aLuka 8

Ányining ákak tseng mak be aYeso

1Nama anong, aYeso tsang a tseng ni iwo̱p igbang'e be izhizhe̱k'e, ne a taas Rife̱ Ritek natoon rigwo̱m Adakunom, álimazhiri kuso̱k be afa ame se mak be wu. 2Ányining ákak gip á tú ku turung ba ámaan nabik, ne a ku sak ba á tá te atser. Ákak kaye̱e̱r'e nye, aMarya abafe aMagadaliya aya ítseng kanataar tá wuruk kaye̱e̱r wu, 3be aZhowana abining aKuza afe a tá nye itomong nasa aHiridus be aSuzana ne ákak whe̱r. Ányining na tu se̱s mo ba be ku ka nyesek ba ike̱re̱ dide̱ng kaye̱e̱r ike̱re̱ ba tá be.

Kumaas natoon aner ikap akak

(aMat 13.1-23; aMar 4.1-20)

4Nizen rigwo̱m ánerawe tá sen nyim, ákak nes ni iwo̱p ze̱r ze̱r nong á tá be̱s nufe aYeso. Ayong a tú tak ba kumaas na ye, 5“Aner ikap akak be ni nas izha naya. Nizen iya a tá se be kunas'e, íca'me ikak kpas niren ne á shesh, ne nanon tang. 6Íca'me íkak kpas nifang agudong, i tá fa tang ne i koor kamok sang karo̱'me tá be iben dide̱ng baꞌ. 7Íkak kpas kaye̱e̱r ikiritsan, ne ikiritsan'e rasak mak be ba, ne i ku te̱ne̱ng ba. 8Ne íca'me íkak i kpas niben itek, ne i rasak ne i te itek dide̱ng, i te ica inyak kuso̱k ma i nar ike̱ng iya a tá tuus.”

aYeso tú ku tak ba anong, ne a ma fe̱ ye, “Aner afe a ta be ato kufok a ra fok.”

9Iyong álimazhiri wu tú rip ike̱ng ife kumaas'e ta sor. 10aYeso tú tak ba ye, “A ma ka no̱o̱k yin kukyem kuren ike̱re̱ rigwo̱m Adakunom i ta se nune̱re̱ng, amma be ákak mi ta fe̱ ne i ninye kumaas, nong a se̱

“ ‘Á ta ye̱re̱k gye̱r tatan, amma á tà ra di baꞌ.

Á tà foos gye̱rtatan, á tà ra ren ike̱ng iya á tin fe̱ baꞌ.’

11“Iyu ne i nye ike̱ng iya kumaas'e ta sor, íca naya'me nye rife̱ Adakunom. 12Ífe i tá kpas niren nye ánerawe aya á tá fok rife̱ Adakunom, ne Ishetan be̱ ne a kok rife̱'me kaye̱e̱r aye̱ ba, fan á bu no̱o̱k katsak nong á tà se̱ kashesh. 13Ífe i tá kpas nifang agudong se kyo̱ndi ánerawe áya a tá fok rife̱'me ne á shan be aye̱ akan, amma rife̱'me kpa agap naye̱ ba baꞌ. Á ti no̱o̱k katsak nizen cie̱k tsek, ke izen iya kubo̱mo̱ng be̱ ne á kpas. 14Íca'me iya i ta kpas kaye̱e̱r ikiritsan nye áner aya a ta fok rife̱ Adakunom, a ra ya kasho̱o̱n nusor'e baꞌ, kamok á ti daam be ike̱re̱ kazatse na, ne kutse̱r kurum ne kusor kutek. 15Íca ife i ta kpas niben itek nye áner aya a tá shan rife̱'me be riye̱ rizining, áfe a ta fok rife̱ Adakunom ne á ninye itomong ne á na ka tsesek ma ne á te ike̱ng itek.

A te kuro̱ng na apitila ne a bun a kis baꞌ

(aMar 4.21-25)

16“A te kuro̱ng na apitila ne a bun a kis ka ne a sak ribong agadu baꞌ. A ta sak nagarang nong áfe a ta no̱o̱s tà di akanang'e. 17Ike̱ng ikak kuse i ta se nune̱re̱ng ife sang a tana won dar a ren baꞌ, ka ike̱ng ikak kuse nukis ife sang a tana won dar a te̱s na akanang baꞌ. 18Kamok anong, ni sak yin riye̱ be ike̱ng yin ta foos yin. Aner aya a ta be ike̱ng iya a tú ku barang mo, afe a ta be baꞌ kaban ike̱ng wu ta di ye wu be gip, a tin shan ni wu.”

Ango̱ aYeso be áronyining aYeso

(aMat 13.1-9; aMar 4.1-9)

19Ango̱ aYeso be áronyining wu tseng nong á tá fe̱ ku kanu be wu, á kyem á be̱ bubarak be wu baꞌ, kamok rigwo̱m ánerawe. 20Ayong aner akak fe̱ be wu ye, “Ango̱ wan be áronyining wan se nufang á shim á ta fe̱ kanu be wan.”

21Ayong aYeso fe̱ be ba ye, “Ango̱ mi be áronyining'i nye áfe a ta fok rife̱ Adakunom ne á ninye itomong.”

aYeso tigba kuwun

(aMat 8.25-27; aMar 4.35-41)

22Katuk kakak aYeso fe̱ be álimazhiri wu ye, “I tar yir kunyi kukya.” Iyong á no̱ kaye̱e̱r kukpara ashi, á tá tseng. 23Á tá se be kutseng'e, ne ida sok aYeso. Kuwun dorok be agap na agbang kudung'e, ne ashi san kuno̱o̱s kaye̱e̱r kukpara'me, ma ba no̱ kaye̱e̱r kudaam dide̱ng.

24Iyong álimazhiri tseng nong á tá su ku shiming ye, “Atekasa, Atekasa, yir sen wei yir!”

Ne aYeso dorok, a tá tigba kuwun'e be agung ashi'me, ne kunyeseng ne karo̱ te win. 25Ne aYeso rip álimazhiri wu ye, “Kuno̱o̱k katsak yin se ake̱ e̱?”

Á te zhing, ne á na ka risim be inyim ye, “Angan na e̱? A ta fe̱ be kuwun be ashi ne á ku fok gip.”

aYeso sak aner akak a ta be ítseng te atser

(aMat 8.28-34; aMar 5.1-20)

26aYeso be álimazhiri wu ya kasho̱o̱n be kutseng na agbang kudung aGalili kaye̱e̱r kukpara ashi'me nong á tá no̱ niben aGarasi i ta ye̱re̱k ife aGalili. 27aYeso tá fa tiik nukim kudung'e, ne a nyim be aner kuwo̱p'e akak a tá be itseng. Aner na n baan be kuwon kasa, ne a sor ica'me naro̱ are̱k. 28Nizen iya a tá di aYeso, a tá kuto̱ ne á kpa natak wu, a tá tasak dide̱ng ye, “aYeso, Igon Adakunom Agbang Agwo̱m Ágwo̱m, wan tse̱r akye̱ be mi e̱? Kusuk, tin no̱o̱k risam baꞌ.” 29A fe̱ anong kamok aYeso tsang a fe̱ be ítseng'e ye, i ra wuruk kaye̱e̱r aner'e. Ítseng'e n me̱ ne i ku daam anong, ne á ku rosom be idun atso̱m nibo̱k be atak, ne á ku fek, gip be anong ne a te̱se̱ng, ne ítseng'e tseng be wu katse.

30aYeso tú rip ye, “Riyerek wan nye angan e̱?”

Ayong a fe̱ ye, “Whe̱re̱,” #8.30: Whe̱re̱ Nirem áner aHeleni, a te “aLizhing” I ta sor kyo̱ndi rigwo̱m ásozha á ta be̱ bubarak izungu inaas ka igataar ayi.kamok ítseng whe̱re̱ ne i no̱ kaye̱e̱r wu. 31Ayong a yiir kunye aYeso akusuk ye sang a tu fe̱ be ba ye á ra be kaye̱e̱r ribong riya sang ri ta be igak baꞌ.

32Kukpara álade whe̱re̱ se be kuya azong nabas kawhanang, iyong ítseng'e nye aYeso akusuk ye a ru ku won ba á tà no̱ kaye̱e̱r álade'me. Ayong a tú won ba. 33Ítseng'e tá fa wuruk kaye̱e̱r aner ame, ne i no̱ kaye̱e̱r álade, kukpara álade'me cei teng nong á tá be kaye̱e̱r kudung ame á tá se kus azong. 34Áfe a tá sen ni sak riye̱ na álade'me tá fa di anong, ne á teng nong á tá se taas'e kaye̱e̱r kuwo̱p ne ni iwo̱p izhizhe̱k'e i ta se bubarak. 35Iyong ánerawe wuruk nong á tá di ike̱ng iya i tá nye, á tá fa be̱ nufe aYeso, ne á di aner ítseng tan wuruk kaye̱e̱r wu ame nusonong natak aYeso. An te ares nong a tá mu ku bun gye̱r kyo̱ndi aner aya rice wu ta se rizining, yong inyim tú ro̱ ba. 36Áfe a tá di taas ánerawe kuri iren iya i tá sak aner a tá be ítseng ame tá te atser. 37Iyong áner iben aGarasi ame cei fe̱ be aYeso ye, a ra tseng a tu ku won ba, kamok inyim tú ro̱ ba dide̱ng. Ayong aYeso no̱ kaye̱e̱r kukpara ashi, a tá tseng.

38Aner ítseng tá wuruk kaye̱e̱r wu ame nye aYeso izong ye wu ta tseng be wu, amma aYeso tú ro a tá fe̱ be wu ye, 39“Ku bun kari, ta se tak ike̱ng iya Adakunom tá ma ka nye'me.” Ayong aner ame tseng a taas kuri ike̱ng iya aYeso tú ku nye'me kaye̱e̱r kuwo̱p'e cei.

aYeso dorok kanamang kakak ka tá tsang ka ku ne a sak abining akak te atser

(aMat 9.18-26; aMar 5.21-43)

40Nizen aYeso tá bun a tú bun nunyi wu tú ku ne ame, rigwo̱m ánerawe á tá sen ku tor tú shan niren. 41Ne aner akak a tú ku yis ye, aZharus a tá nye ako̱k kasho̱o̱n kutu aduwa, wor a be̱ a tá kpa nasho̱o̱n aYeso, a tú ku nye akusuk ye a ra tseng kari wu 42kamok igak angas kutes wu, a tá be aye̱ kuso̱k be afa an te kyo̱ndi a tà ku.

aYeso tá se be kutseng wu yong ánerawe be̱s bubarak be wu ma á tú fi. 43Abining akak tuse azong afe naso̱k tá taas aye̱ kuso̱k be afa, akak kyem a tú sak a tá te atser baꞌ. 44A be̱ nabas kama aYeso nong a tá ra kanu kukpiin wu, ne naso̱k ame wor na nyeseng. 45Ayong aYeso fe̱ ye, “Angan ti ra e̱?” Koangan fe̱ ye wu ren baꞌ, yong aBitrus fe̱ ye, “Atekasa, ánerawe nar agap ma á ta firik ne á na ka tosom.”

46Ne aYeso fe̱ ye, “Aner akak min ra, kamok mi fok kukyem tá wuruk kaye̱e̱r'i.”

47Abining'e tá di a ta won dar a ku ren baꞌ, yong a be̱ be ikap kutiim a tá kpa na atak wu. A tak ike̱ng i ta sak wu tú ku ra be kuri kutser kuya wu ta wor a se̱ nizen iyong nasho̱o̱n ánerawe'me cei. 48Ayong aYeso fe̱ be wu ye, “Angas, kuno̱o̱k katsak wan sak wan n te atser. Tseng caang.” 49Nizen aYeso tá ru fe̱ kanu, aner akak ne nasa aZharus, ako̱k kasho̱o̱n kutu aduwa, be̱ a tá be fe̱ ye, “Angas wan n ku, tu ba bun i daam aner kubo̱so̱p baꞌ.” 50aYeso ta fa fok anong, ne a fe̱ be aZharus'e ye, “Sang tu fok inyim baꞌ, no̱o̱k katsak tsek, a ta te atser.”

51A tá fa no̱ numa aZharus ame, aYeso won aner akak tá no̱ mak be wu baꞌ, ma ke aBitrus be aYohana ne aYakub, be atek ne anyining igon'e tsek. 52Ánerawe sen tang ikun, ne á nye riyo̱m kanamang'e. Ayong aYeso fe̱ be ba ye, “Sang tu tos yin baꞌ, an ku baꞌ, amma a se be ida tsek.”

53Iyong á mas aYeso'me, á ta ren ye an ku. 54Amma aYeso yiir aku'me nubo̱k a tá fe̱ ye, “Angas'i, dorok.” 55Iyong isong wu tú bun, ne a wor a dorok, ne aYeso fe̱ be ba ye, á ru ku no̱o̱k ike̱ng ikak a ta ya. 56Átek'e te zhing, ne aYeso fe̱ be ba ye, sang á tu tak akak ike̱ng iya i tá nye baꞌ.

Currently Selected:

aLuka 8: izrNT

Highlight

Copy