Zang Shonang Yeesɔ 27

Bulu vang Laana daa kaa Rooma

1Zang naa kɔɔ ruu nɛɛ ruu daa tipi Italiya nɛɛ laana, ka ruu nɔngkɔ, zang a Yuliya zang bang sɔɔja Rooma, rɛɛ Bulu nɛɛ zang ɓɔɔ zang mã ri ka sãa ɓɛɛ. Yuliya ɓi ka teteng rɛɛ sɔɔja ɓɔɔ zang ɓaa ri nɛɛ “Sɔɔja Kayisa Agɔsitu ɓɛɛ.” 2Ruu vang laana ɓɔɔ a nɛɛ gari Adaramitiya ɓɔɔ nɛɛ ri daa ka rɛɛ gari ɓɔɔ ka nyaa waapo tipi Asiya ɓɛɛ. A ruu yupaa daanang kati Arisitaku yɔɔ gari Tesalonika ɓɔɔ ka tipi Makidoniya ɓɛɛ daa nɛɛ ruu ning. 3Ɓɔɔ nɔng naa gãntɛ, ruu shɛ̃ɛ gari Sidong. Yuliya palɛ Bulu tɔ̃ɔ. Yaa wu nɛɛ wu daa jee rɛɛ ɓeesang nyaa nɛɛ tɔɔ, ri a wu vuu ɓɔɔ wu kasɛ ɓɛɛ. 4Ruu yaa gari Sidong. Jasung a nɛɛ bii ɓuru kɔ jong, ka ruu nɔngkɔ, ruu bã nɛɛ tipi Kuburu dang gbete ɓɔɔ jasung kagn kpang ɓɛɛ. 5Ruu tɛɛ ka yuu waapo naabm nɛɛ tipi Silisiya nɛɛ ɓɔɔ tipi Pamfiliya, a ruu a kaa gari Mira ɓɔɔ ka tipi Lisiya ɓɛɛ. 6Yuliya yɔɔ sɔɔja ĩi laana gari Alezandiriya ka nihn ɓɔɔ daa ka tipi Italiya ɓɛɛ, a tɛ̃ɛ ruu kagn.

7Laana daa lɛɛm lɛɛm a diki bee ruu kati, ka ruu ɓɔɔ, jasung kpãa ruu nyaa dɔɔli ɓɛɛ. A ruu naa a ka nɔng ɓɔɔ nɛɛ gari Kinida naabm. Jasung zãa ruu daanang, ka ruu nɔngkɔ, ruu bã tipi Karita dang gbete ɓɔɔ jasung kagn kpang ɓɔɔ nɛɛ gari Salamone naabm ɓɛɛ. 8Ruu dang jĩng ka nɔng ɓɔɔ ruu sɔɔ nyaa gãnggãng naabm ɓɛɛ, a ruu naa shɛ̃ɛ nɔng ɓɔɔ zang ɓaa nɛɛ “Nɔng nyaa waapo ɓɔɔ tɔ̃ɔ ɓɛɛ nɛɛ mani.” Nɔng keɓe ɓi nɛɛ Lasiya naabm.

9Ruu nwang ka nɔngkɔ diki bee katɔ. Ka ruu ɓɔɔ, naa ruu tɔɔ ruu daa nɛɛ laana, nwang naa ɓɔɔ ruu mãlɛ yuu ɓuru katɔ ɓɛɛ. A laa ɓɔɔ zang daa zanti kagn ti ɓa tɔ. A Bulu kɔɔ ri ruu keɓe tɔɔ, 10“Rɛɛ masang, n zi tɔ daanang ɓuru keɓe vuu ɓɔɔ daa palɛ ruu katɔ ka gbalang, ruu ti vang vuu dɔɔli. Wu vuu ɓɔɔ ka naa ɓuru nɛɛ laana keɓe kɔ lasɛ shɛ̃ɛning kpang, ruu loo rɛɛ zang ɓɔɔ katɔ ka teteng ɓuru.” 11Yɔɔ sɔɔja raa shoo ɓi ka vuu ɓɔɔ Bulu kɔɔ kpang. Ɓaa shoo ɓi ka rɛɛ zang ɓɔɔ ri zaa laana nɛɛ yɔɔ ɓɔɔ laana ɓi ɓɔɔ ɓiɓɛ kɔ ɓɛɛ. 12Nɔng ɓɔɔ laana ri shiiri kagn kaɓa, ka laa pũngku shi kpang, a zang dɔɔli ri kɔɔyi nɛɛ ri yáa nɔng bii katɔ. Ri daa ka gari Fonisi ri daa nwang ka nɔngkɔ. Ka laa pũngku, Fonisi ɓi doo nɔng ɓɔɔ laana ri shiiri kagn ka tipi Karita ɓɛɛ kɔ. Ka nɔng keɓe kɔ zang yi gbalang daanang nɔng ɓɔɔ ka paa nɔng ɓɔɔ laa nwang nyaa kagn nɛɛ nɔng ka dii nɔng ɓɔɔ laa hãa nyaa kagn.

Jasung yupaa ka waapo

13Jasung gaayu rãanang nɛɛ dii lɛɛm lɛɛm, a rɛɛ zang laana zirɛ mɔɔ kɔɔ nɛɛ ri wàlɛ̀ vuu ɓɔɔ ri kasɛ ɓɛɛ. Ka ruu nɔngkɔ, ri zɔ̃ng laa ɓɔɔ ri mã laana kagn ɓɛɛ, a ri sɔɔ nɛɛ laana nɛɛ nyaa gãnggãng waapo gari Karita naabm gbãng gbãng. 14Knti ɓarɛ bee kpang, a jasung bang ɓɔɔ zang ɓaa nɛɛ Yurokilido gaayu ranang nɛɛ Karita. 15Jasung bìí naa waa laana ɓɔɔ ruu kagn ɓɛɛ, a zang ɓɔɔ ri zaa laana ri zunung ɓɔɔ ri raa laana jĩng ri daa nɛɛ bii jasung bìí takpang. Ka ruu nɔngkɔ, ruu yaa laana bìí kaa gbã̀ágbãa, a jasung dɔ̃rɛ daa kaa nɛɛ mani. 16Dàa sɔɔ nɛɛ ruu nɛɛ gari Kawuda ɓɔɔ waapo kiiri nyaa teteng ɓɛɛ naabm, ruu dang jĩng ka gbongkarɛ ka nɔng ɓɔɔ ruu ta jaa tonsi ɓuru nɛɛ naa jasung. 17Ri gɔ̃ jaa tonsi ri a tɔ nɛɛ mani ka yeti laana a ri kãngtɛ soo ka tɔɔsung laana. Ri kaa vɔrɔ nɛɛ jasung daa nɛɛ ri ka seseele ɓɔɔ zang ɓaa nɛɛ Sariti ɓɔɔ ka nyaa waapo tipi Libiya naabm ɓɛɛ. Ka ruu nɔngkɔ, ri kãlɛ sɛ̃ɛ fɔ̃ɔrɔ ɓɔɔ ri mã ka lapa nɛɛ jasung wu gɔ̃ ri nɛɛ mani ɓɛɛ. Jasung dɔ̃ ri kaa waati. 18Jasung bang ɓɔɔ ra ɓɛɛ shii kpang, ka ruu nɔngkɔ, ɓɔɔ nɔng gãntɛ ri gaayu vuu ɓɔɔ ka yeti laana vannang ka mii. 19Ka lee ɓɔɔ diki daa taati, ri vang vuu ɓɔɔ zang palɛ shonang nɛɛ mani nɛɛ naa ɓarɛ ka mii. 20Diki bee tɔ, ruu zi làa kɔ rɛɛ sang kpang. Jasung ti ra ɓi doo naa gbãng gbãng. Ruu rɛ̃rɛ ɓuru takpang, nɛɛ ruu nwáng ditɔ ningkãari tɔkn kpang.

21Diki bee tɔ tɔkɔlɔng ri shaa vuu shaanang ka nyaa kpang, a Bulu shii ka tĩng ɓarɛ kɔɔ ri tɔɔ, “Rɛɛ masang naa nɔɔ nɛɛ ɓaa shoo ka nyaa mɛɛ, nɔɔ nɛɛ yupaa nɛɛ gari Karita kpang. Vuu kɔ ruu làsɛ́ a ruu looro ɓee, ruu nɛɛ palɛ kpang. 22Kãntang keɓe n gaa nɔɔ, nɔɔ mã danggn kagn, zang ɓɔɔ lòó yuu ɓiɓɛ kagn ka teteng manɛ gbete kpang. Nɔɔ lòó laana kɔ shɛ̃ɛning. 23Ka ruu ɓɔɔ, ka ɓɔɔrɔ nɛɛ zĩi, zang nyaa shonang Laa ɓɔɔ ka lapa nɛɛ a ka bii mɛɛ. Laa ɓɔɔ n zang ɓiɓɛ, a n ti bang wu ɓɛɛ. 24A kɔɔ m tɔɔ, ‘Bulu, mɔɔ kaa vɔrɔ kpang, mɔɔ daa shii ditɔ ka tĩng Kayisa. Laa ɓɔɔ palɛ ɓi tɔ̃ɔ ɓɛɛ, ti ta yuu rɛɛ zang ɓɔɔ mɔɔ daa nɛɛ ri ka yeti laana nandon ri vɔ kpang.’ 25Ka ruu nɔngkɔ, rɛɛ masang, nɔɔ mã danggn kagn. N shing danggn tɔ ka bii Laa, vuu kɔ zang kɔɔ m ɓee, naa nwang ditɔ nɔngkɔ”.

26Jasung dɔ̃ ruu, daa nɛɛ ruu ka nyaa gãnggãng, nɔng ɓɔɔ waapo kiiri ka teteng ɓɛɛ, doo nɛɛ mani.

27Ka lee ɓɔɔ diki ɓuru daa kaa kopi tu dɛ̃ɛti, jasung dɔ̃ ruu ka yuu waapo Adariya. Nɛɛ gãmbang zĩi zang ɓɔɔ ri zaa laana ri zi ɓarɛ nɛɛ naa ruu a tɔ ka tipi naabm. 28Ka ruu nɔngkɔ, ri gãsɛ naa ɓɔɔ mii bee ka tipi dii ɓɛɛ. Ri zirɛ nɛɛ, mii bee ɓi naa ɓɔɔ zang naa doo laa maani tu bmati ɓɛɛ. Ɓɔɔ ruu daa ka tĩng tɔkɔlɔng ri gãsɛ tɔkn, ɓi kaa laa dɛ̃ɛti tu kopi. 29Ri kaa vɔrɔ nɛɛ laana ɓuru daa kpaa rɛɛ tari, ka ruu nɔngkɔ, ri yàarɛ̀ vuu ɓɔɔ yi tonsi tɔ̀ɔ laana wu shii ɓɛɛ naa dɛ̃ɛti ka yeti mii. Ri yaarɛ naa nɛɛ knti laana kɔ jong. Ri wàa nɔng gãntɛnang katɔ. 30Zang ɓɔɔ ri zaa laana ri kãa gbalang nɛɛ ri yuu kaa tɔ, ri yaa laana, ka ruu nɔngkɔ, ri yaa jaa tonsi naa ka mii. Ri pálɛ́ kaa naa ri yaarɛ vuu ɓɔɔ yi laana tɔɔ wu shiiyi ɓɛɛ naa, nɛɛ tĩng ɓiɓɛ. 31A Bulu kɔɔ zang bang sɔɔja nɛɛ rɛɛ sɔɔja ɓɔɔ ri nɛɛ wu ɓɛɛ tɔɔ, “Zang ɓɔɔ ri zaa laana keɓe ri nɛɛ nwàng ka yeti laana kpang, nɔɔ wɔ kpang.” 32A sɔɔja ri dɔ́lɔ́ soo ɓɔɔ zang yi jaa tonsi nɛɛ mani ɓɛɛ, a jaa tonsi daa ka mii.

33Kaa nɛɛ yuu gãndi Bulu bakɛ ri nandon, nɛɛ ri shaa vuu shaanang. Kɔɔ ri tɔɔ, “Diki ɓɔɔ nɔɔ gãng jĩng nɛɛ nɔɔ zi vuu ɓɔɔ naa palɛ daa lee kopi tu dɛ̃ɛti nɔɔ ti shaa vuu ka nyaa kpang. 34Ka ruu nɔngkɔ, n gaa nɔɔ, nɔɔ shaa vuu shaanang. Nɔɔ nɛɛ shaa vuu shaanang kpang nɔɔ nwàng ningkãari kpang. Zang ɓɔɔ loo yuu ɓiɓɛ ɓi kagn teteng manɛ gbete kpang.” 35Kɔɔ tɔ nɔngkɔ, a tuu borodi, zãa Laa ka tĩng ɓarɛ nandon. A shalɛ borodi, a gaayu shaanang kati. 36Ri mã danggn a zang ɓu shaa kaa jong. 37Ɓɔɔ ruu ka yeti laana nandon, ruu laa maani dakn ziti, tu laa taati tu kopi, tu mangbete. 38Ri nandon ri shaa vuu shaanang tɔ, daa ri tɔ, a ri vãlɛ jĩng vuu ɓɔɔ zang ɓaa nɛɛ alakama ɓɔɔ ka yeti laana ɓɛɛ ka mii, nɛɛ tɔɔ laana wu kpiti kaa takpang.

Laana sãyi

39Nɔng gãntɛ tɔ, a ri zi tipi kaɓa nung kaa takpang. Ri zi naa waapo ɓɔɔ daa ka biling seseele kagn ka nyaa ɓiɓɛ ɓɛɛ. A ri kasɛ nɛɛ ri nɛɛ zunung katɔ, ri raa laana jĩng wu daa shii ka yuu seseele kaɓa kɔ. 40Ri dɔ́lɔ́ vuu ɓɔɔ yi laana, tɔ̀ɔ, laana wu shii ɓɛɛ, a ri yaarɛ naa. Vuu bii ri ɔ̃ɔrɔ ka mii. Ri ti kãlɛ rɛɛ soo ɓɔɔ zang mãlɛ vuu ɓɔɔ zang zaa laana nɛɛ mani ɓɛɛ. Ri tuu sɛ̃ɛ fɔ̃ɔrɔ ɓɔɔ zang mã ka tĩng laana ka lapa nɛɛ jasung wu gɔ̃ laana kati. Ri raa jĩng ri daa kaa nɛɛ nyaa gãnggãng bìí. 41Laana vang ka yuu seseele a shiiyi. Ting laana bii tìi ka seseele, daa takpang. Jasung ɓɔɔ rãa ɓɛɛ, ti sãlɛ knti laana ɓi kana.

42Sɔɔja ri tɔ̀ng zɔɔ nɛɛ ri nyɔkɔ zang ɓɔɔ zang mãlɛ ka sãa, ɓɔɔ ri ka yeti laana ɓɛɛ vɔrɔ, ka ruu ɓɔɔ, ri nɛɛ zaarɛ ka mii, ri waa zaa mii, ri daa nyaa gãnggãng, ri yuku ɓɛɛ. 43Zang bang sɔɔja kasɛ nɛɛ wu ta yuu Bulu, ka ruu nɔngkɔ, zãa ri nɛɛ ri nyɔkɔ zang bìí vɔrɔ kpang. Kɔɔ ɓi katɔ kɔ jong nɛɛ zang ɓɔɔ ri nɛɛ zunung zaa mii waanang tɔ, rikɔ ri gaayu shɔɔnang, ri zaa ka mii, ri waa zaa mii, ri daa nyaa gãnggãng. 44Zang ɓɔɔ ri yaa knti ri yiki naa ɓarɛ kaa laa yeenang, a zang ɓɔɔ ri yiki laa ɓɔɔ sãkɛ nɛɛ bii laana ri nwáng nyaa gãnggãng ɓarɛ kati ka knti ɓarɛ. Wee naa ɓɔɔ ruu nwang nyaa gãnggãng nandon, vuu ɓɔɔ lee ruu naa bii kpang ɓɛɛ kɔ.

Currently Selected:

Zang Shonang Yeesɔ 27: mzmNT

Highlight

Copy