈au:
—Te ʉ̱jyu tʉ-actujawigʉs̈p lo que tʉnwatpay, po majawe'naj iyacs̈ta'cway lo que tʉnyʉmpay, ni'c tʉnjawip jʉm tʉmijn mit jʉm tʉnʉcs̈wa'natu, po mijchat ingajawigap jʉm tʉmijn ne jʉm tʉnʉcs̈wa'n. 15Mijchat injuzga̱tcap tu'c jayau as̈am ique's̈. Mit ʉ̱ tʉngajuzga̱tp nepʉn. 16Mit te ʉ̱ tʉjuzga̱tp, tʉjuzga̱tp yacs̈ic ni'c caje' ʉ̱jyu po tʉjuzga̱tcap ʉ̱ mit tʉnte̱t Dios jeme tʉs̈ajyu'tway. 17Mit ja'yic itsʉ̱na inleyni'jcat ni'c iyacs̈ta'cway lo que inʉmgapay mechc jayajwat. 18Ʉ̱ tʉ-actujawigʉs̈p lo que tʉnwatpay, mit tʉnte̱t Dios jeme tʉs̈ajyu'tway is̈actujawigapey lo que tʉnwatpay.
19Je'jat iguinʉmgajau:
—¿Jʉm itsʉ̱na inte̱t Dios?
Jesús ipo'ngʉs̈:
—Ʉ̱ is̈ca-is̈capcap ne inga-is̈capcapey tʉnte̱t Dios. Pi is̈-is̈capcagate ʉ̱, inis̈capcájate tʉnte̱t Dios.
20Jesús cots wename cuandu itsʉ̱naj mam iguiyájca ofrenda mam i-ajque's̈ templuni'c. Mit nepʉn iguiga-actanu ni'c canicoyp hora.
Mam tʉnʉs̈wa'n, ca-oyáj incóyga
21Jesús inʉmgʉs̈awatu:
—Ʉ̱ tʉnʉs̈áj mit is̈che'ngáj po mi-o'jcáj mit ayé mal inwatcapay. Mam ʉ̱ tʉnʉs̈wa'n, mijchat ca-oyáj incóyga.
22Cʉs̈ judíujat inʉmgau:
—¿Is̈jawiga ni-ago'jcʉ̱́j ni'c inʉmp: Mam ʉ̱ tʉnʉs̈wa'n, mijchat ca-oyáj incóyga?
23Mit inʉmgʉs̈au:
—Mijchat mina̱s̈ni'jcatway, mit ʉ̱ tʉtsajpni'cway. Mijchat impensa̱tcap solo itpay en ayʉ̱́j mundu mit ʉ̱ tʉngawamp itpay en ayʉ̱́j mundu. 24Jemni'c tʉnʉmgʉ́s̈aj ni'c mi-o'jcáj mit ayé mal inwatcapay, ni'c te is̈cacupʉjcap ni'c ʉ̱j ayé tʉs̈ajyu'tway Dios, mi-o'jcáj mit ayé mal inwatcapay.
25Cʉs̈ iguinʉmgajau:
—¿Mipʉn mi̱? Cʉs̈ Jesús inʉmgʉs̈au: Lo que tʉnʉmgʉs̈away desde primeru. 26Tʉnaguep mayo'c cosajat pa tʉnʉmgʉs̈awa'n mit pa tʉjuzga̱tcʉs̈wa'n. Po jeme tʉs̈ajyu'tway, ayé iyacs̈ta'cway. Mit lo que tʉnmaraway iguinʉjm je', ayʉ̱́j tʉnyʉmgʉs̈ap jayajwat ayʉ̱́j mundujway.
27Po igajawigawu ni'c je' cots de ite̱t Dios. 28Cʉs̈ Jesús inʉmgʉs̈au:
—Cuandu is̈ajcu'tcáj cunu̱s̈ni'c ʉ̱ jeme tʉjatway jayau, wejpu'n injawigáj ni'c ʉ̱j ayé tʉs̈ajyu'tway Dios, mit ʉ̱jyu tʉngawatp neti, po as̈am tʉs̈ajque's̈ap tʉnte̱t Dios, wename-ey tʉs̈nʉm. 29Ni'c Dios jeme tʉs̈ajyu'tway tsʉ̱nap mit ʉ̱, mit tʉnte̱t Dios tʉs̈canicuyaguip tʉntu'gumu ni'c tʉnwatí̱jcap iwampay je'.
30Iguinʉjm we'n, mayo'c jayajwat iguicupʉjcau je'.
Lo que iyacs̈ta'cway is̈libra̱tcáj
31Cʉs̈ Jesús inʉmgʉs̈au ayé judíujat iguicupʉjcaway je':
—Te mijchat inmutangap lo que tʉnyʉmpay, iyacs̈ta'cway mijatcáj tʉ̱pʉctampajyat, 32mit inis̈capcáj lo que iyacs̈ta'cway, mit lo que iyacs̈ta'cway is̈acnilibra̱tcʉjʉ̱j.
33Cʉs̈ iguipo'ngau:
—Ʉjtsat tʉpichingau Abraham ifamiliani'c mit nunca tʉganitsʉ̱ngap to'ctʉgʉyic mit nepʉn. ¿Tini'cpaj is̈nʉm ni'c tʉjatcáj libre?
34Jesús ipo'ngʉs̈:
—Iyacs̈ta'cway tʉnʉmgʉs̈ap ni'c nu'pʉjʉn iwatpay mal, to'ctʉgʉyic itsʉ̱na mit ayé ma̱jlat. 35Mit tu'c to'ctʉgʉyicway ca-oyap iguimutájna ijayc itʉjc, po je' iway imutanáj pa siempre. 36Jemni'c te Dios iway is̈libra̱tcáj, mijatcáj libre iyacs̈ta'cway. 37Tʉnjawip ni'c mijchat mipichingau Abraham ifamiliani'c, po inwangap is̈ago'jcáj ni'c ingamutangap lo que tʉnyʉmpay. 38Ʉ̱ tʉnyʉmp jeme tʉn-is̈way iguiwat tʉnte̱t Dios, mit mijchat inwatcap lo que inmaraugaway iguiwat inte̱jtat.
39Mit iguinʉmgajau:
—Ʉjtsat tʉnte̱jtat Abraham.
Jesús inʉmgʉs̈au:
—Te mijchat is̈wajyatate Abraham, inwatcájate as̈am Abraham iguiwajt. 40Po jinap inwangap is̈ago'jcáj mit ʉ̱ tʉnʉmgʉs̈au lo que iyacs̈ta'cway as̈am tʉs̈nʉjmau Dios. Abraham igawatu as̈am mijchat. 41Mijchat inwatcap as̈am inte̱jtat iguiwat.
Cʉs̈ iguinʉmgajau:
—Ʉjtsat tʉgaje'jat pejpejnat. Tʉnaguepcap tu'gu tʉnte̱jtat, mit ayé Dios.
42Cʉs̈ Jesús inʉmgʉs̈au:
—Pi téjtatajate Dios, iyacs̈ta'cway is̈wangájate ʉ̱ ni'c tʉpichin mam Dios mit tʉmín yam. Mit tʉgaminu ʉ̱jyu, po je' tʉs̈ajyu't. 43¿Tini'c is̈ca-entendiá̱tca lo que tʉnyʉmpay? Ni'c ca-oyap is̈márauga lo que tʉnyʉmpay. 44Mijchat inte̱jtat Awayagats ayé, mit inwato'jcʉjʉp lo que iwampay inte̱jtat. Je' tu'c ago'cpay desde ámbanu, mit igamutanu lo que iyacs̈ta'cway ni'c igawatp iyacs̈ta'cway. Iguinʉmwa'n tu'c we̱t, aye ni'c yujic iguiwat, ni'c je' tu'c we̱tpay mit je' i-acchu̱chip nu'pʉjʉn we̱t. 45Po ʉ̱ is̈cacupʉjcap ni'c tʉnyʉmp iyacs̈ta'cway. 46¿Pʉn mam mijchat icomproba̱tp ni'c tʉnwatp mal? Mit te tʉnyʉmp iyacs̈ta'cway, ¿tini'c is̈cacupʉjcap? 47Jeme iguiwayjátway Dios, imarap lo que inʉmpay Dios. Jemni'c is̈camárauga lo que inʉmpay ni'c mijchat caje'jat is̈wajyat Dios.
Cristu tsʉ̱nau desde ámbanu
48Cʉs̈ judíujat iguinʉmgajau:
—Iyacs̈ta'cway lo que tʉnyʉmgapay ni'c mi̱ miSamariajway mit inaguep demo̱nyu.
49Ipo'ngʉs̈ Jesús:
—Ʉ̱ tʉnga-aguep demo̱nyu po tʉn-oyninʉmp tʉnte̱t Dios, mit mijchat is̈malninʉmgap. 50Po ʉ̱ tʉngache'mp pa jayajwat tʉs̈-oyninʉmgáj. Itp pʉn iche'mpay pa tʉs̈-oyninʉmáj, mit je' inʉmáj lo que iyacs̈ta'cway. 51Iyacs̈ta'cway tʉnʉmgʉs̈ap ni'c jeme ijayaumaypay lo que tʉnyʉmpay, nunca ca-o'gáj.
52Cʉs̈ judíujat iguinʉmgajau:
—Jinap que tʉnjawigap ni'c inaguep demo̱nyu. Abraham o'cway mit we'ney profetajat, mit mi̱ inyʉmp ni'c jeme ijayaumaypay lo que mi̱ inyʉmpay, nunca ca-o'gáj. 53¿Is̈jawi mi̱ más mi-oyninʉmic que Abraham nate̱jtat ámbanuway mit profetajat jeme o'jcaway? ¿As̈am pʉn inyiwajtʉ mi̱?
54Ipo'ngʉs̈ Jesús:
—Te ʉ̱jyu tʉni-oyninʉjmʉp, caservia̱tp lo que tʉnyʉmpay. Tʉnte̱t Dios ayé tʉs̈-oyninʉmpay, mit mijchat inyʉmgap ni'c je' inDiosat. 55Po mijchat inga-is̈capcap je', po ʉ̱ tʉnis̈cap. Mit te tʉnyʉmp ni'c tʉnga-is̈cap je', tʉjatáj tu'c we̱tpay as̈am mijchat. Po tʉnis̈cap je' mit tʉnjayaumayp lo que inʉmpay. 56Abraham inte̱jtat ámbanuway ji'c ijo̱jt ni'c ijawiu ni'c i-e'páj ayé s̈ʉjw tʉntumi'námpay, mit i-is̈ mit ji'c ijo̱jt.
57Cʉs̈ iguinʉmgajau judíujat:
—Ingani-aguep cincuenta añu, ¿mit in-is̈way Abraham?
58Jesús inʉmgʉs̈au:
—Iyacs̈ta'cway tʉnʉmgʉs̈ap ni'c antes i-ijt Abraham, ʉ̱ tʉ-itnup.
59Cʉs̈ ipʉjcau tsa' pa iguipojcajawa'n, po Jesús niguyu'jtsʉu, mit pichin templuni'c. Mit je' nas̈tuc mam je'jat itsʉ̱nga, mit nʉcs̈.
Currently Selected:
San Juan 8: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
