sēnt lok 16

1ēkosi mina ki itēw kiskinohamawākana, ki itāw pēyak ē wēyotisit ayisiyiniw, ki ayāwēw māka opamitāsowa; ēkosi ēwakwawa ki mamisimaw ē nisiwanācitāyit kā paminamoāt. 2ēkosi ki natomēw mina ki itēw, kēkway oma kā isi pētamān ē itikawiyan? ātota anima ki pamitāsowin; cikēmā namawiya awasimē ki ka pamitāson. 3ēkosi opamitāso ki itwēw o mitonēyicikanihk tānisi kē totamān? wiya nit okimām ē wi maskamit ni paminikēwin? namawiya ēkoyikohk ni maskawisin kita ki monaikēyān: ēkosi kita pakositwāyān ni nēpēwisin? 4ni kisēyitēn tānisi kē totamān, ispi, wayawiwēpinikawiyani ni paminikēwinihk ohci, kita pitokaicik wikiwāhk. 5ēkosi ki natomēw kā ihtasiyit anihi kā masinahamawāyit ot okimāma, ē ki itat anihi nistam, tāniyikohk masinaamawat nit okimām; 6ki itik māka, mitātat tipaikan pimi, ēkosi ki itēw, otina ki masinahikan ēkosi nahapi, kēsiskaw māka masinaha niyānanomitanaw. 7ēkosi mina kotaka ki itēw, tāniyikohk kiya masinaikēyan? ki itwēyiwa māka, mitātahtomitanaw makahk pakwēsikanikān: ki itēw māka, otina ki masinahikan ēkosi ayinānēmitanaw masinaha. 8ot okimāma māka ki mamicimēw ēkā kwayask kā itātisiyit opaminikēa cikēmā ē ki iyinisiwi isihcikēyit; cikēmā aniki kā ot awāsimisimikocik oma aski wiyawāw o mēkwā pimātisiwiniwāw nawac iyinisikatamwak ispic aniki kā ot awāsimisimikocik wāstēw. 9mina māka kit itināwāw, ototēmitamāsok anima wēyotisiwin ohci ēkā kā kwayaskwahk ispi māka notēpayiyēko, kita pitakaikoyēkwāw kākikē itāwinihk. 10ana kā ayākwāmisikatahk ē apistēyitākwaniyik ayakwamisikatam anima mistahi kā itēyitākwaniyik; mina ana ēkā kwayask kā itātisikatahk kā apistēyitākwaniyik, namawiya kwayask itātisikatam anima mistahi kā itēyitākwaniyik. 11kispin māka namawiya ki ki ayākwamisikatēnāwāw wēyotisiwin ēkā kā kwayaskwahk, awēna kē kanawēyitamoikoyēk tāpwē wēyotisiwina. 12mina māka kispin namawiya ki ki ayākwamisikatamwānāwāw kotak awiyak kā ayāt, awēna kē miyikoyēk anima kā tipiyawēwisiyēk kiyawāw. 13#mātyo 6:24namawiya awiyak atoskēyākan kita ki atoskawēw niso okimāwa: cikēmā itawan pēyak kita pakwatēw, ēkosi kita sākihēw kotaka: awēkā kita kistēyimēw pēyak, ēkosi kotaka kita piwēyimēw. namawiya ki ka ki pamistawāwāw kisēmanito mina māman.

14parasiwak māka, wiya ē sākihācik soniyāwa, ki pētamwak kahkiyaw ohi itwēwina; ēkosi ē ki piwapiācik. 15ēkwa māka ki itēw, kiyawāw aniki kā kwayaskwātisiwakēyimisoyēk ē isi wāpamikoyēkok ayisiyiniwak; māka kisēmanito kiskēyitam ki tēiwāwa; cikēmā anima mistahi kā itēyitākwahk ayisiyininahk pakwātikwan isi kanawāpahtam wiya kisēmanito. 16#mātyo 11:12,13oyasowēwin mina okiskiwēhikēwak ki ayāwak iyiko cān; ēkospi aspin ot otēnawiwin kisēmanito ātocikatēw, ēkosi kā itasit ayisiyiniw akamēyimo ē wi pihtokēt. 17#mātyo 5:18mina māka nawac wētan kisik mina aski kita mēcipayiki, ispic pēyak cakipēikanis oyasowēwinihk kita notēpayik. 18#mātyo 5:32; 1 karintiyana 7:10,11piko awiyak ohpimē kē ayākwē wiwa, mina kotaka kē wikimākwē, itotam pisikwātisiwin: ēkosi piko awiyak kē wikimākwē anihi kā wēpinikoyit o nāpēma itotam pisikwatisiwin.

19ki itāw pēyak ē wēyotisit ayisiyiniw, ē wiyatahk mikwēkin mina ē miywāsiniyik wāpiskēkin tahto kisikāw mina ē ki miywacikēt: 20ēkosi ki itāw pēyak opakositwāw, lāsaras ē isiyihkāsot, ē ki pimisimiht ot iskwātēmiyihk misiwē ē wayomikit, 21ē akāwātahk māka kita asamiht piwacikana kā pakitiniyiki omicisowinātikoyihk ohci kā wēyotisiyit nāpēwa; atimwa māka ki pē nokwātamiyiwa omikiwina. 22ēkosi ki otihcipayiw, kā kitimākisit nāpēw ē ki nipit, ē ki itotahikot māka okisikowa o takoniwēwiniyihk ēprēāma: kā wēyotisit nāpēw wista ki nipiw, mina ki naināw. 23hētisihk māka ki ayitāpiw, ē kakwātakitāt, mina ē wapamat ēprēāma wāyaw ohci, mina lāsarasa o takoniwēwiniyihk ē ayāyit. 24ēkosi ki tēpwēw ē itwēt, nota ēprēām, kitimākinawin, mina pē isitisaw lāsaras, kita kitānahk o wanaskocicān nipihk, kita takāpāwatāt nitēyani; wiya ē wisakapinēyān ota kwākotēhk. 25māka ēprēām ki itwēw, nikosē, kanokiskisi mēkwāc ē pimātisiyan ki ki ayān ē miywasiki kēkwaya, ēkosi wiya lāsaras māyi kēkwaya; māka ēkwa wiya kākiciāw, ēkosi kiya ki kakwātakitan. 26mina māka misawāc, tastawāyihk ita kā ayāyahk kistacikātēw kihci pasatināw, ita ohci aniki kā wi nātiskik ēkā kita kaskitācik, mina aniki ēkotē kā wi pē ohci otihtikoyākok. 27ēkosi māka ki itwēw, ki mawimostatin māka nota, kita isitisawat notawiya wikiyihk; 28cikēmā niyānaniwak niciwāmak; kita ācimostawāt, ēkā wistawāw kita pē itohtēcik ota kakwatakitawinihk. 29ēprēam ki itēw, ayāwēwak mosisa mina okiskiwēhikēwa: ēwakwani kita natotawēwak. 30māka ki itwēw, namawiya nota ēprēam; māka kispin awiya nipowinihk ohci, nātikocik o ka kwēskatisitāwāw. 31ki itik māka, kispin ēkā natotawātwāwi mosisa mina okiskiwēhikēwa, namawiya mina kita ki sakocimāwak, kispin ata awiya waniskāyit nipowinihk ohci.

Currently Selected:

sēnt lok 16: KKMR

Highlight

Copy