Nikamowina 37
37
okwayaskātisak ēkwa omacātisak
onikamon David
1ēkāya kika-mikoskātēyihtamihikwak omaci-tōtamowak;
ēkāya ohtēyimik aniki kā‑wanitōtahkik.
2kita-mēscipayiwak wīpac tāpiskōc maskosiya kā‑pāstēki;
mīna kita-nipiwak tāpiskōc kiscikānisa kā‑nipōmakahki.
3mamisītotaw kā‑tipēyihcikēt mīna miyo-tōta;
ēkosi kika-wīkin askīhk
ēkwa kika-nākatohkātikawin.
4kā‑tipēyihcikēt ohci miskamāso miywēyihtamowin,
ēkosi kika-miyik ē‑isi-nitawēyihtaman kitēhihk.
5pakitēyimisōstaw kā‑tipēyihcikēt;
mamisītotaw, ēkosi kika-wīcihik;
6ē‑wāsēskamāsk kikwayaskwātisiwin
kita-kīhkāyāstēw tāpiskōc āpihtā-kīsikāwi-pīsim.
7sāsīpēyihta ē‑pēhat kā‑tipēyihcikēt kita-waskawītotahk;
ēkāya mikoskātēyimik aniki kā‑wēyōtisicik
ahpō aniki kā‑miyopayihikocik okakayēyisiwiniwāwa ohci.
8ēkāya mikoskātēyihta ahpō ēkāya kisiwāsi,
kika-ati-māyi-tōtākon.
9aniki kā‑mamisītotawācik kā‑tipēyihcikēyit kita-wīkiwak askīhk,
māka aniki kā‑macātisicik kita-wayawītisahwāwak.
10wīpac namōya ayiwāk ka‑nōkosiwak omacātisak,
āta kinatonawāwak namwāc ka‑miskawāwak;
11māka aniki kā‑tapahtēyimisocik kita-wīkiwak askīhk
mīna kita-miyo-pimātisiwak ēkwa ka‑pēyāhtakēyimowak.
12maci-ayisiyiniwak kakwē-māyi-tōtawēwak okwayaskātisiwa
mīna kisīwi-kitāpamēwak ē‑pakwātācik.
13māka kā‑tipēyihcikēt pāhpihēw maci-ayisiyiniwa,
ayisk kiskēyihtam wīpac kita-misiwanācihimiht.
14omacātisak nēhpēminamwak osawēskomiwāwa mīna otahcāpīwāwa
kita-nipahācik okitimākisa mīna kā‑manēsicik,
kita-nipahācik anihi kwayask kā‑tōtamiyit;
15māka kita-nipahikwak osawēskomiwāwa ohci,
ēkwa otahcāpīwāwa kita-pīkonamiyiwa.
16nawac ayiwāk itakihtēw okwayaskātisiw apisīs kā‑tipēyihtahk
ispīhci kahkiyaw omacātisak owēyōtisiwiniwāw,
17ayisk kā‑tipēyihcikēt kita-maskamēw osōhkisiwiniyiw omacātisa,
māka kita-kanawēyimēw anihi kā‑kwayaskātisiyit.
18kā‑tipēyihcikēt kitēyimēw anihi kā‑nanahihtākot,
ēkwa anima askiy kita-wīkiwak kākikē.
19namwāc kita-kakwātakihtāwak āta āyimaniyiki,
kika-tēpipayiwak ispīhk misi-nōhtēhkatēhki.
20māka omacātisak kita-nipiwak;
anihi kā‑māyēyimikot kā‑tipēyihcikēt
namōya ayiwāk ka‑nōkosiwak tāpiskōc wāpikwaniya kā‑mēscipayiki;
tāpiskōc kaskāpahtēw kā‑pōni-nōkwaniyik.
21omacātisak nitāhtāmowak māka namwāc kāwi tipahikēwak,
māka kā‑kwayaskātisicik nīhtā-mēkiwak māna kīkway;
22aniki kā‑sawēyimikocik kā‑tipēyihcikēyit kita-wīkiwak askīhk,
māka aniki kā‑pāstāhocik kita-wayawītisahokwak.
23kā‑tipēyihcikēt kiskinohtahēw awiya tānitē kita-itohtēyit
mīna kanawēyimēw anihi kā‑nahēyihtamihikot.
24kīspin pahkisiniyici namwāc kita-mēcimwātapiwak,
ayisk kā‑tipēyihcikēt kita-pasikōnēw.
25nikēhtē-ayiwin ēkwa; wiya kinwēs ē‑pimātisiyān,
māka namwāc nitōhci-pē-wāpamāw awiyak kā‑kwayaskātisit kita-wēpinikot kā‑tipēyihcikēyit
ahpō otawāsimisa kita-papāmi-natotamāyit kita-mīcisoyit.
26tāpitawi asahkēyiwa mīna nīhtā-awihiwēyiwa māna,
ēkosi miyikowisiwak ocawāsimisiwāwa.
27kwēskātisik maci-kīkway ohci ēkwa miyo-tōtamok,
ēkosi kitāniskotāpāniwāwak tāpitawi ka‑wīkiwak askīhk;
28wiya kā‑tipēyihcikēt miywēyihtam kwayask tōtamowin
ēkwa namwāc wēpinēw otayisiyinīma kā‑tāpwēhtākot.
kitēyimēw kākikē,
māka ēkwa kā‑macātisiyit otāniskotāpāniyiwa kita-wayawītisahomāwa.
29kā‑kwayaskātisicik kika-ayāwak askiy,
mīna kita-wīkiwak ēkota kākikē.
30pīkiskwēwina kā‑āpacihtācik kwayaskātisiwak iyinīsi-itakihtēwa
ēkwa tāpitawi kwayask āpatanwa ta‑miyo-pamihitohk.
31kanawēyihtam otēhihk kisē-manitowa owiyasiwēwiniyiw
mīna namōya wīhkāc ta‑nakatam.
32macātisak asawāpamēwak kā‑kwayaskātisicik,
ēkwa ē‑kakwē-nipahācik;
33māka kā‑tipēyihcikēt
namōya kita-nakatēw kita-sākōcihikoyit omacātisa,
ahpō kita-paspīhēw kā‑wiyasiwātimiht.
34pakosēyimototāhk kā‑tipēyihcikēt mīna nanahihtamok otitasiwēwina;
kika-kistēyimik askiy kā‑miyisk,
ēkwa kika-wāpamāwak omacātisak ē‑wayawītisahohcik ēkota ohci.
35pēyakwāw nikī-kiskēyimāw maci-ayisiyiniw ē‑āhkwātisit;
tāpiskōc kā‑māwaci-sōhkisit maskawāhtik Lebanon ohci;
36māka kīhtwām ēkota ē‑pimohtēyān namwāc ēkota ohci-ayāw;
nikī-natonawāw māka namwāc nimiskawāw.
37nākatohkē kā‑miywātisit ayisiyiniw,
kitāpam kwayask kā‑isiyinīhkēt;
ē‑pēyāhtakātisit ayisiyiniw āniskotāpānēw,
38māka omacātisiwak kahkiyaw mēsci-misiwanācihāwak,
ēkwa otāniskotāpāniwāwa mēscinēyiwa.
39kā‑tipēyihcikēt pimācihēw kā‑kwayaskātisiyit
mīna nākatohkēw ispīhk ē‑nayēhtāwīyit.
40wīcihēw mīna paspīhēw;
ē‑pimācihāt kā‑macātisiyit ohci,
ayisk nātāmototāk kita-kanawēyimāt.
Currently Selected:
Nikamowina 37: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
