Zang Shonang Yeesɔ 26

Bulu kɔɔ ruu ɓiɓɛ ka tĩng Agiripa

1A Agiripa kɔɔ Bulu kati tɔɔ, “Zang yaa mɔɔ gbalang tɔ, rang yee ɓaaɓɛ ta.”

Bulu wii naa ɓiɓɛ ka lapa, a gaayu ruu ɓiɓɛ kɔɔnang tɔɔ, 2“Kpanti Agiripa, n zirɛ nyaating mɛɛ pu dɔɔli, ka ruu ɓɔɔ, n walɛ gbalang n kɔɔ ruu ka yuu vuu piti ɓɔɔ zang Yahudi ri kɔɔrɔ ka yuu mɛɛ ka tĩng ɓaaɓɛ lɛɛkɔ ɓɛɛ. 3Ti nɔngkɔ, ka ruu ɓɔɔ, mɔɔ nɛɛ yuu ɓaaɓɛ mɔɔ zi gbalang zang Yahudi nɛɛ vuu ɓɔɔ ri tusu tɔ nandon ɓɛɛ. Ka ruu nɔngkɔ, n gaa mɔɔ mɔ́ɔ mã danggn, mɔɔ ɓaa shoo ka ruu mɛɛ waasɛ̃.

4“Naa ɓɔɔ n nwangnɛ tĩng shɔɔnang bɛ̀ɛ́ n doo jasang ka teteng zang ɓuru ɓɔɔ ti ka Urushalima, a à nɛɛ mani ka lɛɛkɔ keɓe, zang Yahudi, ri zi tɔ nandon. 5Naa ri tɔɔ ri kɔɔ ruu tɔ̃ɔ kɔ nwani, ri zi tɔ nɛɛ ɓɔɔ tĩng shɔɔnang n m zang Farisi, vàá zang ɓɔɔ ɓa rɛɛ vaa zang piti ɓɔɔ ka teteng zang ɓuru ka jĩng ɓɔɔ ri shing ka gbalang Laa dũnnang ɓuru gbãng gbãng ɓɛɛ. 6Wee n shii ɓee, zang jɛ̃ɛ m ruu, ka ruu ɓɔɔ, n shing danggn ka nyaa ɓɔɔ Laa a rɛɛ dabang ɓuru doo tɛ̃ɛ tɛ̃ɛ ɓɛɛ. 7Nyaa ɓɔɔ rɛɛ zɔ̃ng ɓuru kopi tu ziti, ri shing danggn nɛɛ Laa a ri, ka ɓɔɔ ri bang Laa nɛɛ laagɛ̃ nɛɛ zĩi piti ɓɛɛ. Kpanti, ka ruu danggn kɔ n shing ɓee kɔ, zang Yahudi ri kɔɔrɔ ruu shi kpang ka yuu mɛɛ. 8Ɓɔɔ nɔɔ zang Yahudi, ka ruu vi danggn shinnang nɛɛ Laa wisi zang paa katɔ nɛɛ saa kpãa nɔɔ nɔngkɔ viya?

9“N rɛ̃̀rɛ̀ m doo nɔngkɔ, n tɔɔ, n palɛ vuu ɓɔɔ n zunung katɔ nandon, n zãa zang nung Yeesɔ yɔɔ Nazara ɓaanang. 10N palɛ nɔngkɔ ka Urushalima. Zang bang bang zang ɓɔɔ ri dɔɔ vuu ka Gãa Laa, ri yaa m gbalang, a n mãlɛ zang Laa ka sãa dɔɔli. Ɓɔɔ zang nyɔkɔ ri vɔrɔ, n kàsɛ̀ nyaa kagn. 11N shingnɛ zang dang ri jĩng ka rɛɛ gãa zɔɔ kpalɛnang diki diki. N pálɛ̀ ri nɔngkɔ nɛɛ tɔ̀ɔ, ri kɔɔ vuu shi kpang ka yuu danggn ɓɔɔ ri shing ka bii Laa ɓɛɛ kati. Yeti mɛɛ lasɛ nɛɛ ri gbãng gbãng, ka ruu nɔngkɔ, n dàarɛ́ ka rɛɛ gari ɓɔɔgn, n daa dang ri jĩng ka nɔngkɔ.

Bulu kɔɔ zang naa ɓɔɔ Laa kɔ̃sɔ wu yeti ɓɛɛ

(ZSY 9:1-19; 22:6-16)

12“N palɛ naa weɓe kɔ, a diki ɓɔɔ kagn zang bang zang ɓɔɔ ri dɔɔ vuu ka Gãa Laa ri yàa m gbalang, a ri a m nyaa shonang ɓarɛ nɛɛ n daa ka Damasiku. 13Kpanti, n daa kana ka gbalang bɛ̀ɛ́ laa kaa dãngdãng yuu, a vuu yakɛ nɔng nɛɛ lapa. Nɔng ɓɔɔ yakɛ, ɓa ɓɔɔ laa yakɛ katɔ. Yakɛ nɔng kiiri ruu nyaa ka teteng nɛɛ zang ɓɔɔ ruu nɛɛ ri ɓɛɛ.

14“Ruu watɛ ka tipi nandon, a n tãa yee kɔɔ m nɛɛ nyaa Yahudi tɔɔ, ‘Shaawulu, Shaawulu, mɔɔ dang m jĩng ka ruu viya? Wee mɔɔ ta doo nɛɛ knti ɓee, kɔng ɓi doo mɔkɔ, naa ɓɔɔ napo nɛɛ ta laa ɓɔɔ zang ɓiɓɛ kpaa wu nɛɛ mani tɔ, kɔng wu ɓɛɛ.’ 15A n hɛ̃ɛyi n tɔɔ, ‘Ɓu mɔkɔ wiya, Kpanti.’ A Kpanti kɔɔyi tɔɔ, ‘Nkɔ Yeesɔ ɓɔɔ mɔɔ dang wu jĩng ɓɛɛ. 16Yupaa mɔɔ shii doo paa. N nwang nyaa ka bii ɓaaɓɛ ka ruu vuu keɓe kɔ. N tɔɔ n zɔ̃́ng mɔɔ, mɔ́ɔ palɛ m shonang. Mɔɔ ti kɔɔrɔ zang vuu ɓɔɔ mɔɔ zirɛ lɛɛkɔ nɛɛ vuu ɓɔɔ n naa tusu mɔɔ ka tĩng ɓɛɛ. 17N ta mɔɔ katɔ nɛɛ naa rɛɛ zang ɓaaɓɛ, a ɓɔɔ ti nɛɛ naa zang ɓɔɔ ri zang Isirela kpang, ɓɔɔ n shong mɔɔ ka bii ɓarɛ ɓɛɛ. 18Mɔ́ɔ pùu ri jĩng, ri yaa nɔng ɓɔɔ tɔ̀ɔ katɔ, ri a ka nɔng ɓɔɔ yakɛ katɔ ɓɛɛ. Ri ti yaa nɔng ɓɔɔ sheetang roo kpanti kagn, ri a ka bii Laa. Tɔ̀ɔ, ka ruu danggn ɓɔɔ ri shing ka bii mɛɛ, Laa wu kɔsɔ ri vuu shi kpang ɓarɛ kati. Wu ti a ri nɔng nwannang jong ka teteng zang ɓɔɔ wu zɔ̃ngkɔ ri katɔ ɓɛɛ.’

Bulu kɔɔ zang ruu shonang ɓɔɔ wu pálɛ̀ ɓɛɛ

19“Ka ruu nɔngkɔ, kpanti Agiripa, n ta nyaa vuu ɓɔɔ n zi nɛɛ lapa ɓɛɛ kpang. 20Ɓɔɔ tĩng shɔɔnang n kɔɔ zang Ruu Laa ka Damasiku, a n ti daa kɔɔ ka Urushalima, a n ti riki tipi Yahudi nandon. N ti kɔɔ rɛɛ zang ɓɔɔ ri zang Isirela kpang jong n tɔɔ ri yaa vuu shi kpang ɓɔɔ ri palɛ ɓɛɛ, ri a ka bii Laa. Ri ti pálɛ́ vuu ɓɔɔ zang zi kagn nɛɛ ri yaa vuu shi kpang ɓɔɔ ri palɛ ɓɛɛ tɔ ɓɛɛ. 21Rɛɛ zang Yahudi ri yi m ka ruu vuu keɓe kɔ, nɛɛ ri nyɔ m vɔrɔ bɛ̀ɛ́ n ka yeti Gãa Laa. 22Làá kɔ yi m naa ka bii sasak, a nɛɛ mani ka lɛɛkɔ kɔ n kɔɔ rɛɛ zang bang nɛɛ wujɛ piti ɓee. N kɔɔ m doo vuu ɓɔɔ rɛɛ zang nyaa shonang Laa nɛɛ Musa ri kɔɔyi nɛɛ naa palɛ ɓɛɛ kɔ. 23Ri kɔɔyi tɔɔ Kirisi naa dang jĩng ditɔ, wukɔ ti naa yupaa shɔɔnang nɛɛ saa, wu kɔɔ rɛɛ zang Isirela nɛɛ zang ɓɔɔ ri zang Isirela kpang ruu nɔng yakɛnang ɓɔɔ a zang suru bii ɓɛɛ.”

24Ɓɔɔ Bulu kɔɔ ruu kana naa weɓe, Fesitu shaa wu nɛɛ varɛ nɛɛ, “Bulu, mɔɔ shoko, láa ɓɔɔ mɔɔ bèe dɔɔli risi mɔɔ yuu kaa tɔ”.

25A Bulu kasɛ Fesitu nyaa tɔɔ, “Zang bang, yuu mɛɛ risi ka takpang, ruu kɔ n kɔɔ ɓee ɓi niizang kɔ nwani. 26Kpanti Agiripa n kɔɔ mɔɔ ruu keɓe nyaa mɛɛ zaa kpang, ka ruu ɓɔɔ, mɔɔ zi vuu keɓe tɔ nandon ɓɛɛ. N ti zi tɔ vuu ɓɔɔ ɓa shoo ɓaaɓɛ kagn gbete ka yeti ruu keɓe kpang. Ka ruu ɓɔɔ, zang wáa katɔ zang palɛ vuu keɓe kpang ɓɛɛ. 27Kpanti Agiripa mɔɔ shing danggn katɔ, ka bii rɛɛ zang nyaa shonang Laa ya? N zi tɔ mɔɔ shing katɔ.”

28Agiripa kɔɔ Bulu tɔɔ, “Ɓɔɔ mɔɔ zi ka jĩng ɓaaɓɛ nwannang kɔ ruu nwang nɛɛ mɔɔ tɔkɔlɔng ɓee, daa naa ɓɔɔ mɔɔ risi m n nwang zang ɓɔɔ dũng Kirisi ɓɛɛ tɔ ya?”

29Bulu kasɛ wu nyaa tɔɔ, “Naa nwannang ɓuru bee katɔ kɔ tɔkɔlɔng, n gaa Laa m, n tɔɔ, mɔɔ nɛɛ zang kɔ ri ɓaa shoo, ri tãa m lɛ̀ɛ́kɔ keɓe, ri nwang naa ɓɔɔ n nwang ɓɛɛ nandon. Wu naa ɓɔɔ zang mã m nɛɛ soo saka keɓe kpang.”

30A kpanti, nɛɛ Gɔmna, nɛɛ Banike, nɛɛ zang ɓɔɔ ri nwalɛ nɛɛ ri ɓɛɛ, ri seepaa. 31Ri daa tɔ, a ri kɔɔ zɔɔ tɔɔ, “Yɔɔ keɓe palɛ vuu ɓɔɔ kagn ɓɔɔ daa naa ɓɔɔ zang nyɔ wu vɔrɔ, kɔ zang mã wu ka sãa ɓɛɛ kpang.” 32A Agiripa kɔɔ Fesitu tɔɔ, “Naa yɔɔ keɓe nɛɛ kɔɔ kpang nɛɛ zang daa jɛ̃ɛ wu ruu ka tĩng Kayisa kpang, ruu nɛɛ yaa wu naa katɔ.”

Currently Selected:

Zang Shonang Yeesɔ 26: mzmNT

Highlight

Copy