Nikamowina 33
33
mamihci-nikamowin
1kiyawāw kā‑kwayaskātisiyēk,
tēpwē-miyawātamok kā‑tipēyihcikēt iyikohk ē‑kī-miyo-tōtahk;
kahkiyaw kiyawāw kā‑nanahihtawāyēk, mamihcimihk.
2nanāskomihk kā‑tipēyihcikēt kā‑mihcētowāpiyikāsit kitohcikan,
nikamostāhk mitātaht kā‑itamoki kitohcikanēyāpiya kitohcikanihk.
3oski-nikamon sipwēhamāhk,
kitohcikēhk mitoni kwayask ē‑isi-kaskihtāyēk
mīna tēpwēk miyawātamowinihk!
4wiya ē‑tāpwēmakaniyiki otitwēwina kā‑tipēyihcikēt,
mīna kahkiyaw otatoskēwina mamisītocikātēyiwa.
5kā‑tipēyihcikēt sākihtāw kwayask itātisiwin mīna kwayask tōtamowin.
osākihiwēwin ēkāya wīhkāc kā‑kīsipipayik ihtakwaniyiw misiwē askīhk.
6kā‑tipēyihcikēt kī‑osīhtāw kīsik otitasiwēwinihk,
pīsimwa, tipiskāwi-pīsimwa,
mīna acāhkosa otitwēwinihk ohci.
7kī‑māwasakonam kahkiyaw nipiya pēyakwāyihk,
kī‑kipaham itāmihk kihcikamiy pā‑piskihc ita kita-astēyiki.
8mawimostāhk kā‑tipēyihcikēt, kahkiyaw askīhk kā‑ayāyēk!
kistēyimihk, kahkiyaw iyinītik misiwē askīhk kā‑ayāyēk!
9ispīhk ē‑pīkiskwēt, askiy kī‑osīhtāniwiw;
ē‑itasiwātahk kahkiyaw kīkway kī‑ihtakwaniyiw.
10kā‑tipēyihcikēt wawānēyihtamihēw
ē‑itahtōskānēsiyit ayisiyiniwa wiyasiwātamiyici kīkway;
wanāhēw ē‑itasiwēyit ēkāya ē‑kī-tōtamiyit.
11māka wiya otitasiwēwin namwāc pōnipayiyiw;
kākikē pimipayiyiw.
12miywēyihtamwak aniki ē‑itahtōskānēsicik kā‑omanitōmicik kā‑tipēyihcikēyit.
miywēyihtamiyiwa anihi ayisiyiniwa kā‑kī-nawasōnamāsot!
13kā‑tipēyihcikēt kihci-kīsikohk ohci itāpiw
ēkwa ē‑kitāpamāt kahkiyaw ayisiyiniwa.
14itē ohci ē‑kihci-okimāwi-apit,
kitāpamēw tahto anihi ayisiyiniwa ōta askīhk kā‑ayāyit.
15ēkosi wiyakihtam kita-isi-māmitonēyihtamiyit,
mīna kiskēyihtam ē‑isiyinīhkēyit.
16kihci-okimāw namōya sākohtwāw mihcēt ohci ē‑osimākanisīmit;
nōtinikēwiyiniw namwāc sākohtwāw omisi-maskawisīwinihk ohci.
17nōtinikēwi-misatimwak kā‑āpatisiyit
namōya nānitaw kita-kī-isi-sākohtwācik,
omaskawisīwiniwāw ohci namwāc kita-kī-pimācihiwēcik.
18kā‑tipēyihcikēt nākatohkēw anihi kā‑nanahihtākot,
anihi kā‑mamisītotamiyit osākihiwēwin ēkāya wīhkāc kā‑kīsipipayiniyik.
19pimācihēw nipiwinihk ohci;
ē‑mēkwā-misi-nōhtēhkatēhk pimācihtāsow.
20nipakosēyimototawānān kā‑tipēyihcikēt;
wiya ēwako kā‑kanawēyimikoyahk
mīna kā‑wīcihikoyahk.
21kimiywēyihtamihikonaw wiya kā‑tipēyihcikēt
kimamisītotawānaw owīhowinihk kā‑kanātaniyik.
22mahti kisākihiwēwin ēkāya wīhkāc kā‑kīsipipayik nika-wīcēkonān, kā‑tipēyihcikēyan,
wiya ē‑mamisītotātāhk.
Currently Selected:
Nikamowina 33: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
