aLuka 6

Kurip natoon kunom Asabar

(aMat 12.1-8; aMar 2.23-28)

1Katuk Asabar akak aYeso ku sen gor kaye̱e̱r riko̱ alikama, ne álimazhiri wu kpaan bo̱s ace alikama'me, ne á tirip be ibo̱k nong á tá ya ica'me. 2Ayong áner aFarisi ákak tú ku rip ye, “Akye̱ sak yin nye yin ike̱ng iya Itsi ta roon kunye'me katuk Asabar e̱?”

3Ayong aYeso fe̱ be ba ye, “Yiring yin ike̱ng iya aDauda tá nye nizen wu be ánerawe wu tá fok izong. 4A tá no̱ naro̱ a tú ku ya Adakunom iben, a tá sok abiredi azhe̱l'e, aya ta se gye̱r ke ba ya baꞌ, ma ke átsi tsek. A tá no̱o̱k áfudang kutseng wu gip.” 5Ne aYeso fe̱ be ba ye, “Igon Anerawe ne a ti nye rigwo̱m natoon Asabar.”

6Katuk Asabar akak gbak aYeso no̱ kaye̱e̱r kutu aduwa a ta se be kubo̱so̱p ánerawe'me. Aner akak tuse azong aya kubo̱k riya wu tá we̱. 7Áner aFarisi be áfe kubo̱so̱p Itsi se be kutse̱r iren a tana se̱ aYeso be rine̱n. Iyong á ti sak anyisi ni wu nong á tá di ka a tà sak akak ta te atser katuk Asabar'e. 8aYeso ren ike̱ng ba ta sen to̱'me yong a fe̱ be aner kubo̱k'e tá we̱ ame ye, “Dorok ta nyeseng nasho̱o̱n ánerawe.” Ayong aner ame dorok a tá nyeseng.

9aYeso fe̱ be ba ye, “Won mi ta ka rip yin. Akye̱ ne Itsi Adakunom fe̱ natoon Kunom Asabar e̱? I se gye̱r a ta nye ike̱ng itek ka a ta nye ike̱ng imaan'e e̱? I se gye̱r a ta shesh kutser ka a ta fe̱r e̱?” 10A kirik a tú ku ye̱re̱k ba cei, ne a fe̱ be aner ame ye, “Nabak kubo̱k wan.” A nabak kubo̱k'e, ne kubo̱k'e te kutser gye̱r.

11Aye̱ ba beseng dide̱ng yong a kpaan ibo̱ro̱ng awan ba natoon ike̱ng iya a tana nye be aYeso.

aYeso kasa álimazhiri kuso̱k be afa

(aMat 10.1-4; aMar 3.13-19)

12Katuk kakak, kaye̱e̱r inom iyong aYeso ngarak natoon kawhanang nong a tá nye aduwa. A ko̱so̱ i nye aduwa'me. 13Kadiding tá fa karak, ne a yis álimazhiri wu, a kasa kuso̱k be afa kaye̱e̱r ba nong á tá te ámanzo. A ye̱re̱k ba na: 14aSiman aya a tin te riyerek ye aBitrus, be aronyining wu Adarawus, ne aYakub be aYohana, ne aFilibus, be aBatalomi. 15Be aMatiyu, ne aToma, be aYakub igon aZabedi, ne aSiman aya a tú ku yis ye aner a tá be rifup kaben wu. 16Be aYahuda igon aYakub, ne aYahuza Iskariyot, aya a tá sok aYeso a tá no̱o̱k.

aYeso sak ánerawe whe̱re̱ te atser

(aMat 4.23-25)

17aYeso tiik be ámanzo ame naro̱ ka ta se ne̱k. Rigwo̱m ánerawe tuse azong áya a tá nye alimazhiri wu, ne ánerawe aya a nes niben aYahuda be aUshalima ne áfe iben aTaya be aSidon. 18Á be̱s nong á tú ku foos, ne a ka sak ba nong á tà te atser. aYeso turung amaan nabik kaye̱e̱r áya a tá be. 19Koangan shim a tú ku ra kamok kukyem wuruk kaye̱e̱r wu, ne a ku sak ba nong á tá te atser cei.

Riye̱ rikan be riye̱ riwe

(aMat 5.1-12)

20Ayong aYeso kirik a tá ye̱re̱k álimazhiri wu ne a fe̱ ye,

“Áner riye̱ rikan ne á nye yin áfe rizor

kamok rigwo̱m Adakunom nye rife̱ yin.

21Áner riye̱ rikan ne á nye yin áfe izong ta ka ro̱ yin kyo̱o̱rna,

kamok yin tà whas yin.

Áner riye̱ rikan ne á nye yin i ta tos yin kyo̱o̱rna,

kamok yin tà mas yin.

22Áner riye̱ rikan ne á nye yin ánerawe tá ka di yin kye̱re̱,

ne á kam be yin ne á ka kas yin,

ne á ka ranyin kyo̱ndi ike̱ng imaan'e, kamok Igon Anerawe.

23“Nye yin riye̱ rikan katuk'ong ne i to yin nato riye̱ rikan, kamok agbang ishorong yin se naza. Anong ne áda ba nye be áner kuzarap.

24“Awo̱ be yin áfe i ta nye yin árum,

kamok yin n se̱ yin ike̱ng i tana ka shirim yin aye̱.

25Awo̱ be yin áfe i ta whas yin kyo̱o̱rna,

kamok izong tà ka ro̱ yin.

Awo̱ be yin áfe i ta mas yin kyo̱o̱rna,

kamok yin tà nye yin riye̱ riwe ne i tos yin.

26Awo̱ be yin áfe koangan tin fe̱ Rife̱ Ritek natoon yin,

kamok anong ne áda ba nye be áner kuzarap afe abo̱o̱s.

Shim ámudo̱n wan

(aMat 5.38-48; 7.12)

27“Kyo̱o̱rna, mi fe̱ be yin ye, yin áfe i tin foos yin ye i ra shim yin ámudo̱n yin ne i tonong yin áfe a ta ka ranyin yin ritek. 28Fe̱ yin itek natoon áya a ta ka kas yin, ne i nye yin áfe a ta ka nyeen yin aduwa. 29Ke aner akak ta rus nufok kukak, ne i ku kirik kufe afa'me gip, ke akak ti shan ike̱ng ku naka kis wan, tu ku roon kukpiin wan baꞌ. 30Koangan ne a ta rip ike̱ng ikak, ku no̱o̱k. Ke aner akak sok ike̱ng iya i tá nye ifuan, tu fe̱ ye a ra bun a ka no̱o̱k baꞌ. 31Nye yin ánerawe ike̱ng iya yin ta shim yin ba ta ka nye yin'e.

32“Ke yin shim yin awan áfe a ta ka shim yin tsek, ishorong akye̱ ne yin ta se̱ yin nufe Adakunom e̱? Ko áfe rine̱n gip á shim áfe a ta ka shim ba. 33Ke yin nye yin áfe a ta ka nye yin kunye kutek tsek, akye̱ ne yin nye yin'ong e̱? Ko áfe rine̱n nye anong gip. 34Ke yin nyesek yin áfe yin ta ka shim yin ba iko̱p, ne á bun á ka karang ko yin, akye̱ ne yin nye yin'ong e̱? Áfe rine̱n naka nyesek iko̱p gip, ne á shim á ta ka karang ko ba'me cei. 35Shim yin ámudo̱n yin ingya, ku tonong yin ba ritek. Ku nyesek yin ba iko̱p dar ku ni te riye̱ ye á tà ka karang yin, nong ishorong yin tà se whe̱r, ne i te yin inoon Ada Adakunom ayiik'e, kamok wu se gye̱r be áfe a ta won dar á tonong riye̱ rikan ba, ne áya a ta nye imaan'e. 36Be yin kuro̱ riye̱ kyo̱ndi Ada yin ta be kuro̱ riye̱.

Sang tu to̱ yin akak amok baꞌ

(aMat 7.1-5)

37“Sang tu to̱ yin akak amok baꞌ, fan a ba ka to̱ yin'e. Sang tu te̱n yin akak amok baꞌ, fan a ba ka te̱n yin'e. Re̱ng yin ákak rine̱n ba, nong a tà ma ka re̱ng yin rife̱ yin. 38No̱o̱k yin nong yin gip a tà ma ka no̱o̱k yin whe̱re̱, kumaas kutek a ta ye̱se̱p ne a ze̱e̱r ma i nyos ne a ka ko̱ro̱k'e nibo̱k. Kuri kures kufe yin tin maas yin akak'e, kuri kuyong ne a tà ma ka maas ko yin'e.”

39A bun a tú tak ba kumaas na ye, “Akpato̱o̱n ta kyem a ko̱k afudang ishe̱n a? Ke á nye anong, á tà kpas ba cice̱r kaye̱e̱r ribong aꞌa? 40Aner a ta sen bo̱so̱p ike̱ng kun nar aner a tu ku bo̱so̱p'e baꞌ, amma koangan a tú ku bo̱so̱p'e gye̱r tà te kyo̱ndi aner a tú ku bo̱so̱p'e.

41“Akye̱ sak wan ye̱re̱k ikuko̱ i ta se rinyisi afudang wan ne i won agbirik rinyisi rifuan e̱? 42Akye̱ sak wan tá fe̱ be afudang wan ye, ‘Won mi ta ka tun ikuko̱ rinyisi,’ nong wan be rice wan tà kyem i di kugbirik kuya ku ta se rinyisi wan baꞌ e̱? Wan, akardak aner, san ku tun ike̱ng i ta se rinyisi wan nizham ta ra kyem i di gye̱r ne i tun iya i ta se rinyisi afudang wan.

A ren kakon be kutes wu

(aMat 7.16-20; 12.33-35)

43“Kakon katek tes kutes kumaan'e baꞌ, ka kakon kamaan'e tes kutes kutek baꞌ. 44A ren koakye kakon be kutes wu. A se̱ kutes atafo ritin ikiritsan baꞌ, ka a se̱ kutes kakon katek na amaan ritin kakon baꞌ. 45Aner atek fe̱ Rife̱ Ritek kamok kuto̱ro̱ng wu nye kutek, amma amaan aner fe̱ amaan rife̱ kamok kuto̱ro̱ng wu tá nye kumaan'e. Kamok ike̱ng iya i ta se kaye̱e̱r riye̱ ne i wuruk nanu.”

Áfe rino̱k áfa

(aMat 7.24-27)

46“Akye̱ sak yin ti yis yin ye, ‘Agwo̱m, Agwo̱m,’ ka i ra nye yin ike̱ng iya mi tá fe̱ baꞌ e̱? 47Mi tà ka tonong yin kuri kuse aya afe a ta be̱ nunaan, ne a fok rife̱ mi, ne a ninye itomong. 48A se kyo̱ndi aner aya a ta se be rino̱k. A rum karo̱ tsik nong a tin barak ribor'e natoon agudong. Ashi tá fa ta ne a carak kasa'me, a kyem a zuur baꞌ, kamok ribor'e ta se gye̱r. 49Aner aya a ta fok rife̱ mi, sang a tin nye itomong baꞌ, a se kyo̱ndi aner aya a ta no̱k kasa dar ribor ritek, izen iya ashi ta, ne a carak kasa'me, ne kasa'me tà wor ka kpa ne ka yirik cei.”

Currently Selected:

aLuka 6: izrNT

Highlight

Copy