sēnt cān 11

1 # lok 10:38,39 ki ayāw māka pēyak ayisiyiniw ē akosit, lāsaras ē isiyihkāsot, pēhtaniihk, ot otēnawiwahk mēri mina ociwāmiskwēma martawa. 2#cān 12:3ēwakwāna mēri kā ki tamaskonāt kā tipēyihcikēyit tamaskowin ohci, mina kā ki kāsisitēwāt wēstakaya ohci, otawēmāwa lāsarasa kā akosiyit. 3otawēmawa māka ki pē isitisahamāk ē itwēyit, tēpēyihcikēyan, mātika ana kā sākihat ākosiw. 4ispi māka cisas piyēhtahk, omisi ki itwēw, oma ākosiwin namawiya nipowiniwan, māka kita kistēyitākohiht kisēmanito, mina kisēmanito okosisa kita ohci kistēyitākohiht. 5cisas māka ki sākihēw martawa, mina ociwāmiskwēmiyiwa, mina lasarasa.

6ispi māka kā pēhtahk ē ākosiyit, ēkota kēyāpic niso kisikāw ki ayāw ita anima kā ayāt. 7mwēstas iyikohk māka ki itēw o kiskinohamawākana, māhti mina itotētāk cotiyaihk. 8o kiskinohamawākana māka omisi itik, rāpay, cowak anocikē ki natonamwak kita pimwapiskaoskik; kit itohtān ci māka mina ēkotē? 9cisas ki naskwēwasimēw, nama ci mitātat nisosāp tahto tipaikan pēyak ē kisikāk? kispin ayisiyiniw pimohtēci ē kisikāyik, namawiya pahkisin, cikēmā wāpahtam kā wāsēyāk oma aski. 10māka kispin ayisiyiniw pimohtēci ē tipiskāyik, pahkisin, cikēmā ēkā ē kikiskākot wāsēyāw. 11ēwakoni ohi kā ayitwēt; ēkwa mwēstas ki itwēw, kitotēminaw lāsaras nipāw; māka nit itotan, kita natawi koskonak.

12o kiskinohamawākana māka ki itwēyiwa, tēpēyihcikēyan, kispin nēpakwē, kita miyo ayāw. 13ātawiya cisas ē ki nipiyit kā itahk: māka wiyawāw ē āstē ayāyit ē nipāyit kā itahk ki itēyitamwak. 14cisas māka mosis ki wihtamawēw, lāsaras ki nipiw; 15ni miwēyitēn māka kiyawāw ohci ēkā ēkota ē ki ayāyān, kita tāpwētamēk; ēyiwēhk māka natawāpamātāk. 16omisi māka tamas (titimas kā isiyihkāsot) ki itēw wici kiskinohamawākana, kiyām kistanan itotētāk, kita wici nipomāyahk.

17ispi māka cisas tēkosihk, poti sāsay nēw kisikāwa ē ki pimisiniyit nahinitowikamikohk. 18kisiwak cērosalamihk ki ayāw pēhtani, nāntaw niso tipahaskān iyikohk. 19mihcēt māka cowak ki pē natawāpamēwak martawa mina mēriwa, ē wi kākiciācik otawēmayiwa ohci.

20ēkosi marta, sēmāk ē pēhtahk ē pē takosiniyit cisasa, ki sipwētēw ē ki natawi nakiskawāt; mēri māka wiya kēyāpic ki ayapiw wāskāhikanihk. 21mārta māka omisi ki itēw cisasa, tēpēyihcikēyan, kispin ota ki ayāyan, namawiya o kā ki nipih nitawēmāw. 22māka ni kiskēyitin, apocika kēyāpic, piko kēkway kakwēcimaci kisēmanito, kisēmanito ki kā miyik. 23cisas māka itēw, mina kita waniskāw kitawēmāw. 24mārta māka omisi itēw, ni kiskēyitēn mina kita waniskāt āpisisināniwaki iskwayāc kisikāki. 25cisas māka omisi ki itēw, niya oma āpisisinowin, mina pimātisiwin: ana kā tāpwēyēyimit, ata ki nipici, kēyāpic kita pimātisiw: 26awiyak māka ē pimātisit tāpwēyēyimici, nama wikāc kita nipiw. ki tāpwētēn ci oma? 27omisi māka itēw, ēhē, tēpēyihcikēyan: ni tāpwētēn kiya ēwako okosisa kisēmanito, kā ki wi pē itohtēt ota askihk. 28ispi māka omisi kā itāt, ki ati kiwēw, ē ki natomat kimoc ociwāmiskwēma mēriwa, ē itāt, okiskinohamākēw takosin ki natomik māka. 29ispi māka oma kā pēhtahk, sēmāk ki pasiko, ē ki pē nātāt māka. 30cisas māka namēskwa takosin otēnāhk, māka ēkota kēyāpic ki ayāw ita martawa kā ki nakiskākot. 31cowak māka kā witapimācik wāskāhikanihk, ē kakiciācik, ispi wiyāpamācik mēriwa ē ati kisiskā pasikoyit, ē ati wayawiyit, ki pimitisawēwak, ē itwēcik, itohtēw nahinitowikamikohk ē nitawi mātot ēkota.

32ispi māka mēri tēkosihk ita ē ayāyit cisasa, ē wāpamāt māka, ki ispayiho ositiyihk, omisi ē itāt, tēpēyihcikēyan, kispin ota ki ayāyan, namawiya o ka ki nipih nitawēmaw. 33ispi māka cisas wiyāpamāt ē mātoyit, mina cowa kā pē wicēwayit ē mātoyit, ki mawimo ot ahcākohk, mina ki mikoskātēyitam. 34ēkosi ki itwēw, tanitē kā pimisimāyēk? omisi māka ki itēwak, tēpēyihcikēyan, pē wāpahta. 35cisas ki māto. 36omisi māka ki itwēwak cowak, cist, kā ispici sākihāt! 37atiht māka ki itwēwak, nama ci awa nāpēw kā yotēnamwāt oskisikoyiwa ēkā kā wāpiyit, o ka ki kaskitā ohi nāpēwa ēkā kita nipiyit?

38cisas māka mina ē mawimot pihci, ki pē takosin. ki watiwiw māka, mina asini nahinitowikamikohk kipapiw. 39cisas ki itwēw, ohpimē ayihk asini. marta māka, otawēmawa kā ki nipiyit, omisi ki itēw, tēpēyihcikēyan, sāsay wicēkanotokē; cikēmā sāsay nēw kisikāw ki nipiw. 40cisas māka omisi ki itēw, nama ci ki ki ititin kispin tāpwētamani, kita wāpahtaman kisēmanito o kistēyitākosiwin? 41ki tawinēwak māka asiniya. cisas māka ispimihk ē itāpik ki itwēw, notā, ki nanāskomitin ē ki pētawiyan. 42ni kiskēyitēn māka mosak ē pētawiyan: māka oki kā pimikāpawicik ota, kā ohci itwēyān, kita tāpwētahkik kiya ē ki pē isitisahoyan. 43ispi māka omisi kā itwēt, ki tēpwēw, ē kisiwēt lāsaras, pē wayawi. 44ana māka kā ki nipit ki pē wayawiw, ē wēwēkapisot ocicihk mina ositihk nahinitowi wēwēkinikana ohci; mina ē ki ākoyāpahpisot wāpiskēkinoyiw. cisas māka omisi itēw, apaohk, mina pakitinihk.

45mihcēt māka cowak kā ki pē natawāpamācik mēriwa, ē ki wāpahtahkik kā ki ayisicikēyit cisasa, ki tāpwēyēyimēwak. 46māka ātiht ki sipwētēwak ē ki natawāpamācik pārasiwa, ē ki wihtamawācik māka kā ki ayisicikēyit.

47kihci ayamihēwiyiniwak māka, mina pārasiwak, ki māwaciitowak kita oyasowēcik omisi ē itwēcik, tānisi kē itotamahk? cikēmā awa ayisiyiniw itotam mihcēt mamātāwi isihcikēwina. 48kispin omisi isi ēkā nāntaw itotawāyaki, kahkiyaw ayisiyiniwa kita tāpwēyēyimik: ēkosi romanak ki ka pē maskamikonawak kit askinaw mina ki piskitaskānēsiwininaw. 49pēyak māka kayapas ē isiyihkāsot, ē māwaci kihci ayamihēwiyiniwit ēwakwānima ē askiwahk, omisi ki itēw, namawāc kēkway ki kiskēyitēnāwāw, 50ahpo namawiya ki māmitonēyitēnāwāw, ē ispayiikoyēk pēyak ayisiyiniw kita nipostamawāt ayisiyiniwa, ēkā māka kahkiyaw ayisiyiniwak kita nisiwanātisicik. 51namawiya māka wiya sēkē omisi kā itwēt: māka ē māwaci kihci ayamihēwiyiniwit ēwakwānima ē askiwahk, ki kiskiwēhikēw cisas kita nipostamawat ēwakoni ayisiyiniwa; 52namawiya māka piko ēwakoni ayisiyiniwa, māka mina kita māwacihāt kā siswēskāyit māmawi kisēmanito ot awāsimisa. 53ēwako māka ē kisikāk ohci ki oyasowēwak kita nipahācik. 54cisas māka namawāc mina mosis ki papāmotēw ita ē ayāyit cowa; māka ki itohtēw anita askihk kisiwāk pikwataskamikāhk, otēnaw iprēim ē isiyihkātēk, ēkotē māka ki wicēwēw o kiskinohamawākana.

55o mayāskotāto wihkohtowiniwāw māka cowak sāsay kēkāt otihcipayiyiw: mihcēt māka papāmi ita ohci ki pē itohtēwak cērosalamihk ē ki itohtēcik mwayēs otihcipayik mayāskotāto wihkohtowin, kita pēkiisocik. 56ki nanatonawēwak māka cisasa, omisi ē ki ayititocik, ē nanipawicik kihci ayamihēwikamikohk, tānisi kiyawāw ētēyitamēk, namawiya ci kita wi pē itohtēw wihkohtowinihk? 57ēkwa māka kihci ayamihēwiyiniwak mina pārasiwak ki itasowēwak, kispin awiyak ayisiyiniwa kiskēyitamiyit ita ē ayāt, kita kiskiyitamoiwēyit kita ki otinācik.

Currently Selected:

sēnt cān 11: KKMR

Highlight

Copy