Markus 3

Unde ti Cwu Kujwo

(Matiyu 12:9-14; Luka 6:6-11)

1Yesu kafe sang kyi yi uwae kusog Rimam na Mbayawuda cwucwo, ama unde iki ta atang ti wam kujwo. 2Ande ti ta atang pu ayib-ba tsi uwog Yesu, ti a na nung ko iki be awu u nwangru unde wune usir ikyinn ra. Aba ku sha ti a tu riraen unju-wu, ti a na ye wu ti rikwen.

3Ama Yesu ri te unde wu ti cwu kujwo baa, “Ru ba tsi kutampwa-ti ike!” 4Yesu rang ande ti tsi atang baa, “Titini ti putsa icwe, ti a u nde itinyang usir ikyinn ree, re ti a u nde titibi? Ti a u nwangru unde ree, re ti a u wen wu wen?” Aba som skirr, u shanum ti ira ti ri. 5Yesu sae ba ayib uwae rinae, u ndembeb utob ikyaen utob ti kwe-ba u ri te unde wu baa, “Ndab ta kujwo-fu.” Unde wu ndab ta kujwo-wu. Kujwo-wu kafe ti tinyang pangma ti kucang. 6Aba Ande ti kumbub Farisi ruye uwae kusog Rimam atang u ru ka tu ande iki ti imbyi Ukwe Herodus, u te ba myae ira risu fengo ti aba u wen Yesu.

Ande Funn Unju Uyinn Tiyang

7Yesu ti atugbug-wu nwunn uwog wu u ru yi uyinn ti Galili. Ande yang akwen ti uten ti Galili putsa, fa ti ande ti uten Yawudiya, 8ti uten ti Urushelima, ti uten ti Idumiya, ti ande ti nae ukunn unyim ti Yordan, ti ande ti uten Tiire ti Sidon. Aba jwunn timambe, ikyaen ti, aba fxen iten meme wande ti Yesu ku nde, ne aba ter inyae ru ba uwog-wu. 9Awu ri te atugbug-wu baa, aba na sa kuyae iki na ko ba fer wu. Asiti ande a fer pang-ba awu, awu na u si uwae atang. 10Ikyaen ti, awu nwangru ande ti kicaeb yang akwen. Aba ti nwangru-ba khika be ku sha ti a u sa kujwo tekunn ijwe-wu. 11Ko kiye titini ti ande ti site kusung titibi a nungye wu, a ku jwunnsi riben uwe-wu, ku taen ira baa, “Afu ti si Umbae Rimam!” 12Amaa awu ku fwa ba kusen ti ribom baa, aba na kunn-ba rinyi-wu te ande baa, awu na si Umbae Rimam be.

Yesu Tsab Atugbug-Wu

(Matiyu 10:1-4; Luka 6:12-16)

13Isim ayine, Yesu tso yi rikwen. Awu yae ande ti utob-wu ama aba tso ka tu wu. 14Awu tsab ande rijwe asu ifaen u kunn ba baa, atom. Aba na te wu na u som tetso, ti wu na ku tom ba atom, ti a na ku ri ira Rimam te ande, 15ama ti a na u tu kuko ti a u rwae ruye rijwen titibi risu ande ti site kusung titibi. 16Rinyi ande rijwe asu ifaen ba si ayine: Siman, unde iki ti Yesu fa wu rinyi tishe baa, Bitrus, 17ti Yakubu umbae Zebedi, ti inja-wu Yohana. Yesu fa bane rinyi tishe baa, Bowanerige (imbyi-yi baa, Anyisu Imam); 18ti Andarawu ti Filip, ti Bartolomu ti Matiyu, ti Toma ti Yakubu Umbae Alifas, ti Tadeyus, ti Siman Mbakanani#3:18 Mbakanani Unju Mbahelene a bae baa Kananaios, ti imbyi-yi iki si “Unde ti site kitsinn na uten-wu” ko iki be “Unde ti site utob ti byag.”, 19ti Yawuda Iskariyoti, unde wu ti u sa Yesu jabci.

Kuko na Yesu Ru Aka Ba?

(Matiyu 12:22-32; Luka 11:14-23; 12:10)

20Tiri, Yesu ba kununn, ama ande yang-ba akwen byir, riyae ta-yi ti Yesu ti atugbug-wu u ci wuci be. 21Ti ande ti kununn-wu fxen ira yine, aba ru ti a na ka yè wu ikyaen ti, a ku ri baa, risu-wu na ka fife. 22Ande ti ku kwen na ande Icwe Rimam ti ru Urushelima ba ku ri baa, “Awu site Beyel Zebul#3:22 Baal Zabul si Shetann. yi uwae kuko na ukwe na asung titibi, awu ku rwae ruye asung titibi.” 23Yesu kunn ande ba ira u sunn ira te ba baa, “Ayi u nde tu ti Shetann u rwae ruye Shetann a.” 24Asiti ande ti ta imbyi ukwe a kata ifaen u ku ta rika tetso, kujwokwe-wu u tsi-wu be. 25Asiti kununn unde a kata ifaen, ande ba a ku kag atso kag, kununn unde wu u tsi-wu be. 26Asiti Shetann a tsi ikub te risu-wu u kanta ifaen, awu u tsi-wu be. Usir-wu mam pu yi.

27“Cwucwo, unde u sang tu-wu uwae kununn unde ti kpakang u pu ruye usu atang be, se awu a yir pu wu unde wu itawe awu u sang u pu usu-wu ruye. 28Kubenti ti ame ku ri te ni, Rimam u yata na ande meme ikentitibi-ba ti ira tikong ti aba ku ri risu-wu, ko ayi a si rimang. 29Amaa unde ti a ri ndembeb Kusung ti Saen kyag, Rimam u yata na-wu unde wu ikentitibi-wu be. Ikentitibi wune u tsi ti risu-wu ru fife yi uwe.” 30Yesu ri ira yine ikyaen ti, aba ri baa, awu na site kusung titibi.

Ameinja Yesu ti Kubenti

(Matiyu 12:46-50; Luka 8:19-21)

31Uwae kiye wu, ameinja Yesu ti iya-wu ru ba uwog-wu. Aba tsi ise u tom unde ti awu na ka kunn wu ira ba. 32Ande munn uwog ti Yesu som atang, ama a ri te wu baa, “Iya-fu ti ameinja-fu tsi ise akwen. Aba ku sha rifab-fu.” 33Yesu rang ba baa, “Aye ti si iya-m ti ameinja-m?” 34Awu pu ayib sae ande ti som pakob-wu atang u ri baa, “Ande ti ta ne ti si iya-m ti ameinja-m. 35Unde titini ti a ku nde iken ti Rimam ku sha, awu ti si inja-m, ti kaya-m, ti iya-m.”

Currently Selected:

Markus 3: kubNT

Highlight

Copy