sēnt lok 15

1 # lok 5:29,30 ēkospi māka kahkiyaw paplikana mina omacatisa ki pē nātik kita natotākot. 2ēkosi parasiwak asici masinahikēwiyiniwak ki otwēwētāwak, ē itwēcik, awa ayisiyiniw miyo kanawāpamēw omacātisa mina wicimicisomēw.

3ki tasitamawēw māka oma awēcikan, ē itāt, 4tānāna ayisiyiniw kiyawāw, ayāwāt mitātahtomitanaw māyatihkwa, ēkosi waniāt pēyak, nama ci kita nakatēw anihi kēkat mitātahtomitanaw pikwataskihk, ēkosi kita natawi natonaāt. anihi kā wanisiniyit, iyikohk kita miskawāt. 5ispi māka miskawāci, kita nayēw, ē miywēyitahk. 6ēkosi ispi takosiki, kita natomēw ototēma, mina o witapimākana, ē itat, wici miyawātamomik wiya ē ki miskawak ni māyatihkom kā ki wanisihk. 7kit itināwāw, ēkosi mwēhci miyawātamowin kē isi ayāk kihci kisikohk pēyak omacatis ohci kā kwēskātisit, ispic kēkāt mitātahtomitanaw mina kēkat mitātat, okwayaskitātisiwak ēkā kā natawēyitākwaniyik kita kwēskātisicik.

8ahpo tānāna iskwēw ayāwāt mitātat wapiski soniyāwa, kispin waniat pēyak, ēkā kē saskaāhk wāsaskotēnikan, mina ēkā kē wēpaikēt, ēkosi kita akamēyimot kita natonikēt iyikohk kita miskawāt. 9ispi māka ki miskawāci kita māmawi natomēw ototēma mina o witapimākana, ē itwēt, wici miyawātamomik, cikēmā ni ki miskawāw soniyāw kā ki waniak. 10ēkosi mwēhci kit itināwāw, ē ayak miyawātamowin ita ē ayāyit okisikoma kisēmanito, pēyak omacatis ē kwēskipimātisit.

11mina māka ki itwēw, pēyak nāpēw ki nisiyiwa okosisa: 12ēkosi wēsimimāwiyit ki itēw otāwiya, nota, kisac miyin tahto kēkway iyikohk wā miyiwanē cēskwa. ēkosi ki nisotowēw tahto kēkway kā pimāciwākēt. 13ēkosi namawiya mihcēt kisikāwa mwēstas iyikohk, osimimaw ki māwasakonam kahkiyaw kēkway kā ayāt wāyaw ē ki isi sipwētēt; ēkosi ēkota ē ki mēstinahk kahkiyaw kēkway kā kikit kiskwēyātisiwinihk. 14ispi māka kā mēstinahk kahkiyaw, ēkota askihk mistahi ki notēkatāniwan; ēkosi ki māci kwitamāw 15ki natawi wici ayāmēw māka pēyak ayisiyiniwa ēkota ē otaskiyit; ēkosi o kistikāniyihk ki isitisahok kohkosa kita asamāt. 16ki mostawinam māka kita kispototahk sikawēpayicikana kohkosa kā miciyit, māka namawiya awiya ki miyik. 17ispi māka mitoni ē payakwāsi māmitonēyitahk, ki itwēw, tanitahto atoskēyākana notāwi ēyāwāt ē masinahikēāt, ē ayācik ēkoyikohk kita micicik mina ē ayiwākipayiikocik, ēkosi niya ē wi nipiyān ē notēkatēyān. 18ni ka pasikon ēkosi ni ka nātaw notāwi, mina ni ka itaw, nota, ni ki maci totēn kihci kisikohk isi, mina kiya ē itāpisiniyan, 19ēkosi māka namawiya ni tēpakēyitākosin kikosis kita itikawiyān; isihin tāpiskoc pēyak kit atoskēyākanahk kā masinahikēacik. 20ēkosi ki pasiko, mina ē ki nātat otāwiya. māka kēyāpic wāyaw ē ayāt, otāwiya ki wāpamik, ē ki kitimakinākot māka, ē ki ispatāyit mina, ē ki ayakwaskitikwēnikot, ē ocēmikot. 21ēkosi okosisa ki itik, nota, ni ki macitotēn kihci kisikohk isi mina kiya ē itāpisiniyan; ēkosi māka namawiya ni tēpakēyitākosin kikosis kita itikawiyān. 22māka otāwiya ki itēyiwa ot atoskēyākana, pētak, kiyipi ē māwaci miywāsik miskotakay, mina posiskamoyihk; mina acanisa kikamoimihk ocihcihk, mina maskisina ositihk: 23pēsihk māka kā wiyinoiht, mostosos, mina nipaihk, ēkosi micisotān mina miyawātatān: 24cikēmā awa nikosis ki nipiw, māka ēkwa pimātisiw; ki wanisin, ēkwa māka miskawāw. ēkosi māka kī māci miyawātamwak.

25okosisa māka ostēsimāwa kistikānihk ki ayāyiwa; ispi māka kisiwak ē pē otitahk wāskāhikan, ki pētam ē kitocikēwiht mina ē nimiitoiht. 26ki natomēw māka pēyak anihi atoskēyākana, ē ki kakwēcimāt tānisi ē itakamikaniyik. 27ēkosi ki itik, kiciwām takosin: ēkosi kotawi ki nipaēw kā wiyinoyit mostososa, cikēmā ē ayāwāt mina ē pimātisiyit mina ē miyoayāyit. 28ki kisiwāsiw māka, namawiya wi pihtokēw: ēkosi otāwiya ki pē wayawiyiwa, ē ki kākicihikot. 29wiya māka ē naskwēwasimāt ki itēw otāwiya, cist, ohi mihcēt askiwina kit atoskātin, ēkosi namawikāc nopikonēn ē itasowēyan, māka namawikāc ki ki miyin māyatihkosis, kita wici miyawātamomakik nitotēmak: 30māka ispi awa kikosis tēkosihk kā ki nisiwanācitāt kā pimāciwākēyan ē wicēwāt pisikwātiskwēwa, ki ki nipatamawāw kā wiyinoyit mostososa. 31ēkosi ki itik, nikosis, tahki ki wicēwin, mina kahkiyaw kā ayayān ki tipēyitēn, 32ki miyonakwan kita miyawātamahk mina kita miwēyitamahk; cikēmā awa kiciwām ki nipiw, ēkwa māka pimātisiw, ki waniāw, ēkwa māka miskawāw.

Currently Selected:

sēnt lok 15: KKMR

Highlight

Copy