Markus 1

Yohana Ya Iskin Itiba Yesu

(Matiyu 3:1-12; Luka 3:1-18; Yohana 1:19-28)

1Kucangtsi ira ti tinyang Yesu, Unde ti Rimam Tsab Tsi.

2Ayi pangma ti a bae uwae kutsingken Ishaya unde ti ku ya iskin ira Rimam baa,

“Nung, ame tom atom-m

ku ru uwe-fu,

ti wu u kyae na fu fengo.”

3Unde iki ku ya iski

uwae kutur khika baa,

“Ni kyae nyang na Itsekuru Rimam fengo!

Awu ru ku ba.

Ni ndabta uwog ti kukwer,

ti awu ā ba putsa atang!”

4Ara kuben, Yohana ba ku nde batisma uwae unyim yi kutur khika, ama ku ya iski ira Rimam te ande ti a na ya ikentitibi-ba ta ikyaen ti Rimam ā ya ta na ba ikentitibi-ba. 5Ama ande nwunn ti ujwunn-ba uwae uka ti Urushelima ti uten Mbayawuda meme. Aba ku ru ka tu wu ku fxir ikentitibi-ba, ama awu ku nde na ba batisma yi uwae unyim ti Yordan. 6Atupwa-wu si atupwa ti a ndxob ti asung ikyinnsu ti kumunn isim#1:6 Ikyinnsu ti kumunn isim si rakumi (Kamel, unju Nasara). Sae foto yi uwae kutsingken ti Kucangtsi 24:20. ti kupwa ti awu sa yir sang imbyi-wu. Wuci-wu si ayag ti ajaen iwog. 7Awu kyang ku ya iskin ira Rimam te ande baa, “Unde wu ti ku ba isim-m skeb pu wu ame ti rurob. Ame ko-m ti m u tunn apwafxen-wu be. 8Ame nde na ni batisma te ambyi, amaa, awu u nde na ni batisma te Kusung ti saen kyag.”

A Nde Yesu Batisma

(Matiyu 3:13-17; Luka 3:21-22)

9Uwae kiye wu ama Yesu nwunn Nazareti uwae uten ti Galili u ru ba tu Yohana. Yohana nde na wu batisma uwae unyim ti Yordan. 10Ti ritsen ti Yesu tso ku ye uwae ambyi, awu sae apupwen mbubta, ama Kusung Rimam si ba risu-wu pangma kikwae. 11Ama aba fxen afxenjwin iki si apupwen ba, ri baa, “Afu si Umbae-m ti nyang uwae-m. Ame ku tsen utob te fu timambe.”

Shetann Myae Yesu Kumyae

(Matiyu 4:1-11; Luka 4:1-13)

12Ayi tsi-yi tsi be, Kusung Rimam pu Yesu ru yi kutur khika ti ande ta-ba atang be. Kusung Rimam ti sa wu ru yi atang. 13Awu ta uwae kutur atang ka usir mae ifaen, Shetann ku myae wu kumyae ti wu na nde ikentitibi. Ibye anyi munn uwae kutur atang, amaa atom Rimam ti apupwen si ba ndeya wu.

Yesu Ya Iskin Ira Tinyang

(Matiyu 4:12-22; Luka 4:14-15; 5:1-11)

14Isim ayine, a ye Yohana cwunn kyi pursuna. Isim ayine, Yesu ru yi uten ti Galili u ku ri Ira ti Tinyang na Rimam te ande. 15Awu ku ri baa, “Kiye nde pu wu ama kujwokwe Rimam ba pu wu. Ni kafe isim ta ikentitibi-ni ama ru uwae kinjo uwog Ira ti tinyang ti ame ku ri te ni!”

16Ti awu kyang putsa unju uyinn ti Galili, awu nung ande iki ifaen, Siman ti inja-wu Andarawu ku tā akye iwag uwae uyinn atang. Wande-ba si iwag ti ti ye. 17Yesu ri te ba baa, “Ni ba putsa m. Ame u nda ni kafe ande ti ku pu ande ba uwog Rimam.” 18A tsi-ba tsi be, u ya akye-ba ta u nwunn ru ka putsa wu.

19Awu ko ru yi uwe kpang u tu ande iki ifaen cwucwo, Yakubu ti inja-wu Yohana, anyisu Zebedi. Aba som si uwae kuyae-ba, ku kyae nyang akye-ba. 20Ti awu nung ba, awu kunn ba ira baa, aba na ba putsa wu. Aba nwunn ya itse-ba Zebedi ta uwae kuyae, fa ti ande ti ba wande aser, u ru ka putsa Yesu.

Yesu Nwangru Unde ti Rijwen Titibi

(Luka 4:31-37)

21Yesu ti ande ti putsa wu sang uten iki ti a ku kunn wu baa, Kaparnawum. Ti usir ikyinn-ba nde pu yi, Yesu sang kusog uwog ti a ku funn kob atang, u ku kwen na ande atang. 22Ama, iken ti ti kwen-wu fur ande ba ayib, ikyaen ti, awu ku kwen na ande pangma awu ti na ye ira yi tsi. Itikwen-wu si-yi pangma ana ande ti ku kwen na ande Ira Rimam be. 23Uwog wune unde iki sang ba kusog wu atang. Rijwen titibi ta risu unde wu.#1:23 Rijwen titibi ta risu unde wu. Unju Mbayawuda a ri baa, unde wu site rijwen ti ajib. Uwog-ba, itso rijwen wune byangkyi unde ti wu sang kusog Rimam, se ti a rwae ruye pu ba rijwen wu ijwe unde wu tawe. 24Awu taen ira, ri baa, “Iken ti ren fu te ti si imi, afu Yesu unde ti Nazareti? Afu ba ti fu u ba wen ti a. Ame nung pu m afu. Afu si Atom Rimam ti Saen Kyag.” 25Ama Yesu fwan rijwen titibi kubyag baa, “Bwetag ti ruye rimenn unde wune.” 26Ama rijwen titibi byinn unde wu si riben; ijwe-wu ku fufwer. Awu taen ira u ya unde wu ta. 27Ande patag nung ira yi fur ba ayib. Aba ku rang atso baa, “A a! Ayine si imi? Ira tishe ba pu yi! Unde wune ku fwa rijwen titibi kusen, aba ku fxen wu!” 28Ti ritsen, iten ira Yesu yi shag kyife uwae uten ti Galili patag.

Yesu Jim Kicaeb Ande iki

(Matiyu 8:14-17; Luka 4:38-41)

29Ti a ruye kusog Rimam, aba ru yi kununn Siman ti Andarawu, ama Yakubu ti Yohana putsa ba. 30Iya uwa Siman nae kicaeb, ijwe-wu byibyag. Ti Yesu ku sisang kusog atang, a ri te wu ira risu unda wu. 31Yesu ru ba uwog unda wu u ba ye wu kujwo u shir ra wu nwunn ritsen. Ama, ijwe ti ti byag-wu ya wu ta. Awu nwunn ritsen u ru ka nde na ba wuci. 32Usir jwo ureb, ti usir si te pu wu, ande ti uten atang ru ka pu ande ti acaeb meme, ti ande ti rijwen titibi byinn ba, ru ba uwog Yesu. 33Meme ande ti uten atang ru ba funn ufu kusog atang ting ting. 34Ama Yesu nwangru ande yang akwen ti kicaeb ti tsotso. Awu rwae ru rijwen titibi risu ande yang akwen. Awu cwe-wu ti rijwen titibi na ri ira be, ikyaen ti, a nungye pu ba awu.

Yesu ku Ri Ira Rimam Uwae Uten Galili

(Luka 4:42-44)

35Ti ti mbakunn ta ira ti kucang, Yesu shwu kicwag u ruye yi uwog iki ti ande ta-ba atang be, ikyaen ti wu na jwam Rimam. 36Kiye ti Siman ti ande-wu shwu kicwag a rwae rifab-wu ru yi uwog wu ti awu ta atang. 37Ti aba tu pu ba awu, aba ri te wu baa, “Unde titini ku sha rifab-fu.” 38Yesu ri te ba baa, “Ti kyang putsa atso ru yi uten ti ta fifer ne, ikyaen ti m u kaa ri ira Rimam te ba ama, ikyaen ti, ame ba ikyaen-yi.” 39Ama awu kyang kyife uten ti Galili meme, ku ri ira Rimam te ande uwae kusog Rimam na Mbayawuda, ku rwae ru rijwen titibi risu ande.

Yesu Nwangru Unde ti Site Kicaeb Kum

(Matiyu 8:1-4; Luka 5:12-16)

40Unde iki ti site kicaeb kum ru ba uwog Yesu. Awu ba ku riben uwe wu, ku mbyae ti ajwo baa, “Afu a cwe ira, afu site kuko ti fu u jim kicaeb-m.” 41Yesu sae unde wu ti ayibrisi u sa kujwo-wu te kunn wu, u ri te wu baa, “Ame cwe pu m, kicaeb-fu ā ya ta!” 42Ti ritsen kicaeb kum ya unde wu ta. Ijwe-wu kafe pangma ti kucang. 43Ti ritsen, Yesu fwa wu kusen u tē wu ru baa, 44“Nung, ka ri-fu ira yine te unde iki be, ru yi uwog kukwen ama u yerwen na Rimam iken ti Musa ri baa, a na yerwen. Ayine u tso ande baa, kicaeb-fu na jim pu yi.” 45Amaa, unde wu ruye atang u sa ira yi ku kyang ri te ande kyife uwog meme. Yesu tu-wu riyae ti wu sang uwae uten wurr cwucwo be. Awu ku som ti ufang ti ufang. Ama ande ku ru kyife uten meme ru ba uwog wu atang.

Currently Selected:

Markus 1: kubNT

Highlight

Copy