aLuka 7

aYeso sak asam aritek ásozha akak tá te atser

(aMat 8.5-13)

1aYeso tá fa gang kufe̱ ike̱re̱'ong cei ne ánerawe foos, ne a be na aKapanum. 2Aritek ásozha akak tuse azong, afe asam wu tá nye atser baꞌ, an te kyo̱ndi a tá ku. Asam'me se yiik dide̱ng nufe atekasa wu. 3Aritek ásozha'me fok itak aYeso yong a tom áko̱k kasho̱o̱n áner aYahuda nufu nong á tá su ku nye izong ye a ra be̱ sak asam wu tá te atser. 4Á tá fa be̱ nufe aYeso, ne á ku nye akusuk ye, “I ta se gye̱r ke wan be̱ sak asam aner na ta te atser, 5kamok a shim áner yir, ma a min no̱k yir kutu aduwa.”

6Ayong aYeso tseng be ba. A se gugo̱k be kasa'me baꞌ, ne aritek ásozha'me tom áferime̱ wu nufe aYeso ye á ra se fe̱ be wu ye, “Atekasa, sang tu daam baꞌ, mi kyem ke wan be̱ nasa mi baꞌ. 7Ike̱ng i tá sak mi tá kyem i be̱ nufuan'ong baꞌ, fe̱re̱ng tsek asam'i tà te atser. 8Kamok mi gip, akak ti nye rigwo̱m ni mi ne mi min i nye rigwo̱m na ákak. Ke mi fe̱ be ayu ye, a ra tseng, ne a tseng, ne i fe̱ be akak ye, a ra be̱, ne a be̱. Ke mi fe̱ be asam mi ye, a ra nye iyu, ne a nye.”

9aYeso tá fa fok anong ne a te zhing, ne a kirik a tá fe̱ be rigwo̱m ánerawe a tú ku kuus ame ye, “Mi ta ka tak yin, mi kun di aner akak kaye̱e̱r áner Isarela afe a ta be kuno̱o̱k katsak be agap kyo̱ndi aner na baꞌ.” 10Áner a tá tsang á ku tom ba ame tu ku bun kari'me, ne á se se̱ asam'me n te atser.

aYeso sak kukom igon akumung akak dorok

11Nama anong, aYeso be nuwo̱p kukak a tá yis ye aNayin ne álimazhiri wu be rigwo̱m ánerawe tseng mak be wu. 12A tá fa be̱ bubarak be kanu kuwo̱p'e, ne a nyim á sen wuruk be kukom acam akak, afe a ta se ze̱r na anyining wu. Anyining'e nye akumung. Ánerawe whe̱r á tá se nuwo̱p'e se mak be wu. 13Nizen aYeso tá fa ku di, ne a ro̱ riye̱ wu, yong a fe̱ be wu ye, “Sang tu tos baꞌ.”

14aYeso tseng bubarak nong a tá se ra akpate kukom ame, ne áfe a tá sok kukom'e nyeseng, ne a fe̱ ye, “Acam, dorok!” 15Ne acam a tá tsang a ku ame dorok a tá kpaan kufe̱ kanu, ne aYeso no̱o̱k anyining'e.

16Cice̱r ba inyim tú ro̱, yong á kerek Adakunom ye, “Aner kuzarap agbang'e m be̱ kaye̱e̱r yir,” ne á fe̱ ye, “Adakunom m be̱ nong a ta tobok ánerawe wu.”

17Itak'e tseng koake̱ niben aYahuda be iwo̱p ikak i ta se bubarak.

aYohana tom áner áfa nufe aYeso

(aMat 11.2-19)

18Nizen iya álimazhiri aYohana tú ku taas ike̱re̱'me cei, yong a yis áner afa kaye̱e̱r ba 19nong a tú ku tom ba nufe aYeso ye, á ra su ku rip ye, “Wan ne a nye aya a tà fe̱ ye a tà be̱ ame ka ba ra tor akak ze̱e̱r e̱?”

20Áner ame tá fa be̱ nufe aYeso, ne á fe̱ be wu ye, “aYohana aner abatisma min tom yir nufuan ye i ra be̱ ta ka rip yir ye, ‘Wan ne a nye aya a ta fe̱ ye a ta be̱ ame ka ba ra tor akak ze̱e̱r e̱?’ ”

21Nizen iyong aYeso sak áfe a tá nye atser baꞌ, be áfe iriri iro̱k whe̱re̱ tá te atser, ne a turung amaan nabik, ne a sak ákpato̱o̱n whe̱r tá di karo̱. 22Ne a fe̱ be áner a tú ku tom ba ame ye, “Ku bun yin, ta su ku tak yin aYohana ike̱re̱ yin tá di yin ne i foos yin, akpato̱o̱n se̱ kudi karo̱, ne ákun tseng gye̱r, ákparo̱ng te atser, ágbato fok kuto, ikom dorok be kutser, ne a taas áfe rizor Rife̱ Ritek. 23Aner riye̱ rikan ne a nye aner aya a tin be agak riye̱ natoon mi baꞌ.”

24Nama átom aYohana ame tú ku bun, aYeso san kutaas ánerawe'me itak natoon aYohana ye, “Akye̱ ne yin se di yin katse e̱? Aner aya a ta se kyo̱ndi agam kuwun ta zim a? 25Sang ke anong baꞌ, yin se di yin akye̱ e̱? Aner a tá te ares atek a? Wayo, áfe a tá tes ares itso̱m ne á fok kusas kusor sor nazuri rigwo̱m. 26To̱, akye̱ ne yin se di yin e̱? Aner kuzarap a? Ei, mi ta tak yin a nar aner kuzarap. 27Ayu ne a nye aya a tá zibir itak natoon wu ye,

“ ‘Di, mi tà tom atom'i nasho̱o̱n wu

aya a tana ka nye iren.’

28“Mi ta ka tak yin, kaye̱e̱r kutes ányining, akak kuse a tá nar aYohana baꞌ, gip be anong, aya a ta nye igang'e kaye̱e̱r rigwo̱m Adakunom tu nar yiik.”

29Cice̱r ánerawe'me be áfe ku shashang itso̱m iben gip tá fa fok rife̱ aYeso, ne á fe̱ ye iren Adakunom nye katsak kamok aYohana tsang á ku nye ba abatisma. 30Áner aFarisi be áfe a tá ren Itsi dide̱ng raba kanye̱k Adakunom natoon ba, kamok sang aYohana tsang a ku nye ba abatisma baꞌ.

31“Be akye̱ ne mi tin maas ánerawe izam iyu e̱? Á se kyo̱ndi akye̱ e̱? 32Á se kyo̱ndi inoon na tá yo̱ro̱k naro̱ rizhik, ne á fe̱ be áfudang ba ye,

“ ‘Yir ta te̱p yin asharuwa,

Yin to yin baꞌ,

yir bom yir abom riyo̱m

Yin tos yin baꞌ.’

33“aYohana aner abatisma be̱ a yas ka a so̱ ashi anap baꞌ, yin fe̱ yin ye, ‘A be itseng.’ 34Igon Anerawe be̱, a ya ne a so̱, yong yin fe̱ yin ye, ‘A mak a yas, ne a nye rime̱ be áfe kushashang itso̱m iben ne “áfe rine̱n.” ’ 35A ren kukyem be ike̱ng iya ku ta nye.”

aYeso nasa aSiman aner aFarisi

36Aner aFarisi akak fe̱ be aYeso ye, á ra se ya naya kari wu, yong á tseng nasa aner'e nong a ta se yas. 37Abining akak a tá sor kusor wu kaye̱e̱r rine̱n kaye̱e̱r kuwo̱p'e tá fa fok ye, aYeso sen yas nasa aner aFarisi'me, yong a be̱ be name iko̱o̱n itek nudu, a tá nye be ike̱ng ikak a ta yis ye alabasta. 38A tá te cing na atak aYeso a tá tos, ne nanyisi wu ni kpas natak aYeso, ne a re̱ng nanyisi'me be nakuyo̱ng wu, a kunung atak aYeso'me nong a tin kon name iko̱o̱n itek ame.

39Aner aFarisi afe a tá fe̱ ye a ra be̱ kari wu ame tá fa di anong, ne a to̱ riye̱ wu ye, “Ke a fa fe̱ ye aner na nye aner kuzarap Adakunom ke a ren aner a tú ku ras, ne a ren kuri kuse abining'e, ke a ren ye a nye aner rine̱n.”

40Ayong aYeso fe̱ be wu ye, “aSiman, mi be ike̱ng ikak ta ka tak.”

Ne a fe̱ ye, “Aner Kubo̱so̱p, Ni tak.”

41“Áner afa se ko̱bo̱k itso̱m nufe aner akak a ta nyesek iko̱p itso̱m. Akak ko̱bo̱k Itso̱m alebura ife riye̱ rizining be ribir ne akak ko̱bo̱k itso̱m iya alebura tana se̱ kaye̱e̱r kuko̱s iso̱k itoon. 42Cice̱r ba'ong akak be itso̱m a tana ku karang baꞌ, yong a tú won ba'me. To̱, kyo̱o̱rna angan kaye̱e̱r ba ne a tu ku shim ne a nar e̱?”

43Ayong aSiman fe̱ be aYeso ye, “Mi di ye afe a tú ku won itso̱m'e whe̱r ne a nar.”

aYeso fe̱ ye, “Wan fe̱ gye̱r.”

44aYeso kirik nabas afe abining ame, a tá fe̱ be aSiman ye, “Wan di abining na a? Mi be̱ kari wan, wan ti no̱o̱k ashi tanin kusu atak'i baꞌ, amma wu shu atak'i be nanyisi wu, a tá re̱ng be nakuyo̱ng wu. 45Wan ti tonong kushim dide̱ng baꞌ, amma abining na, kum nizen iya mi tá be̱, a won kukur atak'i baꞌ. 46Wan ti korok name rice baꞌ, amma wu ti ko̱n name iko̱o̱n itek natak. 47Kamok anong mi ta ka tak ye, a mu ku re̱ng rine̱n wu ri ta se whe̱r kamok a tonong kushim dide̱ng. Amma afe a tú ku re̱ng rine̱n wu cie̱k, tonong kushim cie̱k mama tsek.”

48aYeso fe̱ be abining ame ye, “A ma ka re̱ng rine̱n wan.”

49Ribir ánerawe á tá se be kuyas be wu kpaan ku naka risim ye, “Angan na a ta re̱ng rine̱n gip kusum e̱?”

50Ne aYeso fe̱ be abining'e ye, “Kuno̱o̱k katsak wan ma ka shesh, tseng caang.”

Currently Selected:

aLuka 7: izrNT

Highlight

Copy