Juan 14
14
Jesús i bijlel Panchan ba'añ i Tat
1Mach mi la' mel la' pusic'al; mi la' ñop Dios, ñopoyonla ja'el. 2Ti' yotot c Tat añ ca'bʌl chumlibʌl; che' machic jax añ chumlibʌl, tic'ʌl tsa' c su'beyetla; mux c majlel c chajpʌbeñetla la' wajñib. 3Mi tsa'ix majli c chajpan la' wajñib, cha' talon c pʌyetla majlel,#14.3 Che' woli i yʌl Jesús cha'añ mi caj i cha' tilel ti' tojlel i cha'año' bʌ che' bʌ tsa'ix cha' ch'ojyi loq'uel ba'añ chʌmeño' bʌ, woli i taj ti t'añ che' mi caj i tilel jiñi Ch'ujul bʌ Espíritu (14.16-28; 15.26; 16.7-15), che' ja'el mi' mejlel ti ch'ʌmbentel isujm cha'añ woli i taj ti t'añ che' mi caj i cha' tilel ti jiñi cojix bʌ q'uiñ (Q'uele Mt 16.27; 25.31-34; 1 Ts 4.16-17; 1 Jn 2.28). cha'añ ya' ba'añon, ya'añetla ja'el. 4La' wujil baqui mic majlel. Cʌñʌl la' cha'añ i bijlel, che'en.
5Tomás tsi' su'be:
—C Yum, mach cujilic lojon baqui ma' majlel. ¿Bajche' mi mejlel j cʌn lojon i bijlel? —Che'en.
6Jesús tsi' su'be:
—Joñon i bijlelon,#Sal 16.11; 86.11; Pr 15.24 isujmlelon, i cuxtʌlelon,#14.6 Isujmlelon: Yic'ot i cuxtʌlelon: Q'uele Jn 1.4; 3.16; 11.25; 17.3. Q'uele ja'el Jn 6.35. ma'añic majqui mi' c'otel ba'añ c Tat, jiñi jach am bʌ tic wenta.#Mt 11.27; Jn 1.18; 6.46; Hch 4.12 7Che' muq'uic la' cʌñon, mi' mejlel la' cʌn c Tat ja'el, wʌle cʌñʌlix la' cha'añ come tsa'ix la' q'uele, che'en.
8Felipe tsi' su'be:
—C Yum, pʌsbeñon lojon a Tat, jasʌl mi tsa' pʌsʌ, —che'en.
9Jesús tsi' su'be:
—Ca'bʌlix ora wʌ'añon la' wic'ot. ¿Mach ba añic tsa' cʌñʌyon, Felipe? Jiñi tsa' bʌ i q'ueleyon, tsa'ix i q'uele c Tat.#Jn 12.45; Jn 1.18; Col 1.15; Heb 1.3 ¿Chucoch ma' wʌl, che' jiñi: “Pʌsbeñon lojon a Tat”? 10¿Mach ba añic ma' ñop añon tic Tat, jiñi c Tat añ ti joñon? Jiñi t'añ mu' bʌ c su'beñetla, ma'añic mic su'b tic bajñelil; jiñʌch c Tat mu' bʌ i yajñel ti joñon, woli bʌ i mel jiñi e'tel quic'ot. 11Ñopoyon, añon tic Tat, c Tat añ ti joñon. Mi ma'añic mi la' ñop c t'añ, ñopoyon cha'añ que'tel.#Jn 2.1-12; 4.34; 5.36; 10.37-38 12Isujm, isujm mic su'beñetla, jiñi mu' bʌ i ñopon, mi caj i mel jiñi e'tel mu' bʌ c mel ja'el, ñumen ñuc mi caj i mel che' bajche' tsa' c mele, come joñon mic majlel ba'añ c Tat. 13Pejtelel chuqui tac mi la' c'ajtiben c Tat tij c'aba', mi caj c mel#Jn 15.7; 16.23-24; Mt 7.7-11; 21.22; Lc 11.9-13; 1 Jn 3.21-22; 5.14-15 cha'añ mi' tsictiyel i ñuclel c Tat ti Yalobil. 14Mi añ chuqui mi la' c'ajtin tij c'aba', joñon mi caj c mel.
Jiñi Ch'ujul bʌ Espíritu
15Mi c'ux mi la' wu'biñon, mi caj la' jac'beñon c mandar.#14.15 Q'uele Jn 14.21; q'uele ja'el Dt 6.4-9; 11.1; 1 Jn 5.3. 16Joñon mi caj j c'ajtiben c Tat, mi caj i yʌq'ueñetla yam bʌ la' waj Pi'leya,#14.16 La' waj Pi'leya: Ti ili versículo tac (4.26; 15.26; 16.7), jiñʌch jiñi Ch'ujul bʌ Espíritu mu' bʌ i su'bentel ti la' Waj Pi'leya (ti griego Parákletos). cha'añ mi' yajñel la' wic'ot ti pejtelel ora. 17Jiñʌch jiñi Espíritu mu' bʌ i pʌs isujmlel Dios, jiñi i cha'año' bʌ pañimil mach mejlic i yʌq'ueñtelob, come ma'añic mi' q'uelob, ma'añic mi' cʌñob ja'el; pero jatetla mi la' cʌn, come mi' yajñel la' wic'ot, mi caj i yajñel ti la' pusic'al.
18Ma'añic mi caj j cʌyetla ti me'ba'; cha' talon ba'añetla. 19Ila ti jumuc', ma'añic mi caj i chʌn q'ueloñob jiñi año' bʌ ti pañimil; pero jatetla mi caj la' q'uelon, come cuxulon. Che' ja'el jatetla cuxul mi caj la' wajñel. 20Ti jim bʌ q'uiñ#14.20 Ti jim bʌ q'uiñ: Jiñi x'alt'añob tsi' c'ʌñʌyob ili t'añ (Ti jim bʌ ora) ba' ora añ chuqui ñuc mi' mel Dios ti' tojlel wiñicob x'ixicob (q'uele Jer 30.8). Ti ili versículo Jesús woli i taj ti t'añ ba' ora tsa'ix cha' ch'ojyi ba'añ chʌmeño' bʌ yic'ot che' bʌ tsa'ix c'oti i yorajlel i q'uiñilel Pentecostés, che' bʌ jiñi xcʌnt'añob tsa'ix i ch'ʌmbeyob isujm che' bajche' añob yic'ot Jesús yic'ot che' bajche' añ Jesús yic'ot i Tat. mi caj la' ña'tan añon tic Tat, jatetla añetla ti joñon, joñon añon ti jatetla. 21Jiñi mu' bʌ i cʌn c mandar yic'ot mu' bʌ i jac', jiñʌch mu' bʌ i c'uxbiñon. Jiñi mu' bʌ i c'uxbiñon, mi caj i c'uxbintel tic Tat, joñon ja'el mi caj j c'uxbin, mi caj cʌq'ueñetla la' wen cʌñon.#Jn 15.10; 1 Jn 5.3; 2 Jn 6
22Jiñi Judas, (mach jiñic Judas Iscariote),#Lc 6.16; Hch 1.13 tsi' c'ajtibe:
—C Yum, ¿bajche' mi caj a wʌq'ueñon lojon c wen cʌñet, che' ma'añic ma' wʌq'ueñob i cʌñet jiñi i cha'año' bʌ pañimil? —Che'en Judas.
23Jesús tsi' jac'ʌ, tsi' su'be:
—Jiñi mu' bʌ i c'uxbiñon mi caj i jac'beñon c t'añ; mi caj i c'uxbintel tic Tat, mi caj c tilel lojon ba'añ, che' ja'el mi caj c cha'len lojon chumtʌl yic'ot. 24Jiñi mach bʌ añic mi' c'uxbiñon, ma'añic mi' jac'beñon c t'añ; jiñi t'añ tsa' bʌ la' wu'bi mach c cha'añic, i t'añʌch c Tat tsa' bʌ i chocoyon tilel.
25Tsa' c su'beyetla jiñi t'añ che' wʌ' to añon la' wic'ot. 26Jiñi la' waj Pi'leya, jiñʌch Ch'ujul bʌ Espíritu, mu' bʌ caj i chocbeñetla tilel c Tat ti j c'aba',#14.26 Ti j c'aba': Jiñʌch yom mi' yʌl, cha'añ jiñʌch Jesús jiñi woli bʌ i c'ajtin (q'uele 14.16-17). jiñi mi caj i cʌntesañetla pejtelel chuqui tac añ, mi caj i yʌq'ueñetla la' cha' ña'tan pejtelel chuqui tsa' c su'beyetla.
27Mi cʌq'ueñetla i ñʌch'tʌlel la' pusic'al,#14.27 I Ñʌch'tʌlel la' pusic'al (Jiñʌch t'añ mu' bʌ i c'ʌñob che' mi' c'otelob ti jump'ejl otot che' bajche' cortesía yic'ot che' mi cha' loq'uelob ti otot) jiñʌch ja'el pejtelel i wenlel mu' bʌ i yʌq'ueñob Jesús i cha'año' bʌ (q'uele Nm 6.26; Sal 29.11; Is 9.6-7; 57.19; Lc 2.14; Jn 16.33; 20.19,21,26; Rm 5.1; Ef 2.14). tilem bʌ ti joñon, mach lajalic bajche' mi la' taj ti pañimil. Mach mi la' mel la' pusic'al. Mach la' cha'len bʌq'uen. 28Tsa'ix la' wu'bi chuqui tsa' c su'beyetla: “Mic majlel, pero mic cha' tilel ba'añetla”. Che' muq'uic la' c'uxbiñon, tijicña la' pusic'al cha'añ tsa' c su'beyetla mic majlel ba'añ c Tat, come ñumen ñuc c Tat bajche' joñon. 29Wʌle tsa'ix c su'beyetla che' maxto añic tsa' ujti, cha'añ mi la' ñopon ba' ora mi' yujtel. 30Mach ca'bʌlix mic caj chʌn c pejcañetla, come tal i yum pañimil, pero ma'añic i p'ʌtʌlel tic tojlel. 31Pero cha'añ mi' cʌn pejtelel pañimil c'ux mi cu'bin c Tat, mic jac' che' bajche' tsi' yʌq'ueyon i mandar. Che'ʌch mic mel.
¡Ch'ojyeñixla, coñixla ti' loq'uel ilayi! #Mt 26.46; Mc 14.42
Currently Selected:
Juan 14: NTCH
Highlight
Share
Copy
Want to have your highlights saved across all your devices? Sign up or sign in
Biblia de Estudio en Ch´ol de Tumbalá, Chiapas, México © Sociedad Bíblica de México A.C.
