Nikamowina 34
34
mamihcimāw kā‑tipēyihcikēt
omiyo-tōtākēwin ohci
onikamon David
1tāpitawi nika-nanāskomāw kā‑tipēyihcikēt;
namōya nika-pōni-mamihcimāw.
2nika-mamihcimāw otōtamowin ohci;
kika-wī-natohtamwak
mīna kika-wī-miywēyihtamwak aniki kā‑kitimahihcik!
3mahti wīhtētān otispāhkēyihtākosiwin kā‑tipēyihcikēt
ēkwa māmawi-mamihcimātān!
4nikī-ayamihēstawāw kā‑tipēyihcikēt
ēkosi nikī-naskwēwasimik,
mīna nikī-paspīhik kahkiyaw kīkway kā‑kostamān ohci.
5aniki kā‑kitimahihcik miywēyihtamwak ē‑mamisītotawācik;
namōya wīhkāc kita-nēpēwisicik.
6aniki ēkāya kā‑kī-wīcihisocik mātōstawēwak,
mīna naskwēwasimikwak;
pimācihēw kahkiyaw nayēhtāwipayiwinihk ohci.
7okīsikōma kanawēyimēyiwa anihi kā‑kistēyimāyit kā‑tipēyihcikēyit
paspinēwinihk ohci mīna pimācihēw.
8hāw, nākatohkē mahti iyikohk ē‑miywātisit kā‑tipēyihcikēt,
miywēyihtamwak aniki kā‑nātāmototawācik.
9kistēyimihk kā‑tipēyihcikēt kahkiyaw kiyawāw otayisiyinīma;
namōya kīkway ka‑nōhtēpayiwak aniki kā‑nanahihtawācik.
10ahpō piko mistahkēsiwak nōhtēhkatēwak namōya ē‑ihtakwaniyik mīciwin,
māka aniki kā‑nanahihtawācik kā‑tipēyihcikēyit
namwāc nōhtēpayiwak kīkway ē‑miywāsiniyik.
11āstamitik, niwīcēwākanisak, mīna natohtawik,
kika-kiskinohamātināwāw
kita-isi-kistēyimāyēk kā‑tipēyihcikēt.
12kinōhtē-miyawātēnāwāw cī pimātisiwin?
kinitawēyihtēnāwāw cī kinwēs kita-pimātisiyēk,
ēkwa kita-miywēyihtamēk?
13ēkosi māka ēkāya maci-pīkiskwēk
mīna ēkāya kiyāskik.
14kwēskīhk maci-kīkway ohci mīna miyo-tōtamok;
sīhkiskamok pēyāhtakēyimowin kākikē ē‑isi-kaskihtāyēk kitēhiwāhk ohci.
15kā‑tipēyihcikēt kitēyimēw anihi kā‑kwayaskātisiyit
mīna natohtawēw kā‑mawimoscikēyit;
16māka ātawēyimēw anihi kā‑maci-tōtamiyit,
ēkosi ispīhk kā‑nipiyit,
kiyipa wanikiskisitotawāwak.
17aniki kwayask otitātisiwak mawimostawēwak kā‑tipēyihcikēyit ēkwa natohtākwak;
mīna pimācihikwak kahkiyaw anihi kā‑nayēhtāwipayicik.
18kisiwāk ohcīstawēw kā‑tipēyihcikēt anihi kā‑pōmēyit;
pimācihēw anihi kā‑māwaci-kitimākēyimoyit.
19kā‑kwayaskātisicik kakwātakihikwak mihcēt kīkwaya,
māka kā‑tipēyihcikēyit pimācihikwak ēwakoni ohci kahkiyaw.
20misakāmē kā‑tipēyihcikēt kanawēyimēw;
namōya ahpō pēyakwāw ka‑kaskatisin.
21maci-kīkway kita-nipahik omacātis;
ēkosi aniki kā‑pakwātācik kā‑kwayaskātisiyit
kita-kakwātakihtāwak.
22kā‑tipēyihcikēt kita-pimācihēw otayisiyinīma;
anihi kā‑nātāmototākot kita-paspīhēw.
Currently Selected:
Nikamowina 34: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
