Markus 2

Yesu Nwangru Unde ti Cwu Afxen ti Ajwo

(Matiyu 9:1-8; Luka 5:17-26)

1Isim usir yang-yi akwen, Yesu kafe ru ba uten ti Kaparnawum, ande fxen ti awu na ta uwae kununn. 2Ama ande yang akwen ru ba byir uwog-wu. Uwog fer. Uwog ta-wu ti ande u som atang be. Ufenkyi ama munnkyi te ande. Ama Yesu ku ri te ba ira Rimam. 3Ama ande inje iki su unde ti cwu afxen ti ajwo ba uwog Yesu. 4Aba shanum te fengo ti a u ba uwog Yesu, ikyaen ti, ande munn timambe. Aba su wu tso yi usen rukub#2:4 usen rukub Usen rukub na Mbayawuda si-yi ma ana-ti ti tine be. Aba ku gbimkyi usen rukub-ba njab pataa itso ti unde u ndetu ti a u tso kaa kyang atang pangma ti aba na ku kyang riben. u mbag riye usen rukub wu u sa unde wu fa ti kucwo-wu meme si ba riben uwe Yesu. 5Ti Yesu nung ti aba ru uwae kinjo uwog-wu, awu ri te unde ti kicaeb wu baa, “Umbae-m, a yata na pu ba afu ikentitibi-fu.” 6Ande iki ti ku kwen na ande Icwe Rimam som atang. Aba ku kab ira uwae-ba baa, 7“Unde wune ku nde rimang ku ri ira yine? Ai! Awu ku ri ira pangma awu ti na si Rimam! Unde ta-wu ti ku yata na ande ikentitibi be, si nyang Rimam amam ti u nde tu yi.” 8Ti ritsen Yesu nung uwae kusung-wu itso ira ti aba ku kab uwae utob-ba. Awu ri te ba baa, “Ani ku nde rimang ku tang itso ira yine? 9Titini ti tom skeb, ti a u ri te unde ti cwu afxen ti ajwo wune baa, ‘A yata na pu ba afu ikentitibi-fu’ ree, re ti a u ri te wu baa, ‘Nwunn ritsen ti fur kucwo-fu ti kyang ikyin ru-fu tiri’? 10Amaa, ame u tatso ni baa, Umbae Unde#2:10 Umbae Unde. Yesu kunn ijwe-wu ahan ikyaen ti a tangsom ti ira ti a bae uwae kutsingken na Daniyel risu unde ti u ba nwangru Mbayawuda. na site kuko uwae utense ti wu u yata na ande ikentitibi-ba.” Awu ri te unde ti cwu afxen ti ajwo baa, 11“Ame ku ri te fu, nwunn ritsen, fur kucwo-fu ti ru yi uwae kununn.” 12Unde wu nwunn ritsen u fur kucwo-wu u ruye ayib ande ba meme. Aba som, ayib fur ba risu. Ama aba som ku teb nyang rinyi Rimam, ku ri baa, “Ati nung ji-ti itso ira yine usir iki khika be!”

Yesu Kunn Lawi ti Awu na Putsa Wu

(Matiyu 9:9-13; Luka 5:27-32)

13Yesu kafe ru kyi yi unju uyinn ti Galili cwucwo. Ande yang akwen ba funn uwog-wu. Awu ku kwen na ba iken. 14Ti awu ya ku fe, awu nung Lawi, umbae Alifas, som unju wande-wu. Awu ku mbe aser ukwe ti uten. Yesu ri te wu baa, “Putsa m!” Lawi nwunn, putsa wu. 15Usir iki Yesu ta kununn Lawi ku ci wuci te wu, ande ti ku mbe aser ukwe, ti ande ti ku nde ikentitibi#2:15 ande ti ku nde ikentitibi Ande bane si ande ti ku putsa-ba icwe ti aba Farisi ye tsi be. ta atang ama. Aba ku ci wuci ti Yesu ti ande ti putsa wu ikyaen ti, ande yang akwen uwae-ba ku putsa Yesu. 16Ande ti ku kwen icwe Rimam ti ta uwae ande ti kumbub Farisi, ta atang. Aba nungye Yesu ku ci wuci ti ande ti ku mbe aser ukwe, ti ande ti ku nde ikentitibi. Aba rang atugbug-wu baa, “Unde ti uwe-ni nde rimang ku ci wuci ti ande ti ku mbe aser ukwe ti ande ti ku putsa-ba icwe be?” 17Ti Yesu fxen ira-ba, awu ri te ba baa, “Ande ti site-ba kicaeb be, ku sha-ba unde ti kucin be. Ande ti site kicaeb ti ku sha unde ti kucin. Ame ba-m uwae utense ti m ba kunn ande ti ku nde iken ti tinyang be. Ame ba ikyaen ti m u kunn ande ti ku nde ikentitibi.”

Unju ti Cwe

(Matiyu 9:14-17; Luka 5:33-39)

18Uwae kiye yine, ande ti putsa Yohana ti ande ti putsa ira Farisi ku cwe unju. Ande iki ru ba uwog Yesu u rang wu baa, “Ande ti putsa Yohana ti ande ti putsa ira Farisi ku cwe unju, amaa ande ti ana-fu ku cwe-ba unju be. Imi ti nde?” 19Yesu rang ba baa, “Usir ti ubaen unda ishe a te arwan-wu som tetso uwog ukwab unda ishe, aba u cwe atso unju a? Usir ti ubaen unda ishe a ba som te arwan-wu ti uwog kinjo, aba u cwe-ba atso unju be. 20Amaa usir iki ku ba ti a u ye ra ubaen unda ishe ru uwog-ba, aba u cwe unju tiri. 21Aye ti u yer kutupwa tishe u sa ba kukyi riye kutupwa ti tikyi? Asiti unde a ku nde ayine, kutupwa ti tishe wu u shi yaen ti tikyi. Tiyaen wu u ba skeb kyi ti kucang cwucwo. 22Aye ti u sa ambyi awaen anam ti ku fifèn si uwae apwa ti tikyi? Unde a nde ayine, apwa yi u ndub yaen, ama ambyi anam ti apwa yi meme u be riben. Ayi nyang skeb ti unde u yaen ambyi anam ti tishe si uwae apwa ti tishe.”

Itsekuru Usir Ikyinn

(Matiyu 12:1-8; Luka 6:1-5)

23Usir ikyinn iki, Yesu ti ande-wu putsa fengo risaen ufang iki. Ti aba ya ku fe, ande-wu ku ye acwong awum yi u ku jwur yi u ku kub. 24Ama ande iki ti kumbub Farisi rang Yesu baa, “A a! Imi ti nde, ande-fu ku nde itso wande yine, ti a bae uwae Kutsingken Rimam baa, a na nde-ba wande usir ikyinn be?” 25Yesu rang ba baa, “Ani fxen ji-ni ira ti Ukwe Dawuda ti ande ti putsa wu nde kiye ti aba ku fxen ti rimenn be a. 26Awu sang yi kusog Rimam kiye ti Abiyata si Kukwen Tiyang, u ka ci wuci ti sisaen ti a cwe-ba ti ande na ci be, si nyang kukwen Rimam amam ti ku ci. Ama awu ci u nda ande ti te wu putsa atso aba ci ama.” 27Ama Yesu ri te ba baa, “A kyae usir ikyinn tsi ikyaen na ande. A kyae-ba unde tsi ikyaen na usir ikyinn be. 28Ayine tatso baa, Umbae Unde ta risu iken meme patag, fa ti icwe na usir ikyinn meme.”

Currently Selected:

Markus 2: kubNT

Highlight

Copy