aLuka 9
9
aYeso tom ámanzo wu kuso̱k be afa
(aMat 10.5-15; aMar 6.7-13)
1aYeso tá yis kuso̱k be afa ame, a tú no̱o̱k ba kukyem kuturung koakye kuri ítseng, kufe ku ni sak áfe iro̱k tana te atser. 2A tú ku tom ba nong a ta se taas itak rigwo̱m Adakunom, ne á sak áfe iro̱k ta te atser. 3A fe̱ be ba ye, “Sang tu sok yin ike̱ng ikak kamok kutseng yin'e baꞌ, ko ishe̱n, ka ishika, ka naya, ka itso̱m, ka tu be yin akpiin afa baꞌ. 4Koakye kasa ne yin no̱ yin ke á ta shan yin ne i sor yin azong ma izen iya yin tana won yin kuwo̱p'e. 5Karo̱ kaya ne á ta shan yin baꞌ, re̱ng yin iwur atak yin nizen iya yin tana won yin kuwo̱p'e, nong i tà sor asheda natoon ba.”
6Iyong á dorok á tsang á tseng ni iwo̱p izhizhe̱k'e, ne á taas Rife̱ Ritek'e, ne á sak ánerawe ta te atser koake̱ ne á no̱.
aHiridus no̱ nudaam
(aMat 14.1-12; aMar 6.14-29)
7To̱, aHiridus afe a tá nye agwo̱mna aGalili fok ike̱re̱ azhing aYeso tá tsang a nye cei. Ayong a daam kamok ákak fe̱ ye, aYeso nye aYohana aner abatisma aya a tá dorok nure̱k. 8Ákak fe̱ ye, a nye Iliya aner kuzarap Adakunom ne a bun an dorok. Ákak bun á fe̱ gbak ye a nye azining kaye̱e̱r aner kuzarap Adakunom agbugbang'e a tan ku, ne a bun an dorok. 9Ne aHiridus fe̱ ye, “Mi sak a tá te̱n rice aYohana ko̱. To̱, angan na ne mi foos ike̱re̱ natoon wu na e̱?” Ayong aHiridus'e shim ke a di aner'e.
aYeso no̱o̱k ánerawe izungu itoon naya
(aMat 14.13-21; aMar 6.30-44; aYoh 6.1-14)
10Nizen ámanzo ame tú ku bun, á tak aYeso ike̱re̱ ba tá nye cei. Ayong a naka ko̱ro̱k ba a tá tseng mak be ba nuwo̱p a ta yis ye aBatseda. 11Ánerawe whe̱re̱ tá fa fok itak'e, yong á tú kuus. A tú nye ba adazha be kube̱. Ayong a tá ka tak ba rife̱ natoon rigwo̱m Adakunom, ne a sak áfe iro̱k tá te atser.
12Kuso̱k be afa ame be̱ nufu nawhe̱shirim á tá fe̱ ye, “Ka te ba niren nong á ta be ni iwo̱p iya i ta se bubarak nong á ta se tse̱r naya be naro̱ kuko̱s kamok yir se yir katse.”
13Ne aYeso fe̱ be ba ye, “Ku no̱o̱k yin ba ike̱ng ikak nong á ta ya.” Iyong á fe̱ ye, “Yir be yir ike̱ng ikak dide̱ng baꞌ, ma ke ágbang abiredi atoon be izos ifa tsek, ma ke ta su ku shan yir ba naya.” 14Atek áfe a ta se azong be̱ barak áner izungu itoon.
Ayong aYeso fe̱ be álimazhiri wu'me ye, “Ku sak yin ba nong á ta sosok nagwo̱m iso̱k itutoon.” 15Alimazhiri'me nye anong, yong koangan sonong kaben. 16aYeso sok ágbang abiredi atoon be ízos ifa ame. Ne a sok rice naza a tá tonong Adakunom riye̱ rikan. A te̱se̱ng abiredi be ízos ame, a ta no̱o̱k álimazhiri wu nong á tá saas ánerawe'me. 17Cice̱r ba ya ma á whas, ne álimazhiri'me tusung ribir íkpis'e cip ni íderse kuso̱k be ifa.
Rife̱ aBitrus natoon aYeso
(aMat 9.18-26; aMar 5.21-43)
18Katuk kakak aYeso tá se be kunye aduwa wu ze̱r, yong álimazhiri wu be̱ á tú se̱. Ne aYeso tú rip ba ye, “Ánerawe fe̱ ye mi nye angan e̱?”
19Iyong álimazhiri'me fe̱ ye, “Ákak fe̱ ye wan nye aYohana aner abatisma, ne ákak fe̱ ye wan nye Iliya, ne ákak bun á fe̱ ye wan nye akak kaye̱e̱r áner kuzarap Adakunom ágbugbang'e, ne a bun an dorok be kutser.”
20Ayong aYeso tú rip ba ye, “To̱, yin ne e̱? Yin di yin ye, mi nye angan e̱?”
Ayong aBitrus fe̱ ye, “Wan ne i nye aKiristi afe Adakunom tá tom.” 21aYeso tú kpam ba ye sang á tú tak akak baꞌ. 22Ayong aYeso fe̱ be ba ye, “Igon Anerawe tà so̱ iriri risam, ne áko̱k kasho̱o̱n be ágbang átsi ne áner kubo̱so̱p Itsi ku rawu, a tu ku fe̱r ne a bun a dorok katuk afe ataar be kutser.”
23Ayong aYeso fe̱ be ba cice̱r ye, “Koangan afe a ta shim a tin kuus, a ra rawu rice wu nong a ta sok kukon a tana ku tigak mo koakye kunom nong a tin kuus. 24Koangan afe a ta shim a ta shesh kutser wu, a tin wei. Afe a tin wei nutser wu kamok'i, a tà shesh kutser wu. 25Akye̱ kuri ike̱ng itek ne anerawe ta se̱, ke a se̱ kazatse na cei, ne a rin wei nutser wu e̱? 26Koangan afe a ta fok isum mi be rife̱ mi, Igon Anerawe ta fok isum wu nizen iya wu tana be̱ kaye̱e̱r kuyiik wu be kuyiik Ada wu ne kufe ámaleka azhe̱l'e. 27Katsak'e ne mi ta ka tak yin, ákak áfe a ta se aze tà tsang á kus baꞌ, ma á di rigwo̱m Adakunom nizham.”
Kanyisi aYeso shishing
(aMat 17.1-8; aMar 9.2-8)
28Nama inom ikara aYeso tá fe̱ rife̱'ong, yong a sok aBitrus be aYohana ne aYakub mak be wu, á tá tseng natoon kawhanang nong á tá se nye aduwa azong. 29Nizen aYeso tá se be aduwa'me kanyisi wu shishing, ne ares wu te akan pes ma a gye̱se̱m. 30Ayong áner ákak ba afa ti wuruk ni wu be kuyiik, áner'e nye aMusa be Iliya, 31ne á fe̱ be aYeso itak riku wu a tana kam be kazatse, izen'e tan be̱ bubarak i ta shining na aUshalima. 32Ida yising aBitrus be áfudang wu, á tá fa te kparak, ne á di kuyiik aYeso be áner afa ame nunyeseng be wu. 33Nizen áner ame tá se be i kam be aYeso, yong aBitrus fe̱ be aYeso ye, “Atekasa, i se gye̱r yir ta se yir aze, i nye yir abur ataar, kuzining tà nye kufuan, ne kuzining nye kufe aMusa, ne kuzining nye kufe Iliya.” A ren ike̱ng iya wu ta fe̱ baꞌ.
34Nizen iya a tú ru fe̱ kanu, kune̱n wuruk ku tú ku kis ba, ne inyim ka ro̱ ba. 35Ne kuto̱ kukak wuruk kaye̱e̱r kune̱n'e ye, “Ayu ne a nye igon'i, mi tan kasa. Ku fok yin kuto.” 36Nama kuto̱'me tá te yu, ne á di aYeso wu ze̱r. Álimazhiri'me sak ike̱re̱'ong kaye̱e̱r aye̱ ba, á tak akak ike̱ng ikak natoon'e nizen iyong baꞌ.
aYeso sak igon kakak ka ta be amaan kabik te katser
(aMat 17.14-21; aMar 9.14-29)
37Kayatson'e, á tá fa tiik natoon kawhanang'e, ánerawe whe̱re̱ be̱s nong á nyim be wu. 38Aner akak kaye̱e̱r ánerawe'me fe̱ be wu ye, “Aner Kubo̱so̱p, mi ta nye izong, ye kusuk be̱ ta di igon'i kamok wu ze̱r tsek ne a nye igon'i. 39Amaan kabik tu daam ma a tang kukun, ne i ku barak kaben ne a tiim ma a turung ace̱ fuk fuk nanu, i wor i tu won baꞌ, ne i nye kyo̱ndi i tu ku fe̱r. 40Mi nye álimazhiri wan akusuk ye á ru ku tun'e, á ra kyem á tun baꞌ.”
41Ayong aYeso fe̱ ye, “Kaꞌ. Yin ánerawe izam na, I ta shonong ne i won dar i no̱o̱k yin katsak, mi ta sor ma ane̱ nong tana ka tsesek be yin e̱? Be̱e̱n igon wan'e aze.”
42Nizen igon'e tá saase, amaan kabik'e tú barak kaben ne a tiim, iyong aYeso tigba amaan kabik'e ne a sak igon'e tá te katser ne a no̱o̱k atek'e. 43Ánerawe te zhing cice̱r be kukyem Adakunom.
Nizen koangan tá te zhing be ike̱ng aYeso tá nye cei, yong aYeso fe̱ be álimazhiri wu'me ye, 44“Wesek yin kuto be ike̱ng mi ta sen ka taas yin. A tà sok Igon Anerawe a tà re̱p ákak'e.” 45Amma ba kyem á ren ike̱ng iya rife̱'me tá sor baꞌ. A tú ne̱r ba'me fan á bu ren ike̱ng'e. Inyim tú ro̱ ba, akak kyem á tú rip baꞌ.
Aner aya a ta nar yiik
(aMat 18.1-5; aMar 9.33-37)
46Álimazhiri'me kpaan nanan awan ba ye angan kaye̱e̱r ba ne a ta nar kuyiik'e. 47aYeso tá ren kuto̱ro̱ng ba, yong a sok igon kakak kahiir'e nong a tú ku sak a tá nyeseng nukim wu. 48Ne a fe̱ be ba ye, “Aner aya ne a shan igon kahiir'e kyo̱ndi kayu kaye̱e̱r riyerek'i, i nye ye a ti shan. Aner aya ne a ti shan, i nye ye a shan aya a tin tom, kamok aner afe a ta mees rice wu ye wu raar kaye̱e̱r yin cei, wu ne a nye ayiik'e ne a nar.”
49Ayong aYohana fe̱ be wu ye, “Atekasa, yir di yir aner akak a tá sen turung ítseng kaye̱e̱r riyerek wan yong yir fe̱ tú ku roon yir'e kamok wu ta nye akak kaye̱e̱r yir baꞌ.”
50Ayong aYeso fe̱ be ba ye, “Sang tu ku ro̱n yin'e baꞌ, kamok aner aya ne a ta ka ranyin baꞌ, a kuus kama yin.”
Áner aSamariya raba kushan aYeso
51Izen tá be̱ bubarak aYeso tana ku bun naza yong a shim ma ke a be na aUshalima. 52Ayong a tom átom ákak nasho̱o̱n wu áya a tana tseng nuwo̱p aSamariya nong á ta su ku nye kanye̱k. 53Amma áner ame raba ku kushan, kamok a se niren kutseng na aUshalima. 54Nizen álimazhiri wu, aYakub be aYohana tá di anong, yong á fe̱ be aYeso ye, “Agwo̱m Ágwo̱m, wan shim yir ta fe̱ yir be kuro̱ng nong ku ta ne naza nong ku tin kpa natoon ba ne ku kuya ba e̱?” 55Ayong aYeso kirik a tú ku tigba ba. 56Ne á be ba nuwo̱p kukak.
Aner aya a ta shim a ta kuus aYeso
(aMat 8.19-22)
57Á tá se be kutseng niren, aner akak fe̱ be aYeso ye, “Mi ta ka kuus koake̱ ne wan tà tseng.”
58Ayong aYeso fe̱ be wu ye, “Áromong be ibong ba, ne nanon be are̱ ba tin sor, amma Igon Anerawe be karo̱ ku ni no̱ baꞌ.”
59Ne aYeso bun a fe̱ be aner akak ye, “Ni kuus.” Amma aner'e fe̱ ye, “Atekasa, ni won ta se ne̱r ada mi nizham.”
60Ayong aYeso fe̱ be wu ye, “Won ikom tu ne̱se̱k ikom ba, wan tseng ta se taas itak rigwo̱m Adakunom.”
61Akak bun a fe̱ be aYeso ye, “Atekasa, mi tà ka kuus, amma ni won ta se nye afekari atato̱ nizham.”
62aYeso fe̱ be wu ye, “Aner aya a tan yiir kutse inyak ikap, ke a bun a kirik kama, a kyem a ta no̱ kaye̱e̱r rigwo̱m Adakunom baꞌ.”
Currently Selected:
aLuka 9: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
