ᒉᓂᓯᐢ 41

1ᑭ ᐊᔨᑭᐣ ᒫᑲ ᑳ ᐳᓂᐸᔨᑭ ᒥᑐᓂ ᓂᓱ ᐊᐢᑭᐃᐧᓇ, ᐯᕒᐅ ᑭ ᐸᐊᐧᒥᐤ; ᐳᑎ ᒫᑲ ᑭ ᓂᐸᐃᐧᐤ ᒋᑭ ᓯᐱᕽ. 2ᐳᑎ ᒫᑲ ᑭ ᐯ ᑲᐹᐊᐧᐠ ᓯᐱᕽ ᐅᐦᒋ ᑌᐸᑯᑊ ᐁ ᒥᔪᑳᒧᒋᐠ ᒧᐢᑐᓴᐧᐠ ᒥᓇ ᐁ ᒥᔪ ᓈᑯᓯᒋᐠ ᑭ ᒥᒋᓱᐊᐧᐠ ᒫᑲ ᐊᓂᑕ ᒪᐢᑯᓯᐢᑳᕽ. 3ᐳᑎ ᒫᑲ ᑯᑕᑲᐠ ᑌᐸᑯᑊ ᑭ ᐯ ᑲᐹᐊᐧᐠ ᓯᐱᕽ ᐅᐦᒋ, ᐁ ᓯᑯᓈᑯᓯᒋᐠ ᒥᓇ ᐁ ᑲᐋᐧᑲᑐᓱᒋᐠ ᒧᐢᑐᓴᐧᐠ, ᑭ ᐃᐧᒋᑲᐸᐃᐧᐢᑕᐁᐧᐊᐧᐠ ᒫᑲ ᐊᓂᐦᐃ ᑯᑕᑭ ᒧᐢᑐᓴᐧ ᐊᓂᑕ ᒋᑭᐯᐠ ᓯᐱᕽ. 4ᐊᓂᑭ ᒫᑲ ᑳ ᓯᑯᓈᑯᓯᒋᐠ ᒥᓇ ᑳ ᑲᐋᐧᑲᑐᓱᒋᐠ ᒧᐢᑐᓴᐧᐠ ᑭ ᑭᑕᒣᐧᐊᐧᐠ ᐊᓂᐦᐃ ᑌᐸᑯᑊ ᑳ ᒥᔪᑳᒧᔨᐟ ᒥᓇ ᑳ ᒥᔪᓈᑯᓯᔨᐟ ᒧᐢᑐᓴᐧ. ᐁᑯᓯ ᒫᑲ ᐯᕒᐅ ᑭ ᑯᐢᑯᐢᑳᐤ. 5ᑭ ᓂᐹᐤ ᒫᑲ, ᐁᑯᓯ ᓂᓵᐧᐤ ᐁᑲᐧ ᐁ ᑭ ᐸᐋᐧᑕᕽ; ᐳᑎ ᒫᑲ ᐸᐦᑫᐧᓯᑲᓂᑳᐣ ᑌᐸᑯᑊ ᐁ ᑕᐦᑐᐢᑎᑳᐧᓀᐟ ᐯᔭᐠ ᒪᐢᑯᓯ, ᐁ ᒪᒥᔦᐧᐃᐧᑭᐟ ᒥᓇ ᐁ ᒥᔪᐟ. 6ᐁᑲᐧ ᐳᑎ ᒥᓇ ᑌᐸᑯᑊ ᐁ ᑕᐦᑐᐢᑎᑲᐧᓀᐟ ᐯᔭᐠ ᒪᐢᑯᓯ ᐁ ᓯᑯᓂᑖᐃᐧᑭᐟ ᒥᓇ ᐁ ᓇᑭᑭᐟ ᐋᐧᐸᓂᔪᑎᐣ ᐅᐦᒋ, ᑭ ᐯ ᓵᑭᑭᐤ ᓈᐊᐧᐩ. 7ᐊᓂᑭ ᒫᑲ ᑌᐸᑯᑊ ᑳ ᓯᑯᓂᑖᐃᐧᑭᒋᐠ ᑭ ᑭᑕᒣᐧᐊᐧᐠ ᐊᓂᐦᐃ ᑌᐸᑯᑊ ᑳ ᒪᒥᔦᐧᐃᐧᑭᔨᐟ ᒥᓇ ᑳ ᒥᔪᓯᔨᐟ. ᐯᕒᐅ ᒫᑲ ᑭ ᑯᐢᑯᐢᑳᐤ, ᐳᑎ ᒫᑲ ᐸᐋᐧᒥᐃᐧᐣ ᐱᑯ. 8#ᑖᓂᐁᓬ 2:2ᑭ ᐃᐦᑭᐣ ᒫᑲ ᐁᑎ ᑫᑭᓭᐹᔮᐠ, ᑭ ᒥᑯᐢᑳᑌᔨᑕᒼ; ᑭ ᓇᑐᒣᐤ ᒫᑲ ᑲᐦᑭᔭᐤ ᐅᑯᓵᐸᑕᒧᐊᐧ ᐃᒋᑊᑎᕽ ᒥᓇ ᑳ ᐃᔨᓂᓯᔨᐟ ᐁᑯᑕ, ᐯᕒᐅ ᒫᑲ ᑭ ᐃᐧᐦᑕᒪᐁᐧᐤ ᐅ ᐸᐋᐧᒥᐃᐧᐣ; ᒫᑲ ᓇᒪᐃᐧᔭ ᐃᐦᑖᐤ ᐁ ᑲᐢᑭᑖᐟ ᑭᑕ ᐃᐧᐦᑕᕽ.

9ᐁᑲᐧ ᒫᑲ ᑳ ᓂᑳᓀᔨᑖᑯᓯᐟ ᐅᒥᓇᐃᐁᐧᐤ ᑭ ᑭᑐᑌᐤ ᐯᕒᐅᐊᐧ, ᐁ ᐃᑖᐟ, ᓂ ᑭᐢᑭᓱᐸᔨᐣ ᐁᑲᐧ ᓂ ᐊᐧᓂᑐᑕᒧᐃᐧᓇ ᐊᓄᐦᐨ ᑳ ᑭᓯᑳᐠ. 10ᐯᕒᐅ ᑭ ᑭᓰᐢᑕᐁᐧᐤ ᐅᐟ ᐊᑐᐢᑫᔮᑲᓇ ᐁᑯᓯ ᐁ ᑭ ᑭᐸᐅᐟ ᑭᐸᐦᐅᑐᐃᐧᑲᒥᑯᕽ, ᑳ ᓂᑳᓂᐟ ᐅᑲᓇᐁᐧᔨᐦᒋᑫᐤ ᐃᐧᑭᕽ, ᓂᔭ ᒥᓇ ᑳ ᓂᑳᓀᔨᑖᑯᓯᐟ ᐅᐸᑫᐧᓯᑲᓂᑫᐤ. 11ᓂ ᑭ ᐸᐋᐧᒥᐣ ᒫᑲ ᐯᔭᑳᐧᐤ ᐁ ᑎᐱᐢᑳᐠ, ᓂᔭ ᒥᓇ ᐃᐧᔭ, ᓂ ᑭ ᐃᑖᐸᑌᓈᐣ ᐁ ᐋᐃᑌᔨᑖᑲᐧᐦᑭ ᓂ ᐸᐋᐧᒥᐃᐧᓂᓈᓇ. 12ᐁᑯᑕ ᒫᑲ ᓂ ᑭ ᐃᐧᒋᐊᔮᒥᑯᓈᐣ ᐅᐢᑭᓂᑭᐤ, ᐦᐃᐸᕒᐅ, ᐁ ᐊᑐᐢᑲᐋᐧᐟ ᑳ ᑎᐯᔨᒫᐟ ᐅᑲᓇᐁᐧᔨᐦᒋᑫᐊᐧ; ᓂ ᑭ ᐃᐧᐦᑕᒪᐋᐧᓈᐣ ᒫᑲ, ᐁᑯᓯ ᑭ ᐃᐧᐦᑕᒼ ᓂ ᐸᐋᐧᒥᐃᐧᓂᓈᓇ; ᒣᐧᐦᒋ ᒫᑲ ᑳ ᐊᔨᑖᐸᑕᒫᕽ ᐁᑯᓯ ᑳ ᐃᓯ ᐃᐧᐦᑕᕽ. 13ᑭ ᐃᐢᐸᔨᐤ ᒫᑲ ᒣᐧᐦᒋ ᑳ ᑭ ᐃᓯ ᐃᐧᐦᑕᒫᑯᔮᕽ ᐁᑯᓯ ᑳ ᐃᑭᕽ; ᓂᔭ ᑳᐃᐧ ᓂ ᑭ ᐸᑭᑎᓂᐠ ᓂᐟ ᐊᑐᐢᑫᐃᐧᓂᕽ, ᐃᐧᔭ ᒫᑲ ᑭ ᐊᑯᑖᐤ.

14ᐯᕒᐅ ᒫᑲ ᑭ ᐃᓯᑎᓴᐦᐅᐁᐧᐤ ᐁ ᓇᑐᒫᐟ ᒍᓯᐸ, ᑭᔨᐸ ᒫᑲ ᑭ ᐯᓯᐁᐧᐊᐧᐠ ᑭᐸᐦᐅᑐᐃᐧᑲᒥᑯᕽ ᐅᐦᒋ; ᑭ ᑳᐢᑭᐹᓱ ᒫᑲ, ᒥᓇ ᐁ ᑭ ᒥᐢᑯᑕᔪᐃᐧᓀᐟ, ᐁᑯᓯ ᐁ ᑭ ᐱᑐᑲᐋᐧᐟ ᐯᕒᐅᐊᐧ. 15ᐯᕒᐅ ᒫᑲ ᐅᒥᓯ ᑭ ᐃᑌᐤ ᒍᓯᐸ, ᓂ ᑭ ᐸᐋᐧᒥᐣ ᓇᒪᐋᐧᐨ ᒫᑲ ᐃᐦᑖᐤ ᐊᐃᐧᔭᐠ ᑭᑕ ᑭ ᐃᐧᐦᑕᕽ; ᓂ ᑭ ᐯᐦᑌᐣ ᒫᑲ ᐁ ᐃᑌᑲᐃᐧᔭᐣ ᐁ ᓂᓯᑐᐦᑕᒪᐣ ᐸᐋᐧᒥᐃᐧᐣ ᑭᑕ ᐃᐧᐦᑕᒪᐣ. 16ᒍᓯᑊ ᒫᑲ ᑭ ᓇᐢᑫᐧᐊᐧᓯᒣᐤ ᐯᕒᐅᐊᐧ, ᐅᒥᓯ ᐁ ᐃᑖᐟ, ᓇᒪᐃᐧᔭ ᓂᔭ; ᑭᓭᒪᓂᑐ ᑭᑕ ᒥᔪᓇᐢᑫᐧᐊᐧᓯᐁᐤ ᐯᕒᐅᐊᐧ. 17ᐯᕒᐅ ᒫᑲ ᐅᒥᓯ ᑭ ᐃᑌᐤ ᒍᓯᐸ, ᐅᒥᓯ ᓂ ᑭ ᐃᑖᐸᑌᐣ, ᐳᑎ ᓂ ᑭ ᓂᐸᐃᐧᐣ ᒋᑭᐯᐠ ᓯᐱᕽ, 18ᐳᑎ ᒫᑲ ᑭ ᐯ ᑲᐹᐊᐧᐠ ᓯᐱᕽ ᐅᐦᒋ ᑌᐸᑯᑊ ᒧᐢᑐᓴᐧᐠ ᐁ ᐃᐧᔨᓄᒋᐠ ᒥᓇ ᐁ ᒥᔪᓈᑯᓯᒋᐠ; ᑭ ᒥᒋᓱᐊᐧᐠ ᒫᑲ ᒪᐢᑯᓯᐢᑳᕽ. 19ᒥᓇ ᒫᑲ ᐳᑎ ᑯᑕᑲᐠ ᑌᐸᑯᑊ ᒧᐢᑐᓴᐧᐠ ᑭ ᐯ ᑲᐹᐊᐧᐠ ᐁ ᑲᐋᐧᑲᑐᓱᒋᐠ ᒥᓇ ᐁ ᓯᑯᓈᑯᓯᒋᐠ; ᓇᒪᐃᐧᑳᐨ ᓂ ᐋᐧᐸᒫᐊᐧᐠ ᒥᓯᐁᐧ ᐃᒋᑊᐟ ᐊᐢᑭᕽ ᑭᑕ ᐃᐢᐱᒋ ᒫᔮᑎᓯᒋᐠ. 20ᐊᓂᑭ ᒫᑲ ᑳ ᑲᐋᐧᑲᑐᓱᒋᐠ ᒥᓇ ᑳ ᒫᔮᑎᓯᒋᐠ ᒧᐢᑐᓴᐧᐠ ᑭ ᑭᑕᒣᐧᐊᐧᐠ ᐊᓂᐦᐃ ᓂᐢᑕᒼ ᑌᐸᑯᑊ ᑳ ᐃᐧᔨᓄᔨᐟ ᒧᐢᑐᓴᐧ. 21ᐃᐢᐱ ᒫᑲ ᑳ ᑭᑕᒫᐧᒋᐠ ᓇᒪᐋᐧᐨ ᑭᑕ ᑭ ᑭᐢᑫᔨᑖᑲᐧᐣ ᐁ ᑭ ᒧᐋᐧᒋᐠ; ᒫᑲ ᐅᐦᒋ ᐱᑯ ᑭ ᓯᑯᓈᑯᓯᐊᐧᐠ ᑖᐱᐢᑯᐨ ᓂᐢᑕᒼ. ᐁᑯᓯ ᓂ ᑭ ᑯᐢᑯᐢᑳᐣ. 22ᐁᑯᓯ ᓂ ᑭ ᐋᐧᐸᐦᑌᐣ ᓂ ᐸᐋᐧᒥᐃᐧᓂᕽ, ᐳᑎ ᑌᐸᑯᑊ ᐁ ᑕᐦᑐᐢᑎᑳᐧᓀᐟ ᐸᐦᑫᐧᓯᑲᓂᑳᐣ ᐯᔭᐠ ᒪᐢᑯᓯ, ᐁ ᒪᒥᔦᐧᐃᐧᑭᐟ ᒥᓇ ᐁ ᒥᔪᓯᐟ. 23ᒥᓇ ᒫᑲ ᐳᑎ, ᑌᐸᑯᑊ ᐁ ᑕᐦᑐᐢᑎᑲᐧᓀᐟ, ᐁ ᓯᑯᓯᐟ, ᐁ ᓂᐳᐁᐧ ᐊᔮᐟ, ᒥᓇ ᐁ ᓇᑭᑭᐟ ᐋᐧᐸᓂᔪᑎᐣ ᐅᐦᒋ, ᒣᐧᐢᑕᐢ ᑭ ᓵᑭᑭᐤ. 24ᐁᑯᓯ ᐊᓂᑭ ᑳ ᓯᑯᓯᒋᐠ ᑭ ᑭᑕᒣᐧᐊᐧᐠ ᐊᓂᐦᐃ ᑌᐸᑯᑊ ᑳ ᒥᔪᓯᔨᐟ; ᐁᑯᓯ ᓂ ᑭ ᐃᐧᐦᑕᒪᐋᐧᐊᐧᐠ ᐅᑯᓵᐸᑕᒧᐊᐧᐠ; ᒫᑲ ᓇᒪᐃᐧᔭ ᐊᐃᐧᔭᐠ ᐃᐦᑖᐤ ᑭᑕ ᑭ ᐃᐧᐦᑕᒪᐃᐧᐟ.

25ᒍᓯᑊ ᒫᑲ ᑭ ᐃᑌᐤ ᐯᕒᐅᐊᐧ, ᐅᐸᐋᐧᒥᐃᐧᐣ ᐯᕒᐅ ᐯᔭᑲᐧᓂᔨᐤ, ᑭᓭᒪᓂᑐ ᑭ ᐋᐧᐸᐦᑕᐦᐁᐤ ᐯᕒᐅᐊᐧ ᐊᓂᒪ ᑳ ᐃᐧ ᐃᑐᑕᕽ. 26ᑌᐸᑯᑊ ᑳ ᒥᔪᓯᒋᐠ ᒧᐢᑐᓴᐧᐠ ᐁᐊᐧᑳᐧᓂᒪ ᑌᐸᑯᑊ ᑕᐦᑐ ᐱᐳᐣ; ᒥᓇ ᑌᐸᑯᑊ ᐁ ᑕᐦᑐᐢᑎᑳᐧᓀᐟ ᐸᐦᑫᐧᓯᑲᓂᑳᐣ ᐁ ᒥᔪᓯᐟ ᐁᐊᐧᑳᐧᓂᒪ ᑌᐸᑯᑊ ᑕᐦᑐ ᐱᐳᐣ; ᐯᔭᑲᐧᐣ ᐊᓂᒪ ᑳ ᐃᑖᐸᑕᒪᐣ. 27ᐊᓂᑭ ᒫᑲ ᑌᐸᑯᑊ ᑳ ᑲᐋᐧᑲᑐᓱᒋᐠ ᒥᓇ ᑳ ᒫᔮᑎᓯᒋᐠ ᒧᐢᑐᓴᐧᐠ ᑳ ᐯ ᑲᐹᒋᐠ, ᐁᐊᐧᑳᐧᓂᒪ ᑌᐸᑯᑊ ᑕᐦᑐ ᐱᐳᐣ; ᒥᓇ ᑌᐸᑯᑊ ᐁ ᑕᐦᑐᐢᑎᑳᐧᓀᐟ ᐸᐦᑫᐧᓯᑲᓂᑳᐣ ᑳ ᓯᑯᓯᐟ ᒥᓇ ᑳ ᓇᑭᑭᐟ ᐁ ᐋᐧᐸᓂᔪᑎᕽ, ᑌᐸᑯᑊ ᑕᐦᑐ ᐱᐳᐣ ᑭᑕ ᓄᑌᑲᑖᓂᐊᐧᐣ. 28ᐁᐊᐧᑯ ᐅᒪ ᑳ ᑭ ᐃᑕᐠ ᐯᕒᐅ; ᑳ ᐃᐧ ᑐᑕᕽ ᑭᓭᒪᓂᑐ ᐋᐧᐸᐦᑕᐦᐁᐤ ᐯᕒᐅᐊᐧ. 29ᒫᑎᑲ, ᐯ ᑕᑯᓯᓄᒪᑲᐣ ᑌᐸᑯᑊ ᑕᐦᑐ ᐱᐳᐣ ᑭᑕ ᑭᐦᒋ ᒥᓯᑖᓂᐊᐧᕽ ᒥᓯᐁᐧ ᐁᐢᐱᒑᐠ ᐃᒋᑊᐟ ᐊᐢᑭ. 30ᒣᐧᐢᑕᐢ ᐃᔨᑯᕽ ᒫᑲ ᑭᑕ ᐸᓯᑯᒪᑲᐣ ᑌᐸᑯᑊ ᑕᐦᑐ ᐊᐢᑭ ᐃᑕ ᑭᑕ ᐊᔮᐠ ᓄᑌᑲᑌᐃᐧᐣ; ᑲᐦᑭᔭᐤ ᒫᑲ ᒥᓯᑖᐃᐧᐣ ᑭᑕ ᐊᐧᓂᑭᐢᑭᓯᑐᒋᑳᑌᐤ ᐃᒋᑊᐟ ᐊᐢᑭᕽ ᒥᓇ ᓄᑌᑲᑌᐃᐧᐣ ᑭᑕ ᒣᐢᑎᓇᒧᒪᑲᐣ ᐊᐢᑭ. 31ᐊᓂᒪ ᒫᑲ ᒥᓯᑖᐃᐧᐣ ᓇᒪᐋᐧᐨ ᑭᑕ ᑭᐢᑫᔨᑖᑲᐧᐣ ᐊᐢᑭᕽ, ᑫ ᐃᐢᐱᒋ ᓄᑌᑲᑌᕽ ᐊᓂᒪ ᑫ ᐯ ᐋᓂᐢᑫᐸᔨᐠ; ᒋᑫᒫ ᓈᐢᐱᐨ ᑭᑕ ᐋᑲᐧᐣ. 32ᐊᓂᒪ ᒫᑲ ᐃᐧᔭ ᐸᐋᐧᒥᐃᐧᐣ ᑳ ᑭ ᐅᐦᒋ ᓇᐳᓇᒫᐦᐟ ᐯᕒᐅ; ᐁᐊᐧᑳᐧᓂᒪ ᐁ ᐋᔮᑕᐢᑖᐟ ᑭᓭᒪᓂᑐ, ᑭᓭᒪᓂᑐ ᒫᑲ ᑭᔨᐸ ᑭᑕ ᐅᑎᐦᒋᐸᔨᑖᐤ. 33ᐁᑲᐧ ᒫᑲ ᑭᔮᒼ ᐯᕒᐅ ᑭᑕ ᓇᓈᑐᓇᐁᐧᐤ ᐊᔨᓯᔨᓂᐊᐧ ᐁ ᐊᔮᑳᐧᒥᓯᔨᐟ ᒥᓇ ᐁ ᐃᔨᓂᓯᔨᐟ ᐁᑯᓯ ᑭᑕ ᑎᐯᔨᐦᑕᒧᐋᐟ ᐃᒋᑊᐟ ᐊᐢᑭ. 34ᑭᔮᒼ ᐯᕒᐅ ᐅᒥᓯ ᑭᑕ ᐃᐦᑐᑕᒼ, ᒥᓇ ᑭᑕ ᐅᔭᑭᒣᐤ ᐅᐸᒥᑖᓱᐊᐧ ᑭᑕ ᓈᓈᑲᑕᐁᔨᑕᐦᑭᐠ ᐊᐢᑭ, ᐁᑯᓯ ᐯᔭᐠ ᐁ ᑭ ᓂᔮᓇᓄᑖᕽ ᐃᔨᑯᕽ ᑭᑕ ᒫᐊᐧᒋᐦᑖᒋᐠ ᐃᒋᑊᐟ ᐊᐢᑭᕽ ᑌᐸᑯᑊ ᑕᐦᑐ ᐊᐢᑭ ᒣᑳᐧᐨ ᐁ ᒥᓯᑖᕽ. 35ᑭᔮᒼ ᒫᑲ ᑭᑕ ᒫᐊᐧᒋᐦᑖᐊᐧᐠ ᒥᒋᐃᐧᐣ ᒣᑳᐧᐨ ᑕᐦᑐ ᐊᐢᑭ ᐁ ᐁᐧᔪᑕᕽ ᒥᓇ ᑭᑕ ᓇᐊᔮᐤ ᐸᐦᑫᐧᓯᑲᓂᑳᐣ ᐯᕒᐅ ᑭᑕ ᑲᓇᐁᐧᔨᒫᐟ, ᒥᓇ ᑭᔮᒼ ᑭᑕ ᑲᓇᐁᐧᔨᑕᒪᐧᐠ ᒥᒋᐃᐧᐣ ᐅᑌᓈᕽ. 36ᐊᓂᒪ ᒫᑲ ᒥᒋᐃᐧᐣ ᑭᑕ ᐊᐢᑖᐧᓂᐊᐧᐣ ᐊᐢᑭᕽ ᐁ ᒪᓂᐢᒋᑳᑌᐠ ᑌᐸᑯᑊ ᑕᐦᑐ ᐱᐳᐣ ᓄᑌᑲᑌᐃᐧᐣ ᑫ ᐊᔮᐠ ᐃᒋᑊᐟ ᐊᐢᑭᕽ; ᐊᓂᒪ ᒫᑲ ᐊᐢᑭ ᐁᑳ ᑭᑕ ᓂᓯᐊᐧᓈᑕᕽ ᓄᑌᑲᑌᐃᐧᐣ ᐅᐦᒋ.

37ᑭ ᒥᔮᐧᐱᓯᐣ ᒫᑲ ᐯᕒᐅ ᐁᐊᐧᑫᐧᔨᐤ, ᒥᓇ ᑭ ᒥᔮᐧᐱᓯᓂᔨᐊᐧ ᑲᐦᑭᔭᐤ ᐅᐟ ᐊᑐᐢᑫᔮᑲᓇ. 38ᐯᕒᐅ ᒫᑲ ᐅᒥᓯ ᑭ ᐃᑌᐤ ᐅᐟ ᐊᑐᐢᑫᔮᑲᓇ, ᑭ ᑲ ᑭ ᒥᐢᑲᐋᐧᓇᐤ ᒌ ᐊᐃᐧᔭᐠ ᑭᑕ ᐃᓯ ᐊᔮᐟ ᑖᐱᐢᑲᐨ ᐊᐊᐧ, ᐊᔨᓯᔨᓂᐤ ᑳ ᑭᑭᐢᑳᑯᐟ ᑭᓭᒪᓂᑐ ᐅᐟ ᐊᐦᒑᐦᑲᐧ? 39ᐯᕒᐅ ᒫᑲ ᐅᒥᓯ ᑭ ᐃᑌᐤ ᒍᓯᐸ, ᑭ ᑭ ᐋᐧᐸᐦᑎᐦᐃᐠ ᑭᓭᒪᓂᑐ ᑲᐦᑭᔭᐤ ᐅᐦᐃ, ᓇᒪᐃᐧᔭ ᐊᐃᐧᔭᐠ ᐃᓯ ᐊᔮᑳᐧᒣᓯᐤ ᒥᓇ ᐃᓯ ᐃᔨᓂᓯᐤ ᑖᐱᐢᑯᐨ ᑭᔭ. 40#ᐃᓯᐦᒋᑫᐃᐧᓂᐋᐧᐊᐧ 7:10ᑭ ᑲ ᑎᐯᔨᑌᐣ ᓂᑭ, ᒥᓇ ᐁ ᐃᑌᐧᔭᐣ ᑭᑕ ᐃᑕᓱᐋᐧᑖᐊᐧᐠ ᓂᐟ ᐊᔨᓯᔨᓂᒪᐠ; ᐱᑯ ᑭᐦᒋ ᐅᑭᒫᐊᐧᐱᐃᐧᓂᕽ ᑭ ᑲ ᐊᔨᐋᐧᑭᐢᑳᑎᐣ. 41ᐯᕒᐅ ᒫᑲ ᐅᒥᓯ ᑭ ᐃᑌᐤ ᒍᓯᐸ, ᒫᑎᑲ, ᑭ ᑭ ᑎᐱᔨᑕᒧᐃᑎᐣ ᒥᓯᐁᐧ ᐃᒋᑊᐟ ᐊᐢᑭ. 42#ᑖᓂᐁᓬ 5:29ᐯᕒᐅ ᒫᑲ ᑭ ᑫᒋᑯᓀᐤ ᐅᐟ ᐊᐦᒐᓂᓴ ᐅᒋᐦᒋᕽ ᐅᐦᒋ, ᐁ ᑭ ᐊᑲᒧᐋᐟ ᒍᓯᐸ ᐅᒋᐦᒋᔨᕽ ᒥᓇ ᐁ ᑭ ᐳᓯᐢᑲᒧᑎᐋᐟ ᐁ ᒥᔮᐧᓯᓂᔨᑭ ᑭᑭᐢᑳᒋᑲᓇ, ᒥᓇ ᐅᓵᐃᐧᓱᓂᔮᐊᐧ ᐁ ᑭ ᑖᐱᐢᑲᐋᐟ ᐅᑲᐧᔮᔨᕽ. 43ᑭ ᐳᓯᐦᐁᐤ ᒫᑲ ᐁ ᐊᐢᑯᐃᐧᐢᑳᑯᐟ ᐅ ᑎᑎᐱᑖᐹᓈᐢᑲᐧ ᑳ ᐊᔮᐋᐧᐟ, ᑭ ᑌᐯᐧᐊᐧᐠ ᒫᑲ ᐅ ᓂᑳᓂᕽ, ᐅᒋᐦᒋᐦᑲᐧᓂᐢᑖᕽ; ᑭ ᑎᐯᔨᐦᑕᒧᐁᐤ ᒫᑲ ᒥᓯᐁᐧ ᐃᒋᑊᐟ ᐊᐢᑭ. 44ᐯᕒᐅ ᒫᑲ ᑭ ᐃᑌᐤ ᒍᓯᐸ, ᓂᔭ ᐯᕒᐅ, ᑭᐢᐱᐣ ᒫᑲ ᐁᑳ ᑭᔭ, ᓇᒪᐃᐧᔭ ᐊᔨᓯᔨᓂᐤ ᑭᑕ ᐅᐦᐱᓇᒼ ᐅᒋᐦᒋ, ᐊᐦᐳ ᐅᓯᐟ, ᒥᓯᐁᐧ ᐃᒋᑊᐟ ᐊᐢᑭᕽ. 45ᐯᕒᐅ ᒫᑲ ᓵᐱᓈᐦᐟᐸᓂᔭ ᑭ ᐃᓯᔨᐦᑳᑌᐤ ᒍᓯᐸ, ᒥᓇ ᐁ ᑭ ᒥᔮᐟ ᑭᑕ ᐃᐧᐃᐧᔨᐟ ᐋᓯᓈᐦᐟ ᐅᑖᓂᓴ ᐹᑎᐯᕒᐊ ᐊᔭᒥᐦᐁᐃᐧᔨᓂᐤ ᐊᓂᑕ ᐋᐣ. ᒍᓯᑊ ᒫᑲ ᑭ ᐸᐹᒧᑌᐤ ᒥᓯᐁᐧ ᐃᒋᑊᐟ ᐊᐢᑭᕽ.

46ᒍᓯᑊ ᒫᑲ ᓂᐢᑐᒥᑕᓇᐤ ᑭ ᑕᐦᑐᐱᐳᓀᐧᐤ ᐃᐢᐱ ᑳ ᐅᑎᐢᑲᐃᐧᑳᐸᐃᐧᐢᑕᐋᐧᐟ ᐯᕒᐅᐊᐧ ᐃᒋᑊᐟ ᑭᐦᒋ ᐅᑭᒫᐊᐧ. ᒍᓯᑊ ᒫᑲ ᑭ ᐊᐧᔭᐃᐧᐤ ᐁᑖᐢᑕᒪᐱᔨᐟ ᐯᕒᐅᐊᐧ ᐅᐦᒋ, ᐁ ᑭ ᐸᐹᒧᑌᐟ ᒥᓯᐁᐧ ᐃᒋᑊᐟ ᐊᐢᑭᕽ. 47ᒣᑳᐧᐨ ᒫᑲ ᑌᐸᑯᑊ ᑕᐦᑐ ᐱᐳᐣ ᐁ ᐁᐧᔪᑕᕽ ᐊᓂᒪ ᐊᐢᑭ ᓵᑲᐢᑭᐣ ᒥᒋᐦᒋᔭ ᑭ ᐃᓯ ᐅᐦᐱᑭᒋᑫᒪᑲᐣ. 48ᑭ ᒫᐊᐧᒋᐦᑖᐤ ᒫᑲ ᑲᐦᑭᔭᐤ ᒥᒋᐃᐧᐣ ᑌᐸᑯᑊ ᑕᐦᑐ ᐱᐳᐣ, ᑳ ᑭ ᐊᔮᔨᐠ ᐃᒋᑊᐟ ᐊᐢᑭᕽ, ᒥᓇ ᐁ ᑭ ᐊᐢᑕᒋᑯᐟ ᒥᒋᐃᐧᐣ ᐅᑌᓈᕽ ᐊᓂᒪ ᒥᒋᐃᐧᐣ ᑭᐢᑎᑳᓂᕽ ᐅᐦᒋ ᑳ ᑭ ᐊᔮᐠ ᒥᓯᐁᐧ ᐋᐧᐢᑳ ᐅᑌᓈᕽ, ᐁᑯᓯ ᑳ ᐃᓯ ᐊᐢᑕᒋᑯᐟ. 49ᒍᓯᑊ ᒫᑲ ᑭ ᒫᐊᐧᒋᐦᐁᐤ ᐸᐦᑫᐧᓯᑲᓂᑳᓇ ᑖᐱᐢᑯᐨ ᔦᑲᐤ ᑭᐦᒋᑲᒥᕽ, ᓇᐢᐱᐨ ᒥᐢᑕᐦᐃ, ᐱᔨᐢ ᐁ ᐳᓂ ᐊᑭᒫᐟ; ᒋᑫᒫ ᓇᒪᐃᐧᔭ ᑭ ᐊᑭᒣᐤ. 50ᒍᓯᑊ ᒫᑲ ᑭ ᓂᐦᑖᐃᐧᑭᑕᒪᐋᐧᐤ ᓂᓱ ᐅᑯᓯᓴ ᒪᐧᔦᐢ ᓄᑌᑲᑌᐃᐧᐣ ᐅᑎᐦᒋᐸᔨᐠ; ᐋᓯᓈᐦᐟ ᐅᑖᓂᓴ ᐹᑎᐯᕒᐊ, ᐊᔭᒥᐦᐁᐃᐧᔨᓂᐤ ᐊᓂᑕ ᐋᐣ, ᑳ ᑭ ᓂᐦᑖᐃᐧᑭᑕᒫᑯᐟ. 51ᒍᓯᑊ ᒫᑲ ᒪᓈᓯ ᑭ ᐃᓯᔨᐦᑳᑌᐤ ᐅ ᓂᐢᑕᒧᓵᓇ; ᑭ ᐃᑌᐧᐤ ᒋᑫᒫ, ᑭᓭᒪᓂᑐ ᓂ ᑭ ᐊᐧᓂᑭᐢᑭᓯᑕᐃᐠ ᑲᐦᑭᔭᐤ ᓂᐟ ᐋᔨᒥᓯᐃᐧᐣ, ᒥᓇ ᑲᐦᑭᔭᐤ ᓄᑖᐃᐧ ᐃᐧᑭ. 52ᑯᑕᑲ ᒫᑲ ᐃᐸᕒᐁᐃᒼ ᑭ ᐃᓯᔨᐦᑳᑌᐤ, ᒋᑫᒫ ᑭᓭᒪᓂᑐ ᓂ ᑭ ᒥᔪ ᓂᐦᑖᐃᐧᑭᐃᐧᐃᐠ ᐊᐢᑭᕽ ᑳ ᑕᓯ ᐋᔨᒥᓯᔮᐣ.

53ᐊᓂᐦᐃ ᒫᑲ ᑌᐸᑯᑊ ᑕᐦᑐ ᐱᐳᐣ ᑳ ᑭ ᐁᐧᔪᑕᕽ ᐃᒋᑊᐟ ᐊᐢᑭᕽ ᑭ ᐳᓂᐸᔨᐤ. 54#ᐃᓯᐦᒋᑫᐃᐧᓂᐋᐧᐊᐧ 7:11ᐁᑲᐧ ᒫᑲ ᑌᐸᑯᑊ ᑕᐦᑐ ᐱᐳᐣ ᓄᑌᑲᑌᐃᐧᐣ ᑭ ᒫᒋᐸᔨᐤ, ᒣᐧᐦᒋ ᒍᓯᑊ ᑳ ᑭ ᐃᑌᐧᐟ, ᒥᓯᐁᐧ ᒫᑲ ᐊᐢᑭᕽ ᑭ ᓄᑌᑲᑖᓂᐊᐧᐣ ᒫᑲ ᐃᐧᔭ ᒥᓯᐁᐧ ᐃᒋᑊᐟ ᐊᐢᑭᕽ ᑭ ᐃᐦᑖᐤ ᐸᐦᑫᐧᓯᑲᐣ. 55#ᒑᐣ 2:5ᐃᐢᐱ ᒫᑲ ᒥᓯᐁᐧ ᐃᒋᑊᐟ ᐊᐢᑭᕽ ᐁᑎ ᓄᐦᑌᐦᑲᑌᒋᐠ, ᐊᔨᓯᔨᓂᐊᐧᐠ ᑭ ᓇᑐᑕᒪᐁᐧᐊᐧᐠ ᐯᕒᐅᐊᐧ ᐸᐦᑫᐧᓯᑲᓇ; ᐯᕒᐅ ᒫᑲ ᐅᒥᓯ ᑭ ᐃᑌᐤ ᑲᐦᑭᔭᐤ ᐃᒋᑊᐟ ᐊᔨᓯᓂᐊᐧ, ᓈᑎᕽ ᒍᓯᑊ; ᑫᑲᐧᐩ ᒫᑲ ᐁ ᐃᑎᑯᔦᐠ ᑐᑕᒧᐠ. 56ᐋᓂᒪ ᒫᑲ ᓄᑌᑲᑌᐃᐧᐣ ᑭ ᐊᔮᐤ ᒥᓯᐁᐧ ᐊᐧᐢᑭᑕᐢᑲᒥᐠ. ᒍᓯᑊ ᒫᑲ ᑭ ᔪᑌᓇᒼ ᑲᐦᑭᔭᐤ ᒥᒋᒥᑲᒥᑲᐧ ᐁ ᑭ ᐊᑖᒫᐟ ᐃᒋᑊᐟ ᐊᔨᓯᔨᓂᐊᐧ; ᐋᑳᐧᐢᑲᐢ ᒫᑲ ᑭ ᐊᑎ ᓄᑌᑲᑖᓂᐊᐧᐣ ᐃᒋᑊᐟ ᐊᐢᑭᕽ. 57ᑲᐦᑭᔭᐤ ᒫᑲ ᐊᐢᑭᔭ ᑭ ᐯ ᓈᑌᐊᐧᐠ ᒍᓯᐸ ᐃᒋᑊᑎᕽ, ᑭᑕ ᐊᑖᐁᐧᒋᐠ ᐸᐦᑫᐧᓯᑲᓇ; ᒋᑫᒫ ᐊᓂᒪ ᓄᑌᑲᑌᐃᐧᐣ ᓈᐢᐱᐨ ᑭ ᐋᑳᐧᐣ ᒥᓯᐁᐧ ᐊᐢᑭᕽ.

Currently Selected:

ᒉᓂᓯᐢ 41: KKMs

Highlight

Copy