Mateo 25

Lajiya cha'añ lujuntiquil xch'octacob

1I yumʌntel jiñi am bʌ ti panchan lajalʌch che' bajche' lujuntiquil xch'octacob tsa' bʌ i ch'ʌmʌyob majlel i candil,#Mt 5.16; Fil 2.15-16 tsa' majli i tajob xñujpuñijel.#25.1 Jiñi ñujpuñijel mu' bʌ i melob ya' ti pasibal q'uiñ, jiñi wiñic Mi' majlel ti' yotot i tat jiñi xch'oc cha'añ mi' yʌq'uentel ti' wenta jiñi mu' bʌ caj i pʌy; ti wi'il mi' majlelob ti yotot jiñi wiñic temel yic'ot xch'oc x'ixicob yic'ot yaño' bʌ pʌybilo' bʌ ti jiñi q'uiñijel. I ya'lel jiñi candil jiñʌch aceite loq'uen bʌ ti olivo te' (Lc 12.35-38). 2Jo'tiquil añob i ña'tʌbal, yam bʌ jo'tiquil ma'añobic i ña'tʌbal. 3Jiñi mach bʌ añobic i ña'tʌbal, tsi' ch'ʌmʌyob majlel candil, pero ma'añic tsi' ch'ʌmʌyob majlel ti oñ i cas; 4jiñi año' bʌ i ña'tʌbal tsi' ch'ʌmʌyob majlel cas ti' buxil, yic'ot ti' candil. 5Che' bʌ tsa' jal-a jiñi xñujpuñijel, tsi' cha'leyob ñʌcʌb, tsa' wʌyiyob. 6Ti ojlil ac'ʌlel tsi' yu'biyob t'añ: ¡U'bix tilel xñujpuñijel; cucula taja tilel! Che'en. 7Che' jiñi tsa' ch'ojyiyob jiñi xch'octacob, tsa' caji i chajpañob i candil. 8Jiñi xch'octacob mach bʌ añobic i ña'tʌbal tsi' su'be jiñi año' bʌ i ña'tʌbal: “Aq'ueñon lojon ts'ita' la' cas, come yomix yajpel lojon j candil”. 9Jiñi año' bʌ i ña'tʌbal tsi' yʌlʌyob: “Ma'añic, ame mach jasʌlic cha'añon lojon yic'ot cha'añetla ja'el, cucula ba'añ xchon casob, mʌñʌ la' cha'añ”. 10Che' majlemob ti mʌñoñel tsa' tili jiñi xñujpuñijel, jiñi chajpʌbilobix bʌ tsa' ochiyob yic'ot jiñi xñujpuñijel;#Ap 19.9 tsa' mʌjqui i ti' otot.#Gn 7.16; Lc 13.25; Heb 3.18-19 11Ti wi'il tsa' c'otiyob jiñi yam bʌ xch'octacob, tsi' yʌlʌyob: ¡c Yum, c Yum, jambeñon lojon! 12Tsi' jac'beyob: Ti isujm, mic su'beñetla, mach j cʌñʌyeticla,#Mt 7.21-23; Lc 13.25-27; 1 Cor 8.3; Gl 4.9; 2 Tm 2.19 che'en. 13Chʌcʌ q'uele la' bʌ che' jiñi, come ma'añic majqui yujil baqui bʌ q'uiñ mi baqui bʌ ora [mi' tilel i Yalobil Wiñic.]#25.13 Ti yan tac bʌ Biblia ma'añic ili t'añ: mi' tilel i Yalobil Wiñic.

Lajiya cha'añ talento tac

14Come i yumʌntel jiñi am bʌ ti panchan lajalʌch bajche' juntiquil wiñic sami bʌ ti ñajt bʌ lum, tsi' pʌyʌ tilel x'e'telob i cha'añ tsi' yʌq'ue ti' wenta i chu'bʌañ. 15Juntiquil tsi' yʌq'ue jo'p'ejl talento,#25.15 Jo'p'ejl talento: Jump'ejl talento jiñʌch wʌcp'ejl mil denario, jiñʌch yom mi yʌl, i tojol juntiquil wiñic tsa' bʌ i cha'le e'tel wʌcp'ejl mil q'uiñ. Jo'p'ejl talento: Jiñʌch i tojol juntiquil x'e'tel tsa' bʌ i cha'le e'tel jo'c'al ja'b. yam bʌ tsi' yʌq'ue cha'p'ejl talento, yam bʌ tsi' yʌq'ue jump'ejl talento, ti jujuntiquil tsa' aq'uentiyob che' bajche' añob i c'ʌjñibal; tsa' majli ti ñajtʌl. 16Jiñi tsa' bʌ i ch'ʌmʌ jo'p'ejl talento tsa' bʌc' majli i c'ʌn ti ganar, tsi' cha'le ti ganar yam bʌ jo'p'ejl talento. 17Che' ja'el, jiñi tsa' bʌ i ch'ʌmʌ cha'p'ejl talento tsi' cha'le ti ganar yam bʌ cha'p'ejl talento. 18Pero jiñi tsa' bʌ i ch'ʌmʌ jump'ejl talento tsa' majli i pic lum, ya'i tsi' mucbe i taq'uiñ i yum.

19Che' bʌ tsa' ñumi ca'bʌl q'uiñ, tsa' cha' tili i yum jiñi x'e'telob cha'añ mi' q'uel bajche' tsi' c'ʌñʌyob jiñi taq'uiñ. 20Tsa' tili jiñi tsa' bʌ aq'uenti jo'p'ejl talento, tsi' ch'ʌmʌ tilel yam bʌ jo'p'ejl talento, tsi' yʌlʌ: “C yum, tsa' wʌq'ueyon jo'p'ejl talento; umba'añ, tsa' cha'le ti ganar yam bʌ jo'p'ejl talento”, che'en. 21I yum tsi' su'be: “Uts'at bajche' tsa' mele, xuc'ul bʌ x'e'telet, che' añ ts'ita' ti a wenta xuc'ul tsa' mele, ca'bʌl mi caj cotsʌbeñet ti a wenta; ochen, tijicñesan a pusic'al yic'ot a Yum”,#Mt 8.11; 22.2; 25.10; Lc 16.10; 1 Cor 4.5 che'en. 22Tsa' c'oti ja'el jiñi tsa' bʌ aq'uenti cha'p'ejl talento, tsi' su'be: “C yum, cha'p'ejl talento tsa' wʌq'ueyon; umba'añ, tsa' c cha'le ti ganar yam bʌ cha'p'ejl”, che'en. 23I yum tsi' su'be: “Uts'at bajche' tsa' mele, xuc'ul bʌ x'e'telet, che' añ ts'ita' ti a wenta xuc'ul tsa' mele, ca'bʌl mi caj cotsʌbeñet ti a wenta. Ochen, tijicñesan a pusic'al yic'ot a Yum”, che'en.

24Tsa' c'oti ja'el jiñi tsa' bʌ aq'uenti jump'ejl talento, tsi' yʌlʌ: “C yum, cujil bʌc'ñʌbilet, ma' tsepben i wut trigo ba' ma'añic tsa' pʌc'ʌ, ma' tuc'ben i wut ba' ma'añic tsa' wejch'u. 25Jiñi cha'añ tsa' bʌc'ñayon, tsa' majli c muc a taq'uiñ ti' mal lum; umba'añ, come a cha'añʌch”, che'en. 26I yum tsi' jac'ʌ: “Jontolet, ts'u'b bʌ x'e'telet, a wujilʌch mic tsepben i wut trigo ba' ma'añic tsa' c pʌc'ʌ, mic tuc'ben i wut ba' ma'añic tsa' c wejch'u. 27Jiñi cha'añ, a wʌc'ʌ c taq'uiñ tsi' c'ʌñʌ ba' mi' c'ʌjñel ti ganar, che'ic jiñi, mic cha' ch'ʌm c taq'uiñ yic'ot i jol che' mic julel. 28Chilbenla jiñi taq'uiñ, aq'uenla jiñi am bʌ lujump'ejl i talento. 29Come jiñi am bʌ i cha'añ, mi caj i yʌq'uentel yam bʌ che' jiñi wen oñ i cha'añ; majqui jach ma'añic i cha'añ mi caj i laj chilbentel ti' pejtelel chuqui añ i cha'añ.#Mt 13.12; Mc 4.25; Lc 8.18; 19.26; Jn 15.2 30Chocola jiñi x'e'tel mach bʌ añic i c'ʌjñibal ti ic'ch'ipan bʌ pañimil ya' ti jumpat; ya'i mi' cajelob ti uq'uel yic'ot quech'ecña bʌ i bʌquel i yej”, che'en.

I yorajlel meloñel ti' tojlel wiñicob x'ixicob

31Che' mi' tilel i Yalobil Wiñic ti' ñuclel, yic'ot pejtelel ch'ujul bʌ i yángelob mi' caj ti buchtʌl ti' yumʌntel yic'ot i ñuclel. 32Ti' tojel i wut mi caj i tempʌntelob pejtelel wiñicob x'ixicob loq'uemo' bʌ ti pejtelel lum; che' jiñi mi caj i t'oxob che' bajche' xcʌnta tʌñʌme' mi' t'ox tʌñʌme' yic'ot chivo. 33Mi' yʌc' tʌñʌme' ti' ñoj. Mi' yʌc' chivo ti' ts'ej. 34Jiñi cha'añ jiñi Rey mi caj i su'ben jiñi año' bʌ ti' ñoj: “La' cu la, ochemet bʌ la ti' yutslel c Tat, ch'ʌmʌ la' yumʌntel chajpʌbil bʌ cha'añetla c'ʌlʌl ti' cajibal pañimil. 35Come che' bʌ tsa' cu'bi wi'ñal, tsa' la' wʌq'ueyon i bʌl c ñʌc'; che' bʌ tsa' cu'bi tiquinti', tsa' la' wʌq'ueyon chuqui mic jap; che' xñumelon jach, tsa' la' pʌyʌyon ochel ti la' wotot; 36che' pits'ilon, tsa' la' wʌq'ueyon chuqui mic xoj; che' c'amon, tsa' la' jula'tayon; che' añon ti mʌjquibʌl, tsa' tili la' q'uelon”,#Job 31.19-20; Is 58.6-10; Ez 18.7; Lc 3.11; Heb 13.3; Stg 1.27; 2.14-16 che'en. 37Jiñi cha'añ jiñi tojo' bʌ mi caj i jac'ob: “C Yum, ¿am ba ba' tsa' q'ueleyet lojon che' wi'ñayet? ¿Tsa' ba cʌq'ueyet lojon i bʌl a ñʌc'? Che' añ a tiquinti', ¿tsa' ba cʌq'ueyet lojon chuqui ma' jap? 38¿Am ba ba' tsa' q'ueleyet lojon che' ñumel jach woliyet, tsa' c pʌyʌyet lojon ochel ti cotot yic'ot che' pits'ilet tsa' cʌq'ueyet lojon chuqui ma' xoj? 39¿Am ba ba' tsa' q'ueleyet lojon che' c'amet o che' añet ti mʌjquibʌl tsajñi cula'tañet lojon?” 40Jiñi Rey mi caj i su'beñob: “Isujm mic su'beñetla, che' bʌ tsa' la' colta juntiquil quermañu, anquese mach ñuquic, joñon tsa' la' coltayon”,#Pr 19.17; Mc 9.41; Mt 10.40-42; 18.5 che'en.

41Che' ja'el, mi caj i su'beñob jiñi año' bʌ ti' ts'ej: “Cucula, chojquemet bʌ la ti Dios, ochenla ti c'ajc mach bʌ añic i jilibal, chajpʌbil bʌ cha'añ xi'ba yic'ot i yÁngelob. 42Come che' bʌ tsa' cu'bi wi'ñal, ma'añic tsa' la' wʌq'ueyon i bʌl c ñʌc', che' bʌ tsa' cu'bi tiquinti', ma'añic tsa' la' wʌq'ueyon chuqui mic jap; 43che' ñumel jach woliyon ma'añic tsa' la' pʌyʌyon ochel ti la' wotot; che' pits'ilon ma'añic tsa' la' wʌq'ueyon chuqui mic xoj; che' c'amon, che' añon ti mʌjquibʌl, ma'añic tsa' la' jula'tayon”, che'en. 44Che' ja'el mi caj i su'beñob: “C Yum, ¿am ba ba' tsa' q'ueleyet lojon che' wi'ñayet, che' añ a tiquinti', che' pits'ilet, che' c'amet, che' añet ti mʌjquibʌl i ma'añic tsa' j coltayet lojon?” 45Che' jiñi, mi caj i su'beñob: “Isujm mic su'beñetla, che' bʌ ma'añic tsa' la' colta juntiquil c cha'añ bʌ anquese mach ñuquic, ma'añic tsa' la' coltayon”, che'en. 46Jiñi cha'añ ili jontolo' bʌ mi caj i majlelob ti tojmulil mach bʌ añic mi' jilel, jiñi tojo' bʌ mi caj i tajob i cuxtʌlel mach bʌ añic mi' jilel, che'en Jesús.

Currently Selected:

Mateo 25: NTCH

Highlight

Copy